1-2. Lande na kakatshimbe Yeso wɔɔngɔ?

L’OTSHO w’ekomelo wakinde la nkɛtɛ oko onto, Yeso akatshimbe wɔɔngɔ. Nde aki suke la ndjakema nyɔi ka l’esehe oma le anto wa kɔlɔ. Koko Yeso kondjakiyanya tsho l’ɔtɛ wakinde suke la ndjakema. Nde akalangaka She efula ndo akalangaka mbɔngɛnyangɛnya. Yeso akeyaka ɔnɛ naka nde ntshikala la kɔlamelo l’ehemba waki suke la mbokomɛ, kete nde ayokimanyiya dia lokombo la Jehowa nyindjama. Yeso akalangaka nto anto, ndo nde akeyaka ɔnɛ elongamelo kaso ka lɔsɛnɔ la pondjo lo nshi yayaye nemanɛka la woho wakandahombe ntshikala la kɔlamelo polo lo nyɔi.

² Kaanga mbakatshimbe Yeso wɔɔngɔ, nde akonge lo wɔladi. Nde akatɛ apɔstɔlɔ ande ate: “Lambonyosha wɔladi ami.” (Jni. 14:27) Nde aki la “wɔladi wa Nzambi,” mbuta ate ki kaya oma lo woho wele onto la diɔtɔnganelo dia dimɛna la Jehowa. Wɔladi ɔsɔ mbakakimanyiya Yeso dia monga la ki ka lo yimba ndo ka l’otema.​—Flpɛ. 4:6, 7.

3. Kakɔna kayangaso nsɛdingola lo sawo nɛ?

³ Ndooko onto l’atei aso lambongaka la asui wele oko wakakikɛ Yeso, koko onto tshɛ latayele Yeso ayohomana l’ehemba. (Mat. 16:24, 25; Jni. 15:20) Ndo l’ɛnyɛlɔ ka Yeso, sho koka ntshimba wɔɔngɔ lo tena dimɔtshi. Akokaso nsala diaha ekiyanu ɛsɔ tahemɛ ndo toshishɛ ki ka lo yimba? Tayanga nsɛdingola awui asato wakasale Yeso l’edja k’olimu ande lanɛ la nkɛtɛ ndo tayanga mɛna woho wakokaso mbookoya etena keso la ehemba.

4. Lo nkamba la 1 Tɛsalɔnika 5:17, sha bɛnyɛlɔ dimɔtshi diɛnya dia Yeso akalɔmbɛ mbala efula lushi l’ekomelo ka lɔsɛnɔ lande la nkɛtɛ?

⁴ Adia 1 Tɛsalɔnika 5:17. Yeso akalɔmbɛ mbala la mbala lushi l’ekomelo ka lɔsɛnɔ lande la nkɛtɛ. Etena kakandahɔhɔla  Eohwelo ka nyɔi kande, nde akalɔmbɛ lo dikambo dia mapa ndo dia vinyɔ. (1 Kɔr. 11:23-25) Ntondo ka mimɔ oma lo dihole diakawasale dambo di’Elekanelo, nde akalɔmbɛ kaamɛ l’ambeki ande. (Jni. 17:1-26) Etena kakandakome nde l’ambeki ande lo Dikona di’esongo w’Ɔlivɛ l’otsho akɔ, nde akalɔmbɛ mbala efula. (Mat. 26:36-39, 42, 44) Ndo ɛtɛkɛta w’ekomelo wakate Yeso ntondo ka nde mvɔ waki tshondo ya dɔmbɛlɔ. (Luka 23:46) Yeso akalɔmbɛ Jehowa lo dikambo tshɛ diakokomɛ lushi l’ekomelo ka lɔsɛnɔ lande.

5. Lande na kakakitakita dihonga di’apɔstɔlɔ?

⁵ Ɔkɔkɔ ɔmɔtshi wakakoke Yeso mbikikɛ ehemba aki nɛ dia nde akayaɛkɛka le She lo dɔmbɛlɔ. Lo wedi okina, apɔstɔlɔ kotetemala nɔmba l’otsho akɔ. Etombelo waki la dui sɔ ele, dihonga diawɔ diakakitakita lo wonya wakonge ehemba. (Mat. 26:40, 41, 43, 45, 56) Etena kongaso l’ehemba, tayotshikala la kɔlamelo paka naka sho ndjela ɛnyɛlɔ ka Yeso ndo ‘ntetemala nɔmba.’ Awui akɔna wakokaso nɔmba?

