1. Lande na kele paka Jehowa oto mbahombaso mamema la tshondo tshɛ?

JEHOWA mbahombaso mamema la tshondo tshɛ nɛ dia nde mbele Otungi aso ndo Ombishi wa lɔsɛnɔ. (Ɛny. 4:11) Koko, sho mongaka l’okakatanu ɔmɔtshi. Kaanga mbalangaso ndo mbalɛmiyaso Jehowa, sho koka monga l’okakatanu wa mbomamema la tshondo tshɛ oko walɔmbande. Sho pombaka nshihodia woho wakoka dui sɔ salema. Koko nyɛsɔ tɔsɛdingole ntondo awui amɔtshi walembetshiya mamema Jehowa la tshondo tshɛ.

2. Lo ndjela Etombelo 34:14, kakɔna kayotosala naka sho mamemaka Jehowa la tshondo tshɛ?

² Lo Bible, mamema Nzambi kɛdikɛdi mbooka ngandji k’efula. Naka sho mamemaka Jehowa la tshondo tshɛ, kete tayowɔtɛmɔlaka paka ndamɛ. Hatohombe mbetawɔ di’onto kana ɛngɔ kakɔna tshɛ mbɔsa dihole diele la Jehowa l’otema aso.​—Adia Etombelo 34:14.

3. Lande na kele hatomamema Jehowa oko akanga wa totshungu?

³ Hatomamema Jehowa oko akanga wa totshungu. Lande na? Nɛ dia dui sɔ mpikama lo awui wekaso wendana la nde. Tekɔ lo ngɛnangɛna waonga ande w’amɛna efula. Sho mbeyaka ndo mbetawɔka awui walangande ndo watonande. Sho shihodiaka ndo sukɛka sangwelo diande lo dikambo diaso. Tekɔ la nɛmɔ l’ɔtɛ wetawɔnde dia sho monga angɛnyi ande. (Os. 25:14) Awui tshɛ wekaso lo dikambo dia Otungi aso ndekaka tosukanya suke la nde.​—Jak. 4:8.

4. a) Awui akɔna wakamba Diabolo la wɔ diaha sho mamema Jehowa la tshondo tshɛ? b) Kakɔna kayotɔsɛdingola lo sawo nɛ?

 ⁴ Diabolo ekɔ lo nɔmbɔla dikongɛ nɛ di’akambo ndo nde kambaka la diɔ dia nomialomia nsaki ya lootɔ yele l’anto ndo wɛɔdu wa demba. (Ɛf. 2:1-3; 1 Jni. 5:19) Oyango ande ele dia sho nanga diangɔ dikina efula diaha sho ndjomamema Jehowa la tshondo tshɛ. Nyɛsɔ tɔsɛdingole toho tohende takoka Diabolo nsala dui sɔ. Ntondotondo, nde tohembaka dia mbesa ɔngɔnyi ndo yoho ya hende ele, nde tɔsɛngiyaka dia nsɔna tɔkɛnyɔ ta kɔlɔ.

5. Lande na kahombaso ndjalamaka diaha monga la ngandji ka falanga?

⁵ Sho tshɛ nangaka ndɛ dimɛna, monga l’ahɔndɔ w’amɛna wa ndɔta ndo dihole dia dimɛna dia mbidjasɛ. Koko, sho pombaka ndjalama diaha monga la ngandji ka falanga. Anto efula wa l’andja wa Satana wekɔ ‘anangi wa falanga’ ndo anangi wa diangɔ diakokawɔ nsomba la falanga. (2 Tim. 3:2) Yeso akeyaka dia ambeki ande wayohembama dia monga la ngandji kɛsɔ. Yeso akate ate: “Ndooko onto lakoka kambɛ ewandji 2 olimu, nɛ dia nde ayohetsha ɔmɔtshi ko ayolanga okina, kana nde ayɛkama ɔmɔtshi ko ayɛkɔ okina. Nyu hanyokoke kambɛ Nzambi la ɛngɔnyi olimu oko ɛhɔmbɔ.” (Mat. 6:24) Onto latɛmɔla Jehowa ko l’etena kakɔ kaamɛ mbetshaka wenya amboleka ndo mbidjaka welo dia nkondja ɔngɔnyi wa l’andja ɔnɛ, lo yoho mɔtshi, nde ekɔ lo kambɛ ewandji ehende olimu. Nde hamamema Jehowa la tshondo tshɛ.

