• Sɔnama oma le Nzambi. “Dimɛ lambokitsha nkumekanga kami . . . dimi layokosha wedja oko etenyi kayɛ k’okitɔ ndo tokoma ta nkɛtɛ oko ɛngɔ kayɛ.”​—Osambo 2:6, 8.

• Monga okitɔ wa Nkumekanga Davidɛ. “Wambotootɛ ɔna, wambotosha ɔna pami . . . Lowandji lande layotahamaka tsho ndo wɔladi hatonga la ekomelo, lo kiti ka lowandji ka Davidɛ ndo lo diolelo diande dia dishikikɛ nge.”​—Isaya 9:6, 7.

• Mbotɔ la Bɛtɛlɛhɛma. “Wɛ Bɛtɛlɛhɛma . . . , oma le yɛ kayotomba ɔnɛ layonga omboledi . . . Woke woke ande wayokoma lo tokoma ta nkɛtɛ.”​—Mika 5:2, 4.

• Mbikashema ndo ndjakema oma le anto. “Nde akɔnyɔma ndo takawɔshi oko onto l’anyanya. . . . Nde akongɔma dikɔnga l’ɔtɛ wa kɔlɔ yaso; nde akaminɔma l’ɔtɛ wa munga yaso.”​—Isaya 53:3, 5.

• Mbolɔma oma lo nyɔi ndo kitshama lo dihole dia lotombo oma le Nzambi. “Wɛ hatontshika lo Diombo. Wɛ hatetawɔ dia okambi ayɛ wa kɔlamelo mɛna difuku. . . . Ndo ɔngɛnɔngɛnɔ mongaka lo lonya layɛ l’omi pondjo pondjo.”​—Osambo 16:10, 11.

Lo ɔkɔndɔ w’ana w’anto tshɛ, ekɔ paka onto ɔtɔi mbakotsha awui walɔmbama dia monga owandji wa dimɛna ndo onto akɔ ko Yeso Kristo. Lo wedi okina, ondjelo ɔmɔtshi akatɛ Mariya nyango Yeso ɔnɛ: “Nzambi ayowosha kiti ka lowandji ka Davidɛ she, . . . ndo Diolelo diande hadiotonga l’ekomelo.”​—Luka 1:31-33.

Yeso atongaka ɔnɔmbɔdi la nkɛtɛ. Koko, nde ayɔlɔmbɔla anto oma l’olongo oko Nkumekanga ka Diolelo diaki Nzambi. Kakɔna kayowetsha Ɔnɔmbɔdi w’oshika? Tɔsɛdingole kɛnɛ kakasale Yeso etena kakinde la nkɛtɛ.

•   Yeso akayakiyanyaka dikambo di’anto. Yeso akakimanyiya apami ndo wamato, akɛnda ndo epalanga, oyadi dioho diawɔ kana lokumu laki lawɔ. (Mateo 9:36; Makɔ 10:16) Etena kakɔsɛngasɛnga kanga sudi ate: “Ɔnkɔnɔlɛ naka wɛ alanga,” Yeso akanandema la kɛtshi ndo akɔkɔnɔla.​—Makɔ 1:40-42.

• Yeso akatetsha woho wa ngɛnyangɛnya Nzambi. Nde akate ate: “Nyu hanyokoke kambɛ Nzambi la ɛngɔnyi olimu oko ɛhɔmbɔ.” Nde akate nto dia sho pombaka salɛ anto akina kɛnɛ kalangaso vɔ tosalɛ. Laadiko a laasɔ, nde akɛnya dia Nzambi hayasha tsho lo kɛnɛ katshaso koko nde ndjashaka ndo lo kɛnɛ kakanyiyaso ndo woho wayaokaso. Ɔnkɔnɛ dia ngɛnyangɛnya Nzambi, sho pombaka mbahemɛ nsaki ya l’etei k’otema aso. (Mateo 5:28; 6:24; 7:12) Ndo Yeso akatɔtɔmiya dia naka talanga monga l’ɔngɛnɔngɛnɔ wa mɛtɛ, sho pombaka mbeka dia nsala kɛnɛ kakombola Nzambi dia nsala ndo oma laasɔ ko sho kisala.​—Luka 11:28.

• Yeso aketsha kɛnɛ kalembetshiya mbokana ngandji. Ɛtɛkɛta waki Yeso ndo kɛnɛ kakandasalaka kaki la shɛngiya ya wolo efula ndo wakanandaka etema w’ampokami ande. “Elui w’anto wakaambe efula lo yoho yande ya mbetsha, nɛ dia nde akawaetshaka oko onto lele la lowandji.” (Mateo 7:28, 29) Nde akawaetsha ɔnɛ: ‘Nyolange atunyi anyu.’ Nde akalɔmbɛ ndo lo wahɔ wa anto amɔtshi waki lo kiɔkɔ ya nyɔi kande ate: “Papa, dimanyiyawɔ, nɛ dia vɔ haweye kɛnɛ kasalawɔ.”​—Mateo 5:44; Luka 23:34.

Yeso mɛtɛ mbele l’akoka wa monga Ɔnɔmbɔdi wa kokele w’andja wayokimanyiya anto ndo wayowasalɛ akambo la ngandji. Ko etena kakɔna kayondotatɛ nɔmbɔla?