6. Ngande wayotokimanyiya mbetawɔ dia ntetemala monga la ki?

⁶ Sho koka nɔmba Jehowa ɔnɛ: “Otosha mbetawɔ k’efula.” (Luka 17:5; Jni. 14:1) Tekɔ l’ohomba wa mbetawɔ nɛ dia Satana pembaka onto tshɛ latayele Yeso. (Luka 22:31) Ngande wayotokimanyiya mbetawɔ dia ntetemala monga la wɔladi kaanga etena keso l’ekakatanu waha pe? Naka tambosala kɛnɛ tshɛ kakokaso nsala dia ndɔshana l’ohemba ɔmɔtshi, kete mbetawɔ kayotokonya dia ntshika akambo l’anya wa Jehowa. Lam’ele tekɔ l’eshikikelo ɔnɛ nde koka nkandola akambo  lo yoho yotoleki, sho mongaka la ki ka lo yimba ndo ka l’etei k’otema.​—1 Pe. 5:6, 7.

7. Wetshelo akɔna wamboyokondja oma lo kɛnɛ kakate Robert?

⁷ Dɔmbɛlɔ tokimanyiyaka dia nama wɔladi wa l’etei k’otema oyadi ehemba akɔna wele laso. Tɔsɛdingole ɛnyɛlɔ ka Robert, ekumanyi ka kɔlamelo kele l’ɛnɔnyi 80 l’ɛmɔtshi. Nde mbutaka ate: “Dako diele lo Filipɛ 4:6, 7 mbakakimanyiya dia ndɔshana l’ehemba efula wa lo lɔsɛnɔ lami. Laki l’ekakatanu wendana l’ekondjelo. Ndo lakashisha ɔkɛndɛ ami w’ekumanyi lo tshanda mɔtshi.” Kakɔna kakimanyiya Robert dia ntetemala monga la wɔladi wa l’etei k’otema? Nde mbutaka ate: “Kam’atatɛmi ndjakiyanya, dimi nɔmbaka. Dimi mɛnaka dia lo yɛdikɔ yalɔmbami mbala la mbala ndo l’etete, mbalekami monga la wɔladi.”

8. Oko wotamidiɔ lo Joani 8:29, naa ɔkɔkɔ okina waki Yeso la wɔladi wa l’etei k’otema?

⁸ Adia Joani 8:29. Oyadi etena kakandahɛnyahɛnyamaka, Yeso aki la wɔladi wa l’etei k’otema nɛ dia nde akeyaka dia nde akangɛnyangɛnyaka She. Nde akatetemala nkitanyiya kaanga etena kakinde l’okakatanu wa nsala dui sɔ. Nde akalangaka She ndo kambɛ Jehowa mbaki dui diakaleke ohomba lo lɔsɛnɔ lande. Ntondo ka ndja la nkɛtɛ, nde aki “okambi wa kɔmba” waki Nzambi. (Tok. 8:30) Ndo etena kakinde la nkɛtɛ, l’ohetoheto tshɛ nde aketsha anto akambo wendana la She. (Mat. 6:9; Jni. 5:17) Olimu ɔsɔ wakasha Yeso ɔngɛnɔngɛnɔ w’efula.​—Jni. 4:34-36.

9. Ngande wele ndjasha l’olimu w’esambishelo koka tokimanyiya dia nama wɔladi wa l’etei k’otema?

 ⁹ Sho koka mbokoya Yeso lo nkitanyiya Jehowa ndo lo mongaka “nshi tshɛ la akambo efula wa nsala l’olimu wa Nkumadiɔndjɔ.” (1 Kɔr. 15:58) Naka sho “ndjasha tshɛ” l’olimu w’esambishelo, kete tayɛna ekakatanu aso la sso di’ɔlɔlɔ. (Ets. 18:5) Ɛnyɛlɔ, mbala efula anto wahomana laso l’esambishelo mongaka l’ekakatanu wotoleki. Koko, etena kekawɔ dia nanga Jehowa ndo kakitanyiyawɔ alako ande, nsɛnɔ yawɔ ndowanaka ndo vɔ ndekaka monga l’ɔngɛnɔngɛnɔ. Etena tshɛ kɛnaso awui asɔ wasalema, sho ndekaka monga l’eshikikelo ɔnɛ Jehowa ayotokokɛ. Ndo eshikikelo kɛsɔ tokimanyiyaka dia nama wɔladi aso wa l’etei k’otema. Kadiyɛso kɛmɔtshi kakadiɛnɛ lɔsɛnɔ lande l’otondo la ɔkɔmwɛlɔ ndo la kanyi ya ndjaɔsa oko onto l’anyanya akɛnyi mɛtɛ ka dui sɔ. Nde mbutaka ate: “Etena kayashami tshɛ l’esambishelo, dimi mbahemɛka tokanyi tami ndo mongaka l’ɔngɛnɔngɛnɔ. Dimi fɔnyaka dia ekɔ ngasɔ nɛ dia etena kemi l’esambishelo, dimi ndjaokaka dia lamboleka ndjasukanya la Jehowa.”