6. Wetshelo akɔna wakokaso nkondja oma l’ɛtɛkɛta wakatɛ Yeso etshumanelo ka la Laodikiya?

⁶ Oya l’ekomelo ka ntambe ka ntondo T.D., ase etshumanelo ka l’osomba wa Laodikiya wakayafunaka ɔnɛ: “Dimi lekɔ ɔngɔnyi ndo lambokondja ɛngɔnyi ndo haahombe ndooko  ɛngɔ.” Koko lo washo wa Jehowa ndo Yeso vɔ waki ‘ase paa ndo ase kɛtshi ndo ase wola ndo totshungu ndo etakataka.’ Yeso akawasha dako, aha l’ɔtɛ wakiwɔ ɛngɔnyi, koko nɛ dia ngandji k’ɛngɔnyi kakalanyaka diɔtɔnganelo diasawɔ la Jehowa. (Ɛny. 3:14-17) Naka tamboshihodia dia nsaki ka monga ɔngɔnyi kekɔ lo ndjahame l’otema aso, kete sho pombaka ntshikitanya ekanelo kaso aha la ntshimbatshimba. (1 Tim. 6:7, 8) Naka hatosadi ngasɔ, kete sho koka ndjotatɛ nanga diangɔ dikina efula ndo Jehowa hetawɔ ɔtɛmwɛlɔ aso. Nde “[nɔmbaka] dia mbomamema paka ndamɛ oto.” (Eoh. 4:24) Ngande wakokaso ndjoshisha wɛdimo lo kɛnɛ kendana la falanga?

7-9. Wetshelo akɔna wakondjayɛ oma lo kɛnɛ kakakomɛ ekumanyi kɛmɔtshi kelɛwɔ David?

⁷ Tɔsɛdingole ɛnyɛlɔ ka David, ekumanyi kakamba olimu efula kadjasɛ l’États-Unis. Nde mbutaka dia nde ekɔ onto lakamba olimu efula. Nde akakambaka lo dihole dia dimɛna lo kɔpanyi kɛmɔtshi ndo wakofutaka falanga efula ndo nde akɔsamaka oko onto lakamba olimu wa lokumu lo wodja akɔ. David mbutaka ate: “L’etena kɛmɔtshi, lakayɔfɔnya ɔnɛ ɔsɔ aki difuto diɛnya dia Jehowa ambɔtshɔkɔla.” Ko onde ngasɔ mbakidiɔ?

⁸ David akatatɛ mɛna tolembetelo tɔmɔtshi takɛnya dia olimu ande waki la shɛngiya ya kɔlɔ lo diɔtɔnganelo diande la Jehowa. Nde mbutaka ate: “Lo nsanganya ya l’etshumanelo ndo kaanga l’esambishelo, lakatakanyiyaka dikambo di’ekakatanu wa l’olimu. Lakakondjaka falanga efula, koko laki l’ekiyanu efula ndo laki l’ekakatanu lo diwala diami.”

⁹ David akashihodia dia nde akahombe nyomɔsɛdingola awui wakandetshaka lo dihole dia ntondo. Nde mbutaka ate: “Lakɔshi yɛdikɔ ya wolo dia nkandola okakatanu ami.” David akalange nyomokongɛ awui wendana  l’olimu ande, ndo nde akɛnya owandji ande w’olimu ekongelo kande. Etombelo akɔna wakonge? Wakanya David l’olimu! Kakɔna kakandasale? Nde mbutaka ate: “La wedi a pindju, lakalodia dɛmandɛ dia ombatshi mboka wa tshanda watatetemala.” Dia vɔ ndjakotshɛka ehomba awɔ, David la wadɛnde wakatatɛ nkamba olimu w’osolelo. L’ɔkɔngɔ w’etena kɛmɔtshi, nde akatatɛ nkamba oko ombatshi mboka wa pondjo ndo oma laasɔ wadɛnde akayotatɛ nkamba olimu ɔsɔ nde la wɔ. Wadi l’omi asɔ wakasɔnɛ dia kambaka olimu wa lo demba waki kɔmbɔsamaka la nɛmɔ le anto efula, koko le wɔ aha woho w’olimu wakambawɔ mboleki ohomba. Kaanga mbele falanga yakondjawɔ yambokitakita lo yɛdikɔ ya etenyi ɔtɔi lo dikumi ka kɛnɛ kakawakondjaka ntondo, ngɔndɔ tshɛ vɔ kondjaka kɛnɛ kewɔ l’ohomba dia nsala adepasɛ. Vɔ nangaka mbetsha Jehowa lo dihole dia ntondo, ndo vɔ mbeyaka aha la taamu dia Jehowa ndjakiyanyaka dikambo dia wanɛ wetsha wahɔ wa Diolelo lo dihole dia ntondo.​—Mat. 6:31-33.

