Dako di’oma lo Bible: “Lo lɔsɛnɔ lanyu, tanyongake la ngandji ka falanga, koko nyɔngɛnangɛnake la kɛnɛ kele la nyu.”​—Hɛbɛru 13:5.

Ɛlɔ kɛnɛ, ekɔ diangɔ efula diata anto dia sho pombaka monga la diɔ. Koko Bible mbutaka dia sho koka “ngɛnangɛna la kɛnɛ kele la [so].” Lo nsala na?

Ewɔ “ngandji ka falanga.” Anto salaka akambo tshɛ oyadi wanɛ wakoka ndanya yoonge, nkumbo, lɔngɛnyi, lɔkɛwɔ ndo kaanga lokumu lawɔ l’ɔtɛ wa “ngandji ka falanga.” (1 Timɔte 6:10) Bu dimɛna nsala akambo lo yoho shɔ! Kɛnɛ kele mɛtɛ ele, anto walanga ɔngɔnyi “ha[wo]lotaki . . . pondjo.”​—Ondaki 5:10.

Anto ndeka diangɔ ohomba. Lo mɛtɛ, diangɔ dia l’emunyi koka monga ohomba efula. Koko diangɔ sɔ hadiokoke tooka ngandji kana taandola, paka anto mbakoka nsala awui asɔ. Monga la “ɔngɛnyi wa mɛtɛ” ayotokimanyiya dia ngɛnangɛna la lɔsɛnɔ.​—Tokedi 17:17.

Dako di’oma lo Bible: “Otema wele l’ɔngɛnɔngɛnɔ ekɔ okanga wa dimɛna.”​—Tokedi 17:22.

L’ɛnyɛlɔ ka “okanga wa dimɛna,” ɔngɛnɔngɛnɔ koka tokimanyiya dia mbikikɛ hemɔ. Ko ngande wakokaso monga l’ɔngɛnɔngɛnɔ etena keso la hemɔ?

Onga la lowando. Naka sho kanyiyaka paka dia ekakatanu aso eto, kete “nshi tshɛ” yayongaka kɔlɔ keto. (Tokedi 15:15) Lo dihole dia nsala ngasɔ, Bible mbutaka ɔnɛ, “nyɛnya dia nyekɔ la lowando.” (Kɔlɔsayi 3:15) Onga la lowando oyadi l’awui watotshitshɛ wakosalɛwɔ lo lɔsɛnɔ. Woho wonga wonya olangala etena katawadje, hiɛlɛlɛ ya dimɛna kana etena kakɔmɔnɛmɔnɛ onto ɔmɔtshi lokayɛ ngandji, awui asɔ koka kosha ɔngɛnɔngɛnɔ lo lɔsɛnɔ.

Salɛka anto akina akambo. Kaanga sho bu la yoonge ya dimɛna, teye dia “ɔngɛnɔngɛnɔ waya lo mbisha ndeka wa nongola.” (Etsha 20:35) Etena katoka anto akina losaka l’ɔtɛ wa kɛnɛ kakataasalɛ, tayoleka monga l’ɔngɛnɔngɛnɔ ndo hatotoleka nkanyiya dikambo di’ekakatanu aso. Sho koka monga la lɔsɛnɔ loleki dimɛna lo nkimanyiya anto akina dia ndo vɔ lawɔ monga la lɔ.

Dako di’oma lo Bible: “Nshikikɛ akambo woleki ohomba.”​—Filipɛ 1:10.

Wadi l’omi wahetsha wenya efula kaamɛ koka ndanya diɔtɔnganelo diele lam’asawɔ. Waomi ndo waa wadi pombaka mbɔsa awala awɔ oko dui dimɔtshi dioleki ohomba lo nsɛnɔ yawɔ.

Nyosalake akambo kaamɛ. Lo dihole dia onto l’onto nyanga wahɔ ande hita, “nyokongɛ dia salaka akambo kaamɛ.” Bible mbutaka ɔnɛ: “Anto 2 ndeka onto 1.” (Ondaki 4:9) Wadi l’omi koka nkatɛ ndo nkɔkɔla demba kaamɛ.

Ɛnya dia wɛ mbokaka olonganyi ayɛ ngandji. Bible keketshaka wadi l’omi dia mbokanaka ngandji ndo nɛmiyanaka lam’asawɔ. (Ɛfɛsɔ 5:28, 33) Mɔnamɔna, kumbatanɛ la ngandji kana mbishana weshasha kaanga wa totshitshɛ koka ndeka nkeketsha diwala. Koko, atshukanyi hawohombe nsala dieyanelo l’andja wa diwala.​—Hɛbɛru 13:4.