SAWO DIA WEKELO 18
Ngandji ndo losembwe lo etshumanelo k’Akristo
“Nyamuyanake eshikɔ. Lo nsala ngasɔ mbayonyokotsha ɔlɛmbɛ wa Kristo.”—NGAL. 6:2.
OSAMBO 12 Jehowa mbele Nzambi ka woke
AWUI WAYƆTƐKƐTAMA *
1. Sho koka monga l’eshikikelo lo awui akɔna ahende?
JEHOWA NZAMBI nangaka atɛmɔdi ande. Nde mbalangaka mbala tshɛ ndo nde ayowalangaka tena tshɛ. Nde nangaka nto losembwe. (Os. 33:5) Diakɔ diele sho koka monga l’eshikikelo lo awui ahende anɛ: 1) Jehowa nyangaka etena kasalɛwɔ ekambi ande akambo aha la losembwe. 2) Nde ndakaka di’anto hawototetemala salɛ ekambi ande akambo aha la losembwe ndo ayowasha dilanya. Lo sawo dia ntondo dia lo asawo anɛ, * takeke dia Ɛlɛmbɛ wakasha Nzambi ase Isariyɛlɛ lo tshimbo ya Mɔsɛ wakahikama lo ngandji. Ɛlɛmbɛ akɔ wakakeketshaka anto dia monga la losembwe le anto tshɛ, kaanga le wanɛ waki kokokaka ndjakokɛ. (Eoh. 10:18) Ɛlɛmbɛ ɛsɔ wakɛnyaka woho wakakokɛka Jehowa atɛmɔdi ande lo yɛdikɔ y’efula.
2. Ambola akɔna wayangaso nkadimola?
2 Ɛlɛmbɛ wa Mɔsɛ wakakomɛ lo 33 T.D. etena kakakengama etshumanelo k’Akristo. Onde Akristo wakahombe monga aha la ɔlɛmbɛ wakahikama lo ngandji ndo wakakeketshaka anto dia monga la losembwe? Ndooko! Akristo wakonge la ɔlɛmbɛ w’oyoyo. Lo sawo nɛ, tayɔsɛdingola ntondo kɛnɛ kalembetshiya ɔlɛmbɛ ɔsɔ. Oma laasɔ tayokadimola lo ambola anɛ: Lande na kakokaso mbuta di’ɔlɛmbɛ ɔsɔ mpikama lo ngandji? Lande na kakokaso mbuta di’ɔlɛmbɛ ɔsɔ keketshaka anto dia monga la losembwe? Lo ndjela ɔlɛmbɛ ɔsɔ, ngande wahomba wanɛ wele la lowandji salɛ anto akina akambo?
“ƆLƐMBƐ WA KRISTO” KƐDIKƐDI NA?
3. “Ɔlɛmbɛ wa Kristo” mendanaka l’awui akɔna wɔtɛkɛtami lo Ngalatiya 6:2?
3 Adia Ngalatiya 6:2. Akristo wekɔ l’ɛse ka “ɔlɛmbɛ wa Kristo.” Yeso kofundɛ ambeki ande listɛ l’ɛlɛmbɛ, koko nde akawasha ɛlɔmbwɛlɔ, wadjango ndo atɔndɔ dia mbalɔmbɔlaka. “Ɔlɛmbɛ wa Kristo” mendanaka l’awui tshɛ waketsha Yeso. Dia nshihodia ɔlɛmbɛ ɔsɔ dimɛna, tɔsɛdingole edingɔ wayela.
4-5. Lo toho takɔna taketsha Yeso, ndo tena diakɔna diakandetsha?
4 Lo toho takɔna taketsha Yeso? Yoho ya ntondo ele, nde aketsha anto oma lo kɛnɛ kakandataka. Ɛtɛkɛta ande waki la shɛngiya nɛ dia nde akataka akambo wa mɛtɛ wendana la Nzambi, aketsha woho wa monga l’oyango wa mɛtɛ lo lɔsɛnɔ ndo akɛnya dia Diolelo dia Nzambi mbayoshidiya asui tshɛ wele l’anto. (Luka 24:19) Yeso aketsha nto la bɛnyɛlɔ. Oma lo yoho yakandasɛnaka, nde akɛnya ambeki ande woho wakawahombaka nsɛna.—Jni. 13:15.