10. Ngande wakokaso namaka otema aso?

¹⁰ Oyadi tekɔ la diangɔ dia l’emunyi efula kana yema tshitshɛ, sho pombaka namaka otema aso. Lo ngande? Tatongake la ngandji k’ɔngɔnyi. Ndo tetawɔke dia olimu wa l’emunyi mbeta la ntondo k’olimu wakambɛyɛ Jehowa. Ngande wakokayɛ mbeya dia kana dui sɔ diekɔ lo salema? Ambola amɔtshi wakokayɛ ndjaoka vɔanɛ: ‘Onde dimi kanyiyaka mbala efula dikambo di’olimu ami wa l’emunyi etena kemi lo nsanganya kana l’esambishelo? Onde dimi ndjakiyanyaka mbala la mbala lo kɛnɛ kendana la nkondja falanga lo nshi yayaye? Onde falanga ndo lomombo la l’emunyi mbelakami dimi ndo olonganyi ami ekakatanu? Onde dimi mbetawɔka nkamba olimu wa l’emunyi wahɔshi anto akina la nɛmɔ naka vɔ mbishakami diaaso dia kambɛ Jehowa efula?’ (1 Tim. 6:9-12) Etena kasɛdingolaso ambola asɔ, sho pombaka mbeya dia Jehowa tolangaka ndo nde ndakaka wanɛ womamema ɔnɛ: “Dimi hakotshikaki ndo hakokalɛki pondjo.” Diakɔ diele ɔpɔstɔlɔ Pɔɔlɔ akafunde ate: “Lo lɔsɛnɔ lanyu, tanyongake la ngandji ka falanga.”​—Hɛb. 13:5, 6.

11. Shɛngiya yakɔna yakoka monga la tɔkɛnyɔ le onto?

¹¹ Jehowa nangaka dia sho ngɛnangɛna la lɔsɛnɔ, ndo tɔkɛnyɔ koka tokimanyiya dia sho nsala dui sɔ. Eelo, Ɔtɛkɛta wa Nzambi mbutaka ɔnɛ: “Ndooko kɛnɛ kele dimɛna le onto oleki ndɛ la nnɔ ndo ngɛnangɛna lo olimu ande  wa wolo.” (Ond. 2:24) Koko, efula ka tɔkɛnyɔ ta l’andja ɔnɛ koka monga la shɛngiya ya kɔlɔ le so. Tɔ mɔnyɔlaka ɛlɛmbɛ wendana la lɔkɛwɔ ndo keketshaka anto dia ndjiha washo kana nanga kɛnɛ katona Ɔtɛkɛta wa Nzambi.

12. Lo ndjela 1 Kɔrɛtɔ 10:21, 22, lande na kahombaso sɔnaka tɔkɛnyɔ la yambalo tshɛ?

¹² Sho nangaka mamema Jehowa la tshondo tshɛ, diakɔ diele hatokoke ndɛ lo “mɛsa wa Jehowa” ndo lo “mɛsa w’ɛdiɛngɛ.” (Adia 1 Kɔrɛtɔ 10:21, 22.) Ndɛ yangɔ kaamɛ l’onto ɔmɔtshi ekɔ djembetelo yɛnya lɔngɛnyi. Naka sho nsɔna tɔkɛnya tasukɛ awui wa ngala, awui w’ɛdiɛngɛ, awui wa mindo, kana nsaki kina ya demba ndo waonga akina, kete lo mɛtɛ tekɔ lo ndɛ mbo ya ndɛ yakakatɛ atunyi wa Nzambi. Etombelo wayonga ele, hatotoyasalɛ tsho kɔlɔ shoamɛ koko tayolanya ndo diɔtɔnganelo diasaso la Jehowa.

