1-3. a) Lo ndjela Osambo 5:4-6, ngande wayaoka Jehowa lo kɛnɛ kendana l’awui wa kɔlɔ? b) Lande na kakokaso mbuta ɔnɛ ndanya ɔna dikɛnda ndɔshanaka la “ɔlɛmbɛ wa Kristo”?

JEHOWA NZAMBI petshaka akambo wa kɔlɔ tshɛ. (Adia Osambo 5:4-6.) Nde petshaka djekoleko tshelo ya mbeyana l’ɔna dikɛnda la wolo nɛ dia ɔsɔ ekɔ kɔlɔ ka ditshi! Oko weso Ɛmɛnyi wa Jehowa, sho mbokoyaka Jehowa lo mpetsha tshelo ya mbeyana l’ɔna dikɛnda la wolo ndo hatetawɔ dui sɔ l’etshumanelo k’Akristo.​—Rɔmɔ 12:9; Hɛb. 12:15, 16.

² Tshelo tshɛ ya ndanya ɔna dikɛnda ndɔshanaka la “ɔlɛmbɛ wa Kristo”! (Ngal. 6:2) Lande na kataso ngasɔ? Oko wakatadiɛnyi lo sawo dietshi, ɔlɛmbɛ wa Kristo mendanaka l’awui tshɛ waketsha Yeso oyadi l’ɛtɛkɛta kana oma l’ɛnyɛlɔ, ɔlɛmbɛ akɔ mpikama lo ngandji ndo keketshaka anto dia monga la losembwe. Lam’ele Akristo wa mɛtɛ kitanyiyaka ɔlɛmbɛ ɔsɔ, vɔ salɛka ana akambo wakoka mbakonya dia vɔ ndjaoka l’ekokelo ndo ndjaoka dia vɔ nangemaka. Koko ndanya ɔna ekɔ dui dia lokaki ndo dia kɔlɔ, dui sɔ konyaka ɔna dia ndjaoka dia nde bu l’ekokelo ndo halangema.

³ Lonyangu ko, tshelo ya mbeyana l’ɔna dikɛnda la wolo yambokokanɛ l’andja w’otondo, tshelo yakɔ yekɔ la shɛngiya ndo le Akristo wa mɛtɛ. Lande na? “Akanga wa kɔlɔ ndo akanga wa lokeso” wambofula ndo amɔtshi koka kaanga sɔsɔmɛ l’etshumanelo. (2 Tim. 3:13) Laadiko dia laasɔ, anto amɔtshi wa l’etshumanelo ndjoyashaka l’awui wa dieyanelo ndo ndjeyanaka l’ana la wolo. Tayanga nsɛdingola lande na kele ndanya ɔna dikɛnda ekɔ pɛkato ka woke efula. Oma laasɔ tayɔsɛdingola woho wakandola dikumanyi awui wendana la pɛkato ya weke, mbidja ndo pɛkato ka ndanya ɔna dikɛnda,  ndo woho wakoka ambutshi nkokɛ anawɔ. *

4-5. Lande na kele ndanya ɔna mbosalɛka kɔlɔ?

⁴ Ndanya ɔna dikɛnda mongaka la shɛngiya le anto edja efula. Dui sɔ mongaka la shɛngiya le wanɛ wakawalanya ndo wanɛ wawaoka ngandji, ɛnyɛlɔ ase nkumbo yawɔ ndo anangɛwɔ l’akadiyɛwɔ w’Akristo. Ndanya ɔna dikɛnda ekɔ pɛkato ka woke.

⁵ Onto leyana l’ɔna dikɛnda la wolo mbosalɛka kɔlɔ. * Salɛ anto akina kɔlɔ ndo mbakonya dia nsowa ekɔ pɛkato. Oko wayotɛna lo sawo diayela, ɔnɛ lalanya ɔna dikɛnda mbosalɛka kɔlɔ lo toho efula. Nde konyaka ɔna dikɛnda diaha ndjaɛkɛ le nde, ndo mbokonyaka diaha ndjaoka l’ekokelo. Ana pombaka kokamɛ oma lo tshelo ya kɔlɔ shɔ ndo ana wakawalanya pombaka sambema ndo kimanyiyama.​—1 Tɛs. 5:14.

6-7. Lande na kele mbeyana l’ɔna dikɛnda la wolo salɛka etshumanelo ndo emboledi kɔlɔ?