5 Tena diakɔna diaketsha Yeso? Nde aketsha etena kakandakambaka olimu ande w’esambishelo lanɛ la nkɛtɛ. (Mat. 4:23) Nde aketsha nto ambeki ande yema tshitshɛ l’ɔkɔngɔ wa eolwelo kande. Ɛnyɛlɔ, nde akɛnama le djui mɔtshi y’ambeki ande, ondo ndekana 500 ndo akawasha didjango ɔnɛ “nyetɛ anto . . . ambeki.” (Mat. 28:19, 20; 1 Kɔr. 15:6) Oko wende ɔtɛ w’etshumanelo, Yeso akatetemala mbetsha ambeki ande l’ɔkɔngɔ wa nde nkalola l’olongo. Ɛnyɛlɔ, oya lo 96 T.D., Kristo akalɔmbɔla ɔpɔstɔlɔ Joani dia nkeketsha ndo mbisha Akristo w’akitami alako.—Kɔl. 1:18; Ɛny. 1:1.
6-7. a) Lende ofundami awui waketsha Yeso? b) Ngande wakitanyiyaso ɔlɛmbɛ wa Kristo?
6 Lende ofundami awui waketsha Yeso? Evanjiliɔ akɔ ɛnɛi kɔndɔlaka akambo efula wakate ndo wakasale Yeso lanɛ la nkɛtɛ. Awui akina wa lo Afundelo w’Akristo wa lo Grɛkɛ wakafundama oma le apami wakasambiyama la nyuma k’ekila ndo waki la “yimba ya Kristo” tokimanyiyaka nto dia nshihodia tokanyi ta Kristo l’awui wotshikitanyi.—1 Kɔr. 2:16.
7 Wetshelo: Wetshelo wa Yeso mendanaka l’awui tshɛ wa lo lɔsɛnɔ. Diakɔ diele, ɔlɛmbɛ wa Kristo nɔmbɔlaka kɛnɛ tshɛ kasalaso la ngelo, l’olimu kana la kalasa ndo l’etshumanelo. Sho mbekaka ɔlɛmbɛ ɔsɔ etena kadiaso Afundelo w’Akristo wa lo Grɛkɛ ndo kakanaso yimba la wɔ. Sho kitanyiyaka ɔlɛmbɛ ɔsɔ lo mbɔtɔnganyiya nsɛnɔ yaso la Jni. 8:28.
ɛlɔmbwɛlɔ, wadjango ndo atɔndɔ wele lo abuku wa lo Bible asɔ. Etena kakitanyiyaso ɔlɛmbɛ wa Kristo, sho kitanyiyaka Jehowa Nzambi kaso ka ngandji, lele Kiɔkɔ ya kɛnɛ tshɛ kaketsha Yeso.—ƆLƐMBƐ WOHIKAMI LO NGANDJI
8. Ɔlɛmbɛ wa Kristo mpikama lo na?
8 Luudu lohikami l’etshina ka wolo kimanyiyaka wanɛ wodjashi lɔkɔ dia ndjaoka l’ekokelo. Woho akɔ waamɛ mbele, ɔlɛmbɛ wa dimɛna wohikami l’etshina ka wolo kimanyiyaka wanɛ wookitanyiya dia ndjaoka l’ekokelo. Ɔlɛmbɛ wa Kristo mpikama l’etshina koleki dimɛna, mbuta ate ngandji. Lande na kataso ngasɔ?
Naka sho salɛ anto akambo la ngandji, kete tekɔ lo nkitanyiya “ɔlɛmbɛ wa Kristo” (Enda odingɔ 9-14) *
9-10. Bɛnyɛlɔ diakɔna diɛnya dia Yeso akatshutshuyama la ngandji, ndo ngande wakokaso mbookoya?
9 Ntondotondo, Yeso akatshutshuyamaka la ngandji lo kɛnɛ tshɛ kakandasalaka. Kɛtshi kana kandji ekɔ tolembetelo ta ngandji. Yeso akasɛngiyama la kɛtshi dia mbetsha elui w’anto, nkɔnɔla ase hemɔ, mbalesha ndo mbolola wanɛ wakavu. (Mat. 14:14; 15:32-38; Makɔ 6:34; Luka 7:11-15) Kaanga mbele nsala awui asɔ akawɔsɛka wenya efula ndo wolo, la lolango tshɛ, Yeso aketsha ehomba w’anto akina la ntondo ka wande. Kɛnɛ koleki tshɛ ele, nde akɛnya ngandji k’efula lo nkimɔ lɔsɛnɔ lande lo dikambo di’anto akina.—Jni. 15:13.
