Lo ɛnɔnyi akumi weke kambeta ɛnɛ, ambutshi waki la diɛsɛ dia monga anto wa ntondo wa nsawola l’ɔnawɔ awui wendana la dieyanelo. Ndo vɔ wakakoke ndjawalembetshiyaka akambo yema yema lo ndjela ɛnɔnyi ndo ehomba awɔ.

Koko akambo wambotshikitana tshɛ lo tshɛ. Dibuku dimɔtshi (The Lolita Effect) mbutaka ɔnɛ: “Oma ko totshitshɛ tawɔ, ana wɛnaka mesajɛ w’awui wa dieyanelo, ndo ekanda kana tovidɛo tendana l’ana taya ndo l’awui wa dieyanelo.” Onde akambo akɔ wekɔ lo nkimanyiya ana kana wekɔ lo mbaalanya?

Akambo akɔ wekɔ ahole tshɛ. Lo dibuku diande Talk to Me First, Deborah Roffman akafunde ate: “Asawo, tɔkɛnyɔ, tovidɛɔ, abuku, esambo, ɛtɛkɛta, awui wɛnyawɔ lo televiziɔ, efundelo, waa piblisite, waa telefɔnɛ ndo waa ɔrdinarɛ ndola l’awui wa dieyanelo ndo vɔ keketshaka [ɛlɔngɔlɔngɔ, tomangase ndo ana w’akɛnda] dia vɔ mbɔsa dia dieyanelo mbele . . . dui dioleki ohomba efula.”

Dikongɛ di’awui w’okanda diekɔ diɔ lawɔ l’onongo lo dikambo sɔ. Wanɛ wasala waa pibisite ndo amundji w’okanda tondjaka ahɔndɔ w’ana wasanga demba lo mbaekiya oma ko totshitshɛ tawɔ dia vɔ ndeka ndjasha lo ɛnamelo kawɔ. Dibuku dimɔtshi (So Sexy So Soon) mbutaka ɔnɛ: “Wanɛ wasala waa piblisite mbeyaka di’ana w’akɛnda nangaka mbetawɔma le asekawɔ akɛnda ndo nsala oko wasala asekawɔ. Oyango wele l’asundji wa diangɔ sɔ bu wa ntshutshuya ana dia nsala awui wa mindo wa dieyanelo” koko dia “vɔ nsondja diangɔ diawɔ.”

Bu ohomba nkomɛ tsho lo mbeya. Oko wele otshikitanu wekɔ lam’asa mbeya woho wakɛndakɛnda mutuka la mbeya nkɛndjakɛndja, woho akɔ wamɛ mbele mbeya akambo wendana l’awui wa dieyanelo la nkamba la diewo diakɔ dia mbɔsa tɛdikɔ ta lomba ntshikitana.

Lo tshena pe: Ɛlɔ kɛnɛ, wɛ pombaka nkimanyiya anayɛ dia vɔ mbekiya “wolo wa shɛnɔdi yawɔ” dia vɔ mbeya “ntshikitanya ɔlɔlɔ la kɔlɔ.”​—Hɛbɛru 5:14.

Kotsha ɔkɛndɛ ayɛ. Kaanga mbele wɛ koka monga la yema ya sɔnyi, wɛ mbahomba nsawola l’ɔnayɛ awui wendana la dieyanelo. Etawɔ dui sɔ.​—Tɔndɔ dia lo Bible: Tokedi 22:6.

Sawolaka la nde asawo wa tomondo. Lo dihole dia mbɔsa wenya efula dia nsawola l’ɔna awui wa diayanelo, nkamba la waaso akina dia sawolaka la nde la nde lo tshena pe awui asɔ, ɛnyɛlɔ etena katanyɛngɔla kana kasalanyu olimu ɔmɔtshi wɛ la nde. Di’ɔna kodiholɛ otema, okande ambola walɔmba onto dia mbisha kanyi yande. Ɛnyɛlɔ, lo dihole dia wɛ mombola ɔnɛ: “Onde wɛ ngɛnangɛnaka piblisite ya nganɛ?” wɛ koka mombola wate: “Oko le yɛ lande na kele wanɛ wasala piblisite kambaka l’esato wa nganɛ dia nsondja diangɔ?” Oma l’ɔkɔngɔ w’okadimwelo ande wɛ koka mombola wate: “Ko wɛ, naa kanyi yayɛ?”​—Tɔndɔ dia lo Bible: Eohwelo k’Ɛlɛmbɛ 6:​6, 7.

Dja yimba l’ɛnɔnyi wele lande. Wɛ koka mbutɛ ɔna lele atɔtɔ kalasa nkombo y’eshika ya tenyi dia demba dia diwutshi ndo woho wakokande ndjakokɛ oma le wanɛ watoyangaka dia ndanya ana w’akɛnda. Etena kayawole wɛ koka mbaewoya akambo w’etatelo wendana la diwutshi. Lam’ayowokoma l’etena kasalema etshikitanu lo demba, vɔ wayeya akambo efula wendana l’awui wa dieyanelo.

Kɔkɔmiya wetshelo w’ohomba l’otema ande. Tatɛ mbetsha ɔnayɛ oma ko dikɛnda, dia monga la losembwe, ndo la dilɛmiɛlɔ. Kɛsɔ ayokokimanyiya di’etena kayoyɔtɛka l’ɔna di’awui wwa dieyanelo, wɛ hatohomba kɛnɛ kambotɛ. Oma laasɔ tɛnde hwe hwe wetshelo wayelayɛ. Ɛnyɛlɔ, naka le yɛ dieyanelo dia la ntondo ka diwala ekɔ kɔlɔ, ko wɛ mbotɛ. Ndo lembetshiyande lande na kediɔ kɔlɔ ndo waale wele la dui sɔ. Dibuku dimɔtshi (Beyond the Big Talk) mbutaka ɔnɛ: “Ayonga wolo di’ɛƐlɔngɔlɔngɔ l’esekaseka mbeyana lam’asawɔ naka vɔ mbeyaka di’ambutshi awɔ tonaka awui asɔ.”

Sha ɛnyɛlɔ. Wɛmɛ pombaka mbisha ɛnyɛlɔ l’akambo wetshayɛ. Ɛnyɛlɔ, onde wɛ mbɔlaka etena kokayɛ ɛtɛkɛta wa mindo? Wɛ ndɔtaka ahɔndɔ wemula nsaki ya demba? Onde wɛ membwanaka l’onto ɔmɔtshi koko wɛ bu la kanyi ya ntshukana la nde? Akambo walasayɛ koka mɛnya woho wa ɛnyɛlɔ kashayɛ ɔnayɛ.​—Tɔndɔ dia lo Bible: Rɔmɔ 2:​21.

Ɛna akambo la sso di’ɔlɔlɔ. Awui wa dieyanelo wekɔ losha l’oma le Nzambi, ndo ndooko onyake, lo diwala, kɛsɔ mongaka kiɔkɔ y’ɔngɛnɔngɛnɔ w’efula. (Tokedi 5:​18, 19) Lembetshiya ɔnayɛ dia l’etena kahombama nde ayoyɔngɛnangɛna la woshasha ɔsɔ, aha la nde monga la lonyangu ndo l’ɔkɛyi wonga la dieyanelo dia la ntondo ka diwala.​—1 Timɔte 1:​18, 19.