SAWO DIA WEKELO 41
Totshikale la kɔlamelo lo “mfɔnu ka woke”
“Nyoke Jehowa ngandji, nyu wanɛ tshɛ wele la kɔlamelo le nde! Jehowa kokɛka akanga wa kɔlamelo.”—OS. 31:23.
OSAMBO 129 Tayotetemala mbikikɛ
AWUI WAYƆTƐKƐTAMA *
1-2. a) Diewoyelo diakɔna diayosha ewandji wa l’andja ɔnɛ keema edja? b) Ambola akɔna wahomba kadimɔma?
OHOKANYIYA dia ewandji wa l’andja ɔnɛ wambosha diewoyelo diakatama aya edja dia “wɔladi ndo lotui tshitshi.” Ondo vɔ wayɔsɛma di’andja ɔnɛ watayalaka lo wɔladi woho wayawɔ. Wedja wayolanga dia sho mfɔnya ɔnɛ vɔ waya l’akoka wa nkandola ekakatanu tshɛ wa l’andja ɔnɛ. Koko vɔ hawonga pondjo l’akoka wa nshimba kɛnɛ kayosalema oma laasɔ! Lande na? Lo ndjela prɔfɛsiya ka lo Bible, “mbala kakɔ ɔtɔi elanyelo kayoya la shashimoya le wɔ . . . ko vɔ hawotohandɔ kaanga yema.”—1 Tɛs. 5:3.
2 Ekɔ ambola amɔtshi w’ohomba wahomba kadimɔma: Kakɔna kayosalema lo “mfɔnu ka woke”? Kakɔna kayolongamɛ Jehowa dia sho nsala l’etena kɛsɔ? Ndo ngande wakokaso ndjalɔngɔsɔla kakianɛ dia ndjotshikala la kɔlamelo lo mfɔnu ka woke?—Mat. 24:21.
KAKƆNA KAYOSALEMA LO “MFƆNU KA WOKE”?
3. Lo ndjela Ɛnyɛlɔ 17:5, 15-18, ngande wayolanya Nzambi “Babilɔna ka Woke”?
3 Adia Ɛnyɛlɔ 17:5, 15-18. “Babilɔna ka Woke” kayolanyema! Oko wakadiatami oma l’etatelo, wedja hawotonga l’akoka wa nshimba kɛnɛ kayosalema l’etena kɛsɔ. Lande na? Nɛ dia “Nzambi a[yodja] lo etema awɔ dia vɔ nkotsha kanyi yande.” Kanyi yakɔna shɔ? Ya ndanya tshunda di’ɛtɛmwɛlɔ wa kashi wa l’andja w’otondo, mbidja ndo Lokristokristo. * Nzambi ayodja kanyi yande l’etema wa “nseke 10” ya “nyama ka ngala ka beela.” Nseke dikumi yekɔ didjidji dia mandji ya pɔlitikɛ tshɛ yasukɛ “nyama ka ngala,” mbuta ate Nations unies. (Ɛny. 17:3, 11-13; 18:8) Etena kayokadimwɛ mandji ya pɔlitikɛ shɔ ɛtɛmwɛlɔ wa kashi, dui sɔ mbayonga djembetelo yayɛnya ɔnɛ mfɔnu ka woke kambotatɛ. Ɔsɔ ekɔ mɛtɛ mpokoso kayonga la shɛngiya le ase andja ɔnɛ.
4. a) Ɛkɔkɔ akɔna wakoka wedja mbisha dia nembetshiya lande na kalɔshawɔ ɛtɛmwɛlɔ wa kashi? b) Kakɔna ondo kayosala anto waki l’ɛtɛmwɛlɔ akɔ?
4 Hateye ɛkɔkɔ wayosha wedja dia mɛnya lande na kowɔlɔsha Babilɔna ka Woke. Ondo vɔ wayota ɔnɛ ɛtɛmwɛlɔ wa l’andja ɔnɛ wekɔ wekamu dia anto monga la wɔladi ndo tena tshɛ vɔ wokongaka la shɛngiya lo kɛnɛ kasala mandji. Kana ondo vɔ wayota ɔnɛ atshunda w’ɛtɛmwɛlɔ ɛsɔ wamboleka ndjamɔtshɛ ɛngɔnyi ndo lomombo. (Ɛny. 18:3, 7) Mɛnamaka dia etena kayowɔlɔsha ɛtɛmwɛlɔ wa kashi, ondo hawotolanya anto tshɛ wa l’ɛtɛmwɛlɔ akɔ. Koko, mɛnamaka dia wedja wayolanya atshunda w’ɛtɛmwɛlɔ. Kam’ayolanyema atshunda asɔ, anto waki ntondo lɔkɔ wayoshihodia ɔnɛ ewandji w’ɛtɛmwɛlɔ wambokita tatala dia nsala kɛnɛ kakawaalake ndo ondo vɔ wayota dia vɔ bu ase ɛtɛmwɛlɔ akɔ.