10 Wetshelo: Sho koka mbokoya Yeso lo mbetsha ehomba w’anto akina la ntondo ka waso. Sho koka nto mbookoya lo mboka anto wa l’ɛtshi kaso ka nkɛtɛ kɛtshi k’efula. Etena katshutshuyamaso la kɛtshi ka ngasɔ dia mbetsha ndo nsambisha lokumu l’ɔlɔlɔ, tekɔ lo nkitanyiya ɔlɛmbɛ wa Kristo.
11-12. a) Kakɔna kɛnya dia Jehowa ndjakiyanyaka efula lo dikambo diaso? b) Ngande wakokaso mbokoya ngandji ka Jehowa?
11 Dui dia hende ele, Yeso akakɛnɛmɔla ngandji ka She. Etena kakandakambaka olimu ande, Yeso akɛnya woho wayakiyanya Jehowa efula lo dikambo di’atɛmɔdi ande. L’atei w’awui waketsha Yeso mbele ndo wayela anɛ: Onto tshɛ la l’atei aso ekɔ la nɛmɔ ndo ohomba le Shɛso lele l’olongo. (Mat. 10:31) Jehowa nomɔlomɔka dia nongola ɔkɔkɔ wakashishɔ wamboyatshumoya ko wambokalola l’etshumanelo. (Luka 15:7, 10) Jehowa akɛnya ngandji kande le so sho tshɛ lo nkimɔ Ɔnande oko oshinga w’etshungwelo lo dikambo diaso.—Jni. 3:16.
12 Wetshelo: Ngande wakokaso mbokoya ngandji ka Jehowa? (Ɛf. 5:1, 2) Etena kɔsaso dia anangɛso ndo akadiyɛso wekɔ la nɛmɔ ndo ohomba, ndo etena kalongolaso l’ɔngɛnɔngɛnɔ tshɛ “ɔkɔkɔ wamboshishɔ” ko wambokalola le Jehowa. (Os. 119:176) Sho mɛnyaka dia sho mbokaka anangɛso l’akadiyɛso ngandji lo ndjakimɔ, ɛnyɛlɔ lo mbakimanyiya tena diewɔ lo dihombo. (1 Jni. 3:17) Etena kasalɛso anto akina akambo la ngandji, sho kitanyiyaka ɔlɛmbɛ wa Kristo.
13-14. a) Oko wɛnyamidiɔ lo Joani 13:34, 35, kakɔna kakadjangɛ Yeso ambeki ande dia nkɛnɛmɔla, ndo lande na kewɔ ɔlɛmbɛ w’oyoyo? b) Ngande wakitanyiyaso ɔlɛmbɛ w’oyoyo ɔsɔ?
13 Dui dia sato ele, Yeso akadjangɛ ambeki ande dia nkɛnɛmɔla ngandji ka ndjahondja. (Adia Joani 13:34, 35.) Ɔlɛmbɛ wa Yeso wekɔ oyoyo nɛ dia vɔ nɔmbaka dia mbokana woho wa ngandji waki kɔnɔmbamaka lo Ɛlɛmbɛ wakasha Nzambi ase Isariyɛlɛ: Langa asekayɛ ambetawudi oko wakakolange Yeso. Dui sɔ nɔmbaka dia monga la ngandji ka ndjahondja. * Sho pombaka mboka anangɛso l’akadiyɛso ngandji kaanga ndeka ndo woho wayalangaso. Sho pombaka mbaoka ngandji polo lo yɛdikɔ ya mbetawɔ kaanga nkimɔ lɔsɛnɔ laso dikambo diawɔ oko wakatosalɛ Yeso.
14 Wetshelo: Ngande wakitanyiyaso ɔlɛmbɛ w’oyoyo ɔsɔ? Lo tshena pe, ele lo ndjahondja dikambo di’anangɛso l’akadiyɛso. Sho mbaokaka ngandji k’efula, diakɔ diele tayetawɔ ndjahondja akambo efula, ɛnyɛlɔ nkimɔ lɔsɛnɔ laso dia mbashimbɛ, koko sho koka ndjahondja ndo diangɔ dia totshitshɛ. Ɛnyɛlɔ, naka sho tshɔka mbala la mbala dia tɔsa ɔnangɛso kana kadiyɛso k’osombe oya lo losanganya, kana naka sho mbetawɔ ntshika kɛnɛ kalangaso dia ngɛnyangɛnya onto ɔmɔtshi lokaso ngandji kana naka sho mbɔsa vakashi l’olimu dia tokimanyiya l’ɔkɔngɔ wa mpokoso, kete tekɔ lo nkitanyiya ɔlɛmbɛ wa Kristo. Sho kimanyiyaka nto lo mbetɛ etshumanelo kaso dihole diakoka onto tshɛ ndjaoka l’ekokelo.
