Lande na kalanga anto sɛnaka pondjo pondjo? Afundelo totɛka dia Nzambi akadje nsaki kɛsɔ l’etema aso. (Ondaki 3:11) Vɔ mbutaka nto dia “Nzambi ekɔ ngandji.” (1 Joani 4:8) Ko ngande wakoka Nzambi ka ngandji totonga la nsaki ka nsɛna pondjo pondjo, ko l’etena kakɔ kaamɛ nde nsala diaha nsaki kɛsɔ kotshama?

Lo mɛtɛ, ndooko onto lalanga mvɔ. Bible mɛnyaka dia nyɔi kekɔ “otunyi.” (1 Kɔrɛtɔ 15:26) Anto amɔtshi mvɔka akɛnda ndo akina ndjovɔka waya epalanga, koko kɛnɛ kele mɛtɛ ele, onto tshɛ ayovɔ. Anto efula mbokaka wɔma etena kakanyiyawɔ dui sɔ. Onde otunyi ɔsɔ ayɔlɛndjama lushi lɔmɔtshi? Onde dui sɔ kokaka salema?

Onde wɛ koka mamba dia mbeya ɔnɛ Nzambi kotonga anto la kanyi ya vɔ ndjovɔka? Etatelo, dibuku dia ntondo dia lo Bible mɛnyaka dia sangwelo diaki Nzambi aki di’anto sɛnaka pondjo pondjo la nkɛtɛ. Jehowa Nzambi akatonge nkɛtɛ l’oseka ɛngɔ tshɛ kele ohomba di’onto sɛnaka ndo monga l’ɔngɛnɔngɛnɔ. Oma laasɔ, nde akatonge Adama pami ka ntondo ndo akokitsha lo paradiso, mbuta ate l’ekambɔ k’Ɛdɛna. Ko, “Nzambi akende diangɔ tshɛ diakandasale, ko nde akɛnyi dia diɔ diekɔ amɛna efula.”​—Etatelo 1:26, 31.

 Adama akatongama kokele, l’efanelo ka Nzambi. (Eohwelo k’Ɛlɛmbɛ 32:4) Eva wadi aki Adama nde lawɔ aki kokele lo yimba ndo lo demba ndo nde komonga l’ɛkɔmɔ. Jehowa akawatɛ ate: “Nyootane, nyofulane, nyolodia nkɛtɛ ndo nyoyiole. Nyoole nse ya lo ndjale, ditongami diafumbɔ l’olongo ndo ditongami tshɛ diele la lɔsɛnɔ diakɛndakɛnda la nkɛtɛ.”​—Etatelo 1:28.

Akahombe mbɔsa etena k’otale di’Adama l’Eva ndodia nkɛtɛ. Eva akahombe mbota ana ndo ana akɔ wakahombe mbota ana, polo l’etena kakahombe nkɛtɛ ndola oko waki sangwelo dia Nzambi. (Isaya 45:18) Onde ekɔ dui dia lomba mfɔnya dia Jehowa akasha Adama l’Eva diɛsɛ sɔ, otondonga vɔ wakahombe nsɛna tsho dia mɛna anawɔ l’ekana awɔ ko pe, aha mbeya kɛnɛ kayowakomɛ?

Ohokanyiya nto di’olimu wakandawasha dia mbolɛ waa nyama. Nzambi akatɛ Adama dia mbɔlɛ waa nyama nkombo ndo dui sɔ diakahombe mbɔsa etena k’otale. (Etatelo 2:19) Koko, mbolɛ waa nyama akalembetshiyaka di’Adama akahombe mbeka akambo wendana la yɔ ndo mbeya woho wa ndjikokɛ. Dui sɔ diakahombe mbɔsa etena k’otale oleki etena kakandɔshi dia ndjiɔlɛ nkombo.

Ɔkɛndɛ wakawasha Nzambi dia ndodia nkɛtɛ ndo mbolɛ waa nyama mɛnyaka di’atshukanyi wa ntondo wakatongama dia nsɛna edja efula. Lo mɛtɛ, Adama akasɛnɛ edja efula.

Bible mɛnyaka di’anto amɔtshi wakasɛnɛ edja efula ndeka woho wotɔsɛna ɛlɔ kɛnɛ. Tɔ mbutaka ɔnɛ: “Nshi tshɛ ya lɔsɛnɔ laki Adama yaki ɛnɔnyi 930.” Oma laasɔ, tɔ mɛnyaka di’anto akina asamalo wakasɛnɛ ɛnɔnyi ndekana 900! Anto akɔ ko Sɛta, Ɛnɔshɛ, Kenana, Jarɛdɛ, Metusɛla ndo Nɔa. Vɔ tshɛ wakasɛnaka la ntondo ka Mvula k’elola ka lo nshi ya Nɔa ndo Nɔa akasɛnɛ ɛnɔnyi 600 la ntondo ka Mvula k’elola. (Etatelo 5:5-27; 7:6; 9:29) Ko lande na kakawasɛnaka edja efula ngasɔ?

Apami asɔ tshɛ wakotɔ yema tshitshɛ l’ɔkɔngɔ w’Adama l’Eva nshisha lɔsɛnɔ la kokele. Kɛsɔ mɛtɛ mbakasale dia vɔ nsɛna edja. Diɔtɔnganelo diakɔna diele lam’asa monga kokele la nsɛna edja? Ndo ngande wayodjama nyɔi otshumba? Dia ntana ekadimwelo, sho pombaka ntondo nshihodia lande na katshundaso ndo kavɔso.