5. Kakɔna kakalake Jehowa lo dikambo dia mfɔnu ka woke, ndo lande na?
5 Bible hɛnya edja ka ngande kayolanyema Babilɔna ka Woke, koko sho mbeyaka dia dui sɔ hadiotosalema edja. (Ɛny. 18:10, 21) Jehowa akalake dia nde ‘ayosusa nshi’ yayosalema mfɔnu ka woke l’oyango wa “asɔnami” ande ndo ɔtɛmwɛlɔ wa mɛtɛ mpandɔ. (Makɔ 13:19, 20) Ko kakɔna kayolongamɛ Jehowa dia sho nsala lam’asa etena kayotatɛ mfɔnu ka woke la ta dia Aramangɛdɔna?
TOTETEMALE NSUKƐ ƆTƐMWƐLƆ WA PUDIPUDI WA JEHOWA
6. Lande na kele aha mpembola losambi l’ɛtɛmwɛlɔ wa kashi tsho kete ambokoka?
6 Oko wakatadiɛnyi lo sawo dietshi, Jehowa nongamɛka di’atɛmɔdi ande ndjakakitola la Babilɔna ka Woke. Koko, dui sɔ nɔmbaka akambo efula laadiko dia mpembola losambi l’ɛtɛmwɛlɔ wa kashi. Sho pombaka ndjashikikɛ dia nsukɛ ɔtɛmwɛlɔ wa mɛtɛ, mbuta ate ɔtɛmwɛlɔ wa pudipudi wa Jehowa. Tɔsɛdingole toho tohende takokaso nsala dui sɔ.
Tatotshikake pondjo nsangana kaamɛ oyadi lo tena dia wolo (Enda odingɔ 7) *
7. a) Ngande wakokaso ntetemala nsukɛ ɛlɛmbɛ wosembwe wa Jehowa wendana la lɔkɛwɔ? b) Ngande watɔtɔmiya Hɛbɛru 10:24, 25 ohomba wa sho sanganaka kaamɛ, djekoleko l’etena kɛnɛ?
7 Ntondotondo, sho pombaka ntetemala nsukɛ ɛlɛmbɛ wosembwe wa Jehowa wendana la lɔkɛwɔ. Tatetawɔke pondjo lɔkɛwɔ la mindo la l’andja ɔnɛ. Ɛnyɛlɔ, hatetawɔ awui wa mindo wa dieyanelo lo toho tshɛ, mbidja ndo diwala dia lam’asa anto wele la tenyi dia demba diaamɛ ndo weho ekina wa dieyanelo dia lam’asa pami la pami kana womoto la womoto. (Mat. 19:4, 5; Rɔmɔ 1:26, 27) Dui dia hende, sho pombaka ntetemala ntɛmɔla kaamɛ l’asekaso Akristo. Sho salaka dui sɔ dihole tshɛ dieso, oyadi lo Mbalasa yaso ya Diolelo kana naka aya ohomba, lo mvudu y’anangɛso kana lo woshɛshɛ. Oyadi dui diakɔna diambotomba, tatotshikake mbekelo kaso ka nsangana kaamɛ dia ntɛmɔla. Lo mɛtɛ, sho pombaka sanganaka kaamɛ, “toleke nsala dikambo sɔ oko wɛna[so] dia lushi lakɔ laya suke.”—Adia Hɛbɛru 10:24, 25.
