Dimi lakotɔ lo Ngɔndɔ ka tanu 19, 1940, lo osomba wa Amioûn, la Liban. L’ɔkɔngɔ w’ɛnɔnyi ɛmɔtshi, nkumbo kaso kakonɔ l’osomba wa Tripoli, dimi lakole lɛkɔ lo nkumbo kokana ngandji, ka shikaa, keya ndo koka Jehowa Nzambi ngandji. Lo nkumbo kaso, takotɔ ana atanu, asato wa wamato ndo ahende w’apami, dimi mbaki ɔna la kose. Le ambutshi ami, nkondja falanga aki lo dihole dia hende. Awui wakatalekaka ndjasha lɔkɔ ele, mbeka Bible, mbɔtɔ nsanganya y’Akristo ndo nkimanyiya anto akina dia vɔ mbeya Nzambi.

L’etshumanelo kaso, taki l’Akristo w’akitami efula. Ɔmɔtshi lokombo lande Michel Aboud, ɔnɛ lakalɔmbɔlaka kɛnɛ kakelamɛka wekelo wa dibuku. Nde mbakatatɛ nsambisha akambo wa mɛtɛ w’Akristo la Liban l’etatelo k’ɛnɔnyi wa 1920, nde akeke akambo akɔ la New York. Dimi mbohɔka lo yoho ya laande woho wakandalɛmiyaka ndo wakandakimanyiyaka esekaseka ehende wakalongola apɔlɔmɛ lo Kalasa ka Ngiliyadɛ, Anne nde la Gwen Beavor. Vɔ wakayonga angɛnyi aso w’eshika. Ɛnɔnyi akumi l’ɔkɔngɔ, lakonge l’ɔngɛnɔngɛnɔ dia mpomana la Anne l’États-Unis. L’ɔkɔngɔ w’etena kɛmɔtshi, lakahomana la Gwen, ɔnɛ lakayotshukama la Wilfred Gooch ndo lakakambaka lo Bɛtɛlɛ ka la Londres, l’Angleterre.

Etena kakimi dikɛnda, Ɛmɛnyi wa Jehowa waki yema tshitshɛ la Liban. Koko l’osalosalo tshɛ, taketshaka anto akina awui wendana la Bible. Takasalaka dui sɔ  kaanga mbakatɔlɔshaka ewandji ɛmɔtshi w’ɛtɛmwɛlɔ. Laakohɔ awui amɔtshi wakawatosalɛka.

Lushi lɔmɔtshi, dimi la kadiyɛmi Sana takasambishaka losango la lo Bible lo etajɛ ɔmɔtshi wa woke. Abe ɔmɔtshi akadɛ l’etajɛ lɛnɛ akatasawolaka l’anto wa lɛkɔ. Ondo onto ɔmɔtshi mbakatowotɛ. Abe akɔ akatatɛ ntɛnga kadiyɛmi. Nde akonge ngala k’efula ndo akasokola Sana lo dihole diadɛwɔ otsha l’etajɛ ko nde akahomɔ. Onto ɔmɔtshi akelɛ apulushi lo telefɔnɛ, vɔ wakaye ndo la ngandji tshɛ vɔ wakasale dia Sana sakemɛ. Vɔ wakatɔlɛ abe otsha lo biro ka apulushi, lɛnɛ akawatoshola dia abe akɔ aki la okoma. Owandji w’apulushi akawombola ate: “Onde wɛ ekɔ lo mbetsha anto awui wa Nzambi? Ko kana wɛ ekɔ lo mbaetsha dia vɔ nsala awui wa ngala?”

