Shikikɛ akambo wahombayɛ mbetsha lo dihole dia ntondo. Bible ndakaka ɔnɛ: “Nshikikɛ akambo woleki ohomba.” (Filipɛ 1:10) Sala listɛ l’akambo w’ohomba kana wa wanyandja wahombayɛ nsala. Koko tohɛke di’awui wele ohomba, ɛnyɛlɔ oko ntshɔ tosomba mbo ya ndɛ, bu dui dia wanyandja. Ndo lo wedi okina, dui diakokayɛ mbɔsa oko dia wanyandja, ɛnyɛlɔ aha mpandja etatelo k’emisiɔ walekayɛ nangaka, mbeyaka monga ko bu dui di’ohomba. *

Nkanyiya la ntondo. Sho mbadiaka l’Ondaki 10:10 (Parole de Vie) mbutaka ɔnɛ: “Naka shɔ hayohembola esongo, ko onto hayidje pɛmɔ, kete nde pombaka ndodja wolo ande wa demba l’ahende dia nkɔta la shɔka yakɔ. Lomba kimanyiyaka onto dia ntondoya akambo.” Naa wetshelo? Dja shɔka yayɛ pɛmɔ, mbuta ate nkongɛ akambo la ntondo diaha wɛ ndjoshisha wenya ayɛ tshanana. Taloya, kana ntola elimu wele bu ohomba, wele mbala efula kɔlɛka wenya ndo wolo. Naka wɛ amboshidiya olimu ɔmɔtshi la ntondo ka datɛ, lande na kahayatatɛ l’olimu wakayakongɛ dia ndjosala yema la ntondo? Lo kanyiyaka la ntondo, wɛ kondjaka etombelo w’amɛna, l’ɛnyɛlɔ k’otshudi wadja shɔka yande pɛmɔ.

Etɛ lɔsɛnɔ layɛ ɔsɛlɛngɛ. Tonaka awui amɔtshi wele bu ohomba ndo wakɔsɛ wenya. Elimu ndo wa randevu wamboleka mbeyaka kosha ɔtɛ ba ba tshanana ndo kɔlɛndja wɔɔngɔ.

Otaloyelo w’akambo ndo monga onto laheye mbɔsa yɛdikɔ. Bible mbutaka ɔnɛ: “Onto lenda lɔpɛpɛ hatonɛ woho, ndo onto lenda wange hatona.” (Ondaki 11:4) Naa wetshelo? Onto lataloya akambo shishaka wenya ndo kɛnɛ kohondokondja. Okambi wa dikambɔ lakonga dia paka awui tshɛ waya dimɛna, mbeyaka ndjonga ko honɛki pondjo ndo laasɔ nde hatona pondjo. Woho akɔ waamɛ mbele, sho mbeyaka ndjonga ko hatɔshi yɛdikɔ l’ɔtɛ w’awui wa lo lɔsɛnɔ waheyama dia kana wayosalema. Naka sho mbeyaka nkonga ɔnɛ paka lambeya kiambokambo tshɛ la ntondo ka dimi mbɔsa yɛdikɔ. Lo mɛtɛ, ekɔ ohomba nyanga dia mbeya kiambokambo tshɛ ndo dia nkanyiya dimɛna la ntondo ka mbɔsa yɛdikɔ tshɛ y’ohomba. Tokedi 14:15 (Bible de Semeur) mbutaka ɔnɛ: “Onto lakanyiya tshɔka otsha la ntondo la yewo.” Koko akambo weta mɛnyaka dia etena kɔsa onto yɛdikɔ, mongaka awui amɔtshi wende bu l’eshikikelo lɔkɔ.​—Ondaki 11:6.