8. Ngande ondo wayotshikitana losango laso lo nshi yayaye?
8 Lo mfɔnu ka woke, ondo losango layotewoya layotshikitana. Nshi nyɛ, tekɔ lo nsambisha lokumu l’ɔlɔlɔ la Diolelo ndo tekɔ lo nsala la wolo dia mbetɛ anto ambeki. Koko l’etena kɛsɔ, ondo tayewoya losango la wolo oko mvula ka mbɔkɔ. (Ɛny. 16:21) Ondo tayewoya losango la kilombo ka andja wa Satana. L’etena kɛsɔ, tayeya woho mɛtɛ wayoyala losango laso ndo woho wayotoliewoya. Onde tayokamba la toho takɔ taamɛ tambokamba la so l’edja k’ɛnɔnyi nkama dia nkotsha olimu aso? Kana onde tayokamba la toho tokina? Hateye. Oyadi yoho yakɔna tshɛ yayotosambisha, mɛnamaka dia tayoyala la diɛsɛ dia mbewoya la dihonga tshɛ losango la kilombo ka Jehowa!—Ɛzk. 2:3-5.
9. Ngande ondo wayosala wedja la losango laso, ko kakɔna kakokaso monga l’eshikikelo?
9 Kɛnɛ koleki tshɛ ele, ondo losango laso layokonya wedja dia toshimba diaha ntetemala nsambisha. Paka oko wayaɛkɛso le Jehowa dia tosukɛ l’olimu w’esambishelo nshi nyɛ, mbayotonga l’ohomba w’osukɔ ande l’etena kɛsɔ. Sho koka monga l’eshikikelo dia Nzambi kaso ayotosha wolo dia nkotsha lolango lande.—Mika 3:8.
TOYALƆNGƆSƆLƐ DIKAMBO DIA TA DIAYOWƆLƆSHA EKAMBI WA NZAMBI
10. Oko wakadiatama lo Luka 21:25-28, kakɔna kayosala anto efula lo menda kɛnɛ kayosalema lo mfɔnu ka woke?
10 Adia Luka 21:25-28. Lo mfɔnu ka woke, anto wayonyanga efula lo mɛna dia ɛngɔ tshɛ kakawafɔnyaka ɔnɛ kamboshikimala l’andja ɔnɛ kambotatɛ ndana. Vɔ wayoyala la “lɔkɔnyɔ,” woka wɔma ɔnɛ ondo wayanga ndjakema l’etena koleki kɔlɔ ka l’ɔkɔndɔ w’ana w’anto kɛsɔ. (Zɛf. 1:14, 15) L’etena kɛsɔ, ondo lɔsɛnɔ layoleka monga wolo kaanga ndo le ekambi wa Jehowa. Lam’ele sho bu ase andja ɔnɛ, ondo tayodiɛnɛ l’ekakatanu ɛmɔtshi. Ondo tayohomba diangɔ dimɔtshi di’ohomba dia nsɛna.
11. a) L’ɔkɔngɔ w’ɛtɛmwɛlɔ wa kashi ndanyema, lande na kayɔsɔma wedja ndo ewandji wa l’andja ɔnɛ Ɛmɛnyi wa Jehowa? b) Lande na kahatahombe mboka mfɔnu ka woke wɔma?
11 L’etena kɛmɔtshi, ondo anto wele ɛtɛmwɛlɔ awɔ wakalanyema wayomala dia mɛna dia ɔtɛmwɛlɔ wa Ɛmɛnyi wa Jehowa wekɔ lo ntetemala monga. Ondo vɔ wayewoya anto akina dia vɔ mbeya woho wewɔ la lonyangu, ɛnyɛlɔ l’Ɛtɛrnɛtɛ. Wedja ndo ɔnɔmbɔdi awɔ, Satana wayotohetsha l’ɔtɛ wele paka ɔtɛmwɛlɔ aso oto mbaki kondanyema. Vɔ hawotokotsha oyango awɔ wa minya ɛtɛmwɛlɔ tshɛ la nkɛtɛ. Diakɔ diele vɔ wayɔsɔmana la so. L’etena kɛsɔ, wedja wayokotsha ɔkɛndɛ wa Ngɔngɔ ka la Mangɔngɔ. * Vɔ wayosangana kaamɛ dia ndɔsha ekambi wa Jehowa la wolo awɔ tshɛ. (Ɛzk. 38:2, 14-16) Sho koka ntatɛ ndjakiyanya yema lo dikambo dia kɛnɛ kayosalema lo mfɔnu ka woke, djekoleko lam’ele hateye akambo efula. Koko, sho koka monga l’eshikikelo ka dui nɛ: Hatohombe mboka mfɔnu ka woke wɔma. Jehowa ayotosha ɛlɔmbwɛlɔ kashimbɛ nsɛnɔ. (Os. 34:19) Tayonga l’akoka wa ‘nkeketala ndo monga la dihonga’ nɛ dia sho mbeyaka dia “etshungwelo ka[so] kaya suke.” *
