Yanga ekimanyielo
Yanga ekimanyielo
“Onto ɔmɔtshi mbeyaka nɛndja onto lele ndamɛ, koko anto 2 wele kaamɛ kokaka mboleka wolo.”—Ondaki 4:12.
ETENA keso la osukɔ w’anto akina, sho mongaka l’akoka woleki tshɛ wa nɛndja otunyi, oyadi onto akɔna eende kana ɛngɔ kakɔna ketɔ. Laasɔ naka wɛ kombolaka nɛndja ɔnwɛlɔ wa mfɔka, kete ayonga dui dia yimba naka wɛ nyanga ekimanyielo k’ase nkumbo kayɛ ndo k’angɛnyi ayɛ, kana k’onto tshɛ layonga suke dia kosukɛ l’otema ɔtɔi ndo la solo dia lotutsha.
Wɛ koka nyanga nto ekimanyielo le wanɛ wakatondoya dia ntshika tshelo shɔ vɔamɛ, nɛ dia vɔ wayoyadja lo dihole diayɛ ndo wayokokimanyiya. Okristo ɔmɔtshi wa la Danemark welɛwɔ Torben mbutaka ɔnɛ: “Osukɔ w’anto akina waki ohomba efula le mi.” Pami kɛmɔtshi kelɛwɔ Abraham ka la Inde, akafunde ate: “Ngandji ka mɛtɛ kakamɛnya ase nkumbo kami ndo k’asekami Akristo kakakimanyiya dia dimi ntshika nnɔ mfɔka.” Koko lo ntena dimɔtshi, kaanga osukɔ w’ase nkumbo ndow’ angɛnyi koka monga la elelo.
Pami kɛmɔtshi kelɛwɔ Bhagwandas mbutaka ɔnɛ: “Lakanɔ mfɔka l’edja k’ɛnɔnyi 27, koko oma l’ɔkɔngɔ wa dimi mbeka kɛnɛ kata Bible lo kɛnɛ kendana la mbekelo ya mindo, lakɔshi yɛdikɔ ya ntshika. Lakahembe dia ntshika nnɔ mfɔka. Lakatshikitanya anto wakekesanɛka la bmi. Lakayange alako. Koko dimi kotondoya. L’ekomelo, l’otsho ɔmɔtshi lakadihɔlɛ Jehowa Nzambi otema lo dɔmbɛlɔ. Lakɔlɔmbɛ dia nde kimanyiyami dia dimi ntshika nnɔ mfɔka. Oma laasɔ lakayotondoyaka!”
Dikambo dikina di’ohomba diahombayɛ nsala ele ndjalɔngɔsɔla dia ekakatanu wayohomana layɛ. Ekakatanu akɔna? Sawo diayela diayotosha elembetshiyelo.
[Kiombo]
ONDE WƐ POMBAKA NKAMBA LA EKANGA?
Ekanga wakimanyiya di’anto ntshika nnɔ mfɔka, ɛnyɛlɔ oko (patch à la nicotine) ekɔ okanga ɔmɔtshi walɔshana la mfɔka wakondjiyɛ wanɛ wasala okanga akɔ miliyara ya dɔlara. La ntondo ka nyanga ekanga washawɔ wanɛ walanga ntshika mfɔka, sɛndingola ambola wayela anɛ:
Ɛlɔlɔ akɔna wele la ekanga? Toho t’esakelo efula kimanyiyaka anto dia nkila mfɔka dia ekanga kitshakitshaka mposa ka mfɔka. Koko anto mbutaka dia l’edjedja ka wonya ekanga hawoyokangaka nto l’etombelo w’amɛna.
Naa waale wele l’ekanga? Ekanga ɛmɔtshi mongaka la etombelo wa kɔlɔ, mbishaka mposa ka ntohɔ, ɔkɔmwɛlɔ, tokanyi ta ndjadaka ndo awui akina. Kɛnɛ kahombayɛ nama lo yimba ele ɔnɛ esakelo wakambawɔ la nicotine mbotaka nto nicotine lo demba ndo mongaka la waale ekina. Lo mɛtɛ onto lakamba la ekanga ayoyonga ɔhɔmbɔ w’ekanga.
Naa toho tokina ta nkila mfɔka? Pursa 88 ya wanɛ wakanɔka mfɔka ntondo wakate dia vɔ wakakile mfɔka lo kitshika mbala kakɔ ɔtɔi, aha la mbɔsa ekanga.