Nzambi akatɛ Adama ate: “Lushi layoyɔlɛ, wɛ ayovɔ ndooko onyake.” (Etatelo 2:17) Otondonga Nzambi akatonge Adama dia ntshunda osombe ndo mvɔ, tshike totondowodjɛ ɔlɛmbɛ ɔsɔ. Adama akeyaka dia otondonga nde kɔndɛ olowa w’oma l’osongo ɔsɔ, tshike totondovɔ.

Adama l’Eva takiwɔ l’ohomba wa ndɛ olowa ɔsɔ dia ntshikala la lɔsɛnɔ, nɛ dia esongo wakatɔka elowa waki efula l’ekambɔ k’Ɛdɛna. (Etatelo 2:9) Otondonga vɔ kɔndɛ olowa wa l’osongo ɔsɔ, atshukanyi wa ntondo asɔ wotɛnya okitanyiya awɔ le Ɔnɛ lakawasha lɔsɛnɔ. Vɔ wotɛnya nto dia vɔ wakeyaka lotshungɔ lele la Nzambi la mbalɔmbɔla.

Dia mbeya lande na kakavu Adama l’Eva, sho pombaka mbidja yimba lo sawo diakonge la shɛngiya le so sho tshɛ. Satana Diabolo akakambe l’oloyi dia mbuta kashi kɛmɔtshi ka kɔlɔ efula. Bible mbutaka ɔnɛ: “Oloyi aki la yewo ndeka nyama ya l’okonda tshɛ yakatonge Jehowa Nzambi. Ko vɔ wakambola womoto ɔnɛ: ‘Onde lo mɛtɛ mbakanyotɛ Nzambi ate tanyɔlɛke elowa w’oma l’esongo tshɛ wele lo ekambɔ?’”​—Etatelo 3:1.

Ko Eva akakadimola ate: “Sho kokaka ndɛ elowa w’oma l’esongo wele lo ekambɔ. Koko Nzambi akatotɛ lo kɛnɛ kendana la elowa w’oma l’osongo wele l’atei w’ekambɔ ate: ‘Tanyɔlɛke ndo tanyonandake, nyotokovɔ.’” Ko, oloyi akawotɛ ate: “Hanyotovɔ mɛ! Nɛ dia Nzambi mbeyaka ɔnɛ lushi layonyɔlɛ elowa w’oma lɔkɔ, washo anyu wayodihɔ ko nyayoyala oko Nzambi, ndo nyayeya kɛnɛ kele ɔlɔlɔ la kɛnɛ kele kɔlɔ.” Lo mbuta ngasɔ, Satana akɛnya dia Jehowa aki kanga kashi, nde akadime Adama l’Eva ɛngɔ kɛmɔtshi ka dimɛna.​—Etatelo 3:2-5.

Eva aketawɔ kɛnɛ kakawotɛ oloyi. Nde akende osongo akɔ. Vɔ waki dimɛna ndo olangala efula! Nde akatshu, akakɔhɔla olowa ɔmɔtshi ndo akatatɛ ndɛ. Bible mbutaka ɔnɛ: “L’ɔkɔngɔ diko, nde akayosha ndo omɛnde etena kakandayonga kaamɛ la nde, ko omɛnde akatatɛ ndɛ.”​—Etatelo 3:6.

Ande woho wakanyange Nzambi lo mɛna woho waketawɔ anande wa ngandji la lolango diaha mbokitanyiya lee! Akandasale? Jehowa akatɛ Adama ate: “[Wɛ a]yokalola lo nkɛtɛ, nɛ dia oma lɔkɔ mbakayɔsama. Wɛ ekɔ ditshu ndo wɛ ayokalola lo ditshu.” (Etatelo 3:17-19) Diakɔ diele “nshi tshɛ ya lɔsɛnɔ laki Adama yaki ɛnɔnyi 930, ko nde akavu.” (Etatelo 5:5) Adama kotshɔ l’olongo kana l’asombo. Nde komonga la lɔsɛnɔ ntondo ka Jehowa mbotonga oma lo ditshu dia nkɛtɛ. Diakɔ diele etena kakandavu, nde komonga la lɔsɛnɔ nto  oko wele ditshu di’oma lɛnɛ akandatongama. Nde komonga nto. Ande lonyangu lee!

Adama l’Eva wakashisha eongelo kawɔ ka kokele l’ɔtɛ wakawahindola ɔlɛmbɛ wa Nzambi l’okonda tshɛ ndo wakashisha elongamelo ka sɛnaka pondjo pondjo. Demba diawɔ diakatshikitana; wakayala anto wele bu kokele, atshi wa pɛkato. Koko ohindodi awɔ komonga la shɛngiya le wɔ vwamɛ. Vɔ wakasambiyɛ tokanula tawɔ eongelo kele keema kokele. Rɔmɔ 5:12 mbutaka ɔnɛ: “Oko wakɔtɔ pɛkato l’andja oma le onto 1 [Adama] ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”

Bible tɛkɛtaka dikambo dia pɛkato la nyɔi oko “ɛngɔ kakomba anto tshɛ ndo okombɔ wafɛ wedja tshɛ.” (Isaya 25:7) Ɛngɔ kakomba anto kɛsɔ kekɔ oko lɔlɛngɔ lahakoke onto mbewɔ. Lo mɛtɛ “anto tshɛ [wekɔ lo mvɔ] oma le Adama.” (1 Kɔrɛtɔ 15:22) Dimbola diambɔma diekɔ oko nɛ diakambola ɔpɔstɔlɔ Pɔɔlɔ ɔnɛ: “Onto akɔna ayontshungola oma lo demba nɛ diayonkonya lo nyɔi?” Onde ekɔ onto ɔmɔtshi lakakoke nsala dui sɔ?​—Rɔmɔ 7:24.