⁶ Onto leyana l’ɔna dikɛnda la wolo salɛka etshumanelo kɔlɔ. Onto la l’etshumanelo lalanya ɔna dikɛnda ndanyaka lokumu l’etshumanelo. (Mat. 5:16; 1 Pe. 2:12) Ɔsɔ bu dui dia losembwe nɛ dia miliyɔ y’Akristo wele la kɔlamelo wekɔ lo “ndɔ ta dia wolo dikambo dia mbetawɔ”! (Judɛ 3) Hatetawɔ dia anto wasala awui wa kɔlɔ ko hawoyatshumoya ntshikala l’etshumanelo nɛ dia dui sɔ ndanyaka lokumu l’etshumanelo.

⁷ Onto leyana l’ɔna dikɛnda la wolo salɛka emboledi kɔlɔ. Akristo pombaka “[ndj]akitshakitsha l’ɛse ka ewandji wa laadiko.” (Rɔmɔ 13:1) Sho mɛnyaka dia sho ndjakitshakitshaka lo nkitanyiya ɛlɛmbɛ wa wodja. Naka onto ɔmɔtshi la l’etshumanelo ambosekola ɔlɛmbɛ ɔmɔtshi, ɛnyɛlɔ naka nde ambeyana l’ɔna dikɛnda la wolo, kete nde ambosalɛ emboledi kɔlɔ. (Ɛdika la Etsha 25:8.) Dikumanyi bu la lotshungɔ la mbisha onto lambosekola ɔlɛmbɛ wa lo wodja dilanya, koko vɔ hawokokɛ onto lambolanya ɔna dikɛnda diaha emboledi mbosha dilanya. (Rɔmɔ 13:4) Otshi wa pɛkato ayona kɛnɛ kakandonɛ.​—Ngal. 6:7.

8. Ngande wɔsa Jehowa onto lasalɛ anto akina kɔlɔ?

⁸ Kɛnɛ koleki tshɛ ele, onto leyana l’ɔna dikɛnda la wolo salɛka Nzambi kɔlɔ. (Os. 51:4) Etena kasalɛ onto ɔmɔtshi onto okina kɔlɔ, nde salɛka ndo Jehowa pɛkato. Tɔsɛdingole ɛnyɛlɔ kɛmɔtshi k’oma l’Ɛlɛmbɛ wakasha Nzambi ase Isariyɛlɛ. Ɛlɛmbɛ wakataka dia naka onto ambova kana ambokesa osekande, kete nde “amboshisha kɔlamelo le Jehowa.” (Lɛw. 6:2-4) Woho akɔ waamɛ mbele, onto ɔmɔtshi la l’etshumanelo lalanya ɔna dikɛnda, lambookonya diaha ndjaoka l’ekokelo, amboshisha kɔlamelo le Nzambi. Onto leyama oko ɔtɛmɔdi wa Jehowa lalanya ɔna dikɛnda tɛngamishaka lokombo la Jehowa. Diakɔ diele, teye ɔnɛ mbeyana l’ɔna dikɛnda la wolo hetawɔma ndo ɔsɔ ekɔ salɛ Nzambi pɛkato ka woke.

9. Naa awui wohikami lo Bible wambotondja okongamelo wa Jehowa l’edja k’ɛnɔnyi efula, ndo lande na?

⁹ Aya ɛnɔnyi efula wele okongamelo wa Jehowa wambotondja awui efula wohikami l’Afundelo wendana la ndanya ɔna dikɛnda. Ɛnyɛlɔ, asawo wa lo Tshoto y’Etangelo  ndo Emɔ! wakɛnya kɛnɛ kakoka wanɛ wakaweyana la wɔ la wolo nsala lo kɛnɛ kendana la ekiyanu, woho wakoka anto akina mbakimanyiya ndo mbakeketsha ndo woho wakoka ambutshi nkokɛ anawɔ. Dikumanyi diakalongola olowanyelo oma l’Afundelo wendana la kɛnɛ kakokawɔ nsala etena kasalema pɛkato ka ndanya ɔna dikɛnda. Okongamelo wekɔ lo ntetemala mvusola yoho yahomba dikumanyi nkandola awui wendana la pɛkato ka ndanya ɔna dikɛnda. Lande na? Dia ndjashikikɛ ɔnɛ yoho yakandola dikumanyi dikambo sɔ mbɔtɔnɛka l’ɔlɛmbɛ wa Kristo.

10-12. a) Etena kakandolawɔ dui tshɛ diendana la pɛkato ka woke, kakɔna katolamaka dikumanyi lo yimba, ndo vɔ ndjakiyanyaka lo awui akɔna? b) Lo ndjela Jakɔba 5:14, 15, kakɔna kasala dikumanyi la wolo?

