AHA woho wele lɔsɛnɔ ɛlɔ kɛnɛ mbakasangoya Nzambi dia lɔ monga. Nkɛtɛ kotohomba ndola l’anto wetawɔ nɔmbwama oma le Otungi awɔ, nkondja wahɔ oma lo ɛlɔmbwɛlɔ kande ndo mbokoya ngandji kande ndo waonga ande akina w’amɛna efula. Nzambi akalange dia vɔ monga l’ɔngɛnɔngɛnɔ lo nkamba kaamɛ dia mbodia anawɔ, mbishola diangɔ di’eyoyo ndo mbetɛ nkɛtɛ k’otondo paradiso.

• “Nde ekɔ lo nkomiya ata lo nkɛtɛ k’otondo.”​—Osambo 46:9.

• “Etena kakashikikɛma kakakoke ka . . . ndanya wanɛ walanya nkɛtɛ.”​—Ɛnyɛlɔ 11:18.

• “Ndooko onto lodjashi lɛkɔ layota ate: ‘Dimi lekɔ la hemɔ.’”​—Isaya 33:24.

• “Ɛsɔnami ami wayɔngɛnangɛnaka lo yɛdikɔ y’efula la olimu wa anya awɔ.”​—Isaya 65:22.

Ngande wayokotshama prɔfɛsiya shɔ? Nzambi akasɔnɛ Ɔnande Yeso dia monga nkumekanga ka lowandji la kokele layɔlɔmbɔla nkɛtɛ oma l’olongo. Bible mbelɛka lowandji lɔsɔ ɔnɛ Diolelo diaki Nzambi. (Danyɛlɛ 2:44) Bible mbutaka lo dikambo dia Yeso ɔnɛ: “Nzambi ayowosha kiti ka lowandji . . . ko nde ayonga Nkumekanga.”​—Luka 1:32, 33.

Lam’akinde la nkɛtɛ, Yeso akasale ahindo efula, dui sɔ mɛnyaka dia lɔsɛnɔ l’anto layoleka monga dimɛna etena kayondɔlɔmbɔla oko nkumekanga.

• Yeso akakɔnɔla weho tshɛ wa hemɔ dia mɛnya woho wayondonya dikɔmɔ tshɛ diele l’anto.​—Mateo 9:35.

• Nde akɔladia ndjale, dia mɛnya woho wayondokokɛ anto oma lo mpokoso y’oma lo diangɔ diakatongama.​—Makɔ 4:36-39.

• Nde akalesha nunu di’anto, dia mɛnya woho wayondosha anto kɛnɛ kele ohomba lo lɔsɛnɔ.​—Makɔ 6:41-44.

• Nde akakadimola ashi wanu lo fɛtɛ ka diwala, dia mɛnya woho wayondokimanyiya anto dia ngɛnangɛna la lɔsɛnɔ.​—Joani 2:7-11.

Ngande wakokayɛ nkondja lɔsɛnɔ lalɔngɔsɔlɛ Nzambi anto wawoka ngandji? Wɛ pombaka nkɛndakɛnda lo mboka kɛmɔtshi. Bible mɛnyaka dia ɔsɔ ekɔ “mboka . . . ka[tɔla] lo lɔsɛnɔ. Anto yema tshitshɛ tsho mbatokiɛnaka.”​—Mateo 7:14.

Mboka katɔla lo lɔsɛnɔ kɛdikɛdi na? Nzambi mbutaka ɔnɛ: “Dimi Jehowa kele Nzambi kayɛ, Ɔnɛ latoketshaka dikambo dia wahɔ ayɛ, Ɔnɛ lakɔlɔmbɔla lo mboka kahombayɛ nkɛndakɛnda.” (Isaya 48:17) Naka wɛ ndjela dako sɔ, kete wɛ ayonga la lɔsɛnɔ loleki dimɛna.

Yeso akate ate: “Dimi lekɔ mboka, mɛtɛ ndo lɔsɛnɔ. Ndooko onto laya le Papa paka lo tshimbo yami.” (Joani 14:6) Naka sho mbetawɔ akambo wa  mɛtɛ waketsha Yeso ndo mbokoya ɛnyɛlɔ kakandatotshikɛ, kete sho kokaka ndjasukanya la Nzambi ndo lɔsɛnɔ laso layoleka monga dimɛna.

Ngande wakokayɛ ntana mboka k’otsha lo lɔsɛnɔ? Ɛtɛmwɛlɔ wekɔ efula, koko Yeso akahɛmɔla ɔnɛ: “Aha onto tshɛ latombelɛka ate: ‘Nkumadiɔndjɔ, Nkumadiɔndjɔ’ mbayɔtɔ lo Diolelo dia l’olongo, koko paka ɔnɛ latosalaka lolango la Papa lele l’olongo mbayɔtɔ.” (Mateo 7:21) Nde akate nto ate: “Nyayowaeya oma lo elowa awɔ.” (Mateo 7:16) Bible koka kokimanyiya dia mbeya ɔtɛmwɛlɔ wa mɛtɛ.​—Joani 17:17.

Ngande wakokayɛ ntatɛ nkɛndakɛnda lo mboka k’otsha lo lɔsɛnɔ? Wɛ pombaka mbeka akambo wendana la Onto lele lo kiɔkɔ ya lɔsɛnɔ: Onto akɔna ɔsɔ? Lokombo lande? Woho akɔna w’onto wende? Kakɔna kasalande? Kakɔna kalangande sho nsala? *

Nzambi nangaka di’anto nsala awui efula aha tsho ndɛ, nkɛnya kana nkenga nkumbo. Sho koka mbeya Otungi aso ndo monga ɔngɛnyi ande. Sho koka mɛnya ngandji kawokaso lo nsala lolango lande. Yeso akate ate: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ.”​—Joani 17:3.

Etena keyaso kɛnɛ kalanga Nzambi dia sho nsala, sho pombaka nsala etshikitanu. Dui sɔ koka monga okakatanu. Koko, lɔsɛnɔ laso layoleka monga dimɛna etena kayototatɛ nkɛndakɛnda lo mboka ka lɔsɛnɔ. Dia kokimanyiya dia nkondja ekadimwelo w’eshika lo ambola wendana la Nzambi, Ɛmɛnyi wa Jehowa mbekaka l’anto Bible ofele l’etena ndo lo dihole dialangayɛ. Wɛ kokaka tofundɛ lo sitɛ kaso ka www.pr418.com.