1-2. Ngande wakatshikitana nkumi ya dikanga hiende, ndo ambola akɔna wayotɔsɛdingola?

NYƐSƆ tɔsɛdingole dimɛna awui wendana la nkumi ya dikanga hiende yakasɛnaka lo nshi yakete. Ɔmɔtshi akolɛ diolelo di’Isariyɛlɛ diaki la waoho dikumi, ndo okina akolɛ diolelo dia Juda diaki la waoho ahende. Kaanga mbakawasɛnɛ lo tena diotshikitanyi, vɔ wakafɔnaka l’akambo efula. Nkumi ya dikanga yakɔ hiende yakatɔmbɔkwɛ Jehowa ndo yakakonya wodja dia nsala pɛkato. Vɔ akɔ ahende wakatɛmɔla dikishi ndo wakadakisha anto. Koko, aki otshikitanu ɔmɔtshi lam’asa apami asɔ ahende. Ɔmɔtshi akatetemala nsala awui wa kɔlɔ polo l’ekomelo ka lɔsɛnɔ lande, koko okina akayatshumoya ndo Jehowa akoodimanyiya l’ɔtɛ w’awui wa kɔlɔ wakandasale. Nkumi ya dikanga yakɔna shɔ?

² Nkombo yawɔ aki Ahaba, nkumekanga k’Isariyɛlɛ, ndo Manase, nkumekanga ka Juda. Etshikitanu waki lam’asa apami ahende asɔ koka tetsha dui dimɔtshi di’ohomba efula: ndjatshumoya. (Ets. 17:30; Rɔmɔ 3:23) Ndjatshumoya kɛdikɛdi na, ndo ngande wɛnama di’onto ekɔ la ndjatshumoya? Sho pombaka mbeya dui sɔ nɛ dia sho nangaka dia Jehowa todimanyiya naka tambosala pɛkato. Dia ntana ekadimwelo lo ambola asɔ, tayanga nsɛdingola nsɛnɔ ya nkumi ya dikanga hiende shɔ ndo tayanga mɛna wetshelo wakokaso nkondja oma lo bɛnyɛlɔ diawɔ. Oma laasɔ, tayɔsɛdingola kɛnɛ kaketsha Yeso lo kɛnɛ kendana la ndjatshumoya.

3. Woho akɔna wa nkumekanga waki Ahaba?

³ Ahaba aki nkumekanga k’esambele ka lo diolelo di’Isariyɛlɛ diaki la waoho dikumi. Nde akatshuke Jezabɛlɛ, ɔna nkumekanga ka Sidɔna, wodja w’ɔngɔnyi waki lo nɔrdɛ. Ondo diwala sɔ  diakakimanyiya ase Isariyɛlɛ dia ntana waaso wa nkondja falanga efula. Koko, diwala sɔ nto diakalanya diɔtɔnganelo diaki lam’asa wodja ɔsɔ la Jehowa. Jezabɛlɛ akatɛmɔlaka Baala ndo nde akatshutshuya Ahaba dia nsala di’ɔtɛmwɛlɔ ɔsɔ ntshɔ otsha la ntondo, vɔ wakasalaka kinumba lo tɛmpɛlɔ ndo wakalambolaka ana. Ndooko omvutshi wa Jehowa waki l’ekokelo etena kaki Jezabɛlɛ la lowandji. Nde akadakisha efula ka l’atei awɔ. (1 Ku. 18:13) Ahaba ndamɛ “aki kɔlɔ efula lo washo wa Jehowa ndeka wanɛ tshɛ waki la ntondo kande.” (1 Ku. 16:30) Jehowa kondjiha washo l’awui wakasalaka Ahaba la Jezabɛlɛ. Nde akeyaka tshɛ lo tshɛ awui wakawasalaka. Diakɔ diele la kɛtshi tshɛ, Jehowa akatome omvutshi Elidja dia tɔhɛmɔla wodja Ande dia ntshikitanya kɛwɔ yawɔ la ntondo ka ndjoohɔ okanga a kɔngɔlɔ wanyu amboshila. Koko, Ahaba nde la Jezabɛlɛ kompokamɛ.