Diaaso dikina diohɔmi ele etena kakalowɛ etshumanelo kaso bisi dia sho ntshɔ l’osomba ɔmɔtshi wanganyi dia tosambisha lokumu l’ɔlɔlɔ. Taketsha etena ka dimɛna polo lam’akayoka abe wa lo ngelo kakɔ kɛnɛ kakatasalaka ndo lam’akandatshumanya anto dia tɔlɔsha. Vɔ wakatɔhɛnyahɛnya, wakatoke edika ndo papa akahomɔ. Dimi mbohɔka etena kakamawendaka elungi kande kaki ndola la dikila. Nde akakalola lo bisi nde la mama, ndo sho wanɛ wakatshikala takakalola tele l’okiyanu. Koko, hambohɛki pondjo kɛnɛ kakate mama etena kakandakitolaka papa dikila, nde akate ate: “Jehowa, lam’alangɛ dimanyiyawɔ. Nɛ dia vɔ haweye kɛnɛ kasalawɔ.”

Lo diaaso dikina, takatshu dia tembola ewotɔ aso lo osomba aso wa lootɔ. Lɛkɔ takatane laka tshɛmi ka pami, evɛkɛ laki owandji ɔmɔtshi w’ɔtɛmwɛlɔ waki la lokumu. Evɛkɛ akɔ akeyaka di’ambutshi ami waki Ɛmɛnyi wa Jehowa. Nde akambitɛ, kaanga mbakimi l’ɛnɔnyi esamalo eto ate: “Enda wɛ, lande na kahayabatizama?” Dimi lakokadimola ɔnɛ, dimi leke dikɛnda ndo ɔnɛ talabatizama nɛ dia laakahombe mbeya awui efula wendana la Bible ndo monga la mbetawɔ ka wolo. Nde kɔngɛnangɛna okadimwelo ami, diakɔ diele nde akatɛ tshɛmi ɔnɛ dimi komonga la dilɛmiɛlɔ.

Koko awui wa kɔlɔ wakatokomɛ asɔ waki yema tshitshɛ. Lo tshɛ kawɔ, ase Liban mbokanaka l’anto ndo nongɔnaka. Diakɔ diele, takakoke nsawola l’anto efula awui wendana la Bible ndo takeke l’anto efula l’atei awɔ Bible.

Etena kakimi leeke lo kalasa, ɔnangɛso ɔmɔtshi l’ɔlɔngɔlɔngɔ akaye oma la Vénézuéla dia ndjembola Liban. Nde akɔtɔka nsanganya l’etshumanelo kaso ndo akayosawola la Wafa, enondo ami la womoto awui wa diwala. Kombeta edja, vɔ wakatshukana ndo wakatshu dia todjasɛ lo Vénézuéla. Lo mikanda wakandafundaka, Wafa akalɔmbɛ papa dia monɔ la nkumbo k’otondo otsha la Vénézuéla. Nde akasale ngasɔ nɛ dia nde aki l’olengolengo lo dikambo diaso. L’ekomelo taketawɔ kɛnɛ kakandate ko takonɔ!

Takakome la Vénézuéla lo 1953 ndo takadjasɛ la Caracas, suke la luudu la prezida. Lam’ele laki dikɛnda, lakangɛnangɛnaka etena kakamɛnaka woho waketetaka prezida lo mutuka ande w’oshinga wolo. Koko komonga dui dia wɔdu  di’ambutshi ami ndjaekesanyiya la wodja w’oyoyo, ɔtɛkɛta, mbekelo, mbo ya ndɛ ndo l’otshikitanelo wa deko. Etena kakawatatɛ ndjaekesanyiya, dui dimɔtshi dia kɔlɔ efula diakatombe.

Papa akatatɛ mboka hemɔ. Ɔsɔ aki dui diakatambiya, nɛ dia nde aki onto laki la demba dia wolo ndo dia dimɛna. Hatoyohɔ ndo etena kakandatate hemɔ ntondo ka laasɔ. Oma laasɔ, wakawonde la kansɛrɛ ka lo lɔlɛngɔ ndo wakoosale epaso. Lonyangu ko, nde akavu lomingu ɔtɔi l’ɔkɔngɔ.

