ONTO ɔmɔtshi lewoya woho wayonga lushi ambɔsɛdingola dihole dimɔtshi l’ekimanyielo k’ehomɔ kelɛwɔ radar. Nde ambɛna dia lɔpɛpɛ la wolo lekɔ lo ndjasukana lo ɛtshi kɛmɔtshi ka nkɛtɛ kele l’anto efula. Lam’ele nde ndjakiyanyaka dia nsɛnɔ y’anto, nde ambosala dui dimɔtshi dia mbaewola la ntondo ka dui sɔ salema.

Woho akɔ waamɛ mbele, Jehowa ekɔ lo mbewola anto wa la nkɛtɛ tshɛ ɛlɔ kɛnɛ dikambo dia “lɔpɛpɛ la wolo” la waale efula loleki mpɛpɛ nkina yakawoke nkumu yayɔ. Ngande wasalande dui sɔ? Ndo lande na kakokaso monga l’eshikikelo dia nde ekɔ lo mbisha anto etena kahombama dia vɔ nsala dui dimɔtshi? Dia nkadimola ambola asɔ, nyɛsɔ tɔsɛdingole ntondo ɛhɛmwɛlɔ ɛmɔtshi wakasha Jehowa anto lo nshi yakete.

Lo nshi yakafundamaka Bible, Jehowa akahɛmɔlaka anto oma lo “mpɛpɛ ya wolo” kana dombo diotshikitanyi dia nde ayanga ndanya wanɛ wele l’okonda tshɛ hawokitanyiya wadjango ande. (Tok. 10:25; Jɛr. 30:23) L’oseka dui tshɛ, nde akewoyaka anto wakendanaka la dui sɔ la ntondo ndo akawatɛka dia vɔ nsala etshikitanu wakɔtɔnɛka la lolango lande. (2 Ku. 17:12-15; Nɛh. 9:29, 30) L’oyango wa nkimanyiya anto wakalangaka nsala etshikitanu wahombama, nde akatomaka mbala la mbala ekambi ande wa la nkɛtɛ dia mbaewoya dombo diande ndo dia nsala akambo aha la ntshimbatshimba.​—Amɔ. 3:7.

Nɔa aki okambi ɔmɔtshi wa kɔlamelo wakasale dui sɔ. L’edja k’ɛnɔnyi efula, nde akahɛmɔlaka la dihonga tshɛ anto wa lo nshi yande wakasalaka awui wa mindo ndo wa ngala lo kɛnɛ kendana la ɔlwɛlɔ wa Mvula k’elola lo nkɛtɛ k’otondo. (Eta. 6:9-13, 17) Nde akawatɛ nto kɛnɛ kakawahombe nsala dia vɔ shimbamɛ, diakɔ diakawayowelɛ l’ɔkɔngɔ ɔnɛ “osambisha w’akambo w’ɛlɔlɔ.”​—2 Pe. 2:5.

Oyadi welo akɔna wakadje Nɔa, anto waki lo nshi ya la ntondo ka Mvula k’elola asɔ kombidja yimba lo losango l’oma le Nzambi lakandawaewoyaka. Vɔ wakɛnya dia vɔ komonga kaanga la yema ya mbetawɔ. Etombelo waki la dui sɔ ele, vɔ wakavu “lam’akaye Mvula k’elola, ko tɔ kakawakumɛ vɔ tshɛ.” (Mat. 24:39; Hɛb. 11:7) Lam’akayasukanaka ekomelo kawɔ, vɔ kokoka pondjo mbuta dia Nzambi kombahɛmɔla.

Lo tena dikina, Jehowa akahɛmɔla anto yema tshitshɛ la ntondo ka “lɔpɛpɛ la wolo” la kilombo kande ntatɛ. Kaanga mbediɔ ngasɔ, nde akayashikikɛka dia wanɛ wakendanaka la dui sɔ wakonge l’etena kahombama dia nsala dui dimɔtshi. Ɛnyɛlɔ, nde akahɛmɔla la ntondo ka mbela Asui dikumi lo Edjibito w’edjedja. Ɛnyɛlɔ kekina, Jehowa akatome Mɔsɛ la Arɔna dia vɔ mpɛmɔla Farawɔ l’ekambi ande lo kɛnɛ kendana la sui di’esambele dia mvula ka mbɔkɔ kakalanya diangɔ efula. Lam’ele mvula ka mbɔkɔ kɛsɔ kakahombe ntatɛ la wedi a pindju, onde Nzambi akawasha etena kahombama dia vɔ ntana eshamelo ndo shimbamɛ oma lo lɔpɛpɛ la wolo lɔsɔ? Bible mbitaka ɔnɛ: “Okambi wa Farawɔ tshɛ wakoke ɔtɛkɛta wa Jehowa wɔma akɔtshiya ekambi ande la dongalonga diande lo luudu aha la ntshimbatshimba. Koko onto tshɛ laki kokitanyiya ɔtɛkɛta wa Jehowa akatshike ekambi ande la dongalonga diande l’oswe.” (Eto. 9:18-21) Mbokɛmaka hwe dia Jehowa akawasha ɔhɛmwɛlɔ wahombama, dia kele wanɛ wakookitanyiya aha la ntshimbatshimba shimbamɛ oma l’etombelo wa sui sɔ.