Nyanga di’akambo salema aha l’ɛkɔmɔ. Jakɔba 3:17 mbutaka ɔnɛ:  “Koko lomba l’oma la diko [kana laki Nzambi] lekɔ . . . ekanelo k’ɔlɔlɔ.” Lo mɛtɛ, bu kɔlɔ nyanga di’akambo salema lo yoho ya dimɛna efula. Koko mbala mɔtshi, sho toyangaka di’akambo salema lo yoho ya kokele, ko dui sɔ ndjokonyaka dia sho nkita tatala ndo ndjotoshaka lonyangu. Ɛnyɛlɔ, onto leka ɔtɛkɛta w’angɛndangɛnda, pombaka mbetawɔ dia nsala wandja, eya dia dui sɔ diayowokimanyiya dia mpama. Oko onto layanga di’akambo salema lo yoho ya kokele tokangaka la wɔma waha nsala munga, ndo dui sɔ kitshakitsha ohamelo ande. Tokedi 11:2 mbutaka ɔnɛ: “Lomba lekɔ kaamɛ la akanga w’okitshakitsha.” Ndo nto, wanɛ wele l’okitshakitsha ndo weya elelo awɔ hawoyɔshi la nɛmɔ diamboleka ndo vɔ koka ndjaɔla vɔamɛ.

Onga la wɛdimo lam’asa olimu la ɔkɔkwɛlɔ wa demba. Bible mbutaka ɔnɛ: “Ndeka dimɛna monga la yema ya diomuyelo tshitshɛ lo dihole dia monga la olimu efula wa wolo ko tatshanyaka lɔpɛpɛ.” (Ondaki 4:6, nɔtɛ) Wanɛ wayasha ɔtɛkɛta l’olimu ndjahondjaka mbala difuto diawɔ di’oma lo “awambo ahende w’olimu” awɔ. Vɔ ndjongaka ko waya bu la wonya ndo wolo wa ngɛnangɛna la kɛnɛ k’oma l’olimu awɔ wa wolo. Koko akanga wa nɛndɛ lo wedi awɔ, ndjashaka “awambo ahende” wa diomuyelo ndo shishaka wenya awɔ w’ohomba. Bible tɔlɔmbaka dia monga la wɛdimo: nkamba olimu wa wolo ndo ngɛnangɛna la kɛnɛ k’oma l’olimu akɔ. “Ɔsɔ ekɔ woshasha wa Nzambi.”​—Ondaki 5:19.

Lalaka efula. Ofundji ɔmɔtshi akafunde ate: “Dimi layetama ndo layolala djɔ lo ki.” (Osambo 4:8) Lo mbuta mɛtɛ, pombaka ndalaka wenya enanɛi l’otsho dia wolo ande wa lo demba, wa lo yimba ndo wa diewo nyomokalola. Djɔ kimanyiyaka onto dia nkamba la wenya ande dimɛna, nɛ dia onto lele ndalaka dimɛna ndjashaka dimɛna lo dikambo ndo kakatshiyaka akambo lo wɔɔngɔ, ndo dui sɔ mbokimanyiaka dia mbaka awui dimɛna. Koko, onto lahalale djɔ dimɛna bu l’akoka wa mbeka dimɛna, ndo salaka aksida ndo munga efula ndo nde mongaka ɛkɛlɛkɛlɛ.

Yadjɛ eyango wakokayɛ nkotsha. “Ndeka dimɛna ngɛnangɛna ka kɛnɛ kɛna washo lo dihole dia nkombo kɛnɛ, nkombola kɛnɛ.” (Ondaki 6:9, Bible d’Osty). Naa wetshelo? Onto lakanyiya dimɛna hetawɔ dia nsaki yande mbahemɛ lɔsɛnɔ lande, djekoleko nsaki yahandakoke nkotsha. Ɛnyɛlɔ, nde hakesama la waa piblisite ya lokeso kana lɛnɛ awotɛwɔ ɔnɛ tayokɔsɔndja falanga aha l’okakanu. Nde mbekaka dia ngɛnangɛna la kɛnɛ kokande nkondja, mbuta ate “kɛnɛ kɛna washo ande.”

