KAANGA mbele ohindodi w’ambutshi aso wa ntondo, Adama l’Eva wakela anto tshɛ pɛkato la nyɔi, dui sɔ kotshikitanya sangwelo dia Nzambi lo dikambo di’anto. Lo tshimbo ya Bible, Ɔtɛkɛta ande wakafundama, Nzambi ekɔ lo nshikikɛ mbala efula ɔnɛ sangwelo diande kotshikitana.

• “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.”​—Osambo 37:29.

• “Nde ayonya nyɔi pondjo, ndo Nkum’Olongo Nkumadiɔndjɔ Jehowa ayokitola asɔyi oma lo dungi tshɛ.”​—Isaya 25:8.

• “Otunyi w’ekomelo wayolanyema ele nyɔi.”​—1 Kɔrɛtɔ 15:26.

• “Nyɔi hatoyala nto, otanda hatoyala nto, delo hatoyala nto, kaanga kandji hatoyala nto.”​—Ɛnyɛlɔ 21:4.

Ngande ‘wayɔmɛna Nzambi nyɔi’ kana wayondonya nyɔi lele otunyi aso? Oko wakatadɛnyi, Bible mbutaka hwe ɔnɛ “anto w’ɛlɔlɔ . . . wayodjasɛka lɔkɔ pondjo pondjo.” Koko tɔ mbutaka nto ɔnɛ “ndooko onto ɔlɔlɔ la nkɛtɛ latosalaka nshi tshɛ ɔlɔlɔ.” (Ondaki 7:20) Dia mbidja nyɔi otshumba, onde Nzambi ayonya atɔndɔ ande yimba? Ndooko! Nde hasalaki dui sɔ pondjo, nɛ dia “Nzambi . . . [h]akoke mbuta kashi.” (Tito 1:2) Ko laasɔ, kakɔna kayosala Nzambi dia nkotsha sangwelo diɛnya ngandji kaki lande etena kakandatonge anto?

Jehowa Nzambi akakimɔ woshasha wa la ngandji dia ntshungola anto oma lo nyɔi lo mfuta oshinga w’etshungwelo. Kitshimudi ya ntondo y’oshinga w’etshungwelo ekɔ ɛngɔ kɛmɔtshi kele la nɛmɔ diakɔ diaamɛ kafutama dia nkomba kɛnɛ kakalana kana dia nkotsha awui wendana la losembwe. Lam’ele anto tshɛ wekɔ atshi wa pɛkato ndo wakalongola dilanya dia nyɔi, Bible mbutaka hwe ɔnɛ: “Ndooko onto l’atei awɔ lakoka ntshungola ɔnango kana mbisha Nzambi oshinga w’etshungwelo dikambo diande, (oshinga w’etshungwelo wa nsɛnɔ yawɔ wekɔ la nɛmɔ di’efula diele vɔ hawokokaki pondjo mfuta).”​—Osambo 49:7, 8.

Etena kavɔ onto lele keema kokele, nde koka tsho mfuta dilanya dia pɛkato yande; nde hakoke ndjatshungola kana ntshungola onto okina oma lo pɛkato yande. (Rɔmɔ 6:7) Taki l’ohomba w’onto la kokele ndo laki kosala pɛkato dia nkimɔ lɔsɛnɔ lande, aha l’ɔtɛ wa pɛkato yande, koko l’ɔtɛ wa pɛkato yaso.​—Hɛbɛru 10:1-4.

Kɛsɔ mɛtɛ mbakakongɛ Nzambi dia nsala. Nde akatome Ɔnande, Yeso oma l’olongo dia ndjootɔ la nkɛtɛ oko onto la kokele, lahasale pɛkato. (1 Petero 2:22) Yeso akate dia nde akaye dia “nkimɔ lɔsɛnɔ lande oko oshinga w’etshungwelo dikambo di’anto efula.” (Makɔ 10:45) Nde akavu dia mfuta pɛkato yaso ndo totshungola oma lo nyɔi.​—Joani 3:16.

Ɛlɔ kɛnɛ, oko watakotshama prɔfɛsiya ya lo Bible, tekɔ lo nsɛna lo “tena dia paa dia wolo mbikikɛ.” Dui sɔ mɛnyaka dia tekɔ lo nsɛna lo “nshi y’ekomelo” ka dikongɛ nɛ dia kɔlɔ di’akambo. (2 Timɔte 3:1) Nshi y’ekomelo yayokoma lo nkondoko “lushi la kilombo ndo l’elanyelo k’anto wa kɔlɔ.” (2 Petero 3:3, 7) Koko anto walanga Nzambi wayoka lo elanyelo kɛsɔ ndo wayokondja “lɔsɛnɔ la pondjo.”​—Mateo 25:46.

Miliyɔ nkina y’anto wayonga la diaaso dia nkondja lɔsɛnɔ la pondjo etena kayowolɔ. Yeso akolola  onto ɔmɔtshi etena kakandembola osomba wa Nayina. Tshɔi y’ɔna wadi aki odo akavu, koko Yeso “akawoke kɛtshi,” ko akawolola. (Luka 7:11-15) Ndo nto, ɔpɔstɔlɔ Pɔɔlɔ akate ate: “Dimi lekɔ l’elongamelo le Nzambi . . . dia eolwelo k’anto w’ɛlɔlɔ ndo k’anto wa kɔlɔ kayoyala.” Elongamelo k’oshika kɛsɔ kekɔ djembetelo ya diambo ya ngandji ka Nzambi le anto.​—Etsha 24:15.

Miliyara y’anto koka nongamɛ dia ndjɔsɛna pondjo pondjo. Bible mbutaka ɔnɛ: “Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.” (Osambo 37:29) L’etena kɛsɔ, vɔ wayonga l’ɔngɛnɔngɛnɔ ndo wayokeketshama lo mɛna ekotshamelo k’ɛtɛkɛta ɛnɛ wakafunde ɔpɔstɔlɔ Pɔɔlɔ ambeta ɛnɔnyi oko 2 000: “Nyɔi le, lende ele otshumba ayɛ? Nyɔi le, lende ele waanga ayɛ?” (1 Kɔrɛtɔ 15:55) Nyɔi lele otunyi woleki tshɛ w’anto ayodjama otshumba!