Omvutshi Mɔsɛ akate dia naka sho nkitanyiya wadjango wa Nzambi, kete tayolongola ɛtshɔkɔ watolaka Nzambi. (Eohwelo k’Ɛlɛmbɛ 10:13; 11:27) Sho hatokitanyiya Nzambi l’ɔtɛ wɔnɛ tayolongola dilanya oma le nde. Waonga w’amɛna efula wa Nzambi totshutshuyaka dia sho mbokitanyiya nɛ dia sho mbookaka ngandji ndo sho kombolaka mbewɔ nsala dui dimɔtshi diakoka mbonyangiya. “Kɛnɛ kalembetshiya nanga Nzambi tɔ kɛnɛ: dia sho nkitanyiya ɛlɛmbɛ ande.”​—1 Joani 5:3.

Ngande wele okitanyiya aso le Nzambi tokimanyiyaka dia sho ntshɔkwama oma le nde? Tɔsɛdingole toho tohende.

“Dimi Jehowa kele Nzambi kayɛ, Ɔnɛ latoketshaka dikambo dia wahɔ ayɛ, . . . lakɔlɔmbɔla lo mboka kahombayɛ nkɛndakɛnda.”​—ISAYA 48:17.

Jehowa Nzambi, Otungi aso teyaka ndo toshaka ɛlɔmbwɛlɔ k’eso la tɔ ohomba. Naka talanga dia wetshelo ande tokimanyiya dia mbɔsa tɛdikɔ ta lomba, kete sho pombaka mbeka oma l’Afundelo w’ekila kɛnɛ kalanga Nzambi dia sho nsala ndo oma laasɔ, ko sho mbidja wetshelo ɛsɔ l’etsha.

“Ɔngɛnɔngɛnɔ le wanɛ woka ɔtɛkɛta wa Nzambi ndo wawokitanyiya!”​—LUKA 11:28.

Ɛlɔ kɛnɛ, miliyɔ ya wanɛ wakitanyiya Ɔtɛkɛta wa Nzambi mongaka l’ɔngɛnɔngɛnɔ wa mɛtɛ. Tɔshi ɛnyɛlɔ ka pami kɛmɔtshi ka lo wodja wa Espagne, lakomalaka esadi esadi ndo nde akasalɛka anto akambo la ngala tshɛ, mbidja ndo wadɛnde. Lushi lɔmɔtshi nde akadia kɛnɛ kakafunde omvutshi Mɔsɛ lo dikambo dia Yɔsɛfu, y’ɔna Jakɔbɔ. Yɔsɛfu akasondjama oko ose mfumbe ndo akadjama lo lokanu aha la nde nkongola onongo; koko nde aki la memakana, la wɔladi ndo akadimanyiya. (Etatelo, tshapita 37-45) Pami ka l’Espagne kɛsɔ akate ate: “Lo nkana yimba l’ɛnyɛlɔ ka Yɔsɛfu, dui sɔ diakatshutshuya dia dimi nkɛnɛmɔla dionga dia memakana ndo ndjakimɛ. Etombelo wambonga la dui sɔ ele, ɛlɔ kɛnɛ laya la lɔsɛnɔ l’ɔngɛnɔngɛnɔ.”

Afundelo w’ekila toshaka ɛlɔmbwɛlɔ ka dimɛna ka woho wakokaso salɛ anto akina akambo. Tɔsɛdingole awui akina efula wendana la dui sɔ lo sawo diayela.