SAWO DIA WEKELO 41
Woho wa nkimanyiya ambeki wa Bible dia mpama polo lo batisimu—Etenyi ka ntondo
“Nyekɔ lo mɛnya dia nyu mbele mukanda waki Kristo wakafundama oma le so, sho wanɛ wele ekambi.”—2 KƆR. 3:3.
OSAMBO 78 “Awaetsha Ɔtɛkɛta wa Nzambi”
AWUI WAYƆTƐKƐTAMA *
Kakɔna kayoleka monga l’ɔngɛnɔngɛnɔ le etshumanelo k’otondo ko ndeka ɔngɛnɔngɛnɔ wa mɛna ombeki wa Bible wakawakimanyiya dia monga la ngandji ambobatizama? (Enda odingɔ 1)
1. Ngande watokimanyiya 2 Kɔrɛtɔ 3:1-3 dia ngɛnangɛna diɛsɛ diele laso dia mbeka l’anto Bible polo lo batisimu? (Enda osato wele lo lohoso.)
NGANDE watoyoyaokaka etena kɛnayɛ ombeki wa Bible wa l’ɛtshi ka nkɛtɛ k’etshumanelo kanyu abatizama? Aha la taamu wɛ tɔngɛnangɛnaka! (Mat. 28:19) Ndo naka wɛ mbakeke l’ombeki ɔsɔ Bible, kete wɛ mongaka l’ɔngɛnɔngɛnɔ w’efula etena kawɛnayɛ abatizama! (1 Tɛs. 2:19, 20) Ambeki weke ka batizama wekɔ “mikanda w’olowelo” w’amɛna, aha tsho le wanɛ wakeke la wɔ Bible, koko ndo le etshumanelo k’otondo.—Adia 2 Kɔrɛtɔ 3:1-3.
2. a) Naa dimbola di’ohomba diahombaso nsɛdingola, ndo lande na? b) Wekelo wa Bible kɛdikɛdi na? (Enda nɔtɛ.)
2 Ekɔ dui dia dimɛna efula mɛna dia l’ɛnɔnyi ɛnɛi wetshi, l’alapɔlɔ wakatomamaka ngɔndɔ tshɛ l’andja w’otondo lofulo l’ambeki wa Bible * laki oko 10 000 000. Ndo l’ɛnɔnyi akɔ waamɛ, lofulo la l’atei atei l’anto ndekana 280 000 wakabatizamaka ɔnɔnyi tshɛ dia monga Ɛmɛnyi wa Jehowa ndo ambeki w’eyoyo wa Yeso Kristo. Ngande wakokaso ndeka nkimanyiya miliyɔ y’ambeki wa Bible asɔ dia batizama? Edja tshɛ kele Jehowa la solo dia lotutsha ndo kakandasha anto etena ndo diaaso dia monga ambeki wa Kristo, sho nangaka nsala tshɛ kakokaso nsala dia mbakimanyiya dia mpama esadi esadi polo lo batisimu. Nshi yekɔ lo tatshu esadi esadi!—1 Kɔr. 7:29a; 1 Pe. 4:7.
3. Kakɔna kayotɔsɛdingola lo sawo nɛ lo kɛnɛ kendana la nɔmbɔla wekelo wa Bible?
3 Lam’ele mbetɛ anto ambeki ekɔ ohomba efula nshi nyɛ, Olui-walɔmbɔla akambola kɔmite ya filialɛ kɛnɛ kakokaso nsala dia ndeka nkimanyiya ambeki wa Bible dia mpama polo lo batisimu. Lo sawo nɛ ndo lo sawo diayela, tayɛna wetshelo wakokaso nkondja oma le ambatshi mboka, waa misiɔnɛrɛ ndo emendji w’etshimbedi wele la diewo. * (Tok. 11:14; 15:22) Vɔ wakalembetshiya kɛnɛ kakoka embetsha wa Bible ndo ambeki awɔ nsala dia wekelo wa Bible ndeka monga l’etombelo w’amɛna. Lo sawo nɛ, tayɔsɛdingola awui atanu wahomba ombeki wa Bible tshɛ nsala dia mpama polo lo batisimu.
