1. Kakɔna kakakosalɛ Jehowa?

NGANDE wakayakome Ɔmɛnyi wa Jehowa? Ntondotondo, wɛ akoke “lokumu l’ɔlɔlɔ” ondo oma le ambutshi ayɛ, oma le osekayɛ ɔmɔtshi la l’olimu kana oma le osekayɛ ɔmɔtshi la la kalasa kana l’ekimanyielo k’esambishelo ka luudu la luudu. (Makɔ 13:10) Oma laasɔ, onto ɔmɔtshi aketsha wenya efula ndo akadje welo dia mbeka la yɛ Bible. L’edja ka wekelo ɔsɔ, wɛ akayoka Jehowa ngandji ndo wɛ akeye dia nde kookaka ngandji. Jehowa akakokotola oya l’akambo wa mɛtɛ ndo kakianɛ oko wayayɛ ombeki ɔmɔtshi wa Yeso Kristo, wɛ aya l’elongamelo ka lɔsɛnɔ la pondjo. (Jni. 6:44) Aha la taamu, wɛ ekɔ la lowando le Jehowa l’ɔtɛ wakandakambe l’onto ɔmɔtshi dia keetsha akambo wa mɛtɛ ndo l’ɔtɛ wakandetawɔ dia wɛ ndjala okambi Ande.

2. Kakɔna kayotɔsɛdingola lo sawo nɛ?

² Etena kɛnɛ kamboteya akambo wa mɛtɛ, tekɔ l’ɔkɛndɛ wa nkimanyiya anto akina dia vɔ monga kaamɛ la so lo mboka katɔla otsha lo lɔsɛnɔ. Mbeyaka monga ko sho ngɛnangɛnaka nsambisha lo luudu la luudu, koko ondo tekɔ l’okakatanu dia nɔmba onto ɔmɔtshi dia mbeka la nde Bible. Onde ngasɔ mbayaokayɛ? Naka ngasɔ, kete ondo wɛ koka mɛna di’alako amɔtshi wele lo sawo nɛ wayokokimanyiya. Tayɔsɛdingola kɛnɛ katotshutshuya dia mbetɛ anto ambeki. Tayɔsɛdingola nto woho wakokaso nkandola ekakatanu wakoka todjɛ wekamu diaha mbeka l’onto ɔmɔtshi Bible. Ntondotondo, tayanga nsɛdingola lande na kahatahombe monga tsho esambisha, koko sho pombaka monga ndo embetsha wa lokumu l’ɔlɔlɔ.

3. Lande na kasambishaso?

³ Etena kaki Yeso la nkɛtɛ, nde akasha ambeki ande didjango  diele la tenyi pende. Ntondotondo, nde akawatɛ dia nsambisha lokumu l’ɔlɔlɔ la Diolelo ndo nde akawaɛnya woho wa nsala dui sɔ. (Mat. 10:7; Luka 8:1) Ɛnyɛlɔ, Yeso akalowanya ambeki ande lo dikambo dia kɛnɛ kakawakoke nsala naka anto wambotona losango la Diolelo kana wambolietawɔ. (Luka 9:2-5) Nde akawatɛ nto polo lɛnɛ ayokoma olimu w’esambishelo lo mbatɛ ate ambeki ande ‘wayosambisha anto wa lo wedja tshɛ.’ (Mat. 24:14; Ets. 1:8) Oyadi anto mbetawɔ esambishelo kawɔ kana bu, ambeki ande wakahombe mbitɛ anto akambo wendana la Diolelo dia Nzambi ndo kɛnɛ kayodiosala.

4. Lo ndjela Mateo 28:18-20, laadiko dia nsambisha akambo wendana la Diolelo kakɔna kahombaso nsala?

⁴ Naa etenyi ka hende ka lo didjango diakasha Yeso? Nde akatɛ ambeki ande dia mbetsha wanɛ wayonga ambeki dia vɔ nkitanyiya akambo tshɛ wakandadjanga. Onde olimu w’esambishelo ndo olimu wa mbetɛ anto ambeki wakahombe komɛ lo ntambe ka ntondo oko wafɔnya anto amɔtshi? Ndooko, Yeso akɛnya di’olimu w’ohomba ɔsɔ wayotetemala polo lo nshi yaso nyɛ, mbuta ate “polo l’etena k’ekomelo ka dikongɛ di’akambo.” (Adia Mateo 28:18-20.) Ondo Yeso akasha didjango sɔ etena kakandɛnama le ambeki ndekana 500. (1 Kɔr. 15:6) Ndo lo ɛnɛlɔ kakandasha Joani, Yeso akɛnya hwe dia nde nongamɛka di’ambeki ande tshɛ nkimanyiya anto akina dia vɔ mbeka akambo wendana la Jehowa.​—Ɛny. 22:17.

