1. Lo tena dimɔtshi, lande na kakoka ekambi wa Jehowa ndjaoka opoko?

LO TENA dimɔtshi, efula l’atei aso ndjaokaka epoko. Le amɔtshi, tokanyi tɔsɔ mbetaka esadi. Le akina, tokanyi tɔsɔ koka ntshikala edja. Sho koka ndjaoka opoko kaanga etena keso l’anto efula. Amɔtshi ndɔka tshondo ya ta dia ndjaekesanyiya la etshumanelo k’oyoyo. Amɔtshi ndja oma lo nkumbo kele la dimama dia wolo, laasɔ vɔ ndjaokaka epoko etena kanganawɔ etale la ewotɔ awɔ. Ndo akina nto ndjaokaka opoko etena kavushawɔ onto ɔmɔtshi lokawɔ ngandji. Ndo Akristo amɔtshi, djekoleko wanɛ weke eyoyo l’akambo wa mɛtɛ, ndjaokaka epoko etena kaatona kana kahɛnyahɛnya ase nkumbo wele bu ambetawudi kana angɛnyi awɔ w’edjedja.

2. Ambola akɔna wayotɔsɛdingola?

² Jehowa mbeyaka ndo shihodiaka dui tshɛ diendana la so. Etena kayaokaso epoko, nde mbeyaka dikambo sɔ, ndo nde nangaka tokimanyiya dia sho minya tokanyi tɔsɔ. Ko ngande watokimanyiya Jehowa? Kakɔna kakokaso nsala diaha sho ndjaoka opoko? Ndo ngande wakokaso nkimanyiya anto akina wa l’etshumanelo kaso wayaoka epoko? Tayɔsɛdingola ekadimwelo wa ambola asɔ.

3. Ngande wakɛnya Jehowa dia nde ndjakiyanyaka lo dikambo dia Elidja?

³ Jehowa ndjakiyanyaka efula dikambo di’ɔlɔlɔ w’atɛmɔdi ande tshɛ. Nde ekɔ suke la ɔmɔmɔ la l’atei aso, ndo nde mɛnaka etena kakɔmɔso. (Os. 145:18, 19) Tende woho wakayasha Jehowa le omvutshi ande Elidja. Pami ka kɔlamelo kɛsɔ akasɛnɛ l’etena ka wolo ka l’ɔkɔndɔ wa wodja w’Isariyɛlɛ. Atɛmɔdi wa Jehowa  wakahɛnyahɛnyama wolo, ndo atunyi wa Nzambi waki la wolo wakasɔmana lo yoho ya laande la Elidja. (1 Ku. 19:1, 2) Dui dikina diakatshindja Elidja wɔɔngɔ aki ondo woho wakandafɔnyaka dia nde mbakatshikala tshɔi y’omvutshi yakakambɛka Jehowa. (1 Ku. 19:10) Nzambi akasale dui dimɔtshi aha la ntshimbatshimba dia nkimanyiya Elidja. Jehowa akatome ondjelo ande ɔmɔtshi dia ndjoshikikɛ omvutshi ande dia nde komonga ndaamɛ ndo ɔnɛ ase Isariyɛlɛ akina efula wakokaka Nzambi wɔma wakikɔ.​—1 Ku. 19:5, 18.

4. Ngande wɛnya Makɔ 10:29, 30 polo lo yɛdikɔ yakɔna yayakiyanya Jehowa lo dikambo di’ekambi ande wele ondo anto akina hawoyowasukɛ?

⁴ Jehowa mbeyaka dia etena kasɔnaso dia mbokambɛ, anto amɔtshi l’atei aso ndjahondjaka awui amɔtshi. L’atei wa kɛnɛ kayahondjawɔ mbele ndo osukɔ w’ewotɔ awɔ wele bu ambetawudi ndo w’angɛnyi awɔ wa ntondo. Ondo l’ɔtɛ wakandayakiyanyaka mbakambola ɔpɔstɔlɔ Petero Yeso mbala kɛmɔtshi ɔnɛ: “Sho takatshike diangɔ diaso tshɛ ndo takakoyele, kakɔna mɛtɛ kayotokondja?” (Mat. 19:27) La ngandji tshɛ, Yeso akashikikɛ ambeki ande ɔnɛ vɔ wayokondja nkumbo ka woke ka lo nyuma. (Adia Makɔ 10:29, 30.) Ndo Jehowa, lele Owandji wa nkumbo kaso ka lo nyuma ndakaka dia nde ayokimanyiya wanɛ walanga mbokambɛ. (Os. 9:10) Tende awui amɔtshi wakokayɛ nsala dia nkondja ekimanyielo ka Jehowa etena kalɔshanayɛ la tokanyi ta ndjaoka opoko.