ƆLƐMBƐ WAKEKETSHA ANTO DIA MONGA LA LOSEMBWE
15-17. a) Ngande wakɛnya etsha wa Yeso woho wakandɔsaka losembwe? b) Ngande wakokaso mbokoya Yeso?
15 “Losembwe” latɛkɛtama lo Bible, nembetshiyaka ntondotondo nsala kɛnɛ kata Nzambi dia kekɔ ɔlɔlɔ ndo nsala dui sɔ aha la shɔnɔdi. Lande na kakokaso mbuta dia ɔlɛmbɛ wa Kristo keketshaka anto dia monga la losembwe?
Yeso akalɛmiyaka wamato ndo akaasalɛka ɔlɔlɔ, mbidja ndo anto akina wakɔsamaka oko anto w’anyanya (Enda odingɔ 16) *
16 Ntondotondo, tɔsɛdingole woho wakɛnyaka etsha wa Yeso woho wakandɔsaka losembwe. Lo nshi yande, ewandji w’ɛtɛmwɛlɔ w’ase Juda wakahetshaka wanɛ waki komonga ase Juda, wakahetshaka ase Juda wakawɔsaka oko anto w’anyanya ndo vɔ kɔmbɔsaka wamato la nɛmɔ. Koko, Yeso aki la losembwe ndo komonga la shɔnɔdi le anto tshɛ. Nde aketawɔ wanɛ waki komonga ase Juda waki la mbetawɔ le nde dia mboyela. (Mat. 8:5-10, 13) Nde akasambisha anto tshɛ aha la mbakanɛ kɔlɔ, akanga w’ɛngɔnyi ndo ase wola. (Mat. 11:5; Luka 19:2, 9) Nde komonga pondjo kanga awui wolo kana salɛ wamato akambo lo yoho ya kɔlɔ. Koko, nde akalɛmiyaka wamato ndo akaasalɛka ɔlɔlɔ, mbidja ndo anto akina wakɔsamaka oko anto w’anyanya.—Luka 7:37-39, 44-50.
17 Wetshelo: Sho koka mbokoya Yeso lo salɛka anto akina akambo aha la shɔnɔdi ndo sambishaka anto tshɛ walanga tohokamɛ, oyadi dihole diakɔna diele la wɔ lo tshunda kana ɔtɛmwɛlɔ wewɔ. Apami w’Akristo mbokoyaka ɛnyɛlɔ kande lo salɛ wamato akambo la dilɛmiɛlɔ. Naka sho nsala awui asɔ, kete tekɔ lo nkitanyiya ɔlɛmbɛ wa Kristo.
18-19. Kakɔna kaketsha Yeso lo dikambo dia losembwe, ndo wetshelo akɔna wakondjaso oma lo wetshelo ande?
18 Dui dia hende ele, tɔsɛdingole kɛnɛ kaketsha Yeso lo dikambo dia losembwe. Nde aketsha atɔndɔ wahomba nkimanyiya ambeki ande dia salɛ anto akina akambo la losembwe. Tɔshi ɛnyɛlɔ kendana la woho wa salanɛ akambo. (Mat. 7:12) Sho tshɛ nangaka di’anto tosalɛ akambo la losembwe. Diakɔ diele, sho pombaka salɛ anto akina akambo la losembwe. Naka sho nsala ngasɔ, vɔ mbeyaka sɛngiyama dia tosalɛ akambo la losembwe. Ko kayotota naka wambotosalɛ akambo aha la losembwe? Yeso aketsha ambeki ande nto dia monga l’eshikikelo ɔnɛ Jehowa ayosala “dia dikambo dia [wanɛ] woolelɛ otsho la yanyi sambɔma la losembwe tshɛ.” (Luka 18:6, 7) Ɛtɛkɛta ɛsɔ wekɔ daka di’ɔnɛ: Nzambi kaso kele la losembwe mbeyaka ehemba wahomana la so lo nshi nyɛ y’ekomelo ndo nde ayosala dia dikambo diaso sambɔma la losembwe tshɛ l’etena kahombama.—2 Tɛs. 1:6.