5. Lo ndjela 1 Kɔrɛtɔ 3:6-9, ɛnyɛlɔ kakɔna kakakambe la Pɔɔlɔ dia mɛnya diɔtɔnganelo diele lam’asa nsambisha la mbetsha?

⁵ Ɔpɔstɔlɔ Pɔɔlɔ akɛdika olimu wa mbetɛ anto ambeki la monɛ diononɛ, dia mɛnya dia sho pombaka nsala akambo efula, koko aha komɛ tsho lo monɛ ntɔngɔ. Nde akohola ase Kɔrɛtɔ ate: “Dimi lakonɛ, Apolo akatɛ ashi . . . Nyu nyekɔ ekambɔ kaki Nzambi kakambema.” (Adia 1 Kɔrɛtɔ 3:6-9.) Sho tekɔ akambi lo “ekambɔ kaki Nzambi,” diakɔ diele sho monɛka ntɔngɔ etena kasambishaso ndo sho ndjitɛka ashi etena ketshaso anto Bible. (Jni. 4:35) Koko sho mbeyaka dia Nzambi mboodia ntɔngɔ, mbuta ate nde mbakotola anto oya le nde.

6. Etena ketshaso anto, kakɔna kahombaso mbakimanyiya dia vɔ nsala?

⁶ Sho nyangaka wanɛ wele “suke dia mbetawɔ akambo wa mɛtɛ wakonya lo lɔsɛnɔ la pondjo.” (Ets. 13:48) Dia nkimanyiya anto asɔ dia vɔ monga ambeki, sho pombaka mbakimanyiya dia vɔ: 1) nshihodia, 2) mbetawɔ, ndo 3) nkamba l’awui wekawɔ oma lo Bible. (Jni. 17:3; Kɔl. 2:6, 7; 1 Tɛs. 2:13) Onto tshɛ la l’etshumanelo koka nkimanyiya ambeki wa Bible lo mbisha ɛnyɛlɔ lo mboka eyoyo ɛsɔ ngandji ndo lo mbalongolaka dimɛna etena kayawɔ lo nsanganya. (Jni. 13:35) Opandjudi weka l’onto Bible nde la wɔ pombaka mbetshaka wenya efula ndo mbidja welo dia nkimanyiya ombeki ande dia nde minya waetawɔ kana mbekelo ‘yohikami wolo.’ (2 Kɔr. 10:4, 5) Koka mbɔsa ngɔndɔ efula dia nkimanyiya onto ɔmɔtshi dia nsala etshikitanu lo lɔsɛnɔ lande dia nde nkotsha oyango wa batizama. Koko nsala etshikitanu ɛsɔ ekɔ ohomba efula.

7. Kakɔna katotshutshuya dia ndjasha l’olimu w’esambishelo ndo wa mbetɛ anto ambeki?

⁷ Lande na kayashaso l’olimu w’esambishelo ndo wa mbetɛ anto ambeki? Ntondotondo, nɛ dia sho mbokaka Jehowa ngandji. Etena kasalayɛ la wolo dia nkitanyiya didjango dia nsambisha ndo mbetɛ anto ambeki, wɛ mɛnyaka dia wɛ mbokaka Nzambi ngandji. (1 Jni. 5:3) Ohokanyiya dui nɛ: Ngandji kokayɛ Jehowa kakakotshutshuya dia nsambisha lo luudu la luudu. Onde didjango sɔ diaki wɔdu nkitanyiya? Ondo bu. Etena kakiyɛ suke la nsambisha lo soko dia ntondo, shi wɛ akoke yema ya  wɔma? Aha la taamu wɛ akoke wɔma! Koko wɛ akeyaka ɔnɛ olimu ɔsɔ mbalanga Yeso dia wɛ nsala, ndo wɛ akakitanyiya didjango sɔ. Ndo ondo l’ɔkɔngɔ w’etena kɛmɔtshi, akayonga dui dia wɔdu dia wɛ nkamba olimu w’esambishelo. Ko kayotota lo kɛnɛ kendana la mbetsha onto ɔmɔtshi Bible? Onde dui sɔ kootshaka wɔma? Ondo ngasɔ. Koko, naka wɛ nɔmba Jehowa dia nde kokimanyiya dia minya wɔma ndo monga la dihonga dia nɔmba onto ɔmɔtshi dia mbeka la nde Bible, kete Jehowa koka kokimanyiya lo nkeketsha nsaki kayɛ ka mbetɛ anto ambeki.