5. Ɛlɔlɔ akɔna wakokayɛ nkondja naka wɛ nkana yimba lo woho wakokimanyiya Jehowa?

⁵ Kana yimba lo woho wakokimanyiya Jehowa. (Os. 55:22) Dui sɔ diayokokimanyiya dia ntetemala monga la kanyi yele la wɛdimo lo dikambo diayɛ. Kadiyɛso kɛmɔtshi k’onyemba kelɛwɔ Carol, * kele ndooko ose nkumbo kande lele Ɔmɛnyi wa Jehowa mbutaka ate: “Etena kakanyiyami woho wakakimanyiya Jehowa etena kakimi l’ehemba wa wolo, dui sɔ kimanyiyakami mɛtɛ diaha dimi ndjaoka opoko. Ndo dui sɔ shikikɛkami dia Jehowa ayokimanyiyaka lo nshi yayaye.”

6. Ngande wakoka 1 Petero 5:9, 10 nkeketsha wanɛ walɔshana la tokanyi ta ndjaoka opoko?

⁶ Kana yimba lo woho wakimanyiya Jehowa  asekayɛ ambetawudi wayaoka epoko. (Adia 1 Petero 5:9, 10.) Hiroshi, ɔnangɛso lele l’edja k’ɛnɔnyi efula ndamɛ mbaki Ɔmɛnyi wa Jehowa lo nkumbo kawɔ mbutaka ate: “L’etshumanelo, bu wolo mɛna di’anto tshɛ wekɔ l’ekakatanu. Mbeya ɔnɛ sho tshɛ tekɔ lo nsala la wolo dia kambɛ Jehowa kokaka nkeketsha wanɛ wele vɔamɛ mbele Ɛmɛnyi wa Jehowa lo nkumbo yawɔ.”

7. Ngande wakokimanyiya dɔmbɛlɔ?

⁷ Tetemala monga la mbekelo y’amɛna ya lo nyuma. L’atei wa mbekelo yakɔ mbele ndo ndjiholɛka Jehowa otema lo mbotɛ woho wayaokayɛ. (1 Pe. 5:7) Massiel mbutaka ate: “Dui dimɔtshi diakaleke ohomba diakakimanyiya dia ndɔshana la tokanyi tami ta ndjaoka opoko aki nɔmbaka Jehowa la etete.” Etena kakɔshi kadiyɛso k’osekaseka kɛsɔ yɛdikɔ ya kambɛ Jehowa, nde akayaoke opoko nɛ dia ndooko ose nkumbo kande ɔtɔi lakambɛ Jehowa. Kadiyɛso kakɔ mbutaka ate: “Nde mbaki Papa kami ka mɛtɛ, ndo dimi mbɔlɔmbaka lushi tshɛ, mbala efula lo lushi, lo mbotɛ woho wayaokami.”

8. Ngande wakokimanyiya wadielo w’Ɔtɛkɛta wa Nzambi ndo nkana yimba la wɔ?

⁸ Adiaka Ɔtɛkɛta wa Nzambi mbala la mbala, kanaka yimba l’ɛkɔndɔ ɛmɔtshi shikaa wɛnya woho wakooka Jehowa ngandji. Bianca, kadiyɛso kɛmɔtshi kakahombaka mbikikɛ ɛtɛkɛta w’ɔkɔmwɛlɔ w’oma le nkumbo kande mbutaka ɔnɛ: “Mbadiaka ndo kanaka yimba l’ɛkɔndɔ wa lo Bible ndo la ɛkɔndɔ wa nsɛnɔ y’ekambi waki Jehowa wakahomana l’ekakatanu akɔ waamɛ kimanyiyakami mɛtɛ.” Akristo amɔtshi kimɛka lo yimba avɛsa amɔtshi washa ekeketshelo, ɛnyɛlɔ oko Osambo 27:10 ndo Isaya 41:10. Akina mɛnaka dia mpokamɛ awui amɔtshi wakadjama l’eshinga w’okanda ɔmɔtshi wekama mbakimanyiyaka diaha vɔ ndeka ndjaoka opoko etena kalɔngɔsɔlawɔ nsanganya kana kadiawɔ Bible.

