Otungi aso wa ngandji ndjakiyanyaka lo dikambo diaso
1. OTUNGI ASO POTOYAKA WONYA
Onde lɔsɛnɔ koka monga lanɛ la nkɛtɛ aha l’esase wa wonya? Wonya mbishaka esongo wolo wa ntondja akatshi, alɛmbɔlɛmbɔ, elowa, ndo ntɔngɔ. Vɔ kimanyiyaka nto esongo dia nkutola ashi oma lo nkɛtɛ lo tshimbo y’edio ndo mbidiyaka ashi polo l’akatshi ndo oma laasɔ, ashi w’oma l’akatshi fumbɔka lo loowa.
2. OTUNGI ASO NDƆSHAKA MVULA
Mvula ekɔ woshasha ɔmɔtshi w’ohomba efula w’oma le Nzambi, wakimanyiya nkɛtɛ dia totondjɛ mbo ya ndɛ. Nzambi tɔlɔshɛka mvula oma l’olongo ndo nde toshaka deko dia ngɔnya diangɔ ndo ndodiaka etema aso la mbo ya ndɛ ndo l’ɔngɛnɔngɛnɔ.
3. OTUNGI ASO TOSHAKA KƐNƐ KA NDƐ NDO KA NDƆTA
Ambutshi efula ndjakiyanyaka lo woho wakokawɔ nkondjɛ nkumbo yawɔ diangɔ dia ndɛ ndo ahɔndɔ wa ndɔta. Tolembete kɛnɛ kata Afundelo, lawɔ mbutaka ɔnɛ: “Nyende dimɛna tofudu ta l’olongo. Tɔ hatoonɛ, hatone ndo hatoombe diangɔ l’odiko, koko Shɛnyu lele l’olongo tileshaka. Onde nyu hanyoleki tofudu nɛmɔ?”—Mateo 6:25, 26.
“Nyokondja wetshelo oma le alɛmbɔlɛmbɔ wa l’oswe, woho wolawɔ. . . . Koko, dimi lambonyotɛ nte: Kaanga [Nkumekanga] Sɔlɔmɔna lo lotombo lande tshɛ kɔndɔta oko ɔtɔi ɔmɔtshi l’atei awɔ. Ko naka Nzambi ndɔtshaka tombatomba . . . , shi nde ayoleka nyɔlɔtsha?”—Mateo 6:28-30.
Lam’ele Nzambi ekɔ l’akoka wa tosha mbo ya ndɛ ndo ahɔndɔ wa ndɔta, sho koka monga l’eshikikelo nto dia nde koka tokimanyiya dia nkondja diangɔ dikina di’ohomba dia lo lɔsɛnɔ. Naka sho nyanga dia nsala lolango la Nzambi, kete nde koka ntshɔkɔla welo wadjaso dia nkondja mbo ya ndɛ kana nde koka tokimanyiya dia sho nkondja olimu wakoka tokimanyiya dia sho monga l’akoka wa nkondja kɛnɛ kele la so ohomba.—Mateo 6:32, 33.
Lo mɛtɛ, tekɔ l’ɛkɔkɔ w’amɛna wa mboka Nzambi ngandji, etena kasɛdingolaso wonya, mvula, tofudu ndo alɛmbɔlɛmbɔ. Lo sawo diayela tayɛna woho wakasawolaka Otungi aso l’anto.