Sho mbekaka awui wendana la Nzambi lo tshimbo y’amvutshi ande
Lo nshi y’edjedja, Nzambi akashaka amvutshi ande nsango y’ohomba efula dia mbewoya anto. Onde nsango shɔ koka tɛnya woho wakokaso nkondja ɛtshɔkɔ oma le Nzambi? Eelo yɔ koka. Nyɛsɔ tende wetshelo wakokaso nkondja oma le amvutshi asato wa kɔlamelo.
ABRAHAMA
Nzambi keema la shɔnɔdi ndo nde kombolaka ntshɔkɔla anto tshɛ.
Nzambi akalake omvutshi Abrahama ɔnɛ “nkumbo tshɛ ya la nkɛtɛ yayɔtshɔkwama lo tshimbo yayɛ.”—Etatelo 12:3.
Wetshelo akɔna wakondjaso? Nzambi tolangaka efula ndo nde kombolaka ntshɔkɔla nkumbo tshɛ, mbuta ate apami, wamato ndo ana, wanɛ wokitanyiya.
MƆSƐ
Nzambi ekɔ kanga kɛtshi ndo nde tshɔkɔlaka wanɛ wasala la wolo dia mboweya.
Kanga-Wolo-Tshɛ akasha Mɔsɛ wolo wa nsala ahindo wa weke wa diambo. Ko Mɔsɛ akalɔmbɛ ɔnɛ: “Ombetsha mboka yayɛ dia dimi keya ndo ntetemala mpomɔ lokolo l’ɔlɔ lo washo ayɛ.” (Etombelo 33:13) Nzambi akangɛnangɛna kɛnɛ kakalɔmbɛ Mɔsɛ ndo nde akɔtshɔkɔla lo mbosha ewo ndo yimba efula dia nshihodia mboka yande ndo waonga Ande. Ɛnyɛlɔ, Mɔsɛ akeke dia Otungi ekɔ “Nzambi ka kɛtshi ndo kokana kandji.”—Etombelo 34:6, 7.
Wetshelo akɔna wakondjaso? Nzambi kombolaka tɔtshɔkɔla sho tshɛ, mbuta ate apami, wamato ndo ana, naka sho nsala la wolo dia mboweya dimɛna. Nde tɛnyaka lo Afundelo w’ekila woho wa mbɔtɛmɔla ndo ɔnɛ nde nomɔlomɔka dia sho mbetawɔma ndo tshɔkwama oma le nde.
YESO
La kɛtshi tshɛ Yeso akakɔnɔla weho tshɛ wa hemɔ
Sho koka ngɛnangɛna l’ɛtshɔkɔ wa pondjo naka sho mbeka akambo wendana la Yeso ndo kɛnɛ kakandasale ndo kakandetsha.
Ɔtɛkɛta wa Nzambi wekɔ l’akambo efula wendana la lɔsɛnɔ la Yeso ndo wetshelo ande. Nzambi akasha Yeso wolo wa nsala ahindo efula, ɛnyɛlɔ oko nkɔnɔla akanga wa totshungu, akanga wa mpoke ndo nkɔnɔla akanga wa tshumbe. Nde akolola kaanga edo. Yeso akɛnya ɛtshɔkɔ wayela Nzambi anto tshɛ lo nshi yayaye. Nde akalembetshiya woho wakoka ɔmɔmɔ la l’atei aso ngɛnangɛna l’ɛtshɔkɔ ɛsɔ ɔnɛ: “Dia vɔ nkondja lɔsɛnɔ la pondjo, weke dia keya wɛ Nzambi ɔtɔi ka mɛtɛ, la Yeso Kristo lakayatome.”—Joani 17:3.
Yeso aki lokana kɛtshi, akokanaka ngandji k’efula ndo aki ɔlɔlɔ. Apami ndo wamato, ɛlɔngɔlɔngɔ ndo epalanga wakayaka oya le nde dia ndjetawɔ leeta lande la waangasanu lɔnɛ: “Nyeke akambo oma le mi, nɛ dia dimi lekɔ la memakana ndo la otema w’okitshakitsha, ko nyu nyayoyakondjɛ ekeketshelo.” (Mateo 11:29) Otshikitanyi l’anto akina wa l’etena kande wakahɛnyahɛnyaka wamato, Yeso akasalɛka wamato akambo l’ɔlɔlɔ tshɛ, la kɛnɛmɔ ndo la dilɛmiɛlɔ.
Wetshelo akɔna wakondjaso? Yeso akɛnya ngandji k’efula le anto ndo akatotshikɛ ɛnyɛlɔ ka dimɛna efula ka woho wakokaso salɛka anto akina akambo.
YESO KEEMA NZAMBI
Afundelo w’ekila mbetshaka dia tekɔ paka la ‘Nzambi ka mɛtɛ 1’ ndo Yeso Kristo aki Dikɛndji dia Nzambi diaki la okitshakitsha. (1 Kɔrɛtɔ 8:6) Yeso akate hwe dia Nzambi mboleka ndo Nzambi mbakotome oya lanɛ la nkɛtɛ.—Joani 11:41, 42; 14:28. *
^ od. 17 Dia mbeya awui akina wendana la Yeso Kristo, enda wekelo 8 ndo 9 wa biukubuku yele l’ɔtɛ a dui ɔnɛ: Mbetawɔ k’oshika mbayokokonya lo lɔsɛnɔ l’ɔngɛnɔngɛnɔ, yɔ tanemaka lo Falase lo www.pr418.com.