10. Wetshelo akɔna wamboyokondja oma lo kɛnɛ kakate Brenda?

¹⁰ Tɔsɛdingole nto ɛnyɛlɔ ka kadiyɛso Brenda. Nde l’ɔnande la womoto wekɔ lo diɛnɛ la hemɔ ka wolo ka lo wɔɔngɔ. Brenda mbetetaka paka lo kɔsa k’etshimbi ndo bu la wolo efula. Nde sambishaka lo luudu la luudu tena dimɔtshi, koko nde ndekaka nsambisha lo fundanɛ mikanda. Nde mbutaka ate: “Etena kakamashihodia ɔnɛ hemɔ kami hɔkɔnɔ lo dikongɛ nɛ, lakayasha tshɛ l’esambishelo. Lo mɛtɛ, esambishelo minyaka yimba yami oma l’ekiyanu ami. Tɔ tshutshuyakami dia ndjasha dia nkimanyiya anto wasambishami l’ɛtshi ka nkɛtɛ k’etshumanelo kaso. Ndo tɔ mboholakami tena tshɛ elongamelo ka lo nshi yayaye kele lami.”

11-13. a) Ngande wakɛnya apɔstɔlɔ ndo anto akina dia vɔ waki angɛnyi w’eshika le Yeso? b) Shɛngiya yakɔna yakonge l’angɛnyi wa Yeso le nde?

¹¹ L’edja kakasambishaka Yeso, apɔstɔlɔ wa kɔlamelo wakonge angɛnyi wa mɛtɛ le Yeso. Vɔ waki bɛnyɛlɔ diasɛna diata Tokedi ɔnɛ: “Ekɔ ɔngɛnyi ɔmɔtshi waleka mbekesanɛ la onto ndeka ndo ɔnango.” (Tok. 18:24) Yeso akɔsaka angɛnyi asɔ la nɛmɔ di’efula. L’edja k’olimu ande, ndooko ɔnango la lo demba lakonge la mbetawɔ le nde. (Jni. 7:3-5) L’etena kɛmɔtshi, ewotɔ ande wakakome polo lo mfɔnya ɔnɛ nde ambodjɔ dadi. (Makɔ 3:21) Otshikitanyi la wɔ, Yeso akatɛ apɔstɔlɔ ande wa kɔlamelo l’otsho wa la ntondo ka nde mvɔ ɔnɛ: “Nyu mbele wanɛ wambotetemala ntshikala kaamɛ la mi lo ehemba ami.”​—Luka 22:28.

¹² Lo waaso amɔtshi apɔstɔlɔ wakanyangiya Yeso, koko nde kombidja yimba lo munga yawɔ ndo akɛnyi dia vɔ waki la mbetawɔ le nde. (Mat. 26:40; Makɔ 10:13, 14; Jni. 6:66-69) L’otsho w’ekomelo wakinde kaamɛ la wɔ ntondo ka nde ndjakema, Yeso akatɛ apami wa kɔlamelo asɔ ate: “Dimi lambonyelɛ angɛnyi, nɛ dia akambo tshɛ wakamoke le Papa, dimi lambonyewoyawɔ.” (Jni. 15:15) Aha la taamu, angɛnyi wa Yeso waki kiɔkɔ y’ekeketshelo k’efula le nde. Woho wakawakimanyiya Yeso l’esambishelo akokonya dia monga l’ɔngɛnɔngɛnɔ w’efula.​—Luka 10:17, 21.

¹³ Laadiko di’apɔstɔlɔ, Yeso aki l’angɛnyi akina w’apami ndo wa wamato wakosukɛ l’olimu w’esambishelo ndo lo toho  tokina t’amɛna. Amɔtshi wakawelɛka lawakawɔ dia tɔlɛ yangɔ. (Luka 10:38-42; Jni. 12:1, 2) Akina waketetaka la nde ndo wakokahɛ diangɔ diawɔ. (Luka 8:3) Yeso aki l’angɛnyi w’eshika nɛ dia nde aki ɔngɛnyi w’oshika le wɔ. Nde akaasalɛ akambo w’amɛna ndo nde aki la wɛdimo lo kɛnɛ kakandalongamɛka oma le wɔ. Yeso aki kokele, koko nde aki la lowando lo osukɔ w’angɛnyi ande waki komonga kokele. Ndo aha la taamu, vɔ wakokimanyiya dia nama wɔladi ande wa l’etei k’otema.

14-15. Akokaso nsala dia monga l’angɛnyi w’eshika, ndo ngande wakokawɔ tokimanyiya?

