Keketsha yɛdikɔ yayɛ

“Dui di’ohomba efula diakakimanyiya anɔshi wa mfɔka efula dia vɔ ntshika nnɔ mfɔka ele vɔ wakakeketsha yɛdikɔ yawɔ.”​—Lo ndjela dibuku diele l’ɔtɛ a dui: “Tshika nnɔ mfɔka!” lo Angɛlɛ.

Lo tshena pe, naka wɛ nangaka ntshika nnɔ mfɔka, kete ntondotondo wɛ pombaka nkeketsha yɛdikɔ yayɛ. Ngande wakokayɛ nkeketsha yɛdikɔ yayɛ? Ntondotondo, nkana yimba lo wahɔ wayoyokondja naka wɛ ntshika nnɔ mfɔka.

Wɛ ayolama falanga yayɛ. Nɔɔka pakɛ ka mfɔka lo lushi mbeyaka kɔlɛ falanga efula l’ɔnɔnyi. “Haleye mɛtɛ falanga ngana shikaa yakamashisha l’ɔnwɛlɔ wa mfɔka.”​—Gyanu, Népal.

Wɛ ayonga l’ɔngɛnɔngɛnɔ w’efula lo lɔsɛnɔ. “Lɔsɛnɔ lami lakatatɛ etena kakamatshike nnɔ mfɔka, ndo lɔ lekɔ lo taleke monga dimɛna efula.” (Regina, Afrique du Sud) Etena katshika anto nnɔ mfɔka, dikoka diawɔ dia ndɛta ndo dia mboka solo mfulaka, ndo vɔ mongaka la wolo lushi la lushi ndo la ɛnamelo ka dimɛna.

Wɛ ayonga la yoonge ya dimɛna. “Ntshika nnɔ mfɔka mongaka la wahɔ w’efula ndo wɛnama mbala kakɔ ɔtɔi le apami la wamato wele l’ɛnɔnyi wotshikitanyi.”​—Centre américaine d’épidémiologie.

Wɛ ayoyaɛkɛ otema. “Lakatshike nnɔ mfɔka nɛ dia dimi konangaka dia mfɔka monga nkumɛmi. Dimi lakalangaka monga owandji wa demba diami.”​—Henning, Danemark.

Nkumbo ndo angɛnyi ayɛ wayokondja wahɔ. “Nnɔ mfɔka . . . ndanyaka yoonge ya wanɛ wele suke la yɛ. . . . Eyangelo mɛnyaka dia ɔnwɛlɔ wa mfɔka ndjakaka miliyɔ y’anto ɔnɔnyi tshɛ la kansɛrɛ ka lolemi ndo hemɔ ka l’otema.”​—Société américaine du cancer

Wɛ ayɔngɛnyangɛnya Otungi ayɛ. “Analengo wa ngandji, nyɛsɔ toyaɛdia omalo mindo tshɛ ya demba.” (2 Kɔrɛtɔ 7:1) “Nambola alemba anyu oko olambo . . . w’ekila ndo wetawɔma le Nzambi.”​—Rɔmɔ 12:​1.

“Kam’akamashihodia ɔnɛ Nzambi tonaka diangɔ dialanya demba, lakɔshi yɛdikɔ ya ntshika nnɔ mfɔka.”​—Sylvia, Espagne.

Koko, naka yɛdikɔ yayɛ hakokimanyiya dia ntondoya. Wɛ koka nyanga ekimanyelo k’ase nkumbo ndo k’angɛnyi. Kakɔna kakokawɔ nsala?