9. Ngande wakokimanyiya wɔtwɛlɔ wa nsanganya?

⁹ Sala la wolo dia mbɔtɔka nsanganya mbala la mbala. Nsanganya shɔ yayokokeketsha, ndo wɛ kokaka mbeya nto ananyɔ l’akadiyɛyɛ. (Hɛb. 10:24, 25) Massiel lakatatɛkɛtshi la diko mbutaka ate: “Kaanga mbakimi ɔsɔnyi, lakɔshi yɛdikɔ ya mbɔtɔka losanganya tshɛ la l’etshumanelo ndo dia mbishaka kɔmatɛrɛ. Dui sɔ diakakimanyiya dia ndjaoka dia lekɔ ose etshumanelo.”

10. Lande na kele ekɔ ohomba mbɔtɔ lɔngɛnyi l’Akristo wele la kɔlamelo?

¹⁰ Ɔtɔ lɔngɛnyi l’Akristo wele la kɔlamelo. Yanga angɛnyi l’etshumanelo wakokayɛ mbeka akambo efula oma le wɔ, oyadi wɛ mbaolɛ kana vɔ kolɛ kana oyadi nyu ntshikitana mbekelo. Bible toholaka dia lomba tanemaka le “esombe w’anto.” (Jɔbɔ 12:12) Esombe w’anto vɔ lawɔ koka mbeka akambo efula oma le akɛnda wele  la kɔlamelo. Davidɛ aki dikɛnda efula lo mbɛdika la Jɔnatana, koko dui sɔ kombashimba dia mbɔtɔ lɔngɛnyi la ma ma. (1 Sa. 18:1) Davidɛ la Jɔnatana wakakimanyiyanaka lam’asawɔ dia kambɛ Jehowa kaanga mbakawahomanaka l’ekakatanu wa wolo. (1 Sa. 23:16-18) Kadiyɛso Irina kele nshi nyɛ ndamɛ oto mbele Ɔmɛnyi wa Jehowa lo nkumbo kawɔ mbutaka ate: “Anangɛso l’akadiyɛso kokaka mɛtɛ monga ambutshi aso ndo ewotɔ aso wa lo nyuma. Jehowa koka nkamba la wɔ dia nkotsha ehomba aso.”

11. Ahombayɛ nsala dia monga l’angɛnyi w’eshika?

¹¹ Mbeyaka monga ko bu wɔdu monga l’angɛnyi w’eyoyo, djekoleko naka wɛ ekɔ ɔsɔnyi. Ratna, kadiyɛso kɛmɔtshi ka diki kakeke akambo wa mɛtɛ kaanga mbakandahomana l’ɔlɔshamelo mbutaka ate: “Lakahombe mbetawɔ dia laki l’ohomba w’ekimanyielo ndo w’osukɔ w’anangɛso l’akadiyɛso wa l’etshumanelo.” Koka monga tshondo y’okakatanu dia mbutɛ onto okina woho wayaokayɛ, koko nsawola l’onto okina lo mbodiholɛ otema ekɔ etshina ka lɔngɛnyi la wolo. Angɛnyi ayɛ nangaka kokeketsha ndo kosukɛ, koko vɔ nangaka wɛ mbatɛ dia vɔ mbeya woho wakokawɔ nsala dui sɔ.

12. Ngande wakoka olimu w’esambishelo kokimanyiya dia nkondja angɛnyi w’eshika?

¹² Yoho mɔtshi yoleki dimɛna ya nkondja angɛnyi ele lo sambishaka kaamɛ l’Akristo akina. Carol lakatatɛkɛtshi la diko mbutaka ate: “Lakakondja angɛnyi efula w’eshika lo mbetshaka wenya kaamɛ l’akadiyɛso l’esambishelo ndo l’elimu ekina wa teokrasi. Jehowa akakimanyiya l’edja k’ɛnɔnyi lo tshimbo y’angɛnyi asɔ.” Mongaka nshi tshɛ dui dia dimɛna le so etena kɔtɔso lɔngɛnyi l’Akristo wa kɔlamelo. Jehowa kambaka l’angɛnyi asɔ dia kokimanyiya dia ndɔshana la tokanyi tatshindja wɔɔngɔ, ɛnyɛlɔ oko tokanyi ta ndjaoka opoko.​—Tok. 17:17.

13. Ɔkɛndɛ akɔna wele l’anto tshɛ wa l’etshumanelo?

