Tolembelo mɛnyaka dia Yeso akonge Ɔlɔmbɛdi a laadiko etena kakandabatizama lo 29 T.D. Ngande weyaso dikambo sɔ? Etena kakabatizama Yeso, nde akɛnya dia nde akalangaka nkimɔ lɔsɛnɔ lande oko olambo lo elambwelo ka didjidji, kakalembetshiyaka “lolango” la Nzambi. (Ngal. 1:4; Hɛb. 10:5-10) Lam’ele elambwelo ekɔ etenyi k’ohomba efula ka lo tɛmpɛlɔ, ondo tɛmpɛlɔ ka lo nyuma, tɔ lawɔ kakatatɛ monga etena kakabatizama Yeso. Tɛmpɛlɔ ka woke ka lo nyuma ka Jehowa kekɔ djidjidji dia yɛdikɔ tshɛ yatokimanyiya dia mbɔtɛmɔla lo yoho ya dimɛma l’ekimanyielo k’olambo wa Yeso.​—Mat. 3:16, 17; Hɛb. 5:4-6.

Lam’ele tɛmpɛlɔ ka woke ka lo nyuma kakashikikɛma, aki ohomba w’Ɔlɔmbɛdi a laadiko tokamba lɔkɔ. Dia nkotsha ohomba ɔsɔ, Nzambi akakite Yeso esɔ la “nyuma k’ekila ndo la wolo.” (Ets. 10:37, 38; Makɔ 1:9-11) Ko, ngande wakokaso monga l’eshikikelo ɔnɛ Yeso akasɔnama oko Ɔlɔmbɛdi a laadiko la ntondo ka nyɔi ndo ka eolwelo kande? Sho tanaka ɔkɔkɔ w’oshika etena kasɛdingolaso ɛnyɛlɔ ka Arɔna ndo ɛhɛna ande wakakambe oko ɛlɔmbɛdi a laadiko l’ɛse k’Ɛlɛmbɛ wa Mɔsɛ.

Oko wakadialɔmbamaka l’Ɛlɛmbɛ, paka ɔlɔmbɛdi a laadiko mbakakokaka mbɔtɔ lo dihole dioleki ekila dia lo tabɛrnaklɛ, ndo l’ɔkɔngɔ diko, lo dihole dioleki ekila dia lo tɛmpɛlɔ. Dihɔndɔ di’okombɔ mbakakakitolaka dihole dioleki ekila sɔ la dihole di’ekila. Ɔlɔmbɛdi a laadiko aketaka la wedi wa dihɔndɔ di’okombɔ sɔ paka lushi l’Ekombelo ka pɛkato. (Hɛb. 9:1-3, 6, 7) Oko wakakitama Arɔna nde la ɛhɛna ande ɛsɔ dia monga ɛlɔmbɛdi a laadiko la ntondo ka mbeta la wedi wa “dihɔndɔ di’okombɔ [dia mɛtɛ mɛtɛ]” dia lo tabɛrnaklɛ, woho akɔ waamɛ mbele Yeso akahombe kitama esɔ oko Ɔlɔmbɛdi a laadiko wa lo tɛmpɛlɔ ka woke ka lo nyuma ka Jehowa ntondo ka nde mvɔ ndo oma laasɔ mbeta la wedi wa “dihɔndɔ di’okombɔ, mbuta ate demba diande” otsha lo lɔsɛnɔ la l’olongo. (Hɛb. 10:20) L’ɔtɛ w’ɔkɔkɔ ɔsɔ, ɔpɔstɔlɔ Pɔɔlɔ akatɛkɛta lo dikambo dia Yeso oko ɔnɛ lakaye oko “Ɔlɔmbɛdi a laadiko” ndo oma laasɔ “nde akɔtɔ lo luudu la dipɛma loleki woke ndo loleki kokele laki kombikama l’anya” ndo “l’olongo.”​—Hɛb. 9:11, 24.

Ndooko otshikitanu wele lam’asa etena kakashikikɛma sheke y’oyoyo la etena kakayasapɔma. Lande na? Etena kakadɛ Yeso l’olongo ndo kakandatɛnya lɔsɛnɔ lande l’onto la kokele lo wahɔ aso, nde akatakola nna dia ntondo l’atei wa wanya asato wakahombe mɛnya ɔnɛ sheke y’oyoyo yamboshikikɛma kana yambeyama. Wanya akɔ waamɛ asɔ mbakasale dia sheke shɔ sapɔma kana ntatɛ nkamba olimu. Wanya akɔna asɔ?

Ntondotondo, Yeso akɛnama la ntondo ka Jehowa; oma laasɔ, Yeso akakimɔ nɛmɔ di’olambo ande le Jehowa; l’ekomelo Jehowa aketawɔ nɛmɔ dia dikila dia Yeso diakatshulɔma, paka wanya asɔ wambotakɔma mbakahombe sheke y’oyoyo ndjokambaka olimu ayɔ.

Bible hatotɛ shikaa etena kaketawɔ Jehowa nɛmɔ di’olambo wa Yeso. Diakɔ diele hatokoke mbita l’eshikikelo tshɛ etena kakɔna kakatatɛ sheke y’oyoyo shɔ shikikɛma ndo kakayatatɛ nkamba olimu ayɔ. Koko sho mbeyaka dia Yeso akadɛ l’olongo nshi dikumi la ntondo ka Pɛntɛkɔsta. (Ets. 1:3) Lo daaso dimɔtshi l’etena ka mondo kɛsɔ, nde akɛnya nɛmɔ dia olambo ande le Jehowa ndo Jehowa akawetawɔ. (Hɛb. 9:12) Mɛtɛ ka dui sɔ kakɛnama hwe lo Pɛntɛkɔsta. (Ets. 2:1-4, 32, 33) L’etena kɛsɔ sheke y’oyoyo shɔ yakashikikɛma mɛtɛ ndo yakatatɛ nkamba olimu.

Lo tshena pe, sheke y’oyoyo yakashikikɛma ndo yakasapɔma l’ɔkɔngɔ wa Jehowa mbetawɔ nɛmɔ dia dikila dia Yeso diakatshulɔma. Oma laasɔ, sheke shɔ yakatatɛ nkamba olimu, ndo Yeso Ɔlɔmbɛdi a laadiko ekɔ lo nkamba oko ompakemi ayɔ.​—Hɛb. 7:25; 8:1-3, 6; 9:13-15.