13-14. Lo ndjela Jakɔba 1:14, 15, lande na kahombaso monga la yambalo y’efula etena kasɔnaso tɔkɛnyɔ? Sha ɛnyɛlɔ.

¹³ Tɔsɛdingole toho tɔmɔtshi shikaa tɛnya dia tɔkɛnyɔ tekɔ oko mbo ya ndɛ ya mɛtɛ mɛtɛ. Etena kalɛso, sho koka nsɔna kɛnɛ kakokaso mbidja l’onyɔ. Koko kam’amɛnaso mbo ya ndɛ shɔ, kete hatoyokoka nsɔna shɛngiya yayonga la diɔ lo demba. Yangɔ ya ndɛ ya dimɛna koka tosha yoonge ya demba ya dimɛna; koko yangɔ ya ndɛ ya kɔlɔ hotosha yoonge ya dimɛna. Mbeyaka monga ko etombelo hatɛnama ko wonya akɔ waamɛ, koko vɔ wayoyɛnama l’ɔkɔngɔ.

¹⁴ Woho akɔ waamɛ mbele, etena kasɔnaso tɔkɛnyɔ, sho pombaka sɔnaka kɛnɛ kakokaso mbidja lo yimba. L’ɔkɔngɔ wa laasɔ, tɔkɛnyɔ takatasɔnyi koka monga la shɛngiya lo woho wakanyiyaso ndo woho wayaokaso. Tɔkɛnyɔ t’amɛna koka tokimanyiya; koko tɔkɛnyɔ ta kɔlɔ tayotosalɛ kɔlɔ. (Adia Jakɔba 1:14, 15.) Mbeyaka monga ko etombelo wele la tɔkɛnyɔ ta kɔlɔ hawɛnama mbala kakɔ ɔtɔi, koko l’ekomelo vɔ wayoyɛnama. Diakɔ diele Bible toshaka ɔhɛmwɛlɔ ɔnɛ: “Tanyoyakesake, Nzambi hasɔkama. Nɛ dia onto l’onto ayona kɛnɛ konɛnde. Dikambo onto lonɛ lo demba ayona ɛhɔndɛlɔ oma lo demba diande.” (Ngal. 6:7, 8) Ekɔ mɛtɛ ohomba dia sho ntona tɔkɛnyɔ tshɛ tasukɛ awui wahetsha Jehowa!​—Os. 97:10.

15. Naa woshasha wambotosha Jehowa watosha ɔlɔ?

¹⁵ Ekambi wa Jehowa efula wekɔ l’ɔlɔ etena kendawɔ JW Televiziɔ^®, mbuta ate shɛnɛ yaso ya televiziɔ ya l’Ɛtɛrnɛtɛ ya dimɛna. Kadiyɛso kelɛwɔ Marilyn akate ate: “JW Televiziɔ kimanyiyakami dia ndeka mɛna akambo la sso di’ɔlɔlɔ, ndo dimi bu l’ohomba wa nsɔtɔla awui amɔtshi wa lɔkɔ. Etena kayaokami opoko kana l’ɔkɔmwɛlɔ, dimi mendaka sawo dimɔtshi di’ekeketshelo kana ekongelo k’Ɔtɛmwɛlɔ wa la pindju. Dui sɔ konyakami dia dimi ndeka ndjaoka suke la Jehowa ndo la okongamelo ande. Ekongelo ka JW Televiziɔ kambotshikitanya lɔsɛnɔ lami tshɛ lo tshɛ.” Onde wɛ kondjaka wahɔ oma lo woshasha wa Jehowa ɔsɔ? JW Televiziɔ kekɔ l’ekongelo k’oyoyo ngɔndɔ tshɛ, kekɔ l’awui wa lohokamɛ ndo tovidɛo ndo esambo watokeketsha wakokayɛ menda kana mpokamɛ tena tshɛ.

16-17. Lande na kahombaso sɛdingolaka la yambalo tshɛ lofulo la wenya wetshaso lo tɔkɛnyɔ, ndo ngande wakokaso nsala dui sɔ?