¹⁴ Angɛnyi w’eshika mbayotokimanyiya dia ntshikala la kɔlamelo le Jehowa. Ndo yoho yoleki dimɛna ya monga l’angɛnyi w’eshika ele monga ɔngɛnyi w’oshika. (Mat. 7:12) Ɛnyɛlɔ, Bible tokeketshaka dia nkimanyiya anto akina, djekoleko anto wele “lo dihombo.” (Ɛf. 4:28) Onde wɛ hakoke nkanyiya onto ɔmɔtshi la l’etshumanelo kanyu lakokayɛ nkimanyiya? Onde wɛ hakoke ntshɔ dia tosombɛ opandjudi ɔmɔtshi wahayotomba oma lakande l’ɔtɛ wa hemɔ kana lotshundu diangɔ? Onde wɛ hakoke ntɔlɛ nkumbo kɛmɔtshi kele bu l’ekondjelo yangɔ ya ndɛ? Naka wɛ mbeyaka woho wa nkamba la sitɛ ka jw.org^® ndo la application JW Library^®, onde wɛ hakoke nkimanyiya anto wa l’etshumanelo kanyu dia mbeya woho wa nkamba la dihomɔ sɔ? Naka sho ndjasha dia nkimanyiya anto akina, kete ondo tayoleka monga l’ɔngɛnɔngɛnɔ.​—Ets. 20:35.

¹⁵ Angɛnyi aso wayotosukɛ etena keso l’ehemba ndo wayotokimanyiya dia ntetemala  monga la wɔladi wa l’etei k’otema. Oko wakahokamɛka Elihu etena kakalembetshiyaka Jɔbɔ ehemba waki lande, mbele angɛnyi aso tokimanyiyaka lo tohokamɛ la solo dia lotutsha tshɛ etena kawatɛso woho wayaokaso. (Jɔbɔ 32:4) Tatolongamɛke dia angɛnyi aso tɔsɛ tɛdikɔ, koko tayonga akanga wa tomba naka sho mpokamɛ alako wohikami lo Bible watoshawɔ. (Tok. 15:22) Ndo oko waketawɔ nkumekanga Davidɛ l’okitshakitsha tshɛ ekimanyielo kakawoshaka angɛnyi ande, sho pombaka minya otako ko mbetawɔ ekimanyielo katosha angɛnyi aso etena keso l’ohomba. (2 Sa. 17:27-29) Lo mɛtɛ, angɛnyi w’eshika wa ngasɔ wekɔ woshasha w’oma le Jehowa.​—Jak. 1:17.

16. Lo ndjela Filipɛ 4:6, 7, naa yoho tshɔi yakokaso monga la wɔladi? Lembetshiya.

¹⁶ Adia Filipɛ 4:6, 7. Lande na katotɛ Jehowa ɔnɛ sho koka monga la wɔladi watoshande “lo tshimbo ya Kristo Yeso”? Nɛ dia sho koka nkondja wɔladi wa lo yimba ndo l’etei k’otema paka naka sho nshihodia ndo mbetawɔ ɔkɛndɛ wa Yeso lo sangwelo dia Jehowa. Ɛnyɛlɔ, diɛsɛ la oshinga w’etshungwelo wa Yeso, pɛkato yaso tshɛ koka dimanyiyama. (1 Jni. 2:12) Dui sɔ tokeketshaka mɛtɛ! Oko wende Nkumekanga ka Diolelo dia Nzambi, Yeso ayonya awui wa kɔlɔ tshɛ watosalɛ Satana la dikongɛ diande. (Isa. 65:17; 1 Jni. 3:8; Ɛny. 21:3, 4) Dui sɔ toshaka elongamelo mɛtɛ! Ndo kaanga mbakatosha Yeso olimu wa wolo wa nkamba, nde ekɔ kaamɛ la so, ekɔ lo tosukɛ lo nshi y’ekomelo ka dikongɛ nɛ. (Mat. 28:19, 20) Dui sɔ toshaka dihonga di’efula mɛtɛ! Ekeketshelo, elongamelo ndo dihonga, wekɔ awui w’ohomba efula wahombaso monga lawɔ dia monga la wɔladi.

17. a) Ngande wakoka Okristo nama wɔladi wa l’etei k’otema? b) Oko wakadialakema lo Joani 16:33, kakɔna kayotokoka nsala?

¹⁷ Ko ngande wakokayɛ nama ki ka lo yimba etena keyɛ l’ehemba efula? Wɛ koka nsala dui sɔ lo nsala akambo wakasale Yeso. Ntondotondo, lɔmba ndo ntetemala nɔmba. Dui dia hende ele, kitanyiya Jehowa ndo sambisha l’ohetoheto oyadi etena kele wolo nsala dui sɔ. Ndo dui dia sato ele, yanga dia angɛnyi ayɛ kokimanyiya etena keyɛ l’ehemba. Lo nsala ngasɔ, wɔladi wa Nzambi wayolama yimba ndo otema ayɛ. Ndo l’ɛnyɛlɔ ka Yeso, wɛ ayodja ehemba otshumba.​—Adia Joani 16:33.