8. Lo ndjela Makɔ 6:34, kakɔna nto katotshutshuya dia mbetsha anto akina?

⁸ Dui dia hende, ngandji kokaso wanyaso anto totshutshuyaka dia mbaetsha akambo wa mɛtɛ. Lo diaaso dimɔtshi, Yeso nde l’ambeki ande wakalɛmbɛ efula l’ɔtɛ wakawasambisha efula. Vɔ waki l’ohomba wa dihole diakawakoke momuya, koko olui w’anto wakaayele lɛkɔ. L’ɔtɛ wakandawaokaka kɛtshi, Yeso akatatɛ mbaetsha “akambo efula.” (Adia Makɔ 6:34.) Nde akakambe olimu efula kaanga mbakinde ambɔlɛmba. Lande na? Yeso akayadje lo dihole di’olui w’anto ɔsɔ. Nde akɛnyi woho wakawadiɛnɛka, diakɔ diele nde akalange mbakimanyiya dia vɔ monga l’elongamelo. Anto wa lo nshi yaso nyɛ wekɔ l’ekakatanu akɔ waamɛ. Tatokesamake l’ɔtɛ wa ɛnamelo kawɔ. Vɔ wekɔ oko ɛkɔkɔ wamboshishɔ wele bu l’olami waalɔmbɔla. Ɔpɔstɔlɔ Pɔɔlɔ akate di’anto wa ngasɔ wekɔ oko anto wele bu la Nzambi ndo wele bu l’elongamelo. (Ɛf. 2:12) Vɔ wekɔ lo “mboka katɔla lo elanyelo”! (Mat. 7:13) Naka sho nkanyiya woho wele anto wa l’ɛtshi kaso ka nkɛtɛ l’ohomba wa mbeya Nzambi, kete ngandji ndo kɛtshi kayototshutshuya dia mbakimanyiya. Ndo yoho yoleki dimɛna yakokaso mbakimanyiya ele lo mbalɔmba dia mbeka la wɔ Bible.

9. Lo ndjela Filipɛ 2:13, ngande wakoka Jehowa kokimanyiya?

⁹ Ondo wɛ ekɔ lo mengenga dia nɔmba onto ɔmɔtshi dia mbeka la nde Bible nɛ dia wɛ mbeyaka dia mbeka l’onto Bible nɔmbaka etena k’efula. Naka ngasɔ mbediɔ, kete tɛ Jehowa tokanyi tayɛ. Lɔmbande dia kokimanyiya dia wɛ monga la nsaki ka nkondja onto ɔmɔtshi la mbekaka la nde Bible. (Adia Filipɛ 2:13.) Ɔpɔstɔlɔ Joani akatoshikikɛ dia Nzambi ayokadimola alɔmbɛlɔ wɔtɔnɛ la lolango Lande. (1 Jni. 5:14, 15) Diakɔ diele, wɛ kokaka monga l’eshikikelo dia Jehowa ayokokimanyiya dia monga la nsaki ka mbetɛ anto ambeki.

10-11. Lande na kakokaso mengenga dia mbeka l’onto ɔmɔtshi Bible?

¹⁰ Sho mbɔsaka la nɛmɔ ɔkɛndɛ aso wa mbetsha anto Bible kaanga mbahomanaso l’ekakatanu wakoka toshimba diaha sho ndjasha efula l’olimu wa mbetɛ anto ambeki woho wakombolaso. Nyɛsɔ tɔsɛdingole ekakatanu ɛmɔtshi l’atei awɔ ndo woho wakokaso mbakandola.

¹¹ Mbeyaka monga ko tekɔ l’elelo ɛmɔtshi l’ɔtɛ w’awui wele la so. Ɛnyɛlɔ, apandjudi amɔtshi waya esombe kana wekɔ l’ekakatanu wendana la yoonge. Onde ekakatanu wa ngasɔ mbele la yɛ? Naka ngasɔ, kete enda wetshelo ɔmɔtshi l’atei wa wetshelo wakatakondja oma lo hemɔ kambokokanɛ ka COVID-19. Takɛnyi dia sho koka mbeka l’anto Bible dimɛna lo nkamba la telefɔnɛ, tablɛtɛ kana ehomɔ kekina! Diakɔ diele, wɛ koka ntatɛ ndo mbekaka l’anto Bible kaanga etena keyɛ lakayɛ ndo dui sɔ diekɔ dimɛna efula. Ndo wetshelo okina wekekɔ. Anto amɔtshi ngɛnangɛnaka mbeka Bible, koko vɔ hawotanema lawakawɔ lo tena diasambisha anangɛso. Koko, vɔ koka tanema la ngelo la pindju k’efula kana la dikɔlɔ. Shi wɛ koka mbekaka l’onto ɔmɔtshi Bible lo tena sɔ? Yeso aketshaka Nikɔdɛmɔ l’otsho, ɔsɔ mbaki etena kakalange Nikɔdɛmɔ.​—Jni. 3:1, 2.

