Tetemala nɔmba dia mbetawɔma le Nzambi
Nzambi akasha anto woshasha wa laande, mbuta ate dikoka dia sawolaka la nde ndo dia mbɔkɛnɛmɔlɛ nsaki yaso lo tshimbo ya dɔmbɛlɔ. Omvutshi Davidɛ akalɔmbɛ ate: “Wɛ latokaka dɔmbɛlɔ le, le yɛ mbayoyaka weho w’anto tshɛ.” (Osambo 65:2) Ko ngande wakokaso nɔmba dia nde tohokamɛ ndo ntshɔkwama oma le Nzambi?
LƆMBAKA L’OKITSHAKITSHA TSHƐ, OMA K’ƐSE OTEMA
Alɔmbɛlɔ ayɛ kokimanyiyaka dia dihola otema ayɛ la ntondo ka Nzambi, mbuta ate mbɔkɛnɛmɔlɛ nsaki yayɛ ya mɛtɛ. (Osambo 62:8) Kanga-Wolo-Tshɛ ngɛnangɛnaka alɔmbɛlɔ wa mɛtɛ w’oma k’ɛse otema.
LƆMBA NZAMBI LO LOKOMBO LANDE HITA
Kaanga mbele Nzambi la nkombo efula ya lɔtɛtɛmɔla, nde ekɔ paka la lokombo ɔtɔi lande hita. “Dimi kele Jehowa. Ɔsɔ kele lokombo lami.” (Isaya 42:8) Lokombo Jehowa tanemaka mbala oko 7 000 lo Afundelo w’ekila. Amvutshi efula wakelɛka Nzambi lo lokombo lande hita. Abrahama akate ate: “Jehowa le, lam’alangayɛ, . . . etawɔ dimi nyomɔtɛkɛta [la yɛ].” (Etatelo 18:30) Sho lawɔ koka nkamba la lokombo la Nzambi, Jehowa etena kawɔlɔmbaso.
LƆMBA LO ƆTƐKƐTA AYƐ HITA
Nzambi shihodiaka tokanyi ndo nsaki yaso, oyadi ɔtɛkɛta akɔna watɛkɛtaso. Ɔtɛkɛta Ande toshikikɛka ɔnɛ: “Nzambi keema la shɔnɔdi, koko lo wedja tshɛ, onto lawoka wɔma ndo lasala akambo w’ɛlɔlɔ mbetawɔmaka le nde.”—Etsha 10:34, 35.
Koko dia sho ntshɔkwama oma le Nzambi, ekɔ ohomba sho nsala awui efula laadiko dia nɔmba. Lo asawo wayela, tayɛna kɛnɛ kahombaso nsala.