4. Dilanya diakɔna diakawate dia Ahaba ayolongola, ndo kakɔna kakandasale?

⁴ L’ekomelo, solo dia lotutsha dia Jehowa diakakomɛ. Nde akatome Elidja dia totɛ Ahaba nde la Jezabɛlɛ dilanya diakawahombe nongola. Ɔlɔndji wa nkumbo kawɔ k’otondo wakahombe nshila oshiki. Ɛtɛkɛta w’Elidja wakananda Ahaba wolo! Dui dia diambo ko, pami k’otako kɛsɔ ‘akayakitshakitsha.’​—1 Ku. 21:19-29.

5-6. Kakɔna kɛnya dia Ahaba komonga la ndjatshumoya ka mɛtɛ?

⁵ Kaanga mbakayakitshakitsha Ahaba lo diaaso sɔ, lɔkɛwɔ lakayonga la nde oma laasɔ, mɛnyaka dia nde komonga la ndjatshumoya ka mɛtɛ. Nde kominya ɔtɛmwɛlɔ wa Baala oma lo diolelo diande. Ndo nde kokeketsha anto dia vɔ ntɛmɔla Jehowa. Ahaba akɛnya dia nde komonga la ndjatshumoya lo toho tokina nto.

⁶ L’ɔkɔngɔ diko, etena kakelɛ Ahaba Jɛhɔshafata laki nkumekanga k’ɔlɔlɔ ka Juda dia vɔ tɔlɔsha ase Suriya, Jɛhɔshafata akawotɛ dia vɔ tambodi ntondo omvutshi ɔmɔtshi wa Jehowa kanyi. Ntondotondo, Ahaba akatone kanyi shɔ lo mbuta ate: “Onto 1 kambotshikala lakokaso mimbola Jehowa kanyi, koko dimi mbohetshaka, nɛ dia nde hataka prɔfɛsiya y’ɛlɔlɔ lo dikambo diami, paka ya kɔlɔ tsho.” Kaanga mbakidiɔ ngasɔ, vɔ wakambola omvutshi Mikaya kanyi. Ahaba aki la shadiya, omvutshi wa Nzambi ɔsɔ akate di’awui wa kɔlɔ wayokomɛ Ahaba! Lo dihole dia ndjatshumoya ndo nyanga dia Jehowa mbodimanyiya, Ahaba laki onto la kɔlɔ akadje omvutshi ɔsɔ lo lokanu. (1 Ku. 22:7-9, 23, 27) Kaanga mbakadje nkumekanga kɛsɔ omvutshi wa Jehowa lo lokanu, nde koshimba dia prɔfɛsiya kɛsɔ kotshama. Lo ta diakayelana, Ahaba akadiakema.​—1 Ku. 22:34-38.

7. Kakɔna kakate Jehowa lo dikambo di’Ahaba l’ɔkɔngɔ wa nyɔi kande?

⁷ L’ɔkɔngɔ w’Ahaba ndjakema, Jehowa akɛnya woho wakandɔsaka pami kɛsɔ. Etena kakakalola nkumekanga k’ɔlɔlɔ Jɛhɔshafata la ngelo la lɔsɛnɔ, Jehowa akatome omvutshi Jehu dia ndjowaanya l’ɔtɛ wakandɔtɔ sheke la Ahaba. Omvutshi wa Jehowa ɔsɔ akate ate: “Onde kanga kɔlɔ koyokimanyiya, ndo wanɛ wahetsha Jehowa kahombayɛ mboka ngandji?” (2 Ɛk. 19:1, 2) Tokane yimba la dui nɛ: Otondonga Ahaba akayatshumoya l’otema ɔtɔi, tshike omvutshi ɔsɔ totondota ɔnɛ nde ekɔ kanga kɔlɔ ndo nde petshaka Jehowa. Mbokɛmaka hwe dia, kaanga mbakanyange Ahaba lo yɛdikɔ mɔtshi, nde kondjatshumoya tshɛ lo tshɛ.

8. Wetshelo akɔna wakokaso nkondja oma l’ɛnyɛlɔ ka Ahaba lo kɛnɛ kendana la ndjatshumoya?

⁸ Wetshelo akɔna wakokaso nkondja oma l’ɛnyɛlɔ ka Ahaba? Etena kakandoke kɛnɛ kakate Elidja lo kɛnɛ kendana l’awui wa kɔlɔ wakahombe komɛ ɔlɔndji wa nkumbo kande, oma l’etatelo Ahaba akayakitshakitsha. Ɔsɔ aki etatelo ka dimɛna. Koko awui wakandayosala oma laasɔ, wakɛnya dia nde komonga la ndjatshumoya ka mɛtɛ. Diakɔ diele, ndjatshumoya nɔmbaka awui efula, aha mɛnya tsho dia tambonyanga  dui dimɔtshi lo tshanda mɔtshi. Nyɛsɔ tɔsɛdingole ɛnyɛlɔ kekina kayotokimanyiya dia nshihodia elɛwɔ ndjatshumoya ka mɛtɛ.