Woho akɔ waamɛ mbele, wakahɛmɔla Farawɔ l’ekambi ande ntondo ka sui dia dikumi. Koko, vɔ wakɔnyɔla l’otako tshɛ ɔhɛmwɛlɔ ɔsɔ. (Eto. 4:22, 23) Etombelo waki la dui sɔ ele, anawɔ wa nondo wakavu. Ɔsɔ aki dui dia lonyangu efula! (Eto. 11:4-10; 12:29) Onde vɔ wakahɛmɔma la wonya? Eelo! Aha la  ntshimbatshimba, Mɔsɛ akahɛmɔla ase Isariyɛlɛ dia sui dia dikumi ndo akawatɛ kɛnɛ kakawakoke nsala dia nshimbɛ nkumbo yawɔ. (Eto. 12:21-28) Anto angana wakayele ɔhɛmwɛlɔ ɔsɔ? Lo ndjela wɛdikelo ɔmɔtshi, anto miliyɔ shato, mbidja ndo ase Isariyɛlɛ ndo “anto akina efula wakasɔhana la wɔ” waki komonga ase Isariyɛlɛ ndo ase Edjibito, wakashimbamɛ oma lo kilombo ka Nzambi ndo wakatombe oma l’Edjibito.​—Eto. 12:38; nɔtɛ.

Oko wɛnya bɛnyɛlɔ sɔ, mbala tshɛ Jehowa ndjashikikɛka di’anto wambonga l’etena kahombama dia nkitanyiya ɛhɛmwɛlɔ ande. (Eoh. 32:4) L’oyango akɔna wakasale Nzambi dui sɔ? Ɔpɔstɔlɔ Petero akate dia Jehowa “halange kaanga onto 1 ndanyema, koko nde nangaka dia anto tshɛ nkondja diaaso dia ndjatshumoya.” (2 Pe. 3:9) Eelo, Nzambi ndjakiyanyaka dikambo di’anto. Nde nangaka dia vɔ ndjatshumoya ndo nkamba la dako diande la ntondo ka lushi lande la kilombo koka.​—Isa. 48:17, 18; Rɔmɔ 2:4.

Ndo ɛlɔ kɛnɛ, anto tshɛ pombaka nkitanyiya ɔhɛmwɛlɔ w’ohomba wewoyama lo nkɛtɛ k’otondo. Etena kakinde la nkɛtɛ, Yeso akahɛmɔla anto ɔnɛ dikongɛ nɛ di’akambo diayolanyema lo “mfɔnu ka woke.” (Mat. 24:21) Lo kɛnɛ kendana la kilombo ka lo nshi yayaye kɛsɔ, nde akatatshi prɔfɛsiya kele l’awui efula kakandalembetshiya kɛnɛ kakoka ambeki ande nongamɛ dia mɛna oko wayasukana etena kɛsɔ. Yeso akate akambo w’ohomba wɛnaso nshi nyɛ.​—Mat. 24:3-12; Luka 21:10-13.

Lo yoho yɔtɔnɛ la prɔfɛsiya kɛsɔ, Jehowa ekɔ lo nkeketsha onto tshɛ ɛlɔ kɛnɛ dia mbokambɛ ndo mbokitanyiya. Nde nangaka di’anto wele l’okitanyiya ngɛnangɛna la lɔsɛnɔ la dimɛna oma ko kakianɛ ndo lo nshi yayaye la ɛtshɔkɔ l’andja ande w’oyoyo wa losembwe. (2 Pe. 3:13) Dia nkimanyiya anto dia monga la mbetawɔ l’alaka ande, Jehowa mbaewoyaka losango lasha panda, mbuta ate “lokumu l’ɔlɔlɔ lɔnɛ la Diolelo” lakate Yeso dia lɔ “layosambishama lo nkɛtɛ k’otondo oko ɔmɛnyi le anto wa lo wedja tshɛ.” (Mat. 24:14) Nzambi ekɔ lo nkongɛ atɛmɔdi ande wa mɛtɛ dia ‘nsambisha lokumu l’ɔlɔlɔ’ kana losango l’oma le Nzambi lo wedja oko 240. Jehowa nangaka di’anto efula mpokamɛ ɔhɛmwɛlɔ ande ɔsɔ ndo shimbamɛ oma lo “lɔpɛpɛ la wolo” la kilombo kande kosembwe.​—Zɛf. 1:14, 15; 2:2, 3.

Bu ohomba dia sho mimbola dia mbeya ɔnɛ Jehowa ambosha anto etena kahombama dia vɔ nkitanyiya ɔhɛmwɛlɔ ande. Tolembetelo mɛnyaka dia nde salaka dui sɔ mbala tshɛ. Koko, dimbola di’ohomba diɔ nɛ: Onde anto wayodja yimba lo ɔhɛmwɛlɔ wa Nzambi kam’eke etena? Nyɛsɔ totetemale nkimanyiya anto efula oko weso akɛndji wa Nzambi dia vɔ nshimbamɛ l’ekomelo ka dikongɛ nɛ di’akambo.