NYEKAKE LOMINGU TSHƐ
Mbola ombeki dia kana nyu koka mbidjasɛ dia nyu ntetemala l’ɔkɛtshanyelo wendana la Bible (Enda odingɔ 4-6)
4. Kakɔna kahombaso mbeya lo kɛnɛ kendana la wekelo wa Bible wa lo tshena pe?
4 Anangɛso l’akadiyɛso efula mbekaka l’anto Bible lo tshena pe. Kaanga mbele ɔsɔ ekɔ etatelo ka dimɛna ka nkimanyiya onto dia ndjasha l’awui wa lo Bible, mbala efula ɔkɛtshanyelo ɔsɔ tongaka lo tshena pe ndo ondo haleke salema lomingu tshɛ. Dia nomialomia nsaki, anangɛso l’akadiyɛso amɔtshi nɔmbaka onto lɛnya nsaki numɛlɔ ya telefɔnɛ, ndo oma laasɔ ndjowelɛ lo telefɔnɛ kana ndjofundɛ mesajɛ wele la tokanyi t’oma l’Afundelo la ntondo ka vɔ ndjowembola. Ɔkɛtshanyelo wa lo waaso wa ngaasɔ koka ntetemala l’edja ka ngɔndɔ efula aha la wekelo wa Bible wa dimɛna monga. Onde mɛtɛ ombeki wa Bible ayohama polo lo ndjakimɔ ndo batizama naka nde * mbetshaka yema y’etena ndo welo wa ngasɔ eto dia mbeka Ɔtɛkɛta wa Nzambi? Ondo bu.
5. Lo ndjela Luka 14:27-33, kakɔna kakatɔtɔmiya Yeso kakoka tokimanyiya l’olimu aso wa mbetɛ anto ambeki?
5 Lo diaaso dimɔtshi, Yeso akasha ɛnyɛlɔ kendana la kɛnɛ kakoka onto nsala dia monga ombeki ande. Nde akatɛkɛta dikambo di’onto ɔmɔtshi lalanga mbika luudu lotangakadi ndo dia nkumekanga kɛmɔtshi kalanga ntshɔ dia tɔlɔsha ta. Yeso akate dia onto lalanga mbika luudu pombaka “[ta]djashi ntondo dia nkamba akumi” dia menda kana nde ayoshidiya luudu lande, ndo ɔnɛ nkumekanga pombaka “[ta]djashi ntondo dia menda” kana asɔlayi ande wayokoka nkotsha oyango awɔ. (Adia Luka 14:27-33.) Woho akɔ waamɛ mbele, Yeso akeyaka dia onto tshɛ lalanga monga ombeki ande, pombaka nsɛdingola la yambalo tshɛ kɛnɛ kalembetshiya mboyela. L’ɔtɛ w’ɔkɔkɔ ɔsɔ mbele sho pombaka nkeketsha ambeki aso wa Bible dia mbekaka la so lomingu tshɛ. Ngande wakokaso nsala dui sɔ?
6. Akokaso nsala dia ambeki aso wa Bible mpama?
6 Nyotate ntaloya wekelo ɛsɔ wa lo tshena pe. Ondo nyu kokaka nkɛtshanya avɛsa akina laadiko etena tshɛ kekanyu. Naka ompokami ayɛ ambekɛ dia nyu sawolaka kambe, kete wɛ koka mbombola dia kana nde ekekɔ la yema y’etena dia nyu nkɛtshanya dui dimɔtshi dia lo Bible. Okadimwelo w’ompokami ayɛ ayɛnya dia kana nde mbɔsaka wekelo wa Bible la nɛmɔ. L’ekomelo, dia mbokimanyiya dia nde mpama esadi, wɛ koka mbombola dia kana nyu kokaka mbekaka mbala hiende lo lomingu. Koko, nɔmbamaka akambo efula oleki mbeka mbala ɔtɔi kana mbala hiende lomingu tshɛ.
LƆNGƆSƆLAKA WEKELO TSHƐ
Lɔngɔsɔla wekelo anyu wa Bible dimɛna, ndo ɛnya ombeki woho wa nɔngɔsɔlaka wekelo (Enda odingɔ 7-9)
7. Ngande wakoka ombetsha nɔngɔsɔlaka wekelo tshɛ wa Bible dimɛna?
7 Oko weyɛ ombetsha, wɛ pombaka nɔngɔsɔlaka wekelo tshɛ wa Bible dimɛna. Wɛ kokaka ntatɛ la mbadia awui ndo avɛsa wele laawɔ. Yanga dia mbeya dimɛna awui woleki ohomba. Kana yimba l’ɔtɛ wa dui, ɛtɛ wahɔnyi, ambola w’edingɔ, avɛsa wofundjiwɔ ɔnɛ “adia,” esato ndo vidɛo tshɛ yakoka kokimanyiya dia nembetshiya awui akɔ. Oma laasɔ, lo nkanyiya dikambo dia ombeki ayɛ, nkana yimba la ntondo woho wakokayɛ mbetsha lo yoho ya wɔdu ndo yokɛma hwe l’oyango wa nde nshihodia awui akɔ esadi eto ndo nkamba la wɔ.—Nɛh. 8:8; Tok. 15:28a.
8. Kakɔna katetsha ɛtɛkɛta w’ɔpɔstɔlɔ Pɔɔlɔ wele lo Kɔlɔsayi 1:9, 10 lo kɛnɛ kendana la nɔmba dikambo di’ambeki aso wa Bible?
8 Etena kayalɔngɔsɔlayɛ, lɔmba Jehowa dikambo di’ombeki ayɛ ndo dia ehomba ande. Lɔmba Jehowa dia kokimanyiya dia mbetsha awui w’oma lo Bible lo yoho yayonanda otema ande. (Adia Kɔlɔsayi 1:9, 10.) Yanga dia mbeya la ntondo dui tshɛ diakoka ombeki ayɛ monga l’okakatanu dia nshihodia kana dia mbetawɔ. Lamaka lo yimba dia oyango ayɛ ele dia mbokimanyiya dia nde mpama polo lo batisimu.
9. Ngande wakoka ombetsha nkimanyiya ombeki ande dia nde nɔngɔsɔlaka wekelo ande? Lembetshiya.
9 Tekɔ l’elongamelo dia lo tshimbo ya wekelo wa Bible wa mbala la mbala, ombeki ayonga la lowando lo kɛnɛ kakasale Jehowa nde la Yeso ndo ayolanga mbeka akambo efula. (Mat. 5:3, 6) Dia nkondja wahɔ tshɛ lo tshɛ oma lo wekelo, ombeki pombaka ndjasha tshɛ lo kɛnɛ kekande. Dia nkotsha oyango ɔsɔ, lembetshiyande ohomba wa nde nɔngɔsɔlaka wekelo tshɛ, lo mbadiaka ndo lo kanaka yimba la ntondo lo woho wɔtɔnɛ awui akɔ lande. Ngande wakoka ombetsha nkimanyiya ombeki? Lɔngɔsɔla wekelo ɔmɔtshi kaamɛ l’ombeki dia mbɛnya woho wasalema dui sɔ. * Lembetshiyande woho wa ntana ekadimwelo wosembwe tɔɔ lo ambola, ndo ɛnyande woho wele mbekɛka eshidi l’ɛtɛkɛta ndo l’ɛnɔngɔ woleki ohomba ayowokimanyiya dia nde mbohɔka ekadimwelo. Oma laasɔ lɔmbande dia nde mbisha ekadimwelo l’ɛtɛkɛta ande hita. Naka nde nsala ngasɔ, kete wɛ ayokoka nshikikɛ dia kana nde akashihodisha awui akɔ. Koko, ekɔ dui dikina diakokayɛ nkeketsha ombeki ayɛ dia nsala.
ETSHANDE DIA SAWOLAKA LA JEHOWA LUSHI TSHƐ
Etsha ombeki ayɛ woho wa sawolaka la Jehowa (Enda odingɔ 10-11)
10. Lande na kele ekɔ ohomba mbadiaka Bible lushi tshɛ, ndo kakɔna kalɔmbama dia ndeka nkondja wahɔ oma lo wadielo wa Bile?
10 Laadiko dia mbekaka lomingu tshɛ nde l’ombetsha ande, ombeki ayokondja wahɔ naka nde salaka awui amɔtshi lushi tshɛ ndamɛ. Nde pombaka sawolaka la Jehowa. Lo ngande? Lo pokamɛka ndo lo sawolaka la Jehowa. Nde koka pokamɛ Jehowa lo mbadiaka Bible lushi tshɛ. (Jash. 1:8; Os. 1:1-3) Ɛnyande woho wa kambaka la “Ekongelo ka wadielo wa Bible” kele lo jw.org. * Lo mɛtɛ, dia mbokimanyiya dia nde ndeka nkondja wahɔ oma lo wadielo ande wa Bible, keketshande dia nde kanaka yimba la kɛnɛ kawetsha Bible lo dikambo dia Jehowa ndo woho wakokande nkamba la kɛnɛ kekande lo lɔsɛnɔ lande.—Ets. 17:11; Jak. 1:25.
11. Ngande wakoka ombeki mbeka woho wa nɔmbaka dimɛna, ndo lande na kele ekɔ ohomba dia nde nɔmbaka Jehowa mbala la mbala?
11 Keketsha ombeki ayɛ dia sawolaka la Jehowa lo mbɔlɔmbaka lushi tshɛ. Salaka alɔmbɛlɔ w’oma k’ɛse otema l’etatelo ndo l’ekomelo ka wekelo tshɛ lo nɔmbaka kaamɛ l’ombeki ndo lo dikambo diande. Naka nde pokamɛka alɔmbɛlɔ ayɛ, kete nde ayeka woho wa nɔmbaka Jehowa Nzambi oma k’ɛse otema ndo l’otema ɔtɔi lo lokombo la Yeso Kristo. (Mat. 6:9; Jni. 15:16) Ohokanyiya woho wayoleka ombeki ayɛ ndjasukanya la Nzambi naka nde mbadiaka Bible lushi tshɛ, mbuta ate mpokamɛ Jehowa ndo nɔmbaka, mbuta ate nsawola la Jehowa! (Jak. 4:8) Naka nde monga la mbekelo shɔ, kete nde ayosala dui dikina diakoka mbokonya dia ndjakimɔ ndo batizama.
KIMANYIYANDE DIA NDAMƐ MONGA LA DIƆTƆNGANELO LA JEHOWA
12. Ngande wakoka ombetsha nkimanyiya ombeki dia monga la diɔtɔnganelo la Jehowa?
12 Kɛnɛ keka ombeki lo wekelo wa Bible hahombe tsho ntshikala lo yimba koko pombaka minanda otema ande. Lande na? Otema aso, mbita ate nsaki yaso, tokanyi taso ndo woho wayaokaso totshutshuyaka dia nsala akambo. Yeso aketsha anto akambo efula ndo vɔ wakangɛnangɛnaka mbeka oma le nde. Koko anto wakatawoyelaka nto l’ɔtɛ wele akambo wakandetshaka wakanandaka etema awɔ. (Luka 24:15, 27, 32) Ombeki ayɛ pombaka mbɔsa Jehowa oko Onto la mɛtɛ mɛtɛ, Onto lakokande monga la diɔtɔnganelo, ndo mbɔsa oko She, Nzambi kande ndo Ɔngɛnyi ande. (Os. 25:4, 5) Etena kekanyu Bible, nkotola yambalo y’ombeki ayɛ lo waonga w’amɛna wa Nzambi. (Eto. 34:5, 6; 1 Pe. 5:6, 7) Oyadi awui akɔna watanyakɛtshanya, leka nkotola yambalo y’ombeki lo woho w’Onto wele Jehowa. Kimanyiya ombeki dia nshihodia waonga w’amɛna wa Jehowa, mbita ate ngandji, ɔlɔlɔ ndo kɛtshi. Yeso akate dia “nanga Jehowa Nzambi kayɛ” mbele “ɔlɛmbɛ woleki woke ndo wa ntondo.” (Mat. 22:37, 38) Sala la wolo dia nkimanyiya ombeki ayɛ dia mboka Nzambi ngandji k’efula.
13. Sha ɛnyɛlɔ kɛnya woho wa nkimanyiya ombeki dia nde mbeya waonga wa Jehowa.
13 Etena kasawolayɛ l’ombeki ayɛ, lembetshiyande lande na kalangayɛ Jehowa. Dui sɔ koka nkimanyiya ombeki ayɛ dia nshihodia dia nde pombaka monga la diɔtɔnganelo dia dimɛna ndamɛ la Jehowa. (Os. 73:28) Ɛnyɛlɔ, onde ekɔ ɔnɔngɔ ɔmɔtshi l’okanda watanyeke kana lo divɛsa wɛnya dui dimɔtshi diendana la Jehowa, mbita ate ngandji, lomba, losembwe kana wolo diananda otema ayɛ? Tɛ ombeki ayɛ dui diakɔ ndo kimanyiyande dia nde mbeya ɔnɛ ɔsɔ ekɔ ɔkɔkɔ ɔmɔtshi l’atei w’ɛkɔkɔ efula wokayɛ Shɛso lele l’olongo ngandji. Ekɔ dui dikina diahomba ombeki wa Bible tshɛ nsala dia nde mpama polo lo batisimu.
KEKETSHANDE DIA MBƆTƆKA NSANGANYA YA L’ETSHUMANELO
Keketsha ombeki ayɛ dia ntatɛ mbɔtɔ lo nsanganya aha la ntshimbatshimba! (Enda odingɔ 14-15)
14. Lo kɛnɛ kendana la nsanganya ya l’etshumanelo, kakɔna katotɛ Hɛbɛru 10:24, 25 kakoka nkimanyiya ombeki wa Bible dia nde mpama?
14 Sho tshɛ nangaka dia ambeki aso mpama polo lo batisimu. Yoho mɔtshi y’ohomba yakokaso mbakimanyiya ele lo mbakeketsha dia vɔ mbɔtɔka nsanganya ya l’etshumanelo. Embetsha ɛmɔtshi wele la diewo mbutaka dia ambeki wɔtɔ nsanganya aha la ntshimbatshimba pamaka esadi. (Os. 111:1) Embetsha ɛmɔtshi nembetshiyaka ambeki awɔ wa Bible ɔnɛ vɔ wayeka akambo efula lo wekelo awɔ wa Bible, koko ekɔ akambo efula wayoweka lo nsanganya wahawateka lo wekelo awɔ. Adia Hɛbɛru 10:24, 25 kaamɛ l’ombeki ayɛ ndo ɛnyande wahɔ wayondokondja naka nde tshɔ lo nsanganya. Ɛnyande vidɛo yele l’ɔtɛ a dui ɔnɛ Kakɔna kasalema lo Mbalasa ka Diolelo? * Kimanyiya ombeki ayɛ dia nde mbɔsa wɔtwɛlɔ wa nsanganya wa lomingu la lomingu oko dui dimɔtshi di’ohomba dia lo lɔsɛnɔ lande.
15. Kakɔna kakokaso nsala dia nkeketsha ombeki aso dia nde mbɔtɔka nsanganya mbala la mbala?
15 Akokayɛ nsala naka ombeki ayɛ atɔtɔka lo losanganya lɔmɔtshi kana hɔtɔ nsanganya mbala la mbala? La wangasanu tshɛ tɛnde dui dimɔtshi diakayeke lo losanganya lɔmɔtshi atete edja. Dui sɔ diayoleka ntshutshuya ombeki oleki mbelɛka tsho otsha lo nsanganya. Shande Tshoto y’Etangelo kana Dikatshi dia losanganya la Lɔsɛnɔ ndo olimu aso w’Okristo diekama l’etena kengo lo losanganya. Ɛnyande kɛnɛ kayekama lo losanganya layela ndo mbolande awui wa lɔkɔ waleka mbɔngɛnyangɛnya. Kɛnɛ tshɛ kayɛna ombeki ayɛ ndo kayondoka lo losanganya la ntondo layondɔtɔ, ayoleka kɛnɛ tshɛ kakandɛnyi ndo kakandoke l’ɔtɛmwɛlɔ okina. (1 Kɔr. 14:24, 25) Nde ayotohomana l’anto akina washa ɛnyɛlɔ ka dimɛna kakokande mbokoya ndo kayowokimanyiya dia nde mpama polo lo batisimu.
16. Kakɔna kalɔmbama dia nɔmbɔla wekelo wa Bible wakonya polo lo batisimu, ndo kakɔna kayotɔsɛdingola lo sawo diayela?
16 Ngande wakokaso nɔmbɔla wekelo wa Bible wakonya polo lo batisimu? Sho koka nkimanyiya ombeki tshɛ dia mbɔsa wekelo la nɛmɔ lo mbokeketsha dia mbekaka lomingu tshɛ ndo nɔngɔsɔlaka wekelo tshɛ. Sho nangaka nto mbokeketsha dia nde sawolaka la Jehowa lushi tshɛ ndo monga ndamɛ la diɔtɔnganelo la Nde. Sho nangaka nkeketsha ombeki dia nde mbɔtɔka nsanganya ya l’etshumanelo. (Enda kiombo yele l’ɔtɛ a dui ɔnɛ: “ Kɛnɛ kahomba ambeki wa Bible nsala dia vɔ mpama polo lo batisimu.”) Koko, oko wayolembetshiya sawo diayela, ekɔ akambo akina atanu wakoka embetsha wa Bible nsala dia nkonya ambeki polo lo batisimu.
OSAMBO 76 Ngande wayaokaso?
^ od. 5 Mbetsha onto ɔmɔtshi dui dimɔtshi, kɛdikɛdi mbokimanyiya “dia kanyiya, dia ndjaoka, dia nsala akambo lo yoho y’oyoyo, kana lo yoho kina.” Divɛsa dia l’ɔnɔnyi wa 2020 diɔsami lo Mateo 28:19, toholaka dia ekɔ ohomba mbeka l’anto Bible ndo mbaetsha woho wakokawɔ monga ambeki wa Yeso Kristo wambobatizama. Lo sawo nɛ ndo lo sawo diayela, tayɛna woho wakokaso ndjalowanya etena kakambaso olimu w’ohomba ɔsɔ.
^ od. 2 ELEMBETSHIELO W’AWUI AMƆTSHI: Naka wɛ ekɔ lo nkɛtshanya l’onto mbala la mbala ndo lo yoho ya dimɛna lo nkamba la Bible, kete wɛ ekɔ lo nɔmbɔla wekelo wa Bible. Wɛ koka mfunda l’alapɔlɔ ɔnɛ wɛ ekɔ lo mbeka l’onto ɔmɔtshi, naka wɛ ambeka la nde mbala hiende l’ɔkɔngɔ wa wɛ mbɛnya woho wasalema wekelo ndo naka wɛ ekɔ l’eshikikelo ɔnɛ wekelo wayotetemala.
^ od. 3 Asawo anɛ wekɔ nto l’alako wɔsami oma l’asawo wele l’ɔtɛ a dui ɔnɛ: “Tɔlɔmbɔlɛ wekelo wa Bible watahame,” wakatondjama lo Olimu aso wa Diolelo wa Ngɔndɔ k’esambele 2004 polo Ngɔndɔ ka tanu 2005.
^ od. 4 Rɛfɛrasɛ tshɛ wendana l’ombeki wa pami mendanaka ndo l’ombeki wa womoto.
^ od. 9 Enda vidɛo ya minitɛ nyɛi yele l’ɔtɛ a dui ɔnɛ Lo mbetshaka ambeki aso dia nɔngɔsɔla. Lo JW Library®, ɔtɔ lam’ofundjiwɔ MEDIA > NSANGANYA NDO OLIMU ASO > TOLOWANYA AKOKA ASO WA MBETSHA.
^ od. 10 Ɔtɔ lam’ofundjiwɔ WETSHELO WA LO BIBLE > DIHOMƆ DIA WEKELO WA BIBLE.
^ od. 14 Lo JW Library®, ɔtɔ lam’ofundjiwɔ MEDIA > NSANGANYA NDO OLIMU ASO > DIHOMƆ DIENDANA L’OLIMU.