¹⁰ Etena kakandola dikumanyi dui tshɛ diendana la pɛkato ka woke, vɔ namaka lo yimba ɔlɛmbɛ wa Kristo walɔmba dia vɔ salɛ ɛkɔkɔ akambo la ngandji, ndo nsala kɛnɛ kata Nzambi dia kekɔ dimɛna ndo losembwe. Diakɔ diele, vɔ pombaka nsɛdingola dimɛna awui efula etena kokawɔ ɔnɛ onto ɔmɔtshi ambosala pɛkato ka woke. Dikumanyi mbele anto wa ntondo wahomba ndjakiyanya dia lokombo laki Nzambi ntetemala kidiama. (Lɛw. 22:31, 32; Mat. 6:9) Vɔ ndjakiyanyaka nto efula dikambo dia yoonge ya lo nyuma y’anangɛwɔ l’akadiyɛwɔ wa lo etshumanelo ndo vɔ nangaka nkimanyiya onto tshɛ lakawasalɛ akambo wa kɔlɔ.

¹¹ Ndo nto, naka ɔnɛ lakasale pɛkato ka woke ekɔ onto la l’etshumanelo, kete dikumanyi wayosala la wolo dia nkimanyiya onto ɔsɔ dia nɔngɔsɔla diɔtɔnganelo diasande la Jehowa naka nde ekɔ lo ndjatshumoya. (Adia Jakɔba 5:14, 15.) Okristo wayasha lo nsaki ya kɔlɔ ndo wasala pɛkato ka woke, ekɔ la hemɔ lo nyuma. Mbuta ate, nde bu nto la diɔtɔnganelo dia dimɛna la Jehowa. * Lo yoho mɔtshi, sho koka mbɛdika dikumanyi la adɔkɔtɛlɛ. Vɔ salaka la wolo “dia nkɔnɔya ɔnɛ lele la hemɔ [l’etena kɛsɔ otshi wa pɛkato].” Alako awɔ w’oma lo Afundelo koka mbokimanyiya dia nɔngɔsɔla diɔtɔnganelo diande la Nzambi, koko dui sɔ koka salema paka nde ekɔ lo ndjatshumoya l’otema ɔtɔi.​—Ets. 3:19; 2 Kɔr. 2:5-10.

¹² Mbokɛmaka dia dikumanyi wekɔ l’ɔkɛndɛ wa woke efula. Vɔ ndjakiyanyaka efula lo dikambo di’ɛkɔkɔ wakawasha Nzambi. (1 Pe. 5:1-3) Vɔ nangaka di’anangɛwɔ l’akadiyɛwɔ ndjaoka l’ekokelo lo etshumanelo. Diakɔ mbele, vɔ salaka akambo la shamanya etena kokawɔ dia onto ɔmɔtshi ambosala pɛkato ka woke, mbidja ndo ndanya ɔna dikɛnda. Tɔsɛdingole ambola watanema l’etatelo  k’odingɔ 13,  15, ndo  17.

13-14. Onde dikumanyi kitanyiyaka ɛlɛmbɛ wa lɛɛta walɔmba dia mbutɛ emboledi naka wambeya di’onto ɔmɔtshi ambolanya ɔna dikɛnda? Lembetshiya.

 ¹³ Onde dikumanyi kitanyiyaka ɛlɛmbɛ wa lɛɛta walɔmba dia mbutɛ emboledi naka wambeya di’onto ɔmɔtshi ambolanya ɔna dikɛnda? Eelo. Lo ahole watanema ɛlɛmbɛ ɛsɔ, dikumanyi salaka la wolo dia nkitanyiya ɛlɛmbɛ wa lɛɛta walɔmba dia mbutɛ lɛɛta naka onto ambolanya ɔna dikɛnda. (Rɔmɔ 13:1) Ɛlɛmbɛ wa ngasɔ halɔshana l’ɛlɛmbɛ wa Nzambi. (Ets. 5:28, 29) Diakɔ diele etena keyawɔ di’onto ɔmɔtshi akeyana l’ɔna dikɛnda la wolo, dikumanyi nyangaka ɛlɔmbwɛlɔ aha la ntshimbatshimba dia nkitanyiya ɛlɛmbɛ wendana la mbewoya lɛɛta dui sɔ.

