Lo yoho mɔtshi, sho tshɛ tekɔ lo nsɛna lo etena kayanga ndja “lɔpɛpɛ la wolo” la lanya lɔsɔ lakelɛ Yeso ɔnɛ “mfɔnu ka woke.” (Mateo 24:21) Sho hatokoke ntshɔ dihole dimɔtshi dia mbewɔ mfɔnu ka woke. Koko sho koka nsala dui dimɔtshi dia ndjakokɛ. Naa dui diakɔ?

Lo dako diande dia lo Dikona, Yeso Kristo akasha dako nɛ: “Diakɔ diele, nyotetemale nyanga ntondo Diolelo la losembwe laki Nzambi.” (Mateo 6:33) Ngande wasalaso dui sɔ?

Ele lo nyanga ntondo Diolelo diaki Nzambi. Kɛsɔ nembetshiyaka dia sho pombaka mbɔsa Diolelo diaki Nzambi oko dui dioleki ohomba le so oleki dui dikina tshɛ. (Mateo 6:25, 32, 33) Lande na kahombaso mbodiɔsa lo yoho shɔ? Nɛ dia anto bu l’akoka wa nkandola ekakatanu wahomana la wɔ l’andja ɔnɛ. Paka Diolelo diaki Nzambi mbakoka nkandola ekakatanu ɛsɔ.

Ele lo nyanga losembwe lande. Sho pombaka nsala kɛnɛ tshɛ kakokaso nsala dia nsɛna lo ndjela ɛlɛmbɛ ndo atɔndɔ wosembwe waki Nzambi. Lande na? Nɛ dia naka sho shoamɛ nsɔna kɛnɛ kele ɔlɔlɔ kana kɛnɛ kele kɔlɔ, kete etombelo wayonga kɔlɔ. (Tokedi 16:25) Lo wedi okina, naka sho nsɛna lo ndjela atɔndɔ wa Nzambi, kete aha Nzambi oto mbayotɔngɛnyangɛnya koko tayoyakondjɛ ndo shoamɛ wahɔ.​—Isaya 48:17, 18.

Tetemala nyanga ntondo Diolelo diaki Nzambi ndo losembwe lande. Yeso akatɔhɛmɔla lo mbuta  dia anto amɔtshi mbeyaka mbekola timba, lo mfɔnya dia vɔ koka ntana ekokelo lo nyanga dia monga la falanga efula. Akina mbeyaka mbetawɔ mɛnama l’ekiyanu wa lo lɔsɛnɔ polo ndo lo ndjoshishɛ etena ka nyanga Diolelo diaki Nzambi.​—Mateo 6:19-21, 25-32.

Koko, Yeso akalake dia wanɛ wasukɛ Diolelo diaki Nzambi wayokondja kɛnɛ kele la wɔ ohomba kakianɛ ndo wayoyɔngɛnangɛna l’ɛtshɔkɔ wahakomɛ wa lo nshi yayaye.​—Mateo 6:33.

Kaanga mbakayangaka ambeki waki Yeso wa lo ntambe ka ntondo Diolelo diaki Nzambi ndo losembwe lande ntondotondo, vɔ kɔmɛna ekomelo ka paa tshɛ ndo k’asui lo nshi yakawasɛnaka. Koko vɔ wakakokamɛ. Lo woho akɔna?

Vɔ wakasɛnaka lo ndjela atɔndɔ wa Nzambi wosembwe ndo kɛsɔ mbakaakokɛka oma l’ekakatanu w’oma le wanɛ wakatone kɛnɛ kata Nzambi. Vɔ waki la mbetawɔ ka wolo k’ɔnɛ Diolelo diayowakimanyiya dia mbikikɛ oyadi ekakatanu woleki tshɛ wolo. Ndo Nzambi akawasha “wolo woleki wɔnɛ wokongaka l’onto” dia vɔ ndɔshana lawɔ.​—2 Kɔrɛtɔ 4:7-9.

Akristo wa lo ntambe ka ntondo wakakitanyiya didjango diaki Yeso dia nyanga ntondo Diolelo. Vɔ wakasambisha lokumu l’ɔlɔlɔ la Diolelo lo bɛtshi diawɔ dia nkɛtɛ. (Kɔlɔsayi 1:23) Onde anto amɔtshi wekɔ lo nsala dui sɔ ɛlɔ kɛnɛ?

Eelo! Ɛmɛnyi wa Jehowa mbeyaka dia ambotshikala paka etena ka tshitshɛ keto la ntondo ka Nzambi nkomiya dikongɛ di’akambo nɛ. Diakɔ diele vɔ wekɔ lo nsala tshɛ kakokawɔ nsala dia nsɛna lo ndjela ɛtɛkɛta wa Yeso ɛnɛ: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.”​—Mateo 24:14.

Ngande wendanayɛ la lokumu l’ɔlɔlɔ? Tambokokeketsha dia mbokoya anto waki lo ntambe ka ntondo wakadjasɛka la Makɛdɔniya, osomba wa Bɛrɔya. Etena kakawoke lokumu l’ɔlɔlɔ la Diolelo oma le ɔpɔstɔlɔ Pɔɔlɔ, vɔ waketawɔ losango lande “la nsaki k’efula.” Oma laasɔ, vɔ ‘wakasɛdingolaka Afundelo la yambalo tshɛ’ dia menda kana kɛnɛ kakawekaka kaki mɛtɛ, ko wakasale akambo lo ndjela kɛnɛ kakaweke.​—Etsha 17:11, 12.

Wɛ lawɔ koka nsala woho akɔ waamɛ. Lo nyanga ntondo Diolelo diaki Nzambi ndo losembwe lande, wɛ ayotana dihole di’eshamelo ndo di’ekokelo nshi nyɛ ndo ayoyɔngɛnangɛna la wɔladi wa pondjo ndo lotui tshitshi lo nshi yayaye.