19 Wetshelo: Naka sho ndjela atɔndɔ waketsha Yeso, kete tayosalɛ anto akina akambo la losembwe. Ndo naka wekɔ lo tosalɛ akambo aha la losembwe l’andja wa Satana, kete sho koka nkondja esambelo lo mbeya dia Jehowa ayosala dia dikambo diaso sambɔma la losembwe tshɛ.
NGANDE WAHOMBA WANƐ WELE LA LOWANDJI SALƐ ANTO AKINA AKAMBO?
20-21. a) Ngande wahomba wanɛ wele la lowandji salɛ anto akina akambo? b) Ngande wakoka omi nkɛnɛmɔla ngandji ka ndjahondja, ndo ngande wahomba ombutshi wa pami salɛ anande akambo?
20 Lo ndjela ɔlɛmbɛ wa Kristo, ngande wahomba wanɛ wele la lowandji salɛ anto akina akambo? Lam’ele ngandji mbele etshina k’ɔlɛmbɛ ɔsɔ, wanɛ wele la lowandji pombaka mbɔsa wanɛ wakokɛwɔ la nɛmɔ ndo mbasalɛ akambo la ngandji. Vɔ pombaka mbohɔ dia Kristo nangaka dia vɔ mɛnya ngandji l’awui tshɛ wasalawɔ.
21 Lo nkumbo. Omi pombaka mboka wadɛnde ngandji “oko wasalɛ Kristo etshumanelo.” (Ɛf. 5:25, 28, 29) Omi pombaka mbokoya ngandji ka ndjahondja ka Kristo lo mbetsha ehomba wa wadɛnde lo dihole dia ntondo. Apami amɔtshi mbeyaka mɛna wolo nkɛnɛmɔla ngandji ka ngasɔ, ondo l’ɔtɛ wakawodiama lo dihole diakiwɔ kosalɛka anto akina akambo la losembwe ndo la ngandji. Koka monga tshondo y’okakatanu le wɔ dia ntshika mbekelo ya kɔlɔ shɔ, koko vɔ pombaka nsala etshikitanu ɛsɔ l’oyango wa nkitanyiya ɔlɛmbɛ wa Kristo. Omi lɛnya ngandji ka ndjahondja nɛmiyamaka oma le wadɛnde. Ombutshi wa pami wasalɛ anande akambo la ngandji, howanyangiya pondjo oma lo kɛnɛ katande ndo kasalande. (Ɛf. 4:31) Koko, nde ayowaɛnya ngandji ndo ayowasukɛ lo toho tayokonya anande dia ndjaoka l’ekokelo. Papa ka ngasɔ nangemaka oma le anande ndo vɔ ndjaɛkɛka le nde.
22. Lo ndjela 1 Petero 5:1-3, “ɛkɔkɔ” wekɔ waki na, ndo ngande wahombawɔ mbasalɛ akambo?
22 Lo etshumanelo. Dikumanyi pombaka mbohɔ dia “ɛkɔkɔ” bu wawɔ. (Jni. 10:16; adia 1 Petero 5:1-3.) Ditelo di’ɔnɛ “ɛkɔkɔ wa Nzambi,” “la ntondo ka Nzambi,” ndo “etenyi k’okitɔ kaki Nzambi” mboholaka dikumanyi dia ɛkɔkɔ wekɔ waki Jehowa. Nde nangaka dia vɔ salɛ ɛkɔkɔ ande akambo la ngandji ndo la lotutsha. (1 Tɛs. 2:7, 8) Dikumanyi diakotsha ɛkɛndɛ awɔ la ngandji tshɛ oko alami w’ɛkɔkɔ mbetawɔmaka le Jehowa. Ndo nto, dikumanyi dia ngasɔ nangemaka ndo nɛmiyamaka le anangɛwɔ l’akadiyɛwɔ.
23-24. a) Ɔkɛndɛ akɔna wele la dikumanyi etena kakandolawɔ awui wendana la pɛkato ya weke? b) Etena kakandolawɔ awui wa ngasɔ, lo na ahomba dikumanyi mbidja yimba?