12. Ngande watɔlɔngɔsɔla “ɔhɔmbɔ wa kɔlamelo ndo kɛsɔ” dikambo dia nshi yayaye?
12 “Ɔhɔmbɔ wa kɔlamelo ndo kɛsɔ” ekɔ lo tɔlɔngɔsɔla dia sho ndjotshikala la kɔlamelo lo mfɔnu ka woke. (Mat. 24:45) Dui sɔ diambosalema lo toho efula, koko tɔsɛdingole ɛnyɛlɔ kɛnɛ: dikongelo dia la wonya dia nsanganya ya weke ya lo 2016-2018. Lo dikongelo sɔ, takakeketshama dia nkeketsha waonga weso l’ohomba oko wayasukana lushi la Jehowa. Nyɛsɔ tovusole lo tshena pe waonga asɔ.
TETEMALA NKEKETSHA KƆLAMELO, EKIKELO NDO DIHONGA DIAYƐ
Yalɔngɔsɔla oma ko kakianɛ dia ndjohandɔ lo “mfɔnu ka woke” (Enda odingɔ 13-16) *
13. Ngande wakokaso nkeketsha kɔlamelo yaso le Jehowa, ndo lande na kahombaso nsala dui sɔ oma ko kakianɛ?
13 Kɔlamelo: Losanganya la rɛjɔ la lo 2016 laki l’ɔtɛ a dui ɔnɛ: “Totshikale la kɔlamelo le Jehowa!” Ekongelo kɛsɔ, kakatetsha dia naka sho monga la diɔtɔnganelo dia ma ma la Jehowa, kete tayonga la kɔlamelo le nde. Wakatohola dia sho kokaka ndjasukanya la Jehowa lo salaka dɔmbɛlɔ dia l’otema ɔtɔi ndo mbekaka Ɔtɛkɛta ande l’etete. Nsala ngasɔ toshaka wolo wa nkandola kaanga ekakatanu woleki wolo. Oko watasukana dikongɛ dia Satana nɛ otsha l’ekomelo kadiɔ, sho koka nongamɛ dia mpomana l’ehemba woleki wolo wendana la kɔlamelo yaso le Nzambi ndo Diolelo diande. Ondo anto wayotetemala tɔsɔka. (2 Pe. 3:3, 4) Ondo dui sɔ diayosalema djekoleko etena kayoleka lomangemange laso mbɔtɔ l’ohemba. Sho pombaka nkeketsha kɔlamelo yaso kakianɛ dia sho ndjotshikala la kɔlamelo lo mfɔnu ka woke.
14. a) Otshikitanu akɔna wayosalema lo dikambo di’anangɛso wayɔlɔmbɔla la nkɛtɛ? b) Lande na kele ayonga ohomba dia sho monga la kɔlamelo l’etena kɛsɔ?
14 Lo mfɔnu ka woke, otshikitanu ɔmɔtshi wayosalema lo dikambo di’anangɛso walɔmbɔla la nkɛtɛ. Lo etena kɛmɔtshi, akitami tshɛ weke la nkɛtɛ wayotshumana l’olongo dia tosha lonya lo ta dia Aramangɛdɔna. (Mat. 24:31; Ɛny. 2:26, 27) Dui sɔ nembetshiyaka dia Olui-walɔmbɔla hatoyala nto kaamɛ la so la nkɛtɛ. Koko, olui a woke w’anto wayotetemala kongɛma. Anangɛso wakotsha kɛnɛ kalɔmbama wele l’atei w’ɛkɔkɔ ekina wayɔlɔmbɔla. Ayonga ohomba dia sho monga la kɔlamelo lo nsukɛ anangɛso asɔ ndo lo ndjela ɛlɔmbwɛlɔ k’oma le Nzambi kayowotoshaka. Panda kaso kayolemanɛ la dui sɔ!