12. Awui akɔna wakoka tokimanyiya dia monga l’eshikikelo ɔnɛ sho kokaka monga embetsha wa Bible w’eshika?

 ¹² Mbeyaka monga ko sho bu l’eshikikelo ɔnɛ tekɔ l’akoka wa mbeka l’onto Bible. Ondo sho fɔnyaka dia sho pombaka tokonga l’ewo k’efula ndo l’akoka la ntondo ka sho ndjotatɛ mbeka l’onto ɔmɔtshi. Naka ngasɔ mbayaokayɛ, kete enda awui asato wakoka kokimanyiya dia monga l’eshikikelo ɔnɛ wɛ kokaka mbeka l’onto ɔmɔtshi Bible. Ntondotondo, Jehowa kɔsaka dia wɛ ekɔ l’akoka wa mbetsha anto akina. (2 Kɔr. 3:5) Dui dia hende, Yeso, ɔnɛ ‘lakalongola lowandji tshɛ l’olongo ndo la nkɛtɛ,’ akakosha lotshungɔ la mbetsha. (Mat. 28:18) Ndo dui dia sato, wɛ koka ndjaɛkɛ le anto akina dia kokimanyiya. Yeso akayaɛkɛ lo kɛnɛ kakawetsha She dia mbuta ndo ntɛkɛta ndo kɛsɔ mbakokayɛ nsala. (Jni. 8:28; 12:49) Laadiko dia laasɔ, wɛ koka nɔmba omendji w’olui ayɛ w’esambishelo, ombatshi mboka ɔmɔtshi wele l’akoka kana opandjudi okina wele la diewo dia kokimanyiya dia ntatɛ nɔmbɔla wekelo wa Bible. Yoho mɔtshi yakokayɛ monga l’eshikikelo ele tshindɛ opandjudi ɔmɔtshi l’atei awɔ otsha le ombeki ande ɔmɔtshi dia tɛna woho walɔmbɔlande wekelo.

13. Lande na kahombaso ndjaekesanyiya la toho t’eyoyo?

¹³ Mbeyaka monga ko tekɔ l’okakatanu dia ndjaekesanyiya la toho t’eyoyo ndo la dihomɔ di’eyoyo. Yoho yekaso l’anto Bible yambotshikitana. Okanda wotoleka mbeka l’anto Bible ele Ngɛnangɛnaka la lɔsɛnɔ pondjo pondjo!, sho nɔmbamaka dia nɔngɔsɔlaka wekelo ndo mbeka l’anto lɔkɔ lo yoho yotshikitanyi la nyɛ yambotosalaka ntondo. Tayadia edingɔ yema tshitshɛ ndo nsala ɔkɛtshanyelo w’efula l’ombeki. Etena kekaso l’onto Bible, tokambe la tovidɛo efula ndo la dihomɔ dia l’Ɛtɛrnɛtɛ, ɛnyɛlɔ JW Library^®. Naka wɛ heye woho wa nkamba la dihomɔ sɔ, kete sawola l’onto ɔmɔtshi lakoka kokimanyiya dia mbeya woho wa nkamba la diɔ. Sho anto mongaka la mbekelo ka kambaka la toho tokoteyaka. Bu dui dia wɔdu dia sho ndjaekesanyiya la toho t’eyoyo ta nsala akambo. Koko l’ekimanyielo ka Jehowa ndo k’anto akina, wɛ koka mɛna dia ekɔ wɔdu ndjaekesanyiya la toho t’eyoyo ndo kaanga ngɛnangɛna efula dia mbeka l’anto Bible. Oko wakate ombatshi mboka ɔmɔtshi, yoho ya wekelo nyɛ yekɔ “dimɛna efula le ombeki ndo le ombetsha.”

14. Kakɔna kahombaso mbohɔka etena kakambaso lo ɛtshi ka nkɛtɛ kele wolo nsambisha, ndo ngande watokeketsha 1 Kɔrɛtɔ 3:6, 7?

