1. Ɔhɛmwɛlɔ akɔna wakafundɛ ɔpɔstɔlɔ Pɔɔlɔ Akristo w’akitami?

ƆPƆSTƆLƆ Pɔɔlɔ akate ate “nyotshike.” Tshika na? “Nyotshike tshikitanyema oma le dikongɛ di’akambo nɛ.” (Rɔmɔ 12:2) Pɔɔlɔ akatɛka Akristo wa lo ntambe ka ntondo ɛtɛkɛta ɛsɔ. Lande na kakandasha apami ndo wamato wakayakimɔ le Nzambi ndo wakakitama nyuma k’ekila ɔhɛmwɛlɔ wa wolo wa ngasɔ?​—Rɔmɔ 1:7.

2-3. Ngande wasala Satana la wolo dia taanganya la Jehowa, ko ngande wakokaso monola diangɔ “diohikami wolo” lo timba taso?

² Pɔɔlɔ akayakiyanyaka nɛ dia akɛnamaka dia Akristo amɔtshi wakasɛngiyama la tokanyi ta kɔlɔ ndo filozofi yakasukɛka andja wa Satana. (Ɛf. 4:17-19) Dui sɔ koka komɛ onto tshɛ la l’atei aso. L’oyango wa taanganya la Jehowa, Satana, nzambi ka dikongɛ nɛ di’akambo kambaka la toho totshikitanyi. Yoho mɔtshi ele nde koka nkamba la nsaki kakoka monga l’onto ka ndjaɔsa la nɛmɔ kana monga la lokumu. Nde koka kaanga nkamba la awui amɔtshi wakatokomɛ lo lɔsɛnɔ, mbekelo, kana kalasa yakatɔtɔ dia tokonya dia nkanyiya woho walangande.

³ Onde ekɔ wɔdu monola diangɔ “diohikami wolo” lo timba taso? (2 Kɔr. 10:4) Pɔɔlɔ akakadimola ate: “Tekɔ lo mbitola tokanyi ndo oseka wekamu tshɛ walɔshana la ewo ka Nzambi, ndo tekɔ lo minda kanyi tshɛ lo lɔhɔmbɔ ko ndjikonya dia yɔ  nkitanyiya Kristo.” (2 Kɔr. 10:5) Eelo, l’ekimanyielo ka Jehowa sho koka mɛtɛ mbahemɛ tokanyi tshɛ ta kɔlɔ. Oko wakoka okanga nsuwola lɔlɛngɔ, Ɔtɛkɛta wa Nzambi koka tokimanyiya dia nsuwola shɛngiya ya lɔlɛngɔ yele la tokanyi ta kɔlɔ t’andja wa Satana.

4. Etshikitanu akɔna wakahombe efula ka l’atei aso nsala etena kakawetawɔ akambo wa mɛtɛ?

⁴ Ohokanyiya yema etshikitanu wakayahombe nsala etena kakayetawɔ akambo wa mɛtɛ wa lo Ɔtɛkɛta wa Nzambi mbala ka ntondo ndo kakayɔshi yɛdikɔ ya kambɛ Jehowa. Le efula ka l’atei aso, dui sɔ diakalɔmbɛ ntshika awui amɔtshi wa kɔlɔ. (1 Kɔr. 6:9-11) Tekɔ la lowando l’ɔtɛ wakatokimanyiya Jehowa dia ntshika nsala awui wa kɔlɔ!

5. Awui akɔna ahende watotɛwɔ dia nsala wɔtɛkɛtami lo Rɔmɔ 12:2?

⁵ Koko, hatokoke mbuta dia hatoyokoka nsala etshikitanu. Kaanga mbahatayosala pɛkato ya weke yakatasalaka ntondo ka batisimu, sho pombaka ntetemala mbewɔ dui tshɛ diakoka tokonya dia kalolɛ ditshelo di’edjedja sɔ. Ngande wakokaso nsala dui sɔ? Pɔɔlɔ mbishaka okadimwelo ate: “Nyotshike tshikitanyema oma le dikongɛ di’akambo nɛ koko nyohilwame lo nɔngɔsɔla timba tanyu.” (Rɔmɔ 12:2) Ɔnkɔnɛ, nɔmbamaka nsala awui ahende. Dui dia ntondo ele, sho pombaka ‘ntshika tshikitanyema,’ kana sɛngiyama oma le andja ɔnɛ. Dui dia hende ele, sho pombaka ‘mpilɔ’ lo nɔngɔsɔla timba taso.