Sɛdingola atɔndɔ wayelayɛ: Atɔndɔ wayelayɛ wayokokimanyiya dia nshikikɛ kɛnɛ kele ɔlɔlɔ, kɛnɛ kele ohomba ndo kakokayɛ ndjasha lɔkɔ. Otondongaka lɔsɛnɔ layɛ lekɔ oko lohito, tshinde atɔndɔ mbotɔlɔmbɔla lohito lakɔ. Atɔndɔ w’amɛna kokimanyiyaka dia mbeya akambo wahombayɛ mbetsha lo dihole dia ntondo ndo dia nkamba dimɛna la wenya ayɛ wonya la wonya ndo lushi la lushi. Lende akokayɛ ntana weho w’atɔndɔ asɔ? Anto efual mbɛlɛka otsha lo Bible, nɛ dia mandolaka efula lomba lele la Bible.​—Tokedi 2:6, 7.

Ngandji konge tɔndɔ dioleki ohomba le yɛ. Kɔlɔsayi 3:14 mbutaka dia ngandji “kele dimama dia kokele.” Onto hakoke monga l’ɔngɛnɔngɛnɔ wa mɛtɛ ndo lotui tshitshi naka ngandji bu, djekoleko lo nkumbo. Wanɛ wahadje yimba lo dikambo dia mɛtɛ sɔ, l’ɔtɛ wele ondo vɔ mbetshaka ɔngɔnyi ndo olimu awɔ lo dihole dia ntondo, weye dia mpokoso mbayowakomɛ. Aha tshanana mbɛnya Bible dia ngandji mbele tɔndɔ dioleki ohomba ndo mbatɛkɛtatɔ mbala nkama lo dikambo dia ngandji!​—1 Kɔrɛtɔ 13:1-3 ; 1 Joani 4:8.

Yatshungwɛka etena dia mbeka akambo wendana la Nzambi. Geoff aki la wadi lakalole tɔ la ngandji, l’ana ahende waki l’ɔngɛnɔngɛnɔ, angɛnyi w’eshika ndo olimu waki la difuto dia dimɛna: nde aki secouriste. Koko l’olimu ande, nde akɛnanaka mbala efula l’anto waki la hemɔ kana edo. Nde akayambolaka ɔnɛ: “Onde lɔsɛnɔ layokomɛ paka nganɛ oto?” Lushi lɔmɔtshi, nde akadia okanda ɔmɔtshi w’Ɛmɛnyi wa Jehowa walembetshiya awui wa lo Bible ndo nde akakondja ekadimwelo w’eshika.

Geoff akatɛ wadɛnde l’anande awui wakandekaka ndo awui akɔ wakaangɛnyangɛnya. Nkumbo k’otondo kakatatɛ mbeka Bible. Wekelo ɔsɔ wakalowanya nsɛnɔ yawɔ ndo akaakakimanyiya dia vɔ mbeya nkamba la wenya awɔ dimɛna. Vɔ wambowasha nto elongamelo ka diambo ka lɔsɛnɔ la pondjo laha l’asui ndo lele mɛtɛ l’oyango. (Ɛnyɛlɔ 21:3, 4)

Ɔkɔndɔ waki Geoff mɛnyaka mɛtɛ k’ɛtɛkɛta wa Yeso Kristo wata ɔnɛ: “Ɔngɛnɔngɛnɔ le wanɛ weya ehomba awɔ wa lo nyuma,” mbuta ate ohomba awɔ wa mbeya Nzambi. (Mateo 5:3) Onde wɛ ekɔ suke dia ndjaombɛka etena dia kotshaka ohomba ɔsɔ? Eya dia ndooko yoho yoleki dimɛna ya nkamba la lushi tshɛ lakondjayɛ, ndo lɔsɛnɔ layɛ l’otondo naka aha yoho yɛnyiso ndjo.