¹⁴ Mbeyaka monga ko tekɔ lo mbidjasɛ lo ɛtshi ka nkɛtɛ kele wolo ntatɛ mbeka l’anto Bible. Anto koka mɛnama oko wekɔ la wendjudi lo losango laso kana wekɔ lo lilɔsha. Kakɔna kakoka tokimanyiya dia ntetemala monga la kanyi y’ɔlɔlɔ otsha le anto wa l’ɛtshi ka nkɛtɛ kɛsɔ? Tohɔ di’akambo koka ntshikitana esadi eto l’andja ɔnɛ w’ofukutanu ndo wanɛ waki kondjashaka lo losango laso koka ndjoshihodia ehomba awɔ wa lo nyuma. (Mat. 5:3) Wanɛ wakatonaka ekanda aso tena tshɛ wakayetawɔ mbeka Bible. Sho mbeyaka nto dia Jehowa mbele Owandji wa dinela. (Mat. 9:38) Nde nangaka dia sho ntetemala monɛ ndo mbitɛ ashi, koko nde mbele l’ɔkɛndɛ wa mbodia. (1 Kɔr. 3:6, 7) Ndo ekɔ tshondo y’ekeketshelo dia mbeyaka dia kaanga naka sho bu l’akoka wa mbeka l’onto ɔmɔtshi Bible l’etena kɛnɛ, Jehowa tɔtshɔkɔlaka lo ndjela welo wadjaso, koko aha lo ndjela etombelo wakondjaso! *

15. Ngande wayaoka Jehowa etena kɛnande onto ɔmɔtshi ambetawɔ mbeka Bible ndo okamba la kɛnɛ kekande?

¹⁵ Jehowa ngɛnangɛnaka etena ketawɔ onto ɔmɔtshi akambo wa mɛtɛ wa lo Bible ndo kasambishande anto akina akambo akɔ. (Tok. 23:15, 16) Ndooko onyake Jehowa ngɛnangɛnaka efula etena kɛnande kɛnɛ kasalema ɛlɔ kɛnɛ! Ɛnyɛlɔ, kaanga mbakonge hemɔ kasambemɛ l’andja w’otondo l’ɔnɔnyi w’olimu wa 2020, anto 7 705 765 wakeke Bible, ndo anto 241 994 wakayakimɔ le Jehowa ndo wakabatizama. Lo wedi awɔ, ambeki w’eyoyo asɔ wayeka l’anto akina Bible ndo wayetɛ anto efula ambeki. (Luka 6:40) Aha la taamu, sho ngɛnyangɛnyaka Jehowa efula etena kayashaso l’olimu wa mbetɛ anto ambeki.

16. Naa oyango wa dimɛna wakokaso ndjadjɛ?

¹⁶ Mbetɛ anto ambeki ekɔ olimu wa wolo, koko l’ekimanyielo ka Jehowa sho kokaka ndjasha dia mbetsha wanɛ weke eyoyo dia vɔ mboka Shɛso lele l’olongo ngandji. Sho kokaka ndjadjɛ oyango wa mbekaka kaanga l’onto ɔtɔi Bible. Sho koka nkashimɔ lo menda etombelo wayonga naka sho nkamba la diaaso tshɛ dia nɔmba wanɛ wahomana la so dia mbeka la wɔ Bible. Sho koka monga l’eshikikelo dia Jehowa ayɔtshɔkɔla welo aso.

17. Ngande wayotoyaoka naka sho mbetsha anto Bible?

¹⁷ Ekɔ tshondo ya diɛsɛ dia nsambisha ndo mbetsha anto akina akambo wa mɛtɛ! Olimu ɔsɔ toshaka ɔngɛnɔngɛnɔ wa mɛtɛ. Ɔpɔstɔlɔ Pɔɔlɔ, lakakimanyiya anto efula wa la Tɛsalɔnika dia monga ambeki, akakɛnɛmɔla tokanyi tande lo yoho nyɛ: “Ele elongamelo kaso kana ɔngɛnɔngɛnɔ aso kana dɛmbɔ diaso dia nkoso diayafunaso la ntondo ka Nkumɛso Yeso lo woongelo ande? Shi mɛtɛ nyu? Nyu mɛtɛ mbele lotombo laso ndo ɔngɛnɔngɛnɔ aso.” (1 Tɛs. 2:19, 20; Ets. 17:1-4) Anto efula ɛlɔ kɛnɛ ndjaokaka woho akɔ waamɛ. Kadiyɛso kelɛwɔ Stéphanie kakakimanyiya anto efula, kaamɛ l’omɛnde, polo lo batisimu mbutaka ate: “Ndooko ɔngɛnɔngɛnɔ woleki wa nkimanyiya anto dia vɔ ndjakimɔ le Jehowa.”