¹⁴ Etena kasawolawɔ la ɔnɛ losalewɔ kɔlɔ ndo ambushi ande kana onto tshɛ leya ɔnɛ  wakeyana la ɔna dikɛnda la wolo, dikumanyi mbaoholaka la ngandji tshɛ ɔnɛ vɔ wekɔ la lotshungɔ la mbutɛ ewandji wa lɛɛta dui sɔ. Ko kayotota naka kɛnɛ kahombawɔ mbutɛ lɛɛta mendanaka l’onto ɔmɔtshi la l’etshumanelo ndo dui diakɔ diambeyama le anto? Onde Okristo wakayota dui diakɔ koka ndjaoka dia nde ambɔtɛngamisha lokombo la Nzambi? Ndooko. Onto lakeyana la ɔna dikɛnda la wolo mbatɛngamisha lokombo la Jehowa.

15-16. a) Lo ndjela 1 Timɔte 5:19, lande na kalɔmbama ɛmɛnyi oko ehende ntondo ka dikumanyi nkenga kɔmite ka kilombo? b) Kakɔna kasala dikumanyi etena kawatɛwɔ ɔnɛ onto ɔmɔtshi la l’etshumanelo ambolanya ɔna dikɛnda?

 ¹⁵ L’etshumanelo, la ntondo ka dikumanyi nkenga kɔmite ka kilombo, lande na kalɔmbama ɛmɛnyi oko ehende? Dui sɔ diekɔ l’atei w’atɔndɔ wa lo Bible wendana la losembwe. Naka onto hashodi kɔlɔ kakandasale, wayɔlɔmba ɛmɛnyi ehende dia mbuta woho wele dikambo ntondo ka dikumanyi nkenga kɔmite ka kilombo. (Eoh. 19:15; Mat. 18:16; adia 1 Timɔte 5:19.) Onde dui sɔ nembetshiyaka dia ntondo ka mbewoya ewandji wa lɛɛta ɔnɛ onto ɔmɔtshi akeyana l’ɔna dikɛnda la wolo, paka tambodi ɛmɛnyi ehende? Ndooko. Hawɔlɔmbɛ dikumanyi kana anto akina dia nsala ngasɔ etena katomba dikambo sɔ kana etena kafundawɔ onto ɔmɔtshi l’ɔtɛ wa kɔlɔ kekina.

¹⁶ Etena keyawɔ ɔnɛ onto ɔmɔtshi la l’etshumanelo ambolanya ɔna dikɛnda, dikumanyi salaka la wolo dia nkitanyiya ɛlɛmbɛ wa lɛɛta wendana la mbewoya dui sɔ, oma laasɔ lo nkamba la kɛnɛ kata Bible wayoshikikɛ dia koka nkenga kɔmite ka kilombo. Naka onto hetawe kɛnɛ kofundawɔ, kete dikumanyi wayombola anto akina weya dui diakɔ. Naka anto oko ahende, mbuta ate ɔnɛ lakaye ndjota dui diakɔ ndo onto okina lakoka nshikikɛ dui sɔ kana awui akina wendana la mbeyana la ɔna dikɛnda la wolo wambota dia nde akasale dui sɔ, kete kɔmite ka kilombo kayokengama. * Naka ɔmɛnyi wa hende bu, kete dui sɔ hɛnya di’onto lakaye ndjota ekɔ kanga kashi. Oyadi ɛmɛnyi ehende bu dia nshikikɛ dia pɛkato kakasalema, dikumanyi koka mbeya ɔnɛ pɛkato ka woke kakasalema, pɛkato kakoka salɛ anto akina kɔlɔ efula. Dikumanyi wayotetemala nsamba ndo nkimanyiya wanɛ wakawasalɛ kɔlɔ. Ndo nto, dikumanyi diayotetemala monga la yambalo dia nkokɛ etshumanelo oma le onto lele ondo akalanya ɔna dikɛnda.​—Ets. 20:28.

17-18. Lembetshiya kɛnɛ kasala kɔmite ka kilombo.

 ¹⁷ Kakɔna kasala kɔmite ka kilombo? Tshɛkɛta “kilombo” halembetshiya dia dikumanyi nomboshaka dia mbɔsa yɛdikɔ y’ɔnɛ ewandji wa lɛɛta pombaka mbisha onto lambolanya ɔna dilanya l’ɔtɛ wambondosekola ɔlɛmbɛ. Dikumanyi hawotshutshuya anto dia nkitanyiya ɛlɛmbɛ; vɔ tshikaka dia lɛɛta nkandola akambo wendana l’enongo. (Rɔmɔ 13:2-4; Tito 3:1) Koko, dikumanyi mbɔsaka yɛdikɔ dia kana ɔnɛ losadi pɛkato ka woke ayotshikala l’etshumanelo kana bu.

