Lo mɛtɛ, Jehowa nangaka di’anto ahende wambotshukana monga l’ɔngɛnɔngɛnɔ ndo la diɔtɔnganelo dia ma ma lam’asawɔ ndo dia diwala diawɔ tshikalaka pondjo. (Mat. 19:4-6) Naka wɛ nangaka ntshukana, ngande wakokayɛ ntana olonganyi w’ɔlɔlɔ? Oko wende Otungi aso, Jehowa mbeyaka kɛnɛ kahombaso nsala dia sho monga la diwala di’ɔngɛnɔngɛnɔ. Diakɔ diele, naka wɛ nkamba l’atɔndɔ wakandatosha, kete wɛ ayokondja etombelo woleki amɛna. Tɔsɛdingole atɔndɔ amɔtshi l’atei awɔ.

Ntondotondo, sho pombaka nshihodia dui nɛ diendana la so: “Otema ndeka diangɔ dikina tshɛ lokeso ndo vɔ wekɔ kɔlɔ efula.” (Jɛr. 17:9) Etena kalanga anto ahende ntshukana ko naka vɔ mɛnana ko ntatɛ membɔna, kete vɔ koka monga la nsaki ya wolo lam’asawɔ, ko naka dui sɔ diambosalema, kete vɔ wayonga l’okakatanu dia mbɔsa tɛdikɔ ta lomba. Naka anto mbɔsa yɛdikɔ ya ntshukana lo ndjela tsho nsaki yele lam’asawɔ, kete ondo vɔ koka ndjonyanga l’ɔkɔngɔ. (Tok. 28:26) Diakɔ diele, bu dui dia lomba dia vɔ akɔ ahende kɛnɛmwanɛ nsaki yawɔ kam’ongawɔ la diɔtɔnganelo kana mbishana alaka amɔtshi la ntondo k’onto l’onto mbeya wonyande dimɛna.

Tokedi 22:3 mbutaka ɔnɛ: “Kanga yewo atɛnaka waale, ko nde atoyashɛka, koko onto lahatahokɔ akambo atotshɔka tsho, ko atodiɛnɛka la etombelo wa kɔlɔ.” Waale akɔna wakoka monga lo nkamba la sitɛ y’Ɛtɛrnɛtɛ dia nyanga olonganyi? Lonyangu ko, anto amɔtshi wakasawola l’anto wahaweye l’Ɛtɛrnɛtɛ, wakatatɛ membwana la wɔ ndo l’ɔkɔngɔ diko wakayoshihodia di’anto akɔ wakembwanaka la wɔ wakayowatɛ dinga. Ndo nto, akanga wa lokeso mbishɛka weho w’anto wewɔ dia vɔ monga la diɔtɔnganelo l’anto akina ndo dia vɔ mbava falanga. Lo tena dimɔtshi, akanga wa lokeso asɔ mbutaka dia vɔ wekɔ Ɛmɛnyi wa Jehowa.

Tɔsɛdingole waale okina. Dikongelo dimɔtshi dia l’ɔrdinatɛrɛ mɛnyaka ɔnɛ onto kapanda l’onto kapanda kokaka ntshukana. Koko, ndooko tolembetelo tɛnya ɔnɛ toho ta nsala akambo tɔsɔ tekɔ mɛtɛ amɛna. Ko onde ayonga dui dia lomba dia sho ndjaɛkɛ lo dikongelo diakasale anto naka sho nangaka ntondoya lo dikambo dimɔtshi di’ohomba efula diele oko diwala? Hatohombe pondjo ndjaɛkɛ lo dikongelo dia l’ɔrdinatɛrɛ oko wakokaso ndjaɛkɛ l’atɔndɔ wa lo Bible.​—Tok. 1:7; 3:5-7.

Tɔndɔ dimɔtshi diele lo Tokedi 14:15 mbutaka ɔnɛ: “Kanga enginya atetawɔka ɛtɛkɛta tshɛ, koko kanga kɛsɔ atokanaka yimba lo ena tshɛ katakolande.” La ntondo ka wɛ nshikikɛ ɔnɛ onto kapanda  ayonga olonganyi w’ɔlɔlɔ, wɛ pombaka tokotaweyi dimɛna. Koko ayonga wolo dia wɛ mbeya onto dimɛna naka wɛ sawolaka la nde tsho l’Ɛtɛrnɛtɛ. Oyadi nyu akɔ ahende onto l’onto ekɔ lo mɛna awui wendana l’osekande ndo nyekɔ lo mbetsha wenya efula kaamɛ lo sawolaka l’Ɛtɛrnɛtɛ, onde wɛ koka mbuta mɛtɛ dia wɛ ambeya onto akɔ dimɛna? Anto amɔtshi wakafɔnyaka dia wambotana onto lawaoka ngandji ka mɛtɛ wakayonyanga l’ɔtɛ wa kɛnɛ kakawayeya lam’akawayɛnana l’onto akɔ okoko l’okoko.