¹³ Anto tshɛ wa l’etshumanelo wekɔ l’ɔkɛndɛ wa mbisha lonya dia ngandji ndo wɔladi monga l’etshumanelo ndo diaha kaanga onto ɔtɔi ndjaoka dia nde ekɔ opoko. (Jni. 13:35) Kɛnɛ kasalaso ndo kataso kokaka mɛtɛ nkimanyiya anto akina lo yɛdikɔ y’efula. Kadiyɛso kɛmɔtshi akate ate: “Etena kakamekaka akambo wa mɛtɛ, etshumanelo kakakome nkumbo kami. Totomonga Ɔmɛnyi wa Jehowa otondonga vɔ kokimanyiyami.” Akokayɛ nsala dia nkimanyiya wanɛ wele vɔamɛ mbele l’akambo wa mɛtɛ dia vɔ ndjaoka dia wekɔ ase etshumanelo?

14. Akokayɛ nsala dia mbɔtɔ lɔngɛnyi la eyoyo?

¹⁴ Sala la wolo dia mbɔtɔ lɔngɛnyi la eyoyo. Sho koka nsala dui sɔ lo nongolaka eyoyo waya l’etshumanelo la wangasanu tshɛ. (Rɔmɔ 15:7) Koko, hatohombe komɛ tsho lo mbisha anto mɔyɔ wa la wangasanu. Sho nangaka mbɔtɔ l’anto lɔngɛnyi layoviya. Laasɔ, onga ɔlɔlɔ ndo yasha l’otema ɔtɔi le eyoyo. Kaanga mbahayahombe ndjatambiya l’akambo awɔ, yanga dia mbeya ekakatanu walɔshanawɔ la wɔ. Anto amɔtshi koka monga l’okakatanu dia mbuta woho wayaokawɔ, laasɔ ewɔ dia mbatshutshuya dia vɔ ntɛkɛta. Koko l’ɔkɔmi tshɛ yanga dia mbeya woho wayaokawɔ lo nkamba la ambola la diewo tshɛ ndo hokamɛ la solo dia lotutsha tshɛ ekadimwelo awɔ. Ɛnyɛlɔ, wɛ koka mambola ɔnɛ ngande wakanyeye akambo wa mɛtɛ?

15. Ngande wakoka Akristo wambotshunda lo nyuma nkimanyiya anto akina wa l’etshumanelo?

¹⁵ Ase etshumanelo tshɛ wayohama lo nyuma, naka Akristo tshɛ wambotshunda lo nyuma, djekoleko dikumanyi ndjasha le wɔ. Melissa, lakodiama l’akambo wa mɛtɛ oma le mama kande mbutaka ɔnɛ: “Lekɔ la lowando l’efula le anangɛso wakayala oko waa papa yami lo nyuma, wanɛ waketsha wenya kaamɛ la mi ndo  wakayasha tshɛ le mi l’edja k’ɛnɔnyi. Mbala tshɛ kakimi la dui dia mbuta, onto ɔmɔtshi aki suke dia pokamɛmi.” Mauricio, ɔnangɛso ɔmɔtshi l’ɔlɔngɔlɔngɔ lakayaoke oko okalema etena kakatshike ombetsha ande wa Bible akambo wa mɛtɛ, mbutaka ate: “Woho wakayasha dikumanyi le mi akakimanyiya efula. Vɔ wakasawolaka la mi mbala la mbala. Vɔ wakasambishaka kaamɛ la mi, wakakahanaka la mi diangɔ di’oshinga wolo diakawasholaka lo wekelo awɔ wa Bible w’onto ndamɛ ndo wakakɛnyaka la mi tɔkɛnyɔ tɔmɔtshi.” Melissa nde la Mauricio waya ekambi wa lo tena tshɛ.

16-17. Lo toho takɔna shikaa takokayɛ nkimanyiya anto akina?

¹⁶ Kimanyiya anto akina lo toho ta shikaa. (Ngal. 6:10) Leo, lakamba oko misiɔnɛrɛ lo wodja ɔmɔtshi wanganyi etale la nkumbo kande mbutaka ate: “Mbala efula kɛnɛ tshɛ kele onto l’ohomba ele nsala tsho tshelo mɔtshi ya la ngandji l’etena kahombama. Dimi mbohɔka lushi lɔmɔtshi lakamasale aksida la mutuka. Lam’akamakome la ngelo, laki l’okiyanu efula. Koko oma laasɔ, wadi l’omi amɔtshi wakambelɛ dia tɔlɛ la wɔ yangɔ. Handjohɔ kɛnɛ kakatale, koko lakohɔ woho wakawapokamɛ la ngandji tshɛ. L’ekomelo, lakayaoke dimɛna efula.”