¹⁸ Etena kele dikumanyi lo kɔmite ka kilombo, ɔkɛndɛ awɔ mendanaka l’awui wa lo nyuma kana w’ɔtɛmwɛlɔ. Lo nɔmbɔma l’Afundelo, vɔ shikikɛka dia kana onto lakalanya ɔna ekɔ lo ndjatshumoya kana bu. Naka nde hayatshumoya, kete nde ayotshanyema ndo wayosha diewoyelo l’etshumanelo. (1 Kɔr. 5:11-13) Naka nde ndjatshumoya, kete nde koka ntshikala Ɔmɛnyi wa Jehowa. Koko, dikumanyi  wayowotɛ ɔnɛ ondo nde hakokaki pondjo nongola diɛsɛ dimɔtshi l’etshumanelo kana mɛmba ɔkɛndɛ akɔna tshɛ l’etshumanelo. Laadiko dia ndjakiyanya dikambo dia yoonge y’ana wakɛnda, dikumanyi koka mpɛmɔla lo woshɛshɛ ambutshi wa l’etshumanelo wele l’ana wakɛnda dia vɔ pombaka monga sso wolo etena kele anawɔ suke l’onto ɔsɔ. Etena kahɛmɔlawɔ ambutshi, dikumanyi pombaka monga la yambalo diaha mbuta nkombo ya wanɛ wosalewɔ kɔlɔ.

19-22. Kakɔna kakoka ambutshi nsala dia nkokɛ anawɔ? (Enda osato wele lo lohoso.)

¹⁹ Waa na wele l’ɔkɛndɛ wa nkokɛ ana oma lo waale? Ambutshi. * Ananyu wekɔ woshasha w’oma le Nzambi, “etenyi k’okitɔ k’oma le Jehowa.” (Os. 127:3) Nyu mbele l’ɔkɛndɛ wa nkokɛ ana asɔ. Kakɔna kahombanyu nsala dia nkokɛ ananyu diaha vɔ mbalanya?

²⁰ Ntondotondo, eka awui wendana la wanɛ walanya ana. Eya weho w’anto walanya ana ndo totshelo takambawɔ la tɔ dia mbakesa. Nyongake la yambalo otsha le anto wakoka monga waale. (Tok. 22:3; 24:3) Nyohɔ dia mbala efula, onto lalanya ɔna dikɛnda ekɔ onto lele ɔna okoweyaka ndo okoyaɛkɛka le nde.

²¹ Dui dia hende ele, nyosawolake dimɛna l’ananyu. (Eoh. 6:6, 7) Dui sɔ nɔmbaka nto dia monga ompokami wa dimɛna. (Jak. 1:19) Nyohɔ dia mbala efula ana w’akɛnda wakawalanya mbokaka wɔma mbuta dui sɔ. Ɔna koka mboka wɔma ɔnɛ hawotetawɔ kɛnɛ katande, kana ɔnɛ lakolanya mbeyaka mbodjangɛ diaha nde mbutɛ anto akina. Naka nyambɛna dui dimɔtshi dia kɔlɔ, kete la ngandji tshɛ nyowaoke ambola ndo oma laasɔ nyohokame ekadimwelo awɔ.

²² Dui dia sato ele, nyetsha ananyu. Nyowate kɛnɛ kahombawɔ mbeya lo dikambo di’awui wa dieyanelo. Nyowaetsha kɛnɛ kahombawɔ mbuta ndo nsala naka onto ɔmɔtshi olanga mbakimɛ lo yoho yahasungana. Nyokambe l’awui washa okongamelo wa Jehowa wendana la woho wa nkokɛ ananyu.​—Enda kiombo yele l’ɔtɛ a dui ɔnɛ: “ Yaetsha wɛmɛ ndo etsha anayɛ.”

23. Ngande wɔsaso mbeyana l’ɔna dikɛnda la wolo, ndo dimbola diakɔna diayokadimɔma lo sawo diayela?

²³ Oko weso Ɛmɛnyi wa Jehowa, sho mbɔsaka dia mbeyana l’ɔna dikɛnda la wolo ekɔ pɛkato ka woke ndo dui dia kɔlɔ efula. Lo nɔmbɔma la ɔlɛmbɛ wa Kristo, sho hatokokɛ wanɛ weyana l’ana w’akɛnda la wolo dia vɔ diɛnɛ l’etombelo w’oma lo pɛkato yawɔ. L’etena kɛsɔ, akokaso nsala dia nkimanyiya wanɛ wakaweyana la wɔ la wolo? Sawo diayela diayokadimola dimbola sɔ.