Omembi w’esambo akate ate: “Dimi halekesanɛ l’akanga wa lokeso, ndo dimi mbewɔka wanɛ washɛ woho wewɔ.” (Os. 26:4) Anto efula fɔnyaka ɔnɛ ekɔ dimɛna mbuta kashi etena kafundawɔ awui wendana la wɔ wadjawɔ l’Ɛtɛrnɛtɛ ndo wendana la diembwanelo l’oyango w’anto ndeka mbangɛnangɛna. Vɔ koka mbishɛ waonga awɔ wa kɔlɔ, kana koka monga ko waonga awɔ wa kɔlɔ hawɛnama etena katomanɛwɔ mesajɛ l’Ɛtɛrnɛtɛ. Kaanga mbakoka anto amɔtshi mbuta dia vɔ wekɔ Ɛmɛnyi wa Jehowa, onde vɔ mɛtɛ wambobatizama? Onde vɔ wekɔ anto wambotshunda lo nyuma? Onde vɔ wekɔ la diɔtɔnganelo dia dimɛna la Jehowa? Onde vɔ wekɔ anto walɛmiyama l’etshumanelo kawɔ? Kana, shi mbeyaka monga ko vɔ wekɔ ɛnyɛlɔ ka kɔlɔ kana “lɔngɛnyi la kɔlɔ”? (1 Kɔr. 15:33; 2 Tim. 2:20, 21) Ndo onde vɔ wekɔ la lotshungɔ lo ndjela Afundelo la ntshukana? Wɛ pombaka mbeya awui asɔ, koko koka monga wolo dia nkondja ekadimwelo wa ambola asɔ naka wɛ hasawodi l’Ɛmɛnyi wa Jehowa ekina weya onto akɔ dimɛna. (Tok. 15:22) Ndo lo mɛtɛ, okambi wa Jehowa wa kɔlamelo hahombe kaanga nkanyiya dia “ntshukana” l’onto lele bu ombetawudi ndo monga la diɔtɔnganelo dia ma ma la nde.​—2 Kɔr. 6:14; 1 Kɔr. 7:39.

Lam’ele ekɔ waale efula nkamba la sitɛ y’Ɛtɛrnɛtɛ dia membwana, ekɔ toho toleki amɛna ta nyanga onto lakoka ndjonga olonganyi aso ndo mbeeya dimɛna. Lo waaso akɔna wakokayɛ ntana onto lakoka monga olonganyi w’oshika? Etena kasalema nsanganya ya lo sɛkɛ l’ahole wahayashimbama, Ɛmɛnyi wa Jehowa koka mbeya anto akina wɔtɔ lo nsanganya ya l’etshumanelo, nsanganya y’etshimbedi, nsanganya ya rɛjɔ ndo nsanganya nkina.

Etena keso bu l’akoka wa nsala nsanganya ya lo sɛkɛ shɔ, ɛnyɛlɔ l’ɔtɛ wa hemɔ kambokokanɛ ka COVID-19, sho kambaka la telefɔnɛ, tablɛtɛ kana ɔrdinatɛrɛ dia mbɔtɔ nsanganya ya l’etshumanelo. Ndo lɛkɔ, sho kondjaka waaso wa mbeya Ɛmɛnyi wa Jehowa ekina w’enyemba. Wɛ koka mɛna woho washawɔ asawo ndo mboka woho washawɔ kɔmatɛrɛ. (1 Tim. 6:11, 12) Nyu koka nto nsawola lo zoom l’ɔkɔngɔ wa nsanganya. Lo nsanganya yɔtɔ elui w’Ɛmɛnyi wa Jehowa lo zoom, wɛ koka mɛna woho wayasha onto lalangayɛ membɔna la nde le anto akina, ndo dui sɔ koka kokimanyiya dia mbeya waonga wa mɛtɛ wele l’onto akɔ. (1 Pe. 3:4) L’ɔkɔngɔ diko, naka wɛ ambeya onto akɔ dimɛna, wɛ koka ndjɛna dia kana nyekɔ l’eyango akɔ waamɛ ndo kana nyu ahende kokaka ntshukana.

Naka wanɛ wele enyemba nyanga onto lakoka ndjotshukana la wɔ lo yoho yɔtɔnɛ l’atɔndɔ wa lo Bible, kete ondo vɔ wayoleka mɛna mɛtɛ k’ɛtɛkɛta wele lo Tokedi wata ɔnɛ: “Onto lakondja wadi [kana omi] la dimɛna ambokondja ɛngɔ ka dimɛna, ndo nde pomɔka lokolo l’ɔlɔ oma le Jehowa.”​—Tok. 18:22.