15. Ngande wakoka ekikelo kaso nkeketala, ndo lande na kele ekɔ ohomba nsala dui sɔ l’etena kɛnɛ?
15 Ekikelo: Losanganya la rɛjɔ la 2017 laki l’ɔtɛ a dui ɔnɛ: “Tatohekɔke!” Ekongelo kɛsɔ kakatokimanyiya dia nkeketsha dikoka diaso dia mbikikɛ ehemba. Takeke dia aha paka lo tena di’amɛna nto mbahombaso monga l’ekikelo. Ekikelo kaso koka keketala naka sho ndjaɛkɛ le Jehowa. (Rɔmɔ 12:12) Tatohɛke pondjo daka dia Yeso nɛ: “Onto layokikɛ polo l’ekomelo mbayoshimbamɛ.” (Mat. 24:13, nɔtɛ) Daka sɔ nembetshiyaka dia sho pombaka ntshikala la kɔlamelo oyadi la ntondo k’ekakatanu akɔna wele laso. Naka sho mbikikɛ ohemba tshɛ l’etena kɛnɛ, kete mbetawɔ kaso kayoleka nkeketala ntondo ka mfɔnu ka woke ntatɛ.
16. Kakɔna kashikikɛ dia kana tekɔ la dihonga, ndo ngande wakokaso nkeketsha dihonga diaso oma ko kakianɛ?
16 Dihonga: Losanganya la rɛjɔ la 2018 laki l’ɔtɛ a dui ɔnɛ: “Onga la dihonga!” Ekongelo kɛsɔ kakatohola ɔnɛ aha akoka aso mbashikikɛ dia kana tekɔ la dihonga. Oko wediɔ lo dikambo dia ekikelo, dihonga dia mɛtɛ ndjaka lo ndjaɛkɛ le Jehowa. Ngande wakokaso nkeketsha wɛkamu aso le nde? Lo mbadiaka Ɔtɛkɛta ande lushi tshɛ ndo kanaka yimba lo woho wakashimbɛka Jehowa ekambi ande lo nshi y’edjedja. (Os. 68:20; 2 Pe. 2:9) Etena kayotɔlɔshama oma le wedja lo mfɔnu ka woke, ayonga ohomba dia sho monga la dihonga ndo ndjaɛkɛ le Jehowa oleki woho wakatasalaka ntondo. (Os. 112:7, 8; Hɛb. 13:6) Naka sho ndjaɛkɛ le Jehowa oma ko kakianɛ, kete tayonga la dihonga diahombama etena kayotɔlɔshama oma le Ngɔngɔ. *
KONGƐƐ ETSHUNGWELO KAYƐ L’ASOLO WALOMƆLOMƆ
Keema edja, Yeso la alembe ande wa l’olongo wayoya lo ta dia Aramangɛdɔna dia ndjolanya atunyi wa Nzambi! (Enda odingɔ 17)
17. Lande na kahatahombe mboka Aramangɛdɔna wɔma? (Enda osato wele lo lohoso.)
17 Oko wakadiatɛkɛtama lo sawo dietshi, anto efula l’atei aso wekɔ lo nsɛna lɔsɛnɔ lawɔ l’otondo lo nshi y’ekomelo. Koko tekɔ nto l’elongamelo ka mpandɔ lo mfɔnu ka woke. Ta dia Aramangɛdɔna diayokomiya dikongɛ di’akambo nɛ tshɛ lo tshɛ. Koko, hatohombe mboka wɔma. Lande na? Nɛ dia ɔsɔ ayonga ta dia Nzambi. (Tok. 1:33; Ɛzk. 38:18-20; Zɛk. 14:3) Etena kayosha Jehowa dikimɔ, Yeso Kristo ayɔlɔmbɔla alembe wa Nzambi lo ta sɔ. Nde ayoyala kaamɛ la akitami wakolwama ndo miliyara y’andjelo. Vɔ tshɛ kaamɛ, wayɔlɔsha Satana, ɛdiɛngɛ ande ndo asɔlayi awɔ wa la nkɛtɛ.—Dan. 12:1; Ɛny. 6:2; 17:14.
18. a) Eshikikelo kakɔna katosha Jehowa? b) Ngande wakokimanyiya Ɛnyɛlɔ 7:9, 13-17 dia monga l’eshikikelo lo dikambo dia nshi yayaye?
