Oma ko etongelo k’anto, Otungi aso akasawolaka l’anto lo tshimbo ya andjelo ndo y’amvutshi. Laadiko dia laasɔ, nde akasale dia losango lande ndo alaka wakandalake fundama. Alaka w’oma le Nzambi asɔ koka tokimanyiya dia sho monga l’ɔngɛnɔngɛnɔ lo nshi yayaye. Ko lende akokayɛ ntana alaka waki Nzambi ɛlɔ kɛnɛ?

Losango lakatosha Nzambi tanemaka l’Afundelo w’ekila. (2 Timɔte 3:16) Ngande wakakambe Nzambi l’amvutshi dia mfunda losango lande? (2 Petero 1:21) Nzambi akadje tokanyi tande lo timba t’afundji ko oma laasɔ, vɔ wakayotifunda. Woho akɔ waamɛ mbele ndo ɛlɔ kɛnɛ. Naka owandji ɔmɔtshi w’olimu ambotɛ sekeletɛlɛ kande dia mfunda losango lɔmɔtshi lo dihole dia ndamɛ lifunda, losango lɔsɔ lekɔ laki owandji koko aha laki sekeletɛlɛ. Woho akɔ waamɛ mbele, Nzambi akakambe l’apami dia mfunda losango lande, ɔnkɔnɛ Nde mbele kanga Afundelo w’ekila.

Losango laki Nzambi lekɔ ohomba, diakɔ diele nde nangaka di’anto tshɛ mboliadia ndo mbolishihodia. Ɛlɔ kɛnɛ “lokumu l’ɔlɔlɔ [lande] la pondjo” lotanema lo “wedja tshɛ ndo waoho tshɛ ndo ɛtɛkɛta tshɛ.” (Ɛnyɛlɔ 14:6, nɔtɛ) L’ekimanyielo k’ɛtshɔkɔ wa Nzambi, Afundelo w’ekila wotanema la tshondo kana l’etenyi l’ɛtɛkɛta ndekana 3 000, ndeka oseka dibuku tshɛ diele lanɛ la nkɛtɛ.