6. Wetshelo akɔna wakondjaso oma lo ɛtɛkɛta wa Yeso wofundami lo Mateo 12:43-45?

⁶ Ohilwelo wakatɛkɛta Pɔɔlɔ nɔmbaka akambo efula aha nsala tsho etshikitanu wɛnama lo washo. Dui sɔ mendanaka la etenyi tshɛ ka lo demba diaso. (Enda kiombo yele l’ɔtɛ a dui ɔnɛ: “ Onde wɛ ambohilɔ kana ambotshikitanya tsho ɛnamelo?”) Sho pombaka nɔngɔsɔla  timba taso, mbuta ate lɔkɛwɔ la l’etei, tokanyi ndo nsaki yaso. Diakɔ diele sho tshɛ pombaka ndjambola ɔnɛ: ‘Onde lekɔ Okristo wa laadiko di’ɛlɔmɔ kana lekɔ Okristo wa mɛtɛ mɛtɛ?’ Otshikinanu wekɔ ohomba. Lo ɛtɛkɛta ande watanema lo Mateo 12:43-45, Yeso akɛnya kɛnɛ kahombaso nsala. (Adia.) Lokanyi lele lo ɛtɛkɛta ɛsɔ mbikaka epole ɔsɛkɛ lo dui dia mɛtɛ di’ohomba nɛ: Hatohombe komɛ tsho lo minya tokanyi ta kɔlɔ; sho pombaka tihɛnya la tokanyi tetawɔma le Nzambi.

7. Ngande wakokaso ntshikitanya lonto laso la l’etei k’otema?

⁷ Onde ekɔ dui dia wɔdu dia ntshikitanya tokanyi taso kana lonto laso la l’etei k’otema? Ɔtɛkɛta wa Nzambi kadimolaka ɔnɛ: “Nyu pombaka ntetemala monga eyoyo lo wolo walɔmbɔla timba tanyu, ndo nyu pombaka ndɔta lonto l’oyoyo lakatongama lo ndjela lolango la Nzambi lo losembwe ndo lo kɔlamelo ya mɛtɛ.” (Ɛf. 4:23, 24) Eelo, sho koka ntshikitanya lonto laso la l’etei k’otema, koko dui sɔ bu wɔdu nsala. Sho pombaka nsala akambo efula aha tsho minya nsaki kana awui wa kɔlɔ. Sho pombaka ntshikitanya “wolo walɔmbɔla timba” taso. Dui sɔ nɔmbaka ntshikitanya nsaki yaso, lɔkɛwɔ, ndo eyango aso. Dui sɔ nɔmbaka nto ntetemala mbidja welo.

8-9. Ngande wɛnya kɛnɛ kakakomɛ ɔnangɛso ɔmɔtshi ohomba wa ntshikitanya lonto laso la l’etei k’otema?

⁸ Nyɛsɔ tɔsɛdingole ɛnyɛlɔ k’ɔnangɛso ɔmɔtshi laki kanga ngala. L’ɔkɔngɔ wa nde ntshika nnɔ wanu efula ndo ndɔ ata, nde akakotsha kɛnɛ kalɔmbama dia batizama, dui sɔ diakonge esambishelo k’efula le anto wa lo dihole diakandadjasɛka. Koko la dikɔlɔ dimɔtshi, yema tshitshɛ l’ɔkɔngɔ wa batisimu kande, nde akahomana la ohemba wakinde konongamɛka. Pami kɛmɔtshi kakadjɔ wanu akaye lakande ndo akatatɛ mbosola dia vɔ ndɔ ta. L’etatelo ɔnangɛso konanga ndɔ ta. Koko etena kakayɔtɛnga pami kɛsɔ lokombo la Jehowa, ɔnangɛso laki eke kabatizama kondjakimɛ nto. Nde akatombe ndo akakɔmɔla pami kɛsɔ. Lande na kakandasale ngasɔ? Kaanga mbakokimanyiya wekelo ande wa Bible dia minya nsaki ka ndɔ ta, nde kotshikitanya wolo wakalɔmbɔlaka yimba yande. Lo ɛtɛkɛta ekina, nde kotshikitanya lonto lande la l’etei.

⁹ Koko, ɔnangɛso ɔsɔ kopekɔ. (Tok. 24:16) Nde akatetemala mpama diɛsɛ l’ekimanyielo ka dikumanyi. L’ekomelo nde akayokotsha kɛnɛ kalɔmbama dia monga ekumanyi. Oma laasɔ, la dikɔlɔ dimɔtshi l’andja wa Mbalasa ka Diolelo, nde akahomana l’ohemba wele oko wakahomana la nde ambeta ɛnɔnyi efula. Pami kɛmɔtshi kakadjɔ wanu akalange nkɔmɔla ekumanyi kekina. Kakɔna kakasale ɔnangɛso? La wɔlamu ndo l’okitshakitsha tshɛ, nde akasawola la pami kakadjɔ wanu, nde akawɔladia ndo nde akokimanyiya dia ntshɔ la ngelo. Lande na kakasale ɔnangɛso ɔsɔ ngasɔ? Ɔnangɛso akatshikitanya lonto lande. L’etei kande, nde akahiloyama ko akakome onto ladja wɔladi, onto l’okitshakitsha; awui asɔ tshɛ ele dia ntombola Jehowa!

