Kɛnɛ kele mɛtɛ lo dikambo dia nshi yayaye
Onde wɛ atayambolaka kɛnɛ katokongɛ lo nshi yayaye? Bible mɛnyaka awui w’ohomba watokongɛ lo nshi yayaye wayonga la nshɛngiya le anto tshɛ wa la nkɛtɛ.
Yeso akɛnya woho “[wayoteya] dia Diolelo dia Nzambi diaya suke.” (Luka 21:31) Nde akatatshi ndo awui akina wayosalema, ɛnyɛlɔ ata, adidimu wa nkɛtɛ wa wolo, ndjala ya kasha ndo elando, mbuta ate awui wɛnaso ɛlɔ kɛnɛ.—Luka 21:10-17.
Ndo nto, Bible totɛka dia lo “nshi y’ekomelo” k’ɛlɔmbwɛlɔ k’ana w’anto, anto wayoleka monga la dionga dia kɔlɔ. Wɛ koka mbadia awui akɔ lo 2 Timɔte 3:1-5. Etena kɛnayɛ waonga ndo etsha ɛsɔ, aha la taamu wɛ mbetawɔka dia prɔfɛsiya ka lo Bible kɛsɔ mbɔtɔnɛka tshɛ lo tshɛ la kɛnɛ kasalema ɛlɔ kɛnɛ.
Kakɔna kalembetshiya dui sɔ? Keema edja, Diolelo diaki Nzambi diayanga nsala etshikitanu wa weke wayolowanya nsɛnɔ y’anto lanɛ la nkɛtɛ. (Luka 21:36) Lo Bible, Nzambi ndakaka awui w’amɛna wayosalema la nkɛtɛ lo dikambo dia wanɛ wayɔsɛna lɔkɔ. Tende bɛnyɛlɔ dimɔtshi.
ƆNƆMBƆDI W’OSHIKA
“Ko wakawosha [Yeso] lowandji, kɛnɛmɔ ndo diolelo, dia anto, wedja ndo elui w’ɛtɛkɛta tshɛ mbokambɛ. Lowandji lande lekɔ lowandji la pondjo lahateta ndo diolelo diande hadiotolanyema.”—DANYƐLƐ 7:14.
Kɛnɛ kalembetshiya dui sɔ: Wɛ koka monga la lɔsɛnɔ l’ɔngɛnɔngɛnɔ l’ɛse ka lowandji loleki tshɛ la l’andja w’otondo lakasha Nzambi Ɔnande, lele Nkumekanga.
YOONGE YA DIMƐNA
“Ndooko onto lodjashi lɛkɔ layota ate: ‘Dimi lekɔ la hemɔ.’”—ISAYA 33:24.
Kɛnɛ kalembetshiya dui sɔ: Wɛ hatataki pondjo kana monga l’ɛkɔmɔ, wɛ ayɔsɛna pondjo pondjo.
WƆLADI WA TSHƐ
“Nde ekɔ lo nkomiya ata lo nkɛtɛ k’otondo.”—OSAMBO 46:9.
Kɛnɛ kalembetshiya dui sɔ: Waale ndo asui tshɛ waya oma lo ta hawotonga nto.
NKƐTƐ KAYOLOLA L’ANTO W’ƐLƆLƆ
“Kanga kɔlɔ hatonga nto . . . akanga wa memakana wayokita nkɛtɛ.”—OSAMBO 37:10, 11.
Kɛnɛ kalembetshiya dui sɔ: Anto wa kɔlɔ hawotonga nto, paka anto walomɔlomɔ dia nkitanyiya Nzambi mbayonga.
NKƐTƐ K’OTONDO KAYOYALA PARADISO
“Vɔ wayoka mvudu ko wayodjasɛka lɔkɔ, ndo vɔ wayokamba dikambɔ dia vinyɔ ko wayɔlɛka elowa w’oma lɔkɔ.”—ISAYA 65:21, 22.
Kɛnɛ kalembetshiya dui sɔ: Nkɛtɛ k’otondo kayonga dihole di’olangala efula. Nzambi ayokotsha dɔmbɛlɔ diaso dia lolango lande salema “la nkɛtɛ.”—Mateo 6:10.
