ONDE wɛ ndjaɔsaka oko onto lele la lowando? Ɔsɔ ekɔ dimbola diahombaso sho tshɛ ndjaoka. Bible kakate dia lo nshi yaso nyɛ, anto efula wayonga “akanga wa lɔhɛndɛ.” (2 Tim. 3:2) Ondo wɛ ambohomanaka l’anto walongamɛ dia paka anto akina mbasalɛka akambo kana mbashaka diangɔ. Ondo vɔ mbɔsaka dia vɔ hawokoke monga la lowando lo kɛnɛ kalongolawɔ. Onde wɛ mɛnaka dia bu dui dia dimɛna dingama l’anto wa ngasɔ?

Otshikitanyi l’anto asɔ, Bible mbitɛka ekambi wa Jehowa ɔnɛ: “Nyɛnya dia nyekɔ la lowando.” Ndo ɔnɛ: “Nyoshake losaka lo akambo tshɛ.” (Kɔl. 3:15; 1 Tɛs. 5:18) Lo mɛtɛ, ekɔ dimɛna sho monga la yimba ya lowando. Ekɔ ɛkɔkɔ efula wɛnya lande na kele dui sɔ ngasɔ.

Ɔkɔkɔ ɔmɔtshi w’ohomba efula wa monga la yimba ya lowando ele nɛ dia yɔ tokimanyiyaka dia ndjaoka dimɛna. Ondo onto lasha losaka ndjaokaka dimɛna ndo onto lashawɔ losaka ndekaka ndjaoka dimɛna nde lawɔ. Lande na kele monga la lowando toshaka sho ndo anto akina ɔngɛnɔngɛnɔ? Tɔsɛdingole ɛnyɛlɔ kɛnɛ: Etena keyayɛ dia anto akina nangaka kosalɛ dui dimɔtshi, onde kɛsɔ hɛnya ɔnɛ vɔ pombaka kosalɛ dui diakɔ? Vɔ ndjakiyanyaka dikambo diayɛ. Etena kayoyoshihodia dui sɔ, wɛ ayoyaoka dimɛna. Sho koka nkanyiya dia ngasɔ mbakidiɔ ndo le Ruta. Bɔaza akɛnya Ruta lokaho. Aha la taamu, Ruta aki l’ɔngɛnɔngɛnɔ w’efula dia mbeya ɔnɛ onto ɔmɔtshi akayakiyanyaka dikambo diande.​—Ruta 2:10-13.

Ekɔ dimɛna monga la lowando djekoleko le Nzambi. Aha la taamu, wɛ kanyiyaka tena efula weshasha wa lo nyuma ndo wa lo demba efula wakakosha Jehowa ndo watetemalande kosha. (Eoh. 8:17, 18; Ets. 14:17) Koko lo dihole dia nkanyiya yema tshitshɛ tsho dikambo di’ɛlɔlɔ wa Nzambi ɛsɔ, ekɔ dimɛna mbɔsa etena ka nkana yimba efula lo ɛtshɔkɔ efula wakotshulwɛ Nzambi wɛ la anto wokayɛ ngandji. Nkana yimba lo lokaho lele la Otungi ayɛ ayokokimanyiya dia ndeka monga la lowando le nde ndo ayoleka kokimanyiya dia mɛna woho wakolangande ndo wakɔsande la nɛmɔ.​—1 Jni. 4:9.

Koko tokomɛke tsho lo nkanyiya dikambo dia lokaho lande ndo nkana yimba lo ɛtshɔkɔ ande, koko shaka Jehowa losaka lo ɛlɔlɔ ande. (Os. 100:4, 5) Anto mbutaka ɔnɛ “ɛtɛkɛta wa eokelo ka losaka kimanyiyaka lo yoho ya dimɛna efula di’anto monga l’ɔngɛnɔngɛnɔ.”

Ɔkɔkɔ okina wele lowando dimɛna le yɛ ele nɛ dia lɔ keketshaka lɔngɛnyi. Sho tshɛ nangaka vɔ taandola. Etena kashayɛ onto okina losaka la l’otema ɔtɔi l’ɔtɛ wa dui dimɔtshi di’ɔlɔlɔ, nyu akɔ ahende nyayonga la diɔtɔnganelo dia ma ma. (Rɔmɔ 16:3, 4) Ndo nto, ondo anto wele la lowando mboleki kimanyiyana. Vɔ mɛnaka awui w’ɛlɔlɔ waasalɛwɔ ndo vɔ sɛngiyamaka vɔ lawɔ dia monga ɛlɔlɔ. Lo mɛtɛ, nkimanyiya anto akina mbelaka ɔngɛnɔngɛnɔ. Ekɔ oko kɛnɛ kakate Yeso ɔnɛ: “Ɔngɛnɔngɛnɔ waya lo mbisha ndeka wa nongola.”​—Ets. 20:35.

Robert Emmons, lele ɔmɔtshi l’atei w’adikitɛlɛ wa lo inivɛrsite wa Californie leeka awui wendana la lowando mbutaka ate: “Dia monga la lowando, sho pombaka nshihodia ɔnɛ tekɔ l’ohomba w’anto akina, lo tena dimɔtshi sho kahaka ndo lo tena dikina sho nongolaka.” Kɛnɛ kele mɛtɛ ele, nsɛnɔ yaso yekɔ lo sukamɛ oma le anto akina lo toho efula. Ɛnyɛlɔ, vɔ mbeyaka tosha mbo ya ndɛ kana tosakɛ. (1 Kɔr. 12:21) Onto lele la lowando ngɛnangɛnaka kɛnɛ kosalɛ anto akina. Naka ngasɔ, ko onde wɛ ekɔ la mbekelo ka nkɛnɛmɔla lowando lo kɛnɛ kakosalɛ anto akina?

Ɔkɔkɔ okina wakokayɛ nkɛnɛmɔla lowando ele nɛ dia lɔ kokimanyiyaka dia ndeka mbidja yimba l’akambo w’ɛlɔlɔ, koko aha wa kɔlɔ. Lo yoho mɔtshi wɔɔngɔ ayɛ kambaka oko lɔlɛkɔ. Vɔ kokimanyiyaka dia ndjasha l’awui amɔtshi wele suke la yɛ ndo ntshika ndjasha l’awui akina. Wɛ mongaka la mbekelo ka mɛna awui w’ɛlɔlɔ ndo aha ndeka mbidja yimba l’ekakatanu. Etena kayoyotalekaka monga la lowando, mbayoyotalekaka mɛna awui w’ɛlɔlɔ ndo dui sɔ diayoleka kokimanyiya dia monga la lowando. Naka wɛ mbika washo l’awui wakokayɛ monga la lowando, kete dui sɔ diayokokimanyiya dia nsala kɛnɛ kakatokeketsha ɔpɔstɔlɔ Pɔɔlɔ dia nsala ate: “Nyɔngɛnangɛnake nshi tshɛ lo Nkumadiɔndjɔ.”​—Flpɛ. 4:4.

Wɛ ayɛna dia lowando layokokimanyiya diaha monga l’ekanelo ka kɔlɔ. Shi ekɔ dui dia wolo monga la lowando, ko l’etena kakɔ kaamɛ monga la kandjema, la lonyangu kana la nkɛlɛ? Ndo nto, anto wele la lowando hawoleke monga la nsaki ka lomombo. Vɔ ngɛnangɛnaka la kɛnɛ kele lawɔ ndo hawoyasha dia nyomokondja diangɔ dikina efula.​—Flpɛ. 4:12.

Oko weyɛ Okristo, wɛ mbeyaka dia Satana nangaka dia wɛ nyanga ndo nkɔmɔ l’ɔtɛ w’ekakatanu wahomana la yɛ lo nshi y’ekomelo nyɛ. Nde nangaka dia wɛ monga la yimba yaha mɛna akambo la sso di’ɔlɔlɔ ndo dia wɛ ndjakiyanyaka. Yimba shɔ koka kokonya diaha ndeka monga l’etombelo w’ɛlɔlɔ oko weyɛ osambisha wa lokumu l’ɔlɔlɔ. Lo mɛtɛ, lowando mongaka kaamɛ la olowa wa nyuma ka