¹⁶ Sho pombaka sɔnaka aha tsho weho wa tɔkɛnyɔ koko ndo yɛdikɔ ya wenya wetshaso lɔkɔ. Naka hatosadi ngasɔ, kete sho koka mbetsha wenya efula lo tɔkɛnyɔ oleki wenya wakambɛso Jehowa. Anto efula mongaka l’okakatanu dia nsusa lofulo la wenya wetshawɔ lo tɔkɛnyɔ. Kadiyɛso Abigail lele l’ɛnɔnyi 18 mbutaka ate: “Menda televiziɔ kimanyiyakami  dia nkɔkɔla demba l’ekomelo ka lushi l’olimu. Koko naka hamongi la yambalo, kete dimi koka mbetsha wenya efula lo mendaka televiziɔ.” Samuel, ɔnangɛso l’ɔlɔngɔlɔngɔ mbutaka ate: “Lakashihodia dia dimi mbetshaka etena k’otale efula lo mendaka tovidɛo ta tomondo l’Ɛtɛrnɛtɛ. Dimi tatɛka menda ɔtɔi, ndo oma laasɔ dimi ndjokashimɔka ko wenya esato kana ɛnɛi wambeta.”

¹⁷ Ngande wakokayɛ sɛdingolaka lofulo la wenya wetshayɛ lo tɔkɛnyɔ? Ntondotondo eya lofulo la wenya l’etshayɛ l’etena kɛsɔ lo kɛnyɔ yakɔ. Onde wɛ hakoke mfunda yɛdikɔ ya wenya wetshayɛ lo lomingu? Funda lo alamanaka ayɛ wenya engana wetshayɛ lo menda televiziɔ, mbɔtɔ l’Ɛtɛrnɛtɛ ndo nkɛnya tɔkɛnyɔ lo tablɛtɛ, l’ɔrdinatɛrɛ kana lo telefɔnɛ kayɛ. Naka wɛ mɛnaka dia wɛ mbetshaka wenya amboleka, kete nsala ekongelo. Kongɛ dia nsala akambo woleki ohomba ntondo, ndo etena ka tɔkɛnyɔ l’ɔkɔngɔ. Oma laasɔ, lɔmba Jehowa dia kokimanyiya dia nɛmiya ekongelo kayɛ. Lo nsala ngasɔ, wɛ ayokondja etena ndo wolo weyɛ l’ohomba dia salaka wekelo wa Bible w’onto ndamɛ, ɔtɛmwɛlɔ wa lo nkumbo, mbɔtɔka nsanganya ya l’etshumanelo, ndo kambɛ Jehowa lo nsambisha ndo mbetɛ anto ambeki. Ndo nto, wɛ ayoleka ngɛnangɛna etena ketshayɛ lo tɔkɛnyɔ nɛ dia wɛ ekɔ lo mbetsha Jehowa lo dihole dia ntondo.

18-19. Ngande wakokaso mɛnya dia tekɔ lo mamema Jehowa la tshondo tshɛ?

¹⁸ L’ɔkɔngɔ wa mfunda lo kɛnɛ kendana la ekomelo k’andja wa Satana ndo andja w’oyoyo wayaye, ɔpɔstɔlɔ Petero akate ate: “Analengo wa ngandji le, lam’ele nyekɔ lo nkonga akambo asɔ, nyosale kɛnɛ tshɛ kakokanyu nsala, dia l’ekomelo nyu ndjotanema la ntondo kande aha la vadi ndo aha la ɛkɔmɔ ndo lo wɔladi.” (2 Pe. 3:14) Etena kakitanyiyaso dako sɔ ndo katshikalaso pudipudi lo lɔkɛwɔ ndo lo nyuma, sho mɛnyaka dia sho mamemaka Jehowa la tshondo tshɛ.

¹⁹ Satana ndo dikongɛ diande di’akambo diayotetemala tɔsɛngiya dia sho ntshikitanya kɛnɛ ketshaso lo dihole dia ntondo. (Luka 4:13) Oyadi ekakatanu akɔna wele la so, hatohombe mbetawɔ di’onto kana ɛngɔ kakɔna tshɛ mbɔsa dihole diele la Jehowa l’otema aso. Toyashikikɛ dia mbisha Jehowa kɛnɛ kahombande nongola paka ndamɛ, mbuta ate mbomamema la tshondo tshɛ!