9. Woho akɔna wa nkumekanga waki Manase?

⁹ Ɛnɔnyi oko nkama hiende l’ɔkɔngɔ, Manase akonge nkumekanga ka Juda. Ondo nde akasale awui wa kɔlɔ ndeka Ahaba! Sho mbadiaka ɔnɛ: “Nde akasale kɛnɛ kaki kɔlɔ lo washo wa Jehowa lo yɛdikɔ y’efula dia mbookiya nkɛlɛ.” (2 Ɛk. 33:1-9) Manase akasalɛ tozambizambi ta kashi dilambwelo ndo akasale ekishi ka kimɛta ka l’esongo lo tɛmpɛlɔ k’ekila ka Jehowa, ondo ɔsɔ aki didjidji di’ɔtɛmwɛlɔ w’awui wa dieyanelo! Nde akasale awui wa maji, awui wa diendja ndo w’alɔka. Ndo nto, nde “akakɛdia dikila di’anto waha la onongo lo yɛdikɔ y’efula ka mamba.” Nde akadakisha anto efula, “akatshumbe anande w’apami lo dja,” dia nambola tozambizambi ta kashi elambo.​—2 Ku. 21:6, 7, 10, 11, 16.

10. Ngande wakahokola Jehowa Manase, ndo kakɔna kakasale nkumekanga kɛsɔ l’ohokwelo ɔsɔ?

¹⁰ L’ɛnyɛlɔ ka Ahaba, Manase akatone ɔhɛmwɛlɔ wakawosha Jehowa lo tshimbo y’amvutshi Ande. L’ekomelo, “Jehowa [akatomɛ Juda] ewandji w’asɔlayi wa nkumekanga k’Asuriya, ko wakayonda Manase la tɔkɔhɔ ndo wakookeleka la mɔlɔla 2 wa nkonga, ko wakɔɔtɔlɛ la Babilɔna.” Etena kakinde lo wodja okina lo lokanu, mɛnamaka dia Manase akakane yimba efula. Nde “akatetemala ndjakitshakitsha efula la ntondo ka Nzambi ka watshɛnde.” Nde kokomɛ laasɔ ato. “Nde akasɛngasɛnga Jehowa Nzambi kande dia nde mbooka kɛtshi.” Lo mɛtɛ, Manase “akatetemala mbɔlɔmba.” Pami ka kɔlɔ kɛsɔ akatatshikitanaka. Nde akatatɛ mbɔsa Jehowa oko “Nzambi kande,” ndo nde akɔlɔmbaka l’etete.​—2 Ɛk. 33:10-13.

11. Lo ndjela 2 Ɛkɔndɔ 33:15, 16, ngande wakɛnya Manase dia nde aki la ndjatshumoya ka mɛtɛ?

¹¹ L’ɔkɔngɔ diko, Jehowa akayokadimola alɔmbɛlɔ wa Manase. Nde akɛnyi etshikitanu wakasale pami kɛsɔ l’otema, oko wakandadiɛnya l’alɔmbɛlɔ ande. Diakɔ diele, Jehowa akahokamɛ Manase etena kakandɔlɔmbɛ dia mbodimanyiya ndo aketawɔ dia nde monga nkumekanga nto. Manase akakambe la diaaso diaki la nde dia mɛnya ndjatshumoya ka mɛtɛ. Nde akasale kɛnɛ kaki Ahaba kosala. Nde akatshikitanya lɔkɛwɔ lande. L’ohetoheto tshɛ, nde akalɔshana l’ɔtɛmwɛlɔ wa kashi ndo akakeketsha anto dia ntɛmɔla Jehowa. (Adia 2 Ɛkɔndɔ 33:15, 16.) Dui sɔ nɔmbaka mɛtɛ dihonga ndo mbetawɔ, nɛ dia Manase aki la shɛngiya ya kɔlɔ le ase nkumbo kande, le ewandji, ndo le wodja ande l’edja k’ɛnɔnyi akumi. Koko kakianɛ l’ɛnɔnyi w’ekomelo ka lɔsɛnɔ lande, Manase ambosala la wolo dia minya awui amɔtshi wa kɔlɔ wakandasale. Ondo nde aki la shɛngiya ya dimɛna le Jɔsiya laki okana ande w’ɔlɔngɔlɔngɔ, lakayonga nkumekanga k’ɔlɔlɔ l’ɔkɔngɔ.​—2 Ku. 22:1, 2.

