Anto amɔtshi ndjambolaka dia kana Ɔtɛkɛta wa Nzambi wambotshikitana. Omvutshi Isaya akate dia Ɔtɛkɛta wa Nzambi “tshikalaka pondjo.” (Isaya 40:8) Ngande wakokaso monga l’eshikikelo di’alaka wa Nzambi wakombama dimɛna?

Nzambi ekɔ la wolo wa nkokɛ Ɔtɛkɛta ande diaha losango la lɔkɔ ndanyema. Lo nshi y’edjedja, etena kakafundamaka kɔpi ya l’anya, afundji wakadiaka mukanda tshɛ w’Afundelo w’ekila asɔ la yambalo tshɛ diaha ɛngɔ kɛmɔtshi kotshama, tshikitanyema kana minyɛma. Koko anto asɔ waki anto wele keema kokele ndo tɔkɔmɔkɔmɔ tatotshitshɛ takɔtɔ.

Tekɔ la nunu dia kɔpi y’edjedja yakafundama l’anya y’Afundelo w’ekila. Naka tambotana otshikitanu ɔmɔtshi wa tshitshɛ lo kɔpi kɛmɔtshi, laasɔ ko sho mbɛdika kɔpi kakɔ la kɔpi kina dia ndjashikikɛ kana kɔpi kakɔ kekɔ ka mɛtɛ.​—Dia mbeya awui akina, enda sawo diele l’ɔtɛ a dui ɔnɛ: “La Bible a-t-elle été modifiée ou falsifiée?” diɔ tanemaka lo jw.org.

Tɔsɛdingole ɛnyɛlɔ kɛmɔtshi ka efundelo w’edjedja wakawelɛka ɔnɛ wɛɔmbɔ wa lo Ndjale ka mbovɔ wakashola dioho dimɔtshi di’ase Arabɛ lo weoko suke la Ndjale kambovɔ lo 1947. Efundelo w’edjedja ɛsɔ wekɔ la tenyi di’Afundelo w’ekila wamboviya ambolekana ɛnɔnyi nunu pende. Ase tomba wakɛdika efundelo wakafundama l’anya ɛsɔ la Afundelo w’ekila wakafundama wele laso ɛlɔ kɛnɛ. Ko kakɔna kakawashola?

Waa nomb’ewo wakɛnyi dia losango lakafundama l’oma le Nzambi lele la so ɛlɔ kɛnɛ lekɔ woho akɔ waamɛ la efundelo w’edjedja. * Ɔsɛdingwelo wa la yambalo tshɛ w’efundelo w’edjedja toshikikɛka dia kɛnɛ kadiaso l’Afundelo w’ekila ekɔ losango l’oma le Nzambi. Sho koka monga l’eshikikelo dia Nzambi akalame la yambalo tshɛ mɛtɛ kele l’Afundelo ande w’ekila lo dikambo diaso ɛlɔ kɛnɛ.

Sho koka mbadia Ɔtɛkɛta wa Nzambi l’eshikikelo tshɛ ndo tonge l’eshikikelo tshɛ dia losango la lɔkɔ lekɔ la mɛtɛ. La dui sɔ lo yimba, nyɛsɔ tɔsɛdingole wetshelo wakondjaso lo dikambo dia Nzambi lo tshimbo y’amvutshi ande.