23 Ɔkɛndɛ akɔna wele la dikumanyi etena kakandolawɔ awui wendana la pɛkato ya weke? Ɔkɛndɛ awɔ ntshikitana la wɔnɛ waki la toshushi ndo dikumanyi diaki l’ɛse k’Ɛlɛmbɛ wakasha Nzambi ase Isariyɛlɛ. Lo ndjela Ɛlɛmbɛ ɛsɔ, apami wakasɔnama wakakandolaka aha tsho akambo wa lo nyuma, koko ndo enongo w’anto k’anto ndo w’anto wakatshaka kɔlɔ. Koko lo ndjela ɔlɛmbɛ wa Kristo, ɔkɛndɛ wa dikumanyi ekɔ wa nkandola awui wa lo nyuma wendana la pɛkato ya weke. Vɔ mbeyaka dia ewandji wa lɛɛta wekɔ l’ɔkɛndɛ wakawasha Nzambi wa kandolaka awui wendana la enongo w’anto k’anto ndo w’anto wasala kɔlɔ. L’atei w’awui akɔ mbele, vɔ wekɔ nto la lowandji la mbidjɛ onto kibawo kana mbodja lo lokanu.—Rɔmɔ 13:1-4.
24 Ngande wakandola dikumanyi akambo wa lo nyuma wendana la pɛkato ya weke? Vɔ kambaka l’Afundelo dia nsɛdingola akambo ndo mbɔsa tɛdikɔ. Vɔ mbeyaka dia ɔlɛmbɛ wa Kristo mpikama lo ngandji. Ngandji tshutshuyaka dikumanyi dia mbidja yimba l’akambo anɛ: Kakɔna kahomba salema dia nkimanyiya onto tshɛ la l’etshumanelo lambowosalɛ dui dimɔtshi dia kɔlɔ? Lo kɛnɛ kendana la ɔnɛ lakasale pɛkato, ngandji tshutshuyaka dikumanyi dia ndjambola ɔnɛ: Onde nde ekɔ la ndjatshumoya? Onde sho koka mbokimanyiya dia nde nɔngɔsɔla diɔtɔnganelo diande la Jehowa?
25. Kakɔna kayotɔsɛdingola lo sawo diayela?
25 Tekɔ mɛtɛ la lowando dia monga l’ɛse k’ɔlɛmbɛ wa Kristo! Naka sho tshɛ nsala la wolo dia nkitanyiya ɔlɛmbɛ ɔsɔ, kete tayokimanyiya di’etshumanelo kaso monga dihole diakoka onto tshɛ ndjaoka dia nde ekɔ lo nangema, mbɔsama la nɛmɔ ndo l’ekokelo. Koko tekɔ lo nsɛna l’andja ɔnɛ wele “akanga wa kɔlɔ” wamboleka “mpama lo kɔlɔ.” (2 Tim. 3:13) Sho pombaka sungukalaka. Ngande wakoka Akristo wa l’etshumanelo nkɛnɛmɔla losembwe la Nzambi etena kakandolawɔ awui wendana la mbeyana l’ɔna dikɛnda la wolo? Tayɔsɛdingola dimbola sɔ lo sawo diayela.
OSAMBO 15 Totombole Ɔnaki Jehowa l’enondo!
^ od. 5 Sawo nɛ ndo asawo ahende wayela wekɔ l’atei w’asawo wayɛnya lande na kakokaso monga l’eshikikelo dia Jehowa ekɔ Nzambi ka ngandji ndo ka losembwe. Nde nangaka di’anto salɛ ekambi ande akambo la losembwe ndo nde keketshaka wanɛ wahawasalɛ akambo la losembwe l’andja ɔnɛ wa kɔlɔ.
^ od. 1 Enda sawo diele l’ɔtɛ a dui ɔnɛ: “Ngandji ndo losembwe lo Isariyɛlɛ w’edjedja” lo Tshoto y’Etangelo ya Ngɔndɔ ka hende 2019.
^ od. 13 ELEMBETSHIELO W’AWUI AMƆTSHI: Ngandji ka ndjahondja totshutshuyaka dia mbetsha ehomba w’anto akina la ntondo ka waso. Sho nangaka ndjahondja ɛngɔ kɛmɔtshi dia nkimanyiya anto akina kana lo wahɔ awɔ.
^ od. 61 ELEMBETSHIELO W’OSATO: Yeso enda wadi aki odo ɔmɔtshi lele ɔnande ɛtɔi ambovɔ. La kɛtshi tshɛ, Yeso ambolola ɔlɔngɔlɔngɔ ɔsɔ.
^ od. 63 ELEMBETSHIELO W’OSATO: Yeso alɛ yangɔ lo luudu la Ofarisɛ welɛwɔ Simɔna. Womoto ɔmɔtshi, ondo kanga loseka asola ekolo wa Yeso la asɔyi ande, awakitola la divo diande ndo awakita esɔ. Simɔna hangɛnangɛna kɛnɛ kasala womoto ɔsɔ, koko Yeso ambɔswɛlɛ womoto akɔ.