12. Wetshelo akɔna wakokaso nkondja oma l’ɛnyɛlɔ ka Manase lo kɛnɛ kendana la ndjatshumoya?

¹² Wetshelo akɔna wakokaso nkondja oma  l’ɛnyɛlɔ ka Manase? Nde akayakitshakitsha ndo nde kokomɛ laasɔ. Nde akalɔmbɛ ndo akasɛngasɛnga Jehowa dia mbooka kɛtshi. Ndo nde akatshikitanya lɔkɛwɔ lande. Nde akasale la wolo dia minya awui wa kɔlɔ wakandasale, nde akatɛmɔla Jehowa ndo nde akakimanyiya anto akina dia nsala woho akɔ waamɛ. Ɛnyɛlɔ ka Manase mbishaka kaanga atshi wa pɛkato ya weke efula elongamelo. Tambɛna djembetelo ya woke yɛnya dia Jehowa Nzambi ekɔ “ɔlɔlɔ ndo suke dia dimanyiya.” (Os. 86:5) Anto wayatshumoya l’otema ɔtɔi kokaka dimanyiyama.

13. Sha ɛnyɛlɔ kɛnya wetshelo w’ohomba wakondjaso wendana la ndjatshumoya.

¹³ Manase kokomɛ tsho lo nyanga l’ɔtɛ wa pɛkato yakandasale. Dui sɔ toshaka wetshelo w’ohomba wendana la ndjatshumoya. Tɔsɛdingole ɛnyɛlɔ kɛnɛ: Wɛ ambotshɔ lo dihole diasondjawɔ weho wa mapa ko ambɔlɔmba dia vɔ kosha okate. Koko lo dihole dia ɔnɛ lasondja kosha okate, nde ambokosha okele. Onde dui sɔ diayokɔngɛnyangɛnya? Ndooko! Onde wɛ ayɔngɛnangɛna naka ɔnɛ lasondja ambokolembetshiya ɔnɛ okele ekɔ l’atei wa diangɔ diadjawɔ l’okate? Ndooko! Woho akɔ waamɛ mbele, Jehowa nɔmbaka otshi wa pɛkato dia ndjatshumoya. Naka otshi wa pɛkato ambonyanga l’ɔtɛ wa pɛkato kande, kete ɔsɔ ekɔ dui di’ohomba. Nsala ngasɔ ekɔ dui di’ohomba diendana la ndjatshumoya, koko hatohombe komɛ laasɔ ato. Ahombaso nsala nto? Sho kondjaka wetshelo efula oma lo wɛɛla ɔmɔtshi wananda otema wakasha Yeso.

14. Lo wɛɛla wa Yeso, ngande wakɛnya ɔna lakashishɔ tolembetelo takɛnya dia nde ambotatɛ ndjatshumoya?

¹⁴ Yeso akasha wɛɛla ɔmɔtshi wakeketsha wa ɔna lakashishɔ, wele lo Luka 15:11-32. Ɔna pami ɔmɔtshi akatɔmbɔkwɛ she, akamɔ oma la ngelo ndo akande lɔkɛndɔ “otsha lo wodja w’etale.” Lɛkɔ, nde akatonga la lɔsɛnɔ la mindo ndo la kɔlɔ. Koko etena kakandonge l’ekakatanu, nde akakane yimba efula. Nde akashihodia dia nde aki la lɔsɛnɔ la dimɛna etena kakinde kaamɛ l’ase nkumbo kawɔ. Oko wakate Yeso, ɔlɔngɔ a pami ɔsɔ “akakane yimba.” Nde akɔshi yɛdikɔ ya nkalola la ngelo ndo nɔmba she edimanyielo. Aki ohomba efula woho wakashihodia ɔnɔsɔ dia nde akasale kɔlɔ. Ko onde nsala ngasɔ, kete ambokoka? Ndooko. Nde akahombe ntshikitanya lɔkɛwɔ lande!

