Naa lokombo la Nzambi? Nzambi ndamɛ mbutaka ate: “Dimi kele Jehowa. Ɔsɔ kele lokombo lami.” (Isaya 42:8) Lokombo l’oshika laki Nzambi tanemaka mbala oko 7 000 lo Bible. Koko, dikadimwelo efula dia Bible pɛnyaka lokombo la Nzambi lo yoho ya kɔlɔ la nkombo ya lɔtɛtɛmɔla, ɛnyɛlɔ “Nkumadiɔndjɔ.” Nzambi nangaka wɛ monga ɔngɛnyi ande, diakɔ diakokeketshande dia wɛ ‘mbelɛ lokombo lande.’​—Os 105:1.

Nkombo ya lɔtɛtɛmɔla yaki Jehowa. Bible tɛkɛtaka dikambo dia Jehowa lo mbeelɛ lo nkombo ya lɔtɛtɛmɔla ya yela nyɛ: “Nzambi,” “Kanga-Wolo-Tshɛ,” “Otungi,” “Shɛso,” “Nkumadiɔndjɔ,” ndo “Nkum’Olongo.” Ekɔ alɔmbɛlɔ efula wele lo Bible wele wekɔ  lo nɔmba Jehowa lo nkamba la nkombo yande ya lɔtɛtɛmɔla la dilɛmiɛlɔ tshɛ ndo la lokombo lande l’oshika, mbuta ate Jehowa.​—Danyɛlɛ 9:4.

Woho wele Nzambi. Nzambi ekɔ nyuma kahɛnama. (Joani 4:24) Bible shikikɛka dia “ndooko onto lakɛnyi Nzambi.” (Joani 1:18) Bible mɛnyaka woho wayaokande. Anto kokaka mbonyangiya kana ‘mbɔngɛnyangɛnya.’​—Tokedi 11:20; Osambo 78:40, 41.

Waonga w’amɛna waki Nzambi. Nzambi keema la shɔnɔdi otsha le anto wa weoho tshɛ ndo w’oma l’ahole tshɛ. (Etsha 10:34, 35) Nde ekɔ nto ‘kanga kɛtshi ndo mbokanaka kandji, hoke nkɛlɛ esadi ndo ndola tɔɔ la ngandji ka kɔlamelo ndo la mɛtɛ.’ (Etombelo 34:6, 7) Koko, Nzambi ekɔ la waonga anɛi waleka tokutola le nde.

Wolo. Lam’ele nde ekɔ “Nzambi Kanga-Wolo-Tshɛ,” nde ekɔ la wolo waha bu l’elelo dia nkotsha daka tshɛ dialakande.​—Etatelo 17:1.

Lomba. Lomba laki Nzambi ndeka l’onto tshɛ. Diakɔ diata Bible ɔnɛ nde ‘ndamɛ oto mbele kanga lomba.’​—Rɔmɔ 16:27.

Losembwe. Nzambi mbutaka mɛtɛ lushi tshɛ. Etsha ande wekɔ “kokele,” ndo nde “keema la wɛngɛngɛ.”​—Eohwelo k’Ɛlɛmbɛ 32:4.

Ngandji. Bible mbutaka dia “Nzambi ekɔ ngandji.” (1 Joani 4:8) Nzambi hɛnya tsho ngandji, koko ngandji kekɔ tshondo ya lonto lande. Dionga diande dioleki woke sɔ mongaka la shɛngiya l’akambo tshɛ watshande ndo dui sɔ diekɔ la wahɔ efula le so lo toho efula.

Woho wɔtɔ Nzambi lɔngɛnyi l’anto. Nzambi ekɔ Shɛso ka ngandji kele l’olongo. (Mateo 6:9) Naka sho monga la mbetawɔ le nde, kete sho kokaka monga angɛnyi ande. (Osambo 25:14) Diakɔ diele, Nzambi tɔlɔmbaka dia ndjasukanya lande lo dɔmbɛlɔ ndo sho ‘nkitsha ekiyanu aso tshɛ le nde, nɛ dia nde ndjakiyanyaka dikambo diaso.’​—1 Petero 5:7; Jakɔba 4:8.

Yeso keema Nzambi. Yeso ekɔ tshɔi y’onto yakatongama mbala kakɔ ɔtɔi oma le Nzambi. Diakɔ diele Bible mbelɛka ɔnɛ Ɔna Nzambi. (Joani 1:14) L’ɔkɔngɔ wa ntonga Yeso, Jehowa akakambe la ɔnande l’enondo ɔsɔ oko “okambi wa kɔmba” dia ntonga diangɔ dikina tshɛ ndo anto akina tshɛ.​—Tokedi 8:30, 31; Kɔlɔsayi 1:15, 16.

 Ndooko lushi lakate Yeso Kristo dia nde ekɔ Nzambi. Koko, nde akate ate: “Dimi lekɔ onyimpala w’oma le nde [Nzambi] ndo Nde mbakantome.” (Joani 7:29) Etena kakatɛkɛtaka Yeso l’ambeki ande, nde akelɛ Jehowa ate: “Papa kami ndo Papa kanyu” ndo “Nzambi kami ndo Nzambi kanyu.” (Joani 20:17) L’ɔkɔngɔ wa Yeso mvɔ, Jehowa akawolola dia tɔsɛna l’olongo ndo akawosha lowandji l’efula lo lonya Lande l’omi.​—Mateo 28:18; Etsha 2:32, 33.

Yeso Kristo koka kokimanyiya dia ndjasukanya la Nzambi

Yeso akaye la nkɛtɛ dia ndjotetsha awui wendana la She. Jehowa akate lo dikambo dia Yeso ate: “Ɔnɛ ele Ɔnami, ɔnɛ lokami ngandji. Nyoohokamee.” (Makɔ 9:7) Yeso mbeyaka Nzambi dimɛna efula, ndeka onto tshɛ. Nde akate ate: “Ndooko onto leya Papa paka Ɔna, ndo onto tshɛ lele Ɔna nangaka mbosholɛnde.”​—Luka 10:22.

Yeso akakɛnɛmɔlaka waonga waki Nzambi lo yoho ya kokele. Yeso akokoyaka waonga waki She tshɛ lo tshɛ, diakɔ diakandakoke mbuta ɔnɛ: “Onto tshɛ lambɔmɛna ambɛna ndo Papa.” (Joani 14:9) Yeso akakimanyiya anto dia ndjasukanya la Nzambi lo nkɛnɛmɔla ngandji ka She l’ɛtɛkɛta ndo l’etsha ande. Nde akate ate: “Dimi lekɔ mboka, mɛtɛ ndo lɔsɛnɔ. Ndooko onto laya le Papa paka lo tshimbo yami.” (Joani 14:6) Nde akate nto ate: “Atɛmɔdi wa mɛtɛ wayɔtɛmɔla Papa lo nyuma ndo lo mɛtɛ, nɛ dia lo mɛtɛ, Papa anto wa ngasɔ kayangande dia mbɔtɛmɔla.” (Joani 4:23) Ohokanyiya dui sɔ! Jehowa ekɔ lo nyanga anto wele oko wɛ wakombola dia mbeya akambo wa mɛtɛ wendana la nde.