10. Kakɔna kahombaso nsala dia ntshikitanya lonto laso la l’etei k’otema?

¹⁰ Etshikitanu ɛsɔ hawosalema mbala kakɔ ɔtɔi; kana aha la mbidja welo. Ondo ayonga ohomba sho ‘mbidja welo’ wa l’otema ɔtɔi l’edja k’ɛnɔnyi. (2 Pe. 1:5) Kɛsɔ halange mbuta ɔnɛ monga “lo mɛtɛ” edja kete ambokoka. Sho pombaka nsala la wolo dia ntshikitanya lonto laso la l’etei k’otema. Ekɔ wanya amɔtshi wayotokimanyiya dia nsala otshikitanu ɔsɔ. Nyɛsɔ tɔsɛdingole wanya amɔtshi l’atei awɔ.

11. Ngande watokimanyiya dɔmbɛlɔ dia ntshikitanya lonto laso?

¹¹ Dɔmbɛlɔ ekɔ nna dia ntondo di’ohomba efula. Sho pombaka nɔmbaka oko wakasale omembi w’esambo wakate ate: “Nzambi le, otonge otema wa pudipudi l’etei kami, ndo odje l’etei kami yimba y’oyoyo ndo yamboshikimala.” (Os. 51:10) Sho pombaka mbeya ɔnɛ ekɔ ohomba sho ntshikitanya lonto laso ndo nɔmba Jehowa ekimanyielo. Ngande wakokaso monga l’eshikikelo ɔnɛ Jehowa ayotokimanyiya dia nsala etshikitanu? Sho koka keketshama oma lo daka dia Jehowa diakendanaka l’ase Isariyɛlɛ w’ɛtɛ wolo wa lo nshi y’Ɛzɛkiyɛlɛ diata ɔnɛ: “Dimi layowasha otema wele kaamɛ, ndo layodja yimba y’oyoyo le wɔ; ndo . . . layowasha otema wa emunyi, [mbuta ate otema wakɛta dia ndjela ɛlɔmbwɛlɔ kaki Nzambi].” (Ɛzk. 11:19; nɔtɛ) Jehowa aketawɔ nkimanyiya ase Isariyɛlɛ asɔ dia nsala etshikitanu ndo nde mbetawɔka tokimanyiya sho lawɔ.

12-13. a) Lo ndjela Osambo 119:59, lo akambo akɔna wahombaso kanaka yimba? b) Ambola akɔna wahombayɛ ndjaoka?

¹² Kanaka yimba ekɔ nna dia hende di’ohomba. Etena kadiaso Ɔtɛkɛta wa Nzambi la yambalo tshɛ lushi tshɛ, sho pombaka mbɔsaka etena ka nkana yimba kana nkanyiya efula lo tokanyi kana nsaki yahombaso nsala etshikitanu. (Adia Osambo 119:59; Hɛb. 4:12; Jak. 1:25) Sho pombaka mbeya tokanyi ndo nsaki yasɛngiyama la tokanyi t’andja ɔnɛ. Sho pombaka mbetawɔ la losembwe tshɛ ɔnɛ tekɔ la wɛɔdu ndo oma laasɔ nsala la wolo dia minya wɛɔdu ɛsɔ.

¹³ Ɛnyɛlɔ, yambola ɔnɛ: ‘Onde lekɔ la vadi mɔtshi y’ɔkɔmiya kana ya kandjema l’otema ami?’ (1 Pe. 2:1) ‘Onde dimi ndjadiyaka yema l’ɔtɛ wa dihole diakamole, kalasa yakamɔtɔ kana falanga yele la mi?’ (Tok. 16:5) ‘Onde dimi mbɔsaka anto akina wele bu la diangɔ diele la mi kana wanɛ woye oma lo dihole dikina dia vɔ bu la nɛmɔ?’ (Jak. 2:2-4) ‘Onde dimi kotɔmaka oma lo diangɔ dia l’andja ɔnɛ?’ (1 Jni. 2:15-17) ‘Onde dimi nangaka tɔkɛnyɔ t’awui wa mindo kana wa ngala?’ (Os. 97:10; 101:3; Amɔ. 5:15) Etena kayoyokadimola lo ambola asɔ wɛ ayeya etshikitanu ɛmɔtshi wahombayɛ nsala. Naka sho minya tokanyi “[t]ohikami wolo” l’etema aso, kete tayɔngɛnyangɛnya Shɛso lele l’olongo.​—Os. 19:14.