15. Ngande wakɛnya ɔna lakashishɔ la lo wɛɛla wa Yeso ndjatshumoya?

¹⁵ Ɔna lakashishɔ ɔsɔ akɛnya ndjatshumoya oma k’ɛse otema oma lo kɛnɛ kakandasale. Nde akande lɔkɛndɔ l’otale otsha la ngelo. Oma laasɔ, etena kakandasawola la she, nde akawotɛ ate: “Papa, dimi lakasalɛ olongo kɔlɔ ndo lakakosalɛ kɔlɔ. Dimi handjosungana mbelamɛ ɔnayɛ.” (Luka 15:21) Woho wakashola ɔlɔngɔ a pami ɔsɔ pɛkato kande l’otema ɔtɔi, akɛnya dia nde akalange nɔngɔsɔla diɔtɔnganelo diasande la Jehowa. Nde akeyaka nto dia etsha ande wakanyangiya she. Ndo nde aki suke dia mbidja welo dia nyometawɔma le she, ndo nde aketawɔ kaanga dia mbɔsaka oko ose  olimu ɔmɔtshi wa she! (Luka 15:19) Wɛɛla ɔnɛ bu tsho ɔkɔndɔ wananda otema. Atɔndɔ wa lɔkɔ kokaka nkimanyiya dikumanyi dia l’etshumanelo etena kalangawɔ mbeya dia kana osekawɔ ombetawudi lakasale pɛkato ka woke amboyatshumoya mɛtɛ.

16. Lande na kakokadiɔ monga wolo dia dikumanyi mbeya polo lo yɛdikɔ yakɔna yamboyatshumoya onto ɔmɔtshi lakasale pɛkato ka woke?

¹⁶ Bu dui dia wɔdu le dikumanyi dia mbeya dia kana onto ɔmɔtshi lakasale pɛkato ka woke amboyatshumoya mɛtɛ. Lande na? Dikumanyi hawokoke mbeya kɛnɛ kele l’otema, diakɔ diele vɔ pombaka ndjaɛkɛ lo tolembetelo tɛnya dia ɔnangɛwɔ ambotshikitanya kanyi yande tshɛ lo tshɛ lo kɛnɛ kendana la pɛkato kakandasale. Lo waaso amɔtshi, mbeyaka monga ko onto ɔmɔtshi akasale pɛkato ya weke efula woho wele mbeyaka monga ko dikumanyi diayosawola la nde hawotetawoyama dia nde amboyatshumoya l’otema ɔtɔi.

17. a) Ɛnyɛlɔ kakɔna kɛnya dia nyanga tsho lo dui dimɔtshi mbeyaka monga ko hɛnya di’onto amboyatshumoya mɛtɛ? b) Oko wɔkɔndwamidiɔ lo 2 Kɔrɛtɔ 7:11, kakɔna kahomba onto nsala dia nde mɛnya dia nde ekɔ la ndjatshumoya ka mɛtɛ?

¹⁷ Tɔsɛdingole ɛnyɛlɔ kɛmɔtshi. Ɔnangɛso ɔmɔtshi akasale loseka mbala efula l’edja k’ɛnɔnyi efula. Lo dihole dia nde nyanga ekimanyielo, nde amboshɛ wadɛnde, angɛnyi ande ndo dikumanyi pɛkato kɛsɔ. L’ekomelo dikumanyi wamboyeya dui sɔ. Etena kambowowɛnya tolembetelo, nde ambetawɔ kɛnɛ kakandasale, ndo ambɛnama dia nde ambonyanga efula. Onde nsala ngasɔ kete ambokoka? Dikumanyi diakandola dui sɔ wayonga l’ohomba wa mɛna awui efula, koko aha tsho lonyangu. Onto ɔsɔ lakasale pɛkato kokisala mbala ɔtɔi keto l’ɔtɛ wakandɔshi yɛdikɔ ya kɔlɔ, koko nde akasale pɛkato ka woke l’edja k’ɛnɔnyi efula. Ɔnɛ lakasale pɛkato kombishola pɛkato kande ndaamɛ, koko wakayotɛ dikumanyi. Diakɔ diele, dikumanyi wayonga l’ohomba wa mɛna tolembetelo tɛnya dia otshi wa pɛkato ambosala etshikitanu w’oma k’ɛse otema wendana la tokanyi, nsaki ndo lɔkɛwɔ lande. (Adia 2 Kɔrɛtɔ 7:11.) Koka mbɔsa etena k’otale di’onto ɔsɔ nsala etshikitanu wahombama. Ondo ayonga ohomba di’onto ɔsɔ mbitshanyema oma l’etshumanelo k’Akristo l’edja k’etena kɛmɔtshi.​—1 Kɔr. 5:11-13; 6:9, 10.

18. Ngande wakoka onto lakatshanyema mɛnya ndjatshumoya ka mɛtɛ, ndo etombelo akɔna wayonga la dui sɔ?

¹⁸ Dia mɛnya ndjatshumoya ka l’otema ɔtɔi, onto lakatshanyema pombaka mbɔtɔka lo nsanganya mbala la mbala ndo ndjela alako wa dikumanyi wendana la mbekelo y’amɛna ya lo nyuma, nɔmbaka ndo mbekaka. Nde pombaka nto mbewɔ awui wakoka mbokonya dia nyomosala pɛkato. Naka nde mbidja welo dia nɔngɔsɔla diɔtɔnganelo diasande la Jehowa, kete nde koka monga l’eshikikelo dia Jehowa ayowodimanyiya tshɛ lo tshɛ ndo dikumanyi diayowokaloya  l’etshumanelo. Kɛnɛ kele mɛtɛ ele, etena kalomboshawɔ otshi wa pɛkato, dikumanyi sɛdingolaka dikambo la dikambo lo woho adiɔ ndo vɔ pombaka mbewɔ monga awui wolo.

19. Kakɔna kalɔmbama dia mɛnya di’onto ekɔ la ndjatshumoya ka mɛtɛ? (Ɛzɛkiyɛlɛ 33:14-16)

¹⁹ Oko wambotodiɛna, ndjatshumoya ka mɛtɛ nɔmbaka akambo efula, koko aha mbuta tsho ɔnɛ tambonyanga l’ɔtɛ wakatasale pɛkato ka woke. Nɔmbamaka nto nsala etshikitanu w’oma k’ɛse otema lo yimba ndo l’otema ndo nsala awui w’ɛlɔlɔ. Dui sɔ nɔmbaka nto dia ntshika nsala awui wa kɔlɔ ndo nyomokitanyiya atɔndɔ wa Jehowa. (Adia Ɛzɛkiyɛlɛ 33:14-16.) Dui dia ntondo diahomba onto lakasale pɛkato ndjakiyanya ele nɔngɔsɔla diɔtɔnganelo diasande la Jehowa diakalana.

20-21. Kakɔna kakokaso nsala dia nkimanyiya onto ɔmɔtshi lakasale pɛkato ka woke?

²⁰ Yeso akate lo tshena pe dui dimɔtshi di’ohomba diendana l’olimu ande ate: “Dimi lakaye dia ndjoyanga . . . atshi wa pɛkato dia vɔ ndjatshumoya.” (Luka 5:32) Nsaki kɛsɔ mbahombaso monga la tɔ ndo sho. Tɔshi di’ɔngɛnyi aso wa ma ma akasale pɛkato ka woke. Ahombaso nsala?

²¹ Naka sho nyanga dia mbishɛ pɛkato kande, kete tayosalɛ ɔngɛnyi aso kɔlɔ. Hatotokoka mbishɛ pɛkato, nɛ dia Jehowa ekɔ lo mɛna. (Tok. 5:21, 22; 28:13) Wɛ koka nkimanyiya ɔngɛnyi ayɛ lo mboohola dia dikumanyi koka mbokimanyiya. Naka ɔngɛnyi ayɛ ambotona mbishola pɛkato kande le dikumanyi, wɛ pombaka mbutɛ dikumanyi dui sɔ, lo nsala ngasɔ wɛ ayɛnya dia wɛ nangaka mɛtɛ ɔngɛnyi ayɛ. Ekɔ ohomba nsala dui sɔ, nɛ dia diɔtɔnganelo diasande la Jehowa diekɔ lo waale!

22. Kakɔna kayotɔsɛdingola lo sawo diayela?

²² Ko kayotota naka onto akasale pɛkato ka woke ndo l’etena k’otale ko dikumanyi wambɔsa yɛdikɔ ya mbotshanya? Onde dui sɔ mɛnyaka dia wamboosalɛ akambo aha la kɛtshi? Lo sawo diayela, tayɔsɛdingola woho wele yoho yahokola Jehowa atshi wa pɛkato mɛnyaka dia nde mbaokaka kɛtshi ndo woho wakokaso mbookoya.