KƐNƐ KATA ANTO

Anto amɔtshi mbɔsaka dia tɔkɛnyɔ ta falanga bu kɔlɔ, djekoleko etena ketawɔmatɔ oma le lɛɛta. Ɛnyelɔ, mandji mɔtshi sukɛka tɔkɛnyɔ takɔ la falanga yawɔ hita, ndo vɔ kambaka la falanga yakondjawɔ oma lɔkɔ dia nkimanyiya anto tshɛ.

KƐNƐ KATA BIBLE

Bible hatɛkɛta dikambo dia tɔkɛnyɔ ta falanga lo yoho ya hwe hwe, koko tɔ mbishaka atɔndɔ efula wɛnya kanyi yaki Nzambi lo dikambo dia tɔkɛnyɔ ta falanga.

Kɛnɛ kakonya anto dia nkɛnya tɔkɛnyɔ ta falanga ele vɔ nangaka nkondja falanga y’anto akina. Kɛsɔ hɔtɔnɛ la kɛnɛ katɔhɛmɔla Bible ɔnɛ: ‘‘Nyewɔ weho tshɛ wa lokaki.’’ (Luka 12:25) Tɔkɛnyɔ ta falanga ndjaaka oma lo lokaki. Akanga wa tɔkɛnyɔ ta falanga mɛnyaka anto dia wayokondja falanga efula naka vɔ tikɛnya, nɛ dia vɔ mbeyaka dia onto tshɛ lakɛnya kɛnyɔ ya falanga nyangaka dia nkondja falanga efula. Lo dihole dia nkokɛ anto oma lo lokaki, tɔkɛnyɔ ta falanga monɛka l’etema awɔ nsaki ka nkondja falanga yewɔ hawotombi dungu.

Tɔkɛnyɔ ta falanga ndjaaka oma lo eyango wa lokaki wa nkondja falanga yashisha akɛnyi akina. Koko, Bible keketshaka diaha sho ‘ntetemala nyanga wahɔ aso hita, koko wahɔ w’anto akina.’ (1 Kɔrɛtɔ 10:24) Ndo lo Ɛlɛmbɛ Dikumi, ɔlɛmbɛ ɔmɔtshi mbutaka ɔnɛ: “Tɔkɔmiyake . . . ɛngɔ tshɛ ka osekayɛ onto.” (Etombelo 20:17) Etena kadjande otema dia mbidja otshumba lo kɛnyɔ ya falanga, ɔkɛnyi kombolaka dia akɛnyi akina nshisha falanga yawɔ dia nde ndjikondja.

Bible tɔhɛmɔlaka nto diaha sho nkanyiya ɔnɛ shansɛ ekɔ yoho mɔtshi yatshɔkwamaso. L’Isariyɛlɛ w’edjedja, aki anto amɔtshi waki komonga la mbetawɔ ndo wakayokomaka wanɛ “wakalɛka mɛsa dikambo dia jambizambi ya Mpawo.” Onde ndjasha lo yoho shɔ otsha le “jambizambi ya Mpawo” mbetawɔmaka le Nzambi? Ndooko, nde akawatɛ ate: “Nyu nyekɔ l’atei wa wanɛ wasɛka Jehowa, wanɛ wohɛ dikona diami di’ekila.”​—Isaya 65:11, 12.

Kɛnɛ kele mɛtɛ ele, lo wedja ɛmɔtshi, vɔ kambaka la falanga y’oma lo tɔkɛnyɔ ta falanga dia mfutɛ ana kalasa, di’akambo wendana la wodja tshɛ ndo akambo akina, koko kaanga mbakambawɔ la falanga shɔ lo akambo akina, kɛsɔ hatshikitanya kiɔkɔ yayɔ, mbuta ate, yɔ ndja oma lo kɛnɛ kakeketsha anto dia monga la lokaki, nyanga wahɔ awɔ hita, ndo kɛsɔ konyaka onto dia nkombola monga l’ɛngɔ kɛmɔtshi aha la ntomba dungu.

“Tɔkɔmiyake . . . ɛngɔ tshɛ ka osekayɛ onto.”​—Etombelo 20:17.

KƐNƐ KATA BIBLE

Bible mbishaka ɔhɛmwɛlɔ le “wanɛ wamboyashikikɛ dia monga ɛngɔnyi kɔka l’ohemba, lo djonga ndo lo nsaki efula y’anyanya ndo ya kɔlɔ yakonya anto lo elanyelo ndo lo eshishwelo.” (1 Timɔte 6:9) Kɛnyɔ ya falanga monɛka lokaki, koko Bible nshilaka “lokaki” l’atei wa waonga wa kɔlɔ efula wahombaso mbewɔ la wolo tshɛ.​—Ɛfɛsɔ 5:3.

Lam’ele tɔ salaka dia onto mbidja yimba lo wahɔ ande hita, tɔkɛnyɔ ta falanga konyaka onto dia nde monga la ngandji ka falanga, kɛnɛ kele Bible mbutaka ɔnɛ tɔ kekɔ “odo wa weho w’akambo tshɛ wa kɔlɔ.” Nsaki ka falanga koka ndjokoma oko ɛngɔ kɛmɔtshi kele la nkudu kalɔmbɔla lɔsɛnɔ l’onto, nkonya onto dia nde monga l’ekiyanu efula ndo ndanya mbetawɔ kande le Nzambi. Lo yoho ya didjidji, Bible nembetshiyaka dia wanɛ wambondama lo djonga ya ngandji ka falanga dia vɔ “wakayatshatsha la lonyangu l’efula.”​—1 Timɔte 6:10.

Lokaki shishɛka anto ɔlɔ, mbakonyaka diaha ngɛnangɛna la kɛnɛ kele lawɔ ndo kɛsɔ mbashishɛka ɔngɛnɔngɛnɔ mɛtɛ. “Onto lalanga mfɛsa halotaki mfɛsa pondjo, ndo onto lalanga ɔngɔnyi la diangɔ halotaki pondjo.”​—Ɛfɛsɔ 5:10.

Miliyɔ y’anto wakakotwama dia nkɛnya tɔkɛnyɔ ta falanga wamboyoshihodia dia wakandama lo djonga ya kɛnyaka paka tɔkɛnyɔ ta falanga. Dikambo sɔ diambodianganɛ ahole efula, l’États-Unis oto, sho tanaka miliyɔ y’akɛnyi wa tɔkɛnyɔ ta falanga.

Yokedi mɔtshi mbutaka ɔnɛ: “Etenyi k’okito kakondjama tondo la lokaki hatonga ɔtshɔkɔ l’ekomelo.” (Tokedi 20:21) Tɔkɛnyɔ ta falanga ambokonya anto lo mbɔsa abasa ndo kɛsɔ ambashishɛ elimu awɔ, ambohandjola awala awɔ, ndo lɔngɛnyi lawɔ. Nkamba l’atɔndɔ wa lo Bible lo kɛnɛ kendana la tɔkɛnyɔ ta falanga koka nkimanyiya anto dia vɔ mbewɔ etombelo wa kɔlɔ wonga la tɔkɛnyɔ ta falanga lo lɔsɛnɔ ndo l’ɔngɛnɔngɛnɔ awɔ.

“Wanɛ wamboyashikikɛ dia monga ɛngɔnyi kɔka l’ohemba, lo djonga ndo lo nsaki efula y’anyanya ndo ya kɔlɔ yakonya anto lo elanyelo ndo lo eshishwelo.”​—1 Timɔte 6:9.