18 Jehowa toshikikɛka ɔnɛ: “Ndooko ehomɔ ka ta kayowotshula dia kɔlɔsha kayolowana.” (Isa. 54:17) “Olui a woke w’anto” w’atɛmɔdi wa Jehowa wa kɔlamelo “wa[y]oya oma lo mfɔnu ka woke” wele la lɔsɛnɔ! Oma laasɔ, vɔ wayotetemala mbokambɛ olimu w’ekila. (Adia Ɛnyɛlɔ 7:9, 13-17.) Bible toshaka ɛkɔkɔ efula wa monga l’eshikikelo ɔnɛ tayoshimbamɛ lo nshi yayaye! Sho mbeyaka dia “Jehowa kokɛka akanga wa kɔlamelo.” (Os. 31:23) Onto tshɛ lalanga ndo latombola Jehowa ayɔngɛnangɛna mɛna woho wayondoyindja lokombo lande l’ekila.—Ɛzk. 38:23.
19. Naa elongamelo ka diambo katokongɛɛ lo nshi yayaye yaya suke?
19 Ohokanyiya woho wakoka 2 Timɔte 3:2-5 kadimɔma naka avɛsa akɔ wɔtɛkɛta dikambo di’anto wa l’andja w’oyoyo wahatonga lo shɛngiya ya Satana. (Enda kiombo yele l’ɔtɛ a dui ɔnɛ: “ Woho wayoyala anto l’etena kɛsɔ.”) Ɔnangɛso George Gangas, laki ose Olui-walɔmbɔla akatɛkɛta lo dikambo di’avɛsa akɔ nganɛ: “Ngande wayoyala andja ɔnɛ lam’ayoyala onto tshɛ ɔnangɛso kana kadiyɛso! Keema edja, wɛ ayoyala la diɛsɛ dia nsɛna lo dikongɛ di’akambo di’oyoyo sɔ. Wɛ ayɔsɛna edja efula oko woho wasɛna Jehowa. Tayɔsɛnaka pondjo pondjo.” Ande elongamelo ka diambo kele laso lee!
OSAMBO 122 He totshikale nge, aha la ndjɛkayɛka!
^ od. 5 Sho mbeyaka dia “mfɔnu ka woke” kayanga ndja keema edja le anto. Kakɔna kayolembetshiya dui sɔ le so? Kakɔna kayolongamɛ Jehowa dia sho nsala l’etena kɛsɔ? Waonga akɔna wahombaso nkeketsha oma ko kakianɛ dia ndjotshikala la kɔlamelo l’etena kɛsɔ? Tayeya awui asɔ lo sawo nɛ.
^ od. 3 ELEMBETSHIELO W’AWUI AMƆTSHI: Lokristokristo kengama l’ɛtɛmwɛlɔ wayata dia wekɔ Akristo koko hawetsha anto dia ntɛmɔla Jehowa lo ndjela atɔndɔ ande.
^ od. 11 ELEMBETSHIELO W’AWUI AMƆTSHI: Etelo k’ɔnɛ Ngɔngɔ ka la Mangɔngɔ (ndo Ngɔngɔ lo hiembola) kɛdikɛdi osanga wa wedja wayɔlɔsha ɔtɛmwɛlɔ wa mɛtɛ lo mfɔnu ka woke.
^ od. 11 Dia mbeya awui efula wendana l’akambo tshɛ wayosalema ntondo ka ta dia Aramangɛdɔna, enda tshapita 21 ya dibuku Diolelo diaki Nzambi diekɔ lo mbolɛ! Dia mbeya awui efula wendana la ta dia Ngɔngɔ ka la Mangɔngɔ, ndo woho wayoshimbɛ Jehowa ekambi ande lo Aramangɛdɔna, enda tshapita 17 ndo 18 ya dibuku Ɔtɛmwɛlɔ wa pudipudi wa Jehowa wambokaloyama!
^ od. 16 Losanganya la woke la 2019 lele l’ɔtɛ a dui ɔnɛ: “Ngandji hakomɛ pondjo!” toshikikɛka dia sho kokaka ntetemala ndjaoka lo lotui tshitshi oma l’ekokelo ka la ngandji ka Jehowa.—1 Kɔr. 13:8.
^ od. 64 ELEMBETSHIELO W’OSATO: Lo mfɔnu ka woke, la dihonga tshɛ olui ɔmɔtshi wa tshitshɛ w’Ɛmɛnyi wa Jehowa wambosangana l’okonda dia nsala losanganya la l’etshumanelo.
^ od. 66 ELEMBETSHIELO W’OSATO: Olui a woke w’atɛmɔdi wa kɔlamelo wa Jehowa wayoya oma lo mfɔnu ka woke wele la lɔsɛnɔ ndo l’ɔngɛnɔngɛnɔ!