14. Lande na kele nsɔna angɛnyi w’eshika ekɔ dui di’ohomba efula?

¹⁴ Nsɔna angɛnyi w’eshika ekɔ nna dia sato di’ohomba efula. Oyadi sho mbeyaka dui sɔ kana bu, sho sɛngiyamaka wolo oma le angɛnyi aso. (Tok. 13:20) Lo olimu kana la kalasa, ondo sho dingama l’anto wahatokimanyiya dia nkanyiya woho wetawɔma le Nzambi. Koko sho koka nkondja angɛnyi w’eshika lo nsanganya y’Akristo. Lɛkɔ mbakokaso keketshana kana sɛngiyana “lo ngandji ndo lo etsha w’ɛlɔlɔ.”​—Hɛb. 10:24, 25, nɔtɛ.

15-16. Ngande wasala Satana la wolo dia ntshikitanya ekanelo kaso?

¹⁵ Koko, tohɔ dia Satana ekɔ lo nsala la wolo dia ntshikitanya ekanelo kaso. Nde kambaka la weho tshɛ wa tokanyi dia ndanya shɛnyiya ya dimɛna yele la Ɔtɛkɛta wa Nzambi le so.

¹⁶ Satana ekɔ lo ntetemala mboka dimbola diakɔ diamɛ diakandoke Eva lo ekambɔ ka Ɛdɛna ɔnɛ: “Onde lo mɛtɛ mbakanyotɛ Nzambi ate . . . ?” (Eta. 3:1) L’andja ɔnɛ walɔmbɔma oma le Satana, mbala efula sho mbokaka anto woka ambola wakoka tokonya dia mbidja taamu lo awui wetawɔso, ɛnyɛlɔ: ‘Onde mɛtɛ  mbahetawɔ Nzambi diwala dia lam’asa pami la pami kana womoto la womoto? Onde mɛtɛ mbahetawɔ Nzambi dia nyu nsala fɛtɛ ka Nɔɛlɛ kana ka lushi la eotwelo? Onde mɛtɛ Nzambi kanyu nyɔlɔmbaka dia ntona mbidja dikila? Onde mɛtɛ Nzambi ka ngandji nyɔlɔmbaka dia mbewɔ diɔtɔnganelo l’anto wakawatshanya wokanyu ngandji?’

17. Kakɔna kahombaso nsala naka wambotoka ambola watokonya dia mbidja taamu lo dietawɔ diaso, ndo etombelo akɔna wɛnya Kɔlɔsayi 2:6, 7 wakoka monga?

¹⁷ Sho pombaka monga l’eshikikelo dia dietawɔ diaso diekɔ mɛtɛ. Naka hatotanyi ekadimwelo lo ambola w’ohomba wendana la dietawɔ diaso, kete sho koka ndjotatɛ mbidja taamu dia kana kɛnɛ ketawɔso kekɔ mɛtɛ. Taamu tɔsɔ koka yema yema ntshikitanya ekanelo kaso ndo ndanya mbetawɔ kaso. Ko ahombaso nsala? Ɔtɛkɛta wa Nzambi totɛka dia mpiloya timba taso, dia shoamɛ mbeya dimɛna “lolango la Nzambi l’ɔlɔlɔ, letawɔma ndo la kokele.” (Rɔmɔ 12:2) Naka sho mbekaka mbala la mbala, kete sho koka nshikikɛ shoamɛ akambo wa mɛtɛ wakateke oma lo Bible. Sho koka monga l’eshikikelo tshɛ lo tshɛ ɔnɛ atɔndɔ wa Jehowa wekɔ osembɔki. Oma laasɔ, oko osongo wele l’edio wohikami wolo, tayohikama wolo, mbuta ate ‘shikimala lo mbetawɔ.’​—Adia Kɔlɔsayi 2:6, 7.

18. Kakɔna kayotokimanyiya dia nsuwola etombelo wa lɔlɛngɔ w’oma lo andja wa Satana?

¹⁸ Ndooko onto okina lakoka shikimadia mbetawɔ kayɛ, diakɔ diele tetemala monga oyoyo lo wolo walɔmbɔla yimba yayɛ. Tetemala nɔmba; sɛngasɛnga Jehowa dia kokimanyiya la nyuma kande. Kanaka yimba efula; tetemala nsɛdingola tokanyi ndo nsaki yayɛ. Sɔna angɛnyi w’eshika; ongaka kaamɛ l’anto wayokokimanyiya dia mpiloya yimba yayɛ. Lo nsala ngasɔ, wɛ ayosuwola etombelo wa lɔlɛngɔ wa andja wa Satana ndo wɛ ayotondoya dia minya “tokanyi ndo oseka wekamu tshɛ walɔshana la ewo ka Nzambi.”​—2 Kɔr. 10:5.