¹⁷ Sho tshɛ ngɛnangɛnaka akambo wa lo nyuma, ɛnyɛlɔ oko nsanganya y’etshimbedi ndo nsanganya ya rɛjɔ, nɛ dia lo waaso asɔ sho mbetshaka wenya kaamɛ l’anto akina ndo sho sawolaka awui wakatɛkɛtami lo nsanganya yakɔ. Koko, Carol lakatatɛkɛtshi la diko mbutaka ate: “Lo nsanganya y’etshimbedi ndo ya rɛjɔ dimi ndjaokaka opoko.” Lande na? Nde mbutaka ate: “Kaanga mbodingamimi la nkama kana nunu di’anangɛso l’akadiyɛso, mbala efula vɔ mbidjasɛka kaamɛ la nkumbo yawɔ. Le mi, etena kawaɛnami, dimi ndekaka ndjaoka opoko.” Akina mongaka l’okakatanu dia mbɔtɔ nsanganya ya weke mbala ka ntondo l’ɔkɔngɔ wa vɔ mvusha elonganyi awɔ. Onde wɛ mbeyaka onto ɔmɔtshi lele l’ekakatanu wa ngasɔ? Lande na kahayawelɛ dia nde ndjonga kaamɛ la nkumbo kayɛ dia ndjosala dui dimɔtshi dia lo nyuma?

18. Ngande wakokaso nkamba la 2 Kɔrɛtɔ 6: 11-13 etena kalongolaso anto akina lawakaso?

¹⁸ Etshaka wenya kaamɛ l’anto akina. Sala  la wolo dia mbetshaka wenya kaamɛ l’anangɛso l’akadiyɛso wotshikitanyi etena kasalayɛ akambo ayɛ amɔtshi, djekoleko wanɛ wakoka ndjaoka opoko. Sho nangaka ‘dihola etema aso hwe,’ djekoleko otsha le anto wa ngasɔ. (Adia 2 Kɔrɛtɔ 6:11-13.) Melissa lakatatɛkɛtshi la diko mbutaka ate: “Sho mongaka l’ɔngɛnɔngɛnɔ tena tshɛ etena katelɛ anangɛso lawakawɔ dia tetsha wenya kaamɛ kana dia mɛngɔla yema kaamɛ.” Onde ekɔ onto ɔmɔtshi la l’etshumanelo kanyu lakokayɛ nongola lakayɛ?

19. Etena kakɔna kele mbetsha wenya kaamɛ l’asekaso Akristo koka ndeka monga ohomba?

¹⁹ Ekɔ tena dimɔtshi diele asekaso Akristo koka ndeka ngɛnangɛna dia sho mbetsha wenya kaamɛ la wɔ. Mbeyaka monga ko amɔtshi wekɔ l’okakatanu dia monga kaamɛ l’ase nkumbo yawɔ wele bu ambetawudi etena kasalawɔ fɛtɛ yawɔ ya l’ɛtɛmwɛlɔ kana yakɛnɛmɔla ngandji ka wodja. Akina mbokaka kandji efula etena kakoka adatɛ amɔtshi, ɛnyɛlɔ datɛ diakawavusha lakiwɔ ɔmɔtshi la ngandji. Naka sho nɔmba anangɛso l’akadiyɛso wane wele l’ekakatanu wa ngasɔ dia mbetsha wenya kaamɛ la wɔ, kete sho mbaɛnyaka dia sho ‘ndjakiyanyaka l’otema ɔtɔi dikambo diawɔ.’​—Flpɛ. 2:20.

20. Ngande wakoka ɛtɛkɛta wa Yeso wele lo Mateo 12:48-50 tokimanyiya etena kayaokaso opoko?

²⁰ Ekɔ ɛkɔkɔ efula wakoka Okristo ndjaoka opoko lo tena dimɔtshi. Koko, sho hatohombe pondjo mbohɛ dia Jehowa mbeyaka dimɛna tokanyi ta ngasɔ. Nde toshaka kɛnɛ keso l’ohomba, mbala efula lo tshimbo y’asekaso Akristo. (Adia Mateo 12:48-50.) Lo wedi okina, sho mɛnyaka Jehowa dia tekɔ la lowando lo yɛdikɔ yande yoludi la ngandji etena kasalaso la wolo tshɛ dia nsukɛ nkumbo kaso ka lo nyuma. Oyadi woho wakokaso ndjaoka lo tena dimɔtshi, teye dia sho bu shoamɛ nɛ dia Jehowa ekɔ tena tshɛ kaamɛ la so!