Ekɔ wolo nembetshiya kandji kakatoke. Dimi laki paka l’ɛnɔnyi 13 eto. Taki l’ɔkɛyi w’efula ndo aki oko andja wambotokongotwɛ. L’edja k’etena kɛmɔtshi, aki okakatanu dia mama mbikikɛ nyɔi k’omɛnde. Koko, takayɛna dia lɔsɛnɔ pombaka ntetemala ndo Jehowa akatokimanyiya dia mbikikɛ. Etena kakimi l’ɛnɔnyi 16, lakalongola dipɔlɔmɛ lo kalasa ka sekɔndɛrɛ la Caracas, ndo lakalangaka mɛtɛ nsukɛ nkumbo kami.

L’etena kɛsɔ, enondo ami Sana akatshukama la Rubén Araujo, ɔnɛ lakatolongola dipɔlɔmɛ lo Kalasa ka Ngiliyadɛ ko nkalola la Vénézuéla. Vɔ wakasɔnɛ dia monɔ la New York. Etena kakɔshi nkumbo kami yɛdikɔ ya dimi mbɔtɔ l’inivɛrsite, lakatshu la New York dia todjasɛ laka enondo ami l’omɛnde, dia tɔtɔ kalasa lɛkɔ. Enondo ami l’omɛnde waki la shɛngiya y’efula lo ohamelo ami wa lo nyuma etena kakamadjasɛka kaamɛ la wɔ. Laadiko dia laasɔ, taki l’anangɛso efula wambotshunda lo nyuma l’etshumanelo kaso ka lo ɔtɛkɛta wa espagnole la Brooklyn. Anangɛso ahende l’atei awɔ wakamayeya ndo wakamangɛnangɛnaka ele Milton Henschel la Frederick Franz; vɔ akɔ ahende wakakambaka lo Bɛtɛlɛ ka la Brooklyn.

Etena kaki ɔnɔnyi ami wa ntondo l’inivɛrsitɛ la New York suke la nshila, lakatatɛ nkanyiya lo dikambo dia kɛnɛ kakamasalaka la lɔsɛnɔ lami. Lakadia ndo lakakanyiya efula lo kɛnɛ kendana la asawo wa lo Tshoto y’Etangelo wakatɛkɛtaka dikambo di’eyango w’amɛna w’Akristo. Lakɛnaka woho waki ambatshi mboka ndo ase Bɛtɛlɛ wa l’etshumanelo kaso l’ɔngɛnɔngɛnɔ ndo lakalomɔlomɔka dia monga oko vɔ. Koko, laasɔ ko latabatizama. Edja efula la ntondo ka laasɔ, lakashihodiaka ohomba wa nambola lɔsɛnɔ lami le Jehowa. Lakasale dui sɔ ndo lakabatizama lo Ngɔndɔ ka sato 30, 1957.

L’ɔkɔngɔ wa dimi batizama, lakatatɛ nkanyiya dia monga ombatshi mboka. Lakalangaka mɛtɛ monga ombatshi mboka, koko lakɛnaka dia ɔsɔ ayonga dui dia wolo. Ngande wakamakoke nkamba olimu ɔsɔ ko l’etena kakɔ kaamɛ lɔtɔ l’inivɛrsite? Takatomanɛ mikanda efula dimi l’ase nkumbo kami lo kɛnɛ kendana la yɛdikɔ yami ya ntshika mbɔtɔ l’inivɛrsite, ko nkalola la Vénézuéla ndo tonga ombatshi mboka.

Lakakalola la Caracas lo Ngɔndɔ ka samalo 1957. Koko, lakɛnyi di’awui wakakomɛ nkumbo kami komonga dimɛna. Vɔ waki l’ohomba w’onto okina layanga falanga dia mbasukɛ. Ngande wakamakoke mbakimanyiya? Lakakondja olimu lo bankɛ, koko lakalangaka mɛtɛ monga ombatshi  mboka. Kɛnɛ koleki tshɛ ele, ɔsɔ mbaki ɔkɔkɔ wakamakalola. Lakɔshi yɛdikɔ ya nsala awui akɔ ahende. L’edja k’ɛnɔnyi efula, lakakambaka wenya efula lo bankɛ ndo lakakambaka oko ombatshi mboka. Laki l’akambo efula wa nsala ndo laki l’ɔngɛnɔngɛnɔ!

Lakayoleka monga l’ɔngɛnɔngɛnɔ etena kakamɛnana ndo kakamatshukana la Sylvia, kadiyɛso k’olangala efula k’ose Allemagne koka Jehowa ngandji efula. Sylvia l’ambutshi ande wakonɔ la Vénézuéla. L’ɔkɔngɔ w’etena kɛmɔtshi, takote ana ahende, ɔna la pami, Michel (Mike), la ɔna la womoto, Samira. Ndo nto, lakatatɛ mɛmba ɔkɛndɛ wa mama. Nde akaye dia ndjodjasɛ kaamɛ la so. Koko lakahombe ntshika olimu w’ombatshi mboka l’ɔtɛ w’ɛkɛndɛ wa lo nkumbo, koko lakatetemala nsambisha efula. Dimi la Sylvia takakambaka oko ambatshi mboka wa tshanda lo tena diakiso la diaaso lo tovakashi.

Aki etena kaki ana wekekɔ lo kalasa mbakamahomana l’akambo wakamatɛkɛtshi l’etatelo ka sawo nɛ. Lo mbuta mɛtɛ, dimi laki la lɔsɛnɔ la dimɛna ndo anto wakakambaka kaamɛ la mi lo bankɛ wakanɛmiyaka. Koko, kɛnɛ kakamalekaka nanga ele anto mbɔsami oko okambi wa Jehowa. Tokanyi taki la mi lushi lɔsɔ komimɔ oma lo yimba yami. Diakɔ diele, dimi la wadɛmi takadjasɛ kaamɛ dia nkɛtshanya awui wendana la falanga. Naka dimi ntshika olimu ami wa lo bankɛ, kete wayombisha falanga efula. Lam’ele sho komonga l’abasa, lakɛnyi dia naka sho monga la lɔsɛnɔ l’ɔsɛlɛngɛ, kete takakoke monga la falanga yakatakoke nsɛna l’edja k’etena k’otale.

Komonga dui dia wɔdu dia mbɔsa yɛdikɔ shɔ, koko wadɛmi la ngandji nde la mama wakasukɛ tshɛ lo tshɛ. Diakɔ diele, lakɔshi yɛdikɔ ya monga ombatshi mboka nto. Ɔsɔ aki dui di’ɔngɛnɔngɛnɔ efula! Akɛnama dia mboka ambodihɔ. Koko yema tshitshɛ oma laasɔ, takakondja losango lakataambiya sho tshɛ.

Lushi lɔmɔtshi, dɔkɔtɛlɛ akate dia Sylvia aya la diemi. Ɔsɔ aki dui dia diambo le so sho akɔ ahende! Ɔsɔ aki dui di’ɔngɛnɔngɛnɔ efula; koko lakakanyiya lo kɛnɛ kendana la yɛdikɔ yakamɔshi ya monga ombatshi mboka. Shɛngiya yakɔna yakakoke monga la yɛdikɔ shɔ? Aha la ntshimbatshimba takatshikitanya ekanelo kaso ndo takatatɛ kongɛɛ onto okina lo nkumbo kaso. Koko lakatetemala ndjambola dia kana layonga l’akoka wa nkamba oko ombatshi mboka?

L’ɔkɔngɔ wa sho nkɛtshanya eyango aso, takalame yɛdikɔ yaso ya dimi monga ombatshi  mboka. Gabriel, ɔnaso la pami akotɔ lo Ngɔndɔ ka nɛi 1985. Kaanga mbakidiɔ ngasɔ, lakatshike nkamba lo bankɛ ndo lakatatɛ nkamba oko ombatshi mboka wa pondjo nto lo Ngɔndɔ ka samalo 1985. L’ɔkɔngɔ diko, lakayonga la diɛsɛ dia nkamba oko ose kɔmite ka filialɛ. Koko biro ka filialɛ komonga la Caracas, diakɔ diele lakahombaka mindaka lɔkɛndɔ la kilɔmɛtrɛ oko 80 nshi hiende kana shato lo lomingu.

Biro ka filialɛ kakikɔ l’osomba wa La Victoria, diakɔ diele takɔshi yɛdikɔ ya monɔ oko nkumbo otsha la La Victoria dia tonga suke la Bɛtɛlɛ. Ɔsɔ aki otshikitanu wa woke efula. Dimi ngɛnangɛnaka ndo mandolaka nkumbo kami efula. Dionga diawɔ diaki ekimanyielo ka woke efula. Enondo ami Baha aketawɔ dia kokɛka mama. Mike akatshuke wadi, koko Samira la Gabriel wakatetemala mbidjasɛ la so. Diakɔ diele, monɔ otsha la La Victoria, akatokonya dia sho ntshika angɛnyi waki la so la Caracas. Ndo nto, wadɛmi la ngandji, Sylvia akahombe ndjaekesanyiya la osomba wa tshitshɛ lo dihole dia kapitalɛ ka wodja, osomba wele l’anto efula. Ndo sho tshɛ takahombe mbekɛ dia nsɛna lo luudu la tshitshɛ. Lo mɛtɛ, akalɔmbama akambo efula dia mbɔsa yɛdikɔ ya monɔ oma la Caracas otsha la La Victoria.

Koko awui wakatshikitana nto. Gabriel akatshuke wadi ndo Samira akamɔ oma la ngelo dia toyadjasɛ. Oma laasɔ, wakatelɛ dimi la Sylvia lo 2007 dia todjasɛ kaamɛ l’ase nkumbo ka Bɛtɛlɛ, lɛkɔ mbeso polo ndo ɛlɔ. Mike, ɔnaso l’enondo la pami, ekɔ lo nkamba oko ekumanyi ndo oko ombatshi mboka kaamɛ la wadɛnde, Monica. Gabriel nde lawɔ ekɔ ekumanyi ndo ekɔ lo mbidjasɛ nde la wadɛnde Ambra l’Italie. Samira, laadiko dia monga ombatshi mboka, ekɔ lo nkimanyiya oko onto layakimɔ la lolango oma l’etale lo Bɛtɛlɛ.

Lakahombe mbɔsa tɛdikɔ ta weke efula lo lɔsɛnɔ lami. Koko dimi bu la lonyangu l’ɔtɛ wa dui sɔ. Layonyomɔsa tɛdikɔ ta woho akɔ waamɛ nto. Lekɔ la lowando lo ɛkɛndɛ efula wa lo nyuma ndo waɛsɛ wamomokondja lo kambɛ Jehowa. L’edja k’ɛnɔnyi efula, lambɛna di’ekɔ ohomba efula nsala dia diɔtɔnganelo diasaso la Jehowa mongaka nshi tshɛ wolo. Oyadi tɛdikɔ tahombaso mbɔsa tekɔ totshitshɛ kana weke, nde koka tosha wɔladi “woleki tokanyi tshɛ.” (Flpɛ. 4:6, 7) Dimi la Sylvia ngɛnangɛnaka nkamba lo Bɛtɛlɛ ndo sho ndjaokaka dia Jehowa ekɔ lo tɔtshɔkɔla l’ɔtɛ wa tɛdikɔ taso nɛ dia sho mbeetshaka nshi tshɛ lo dihole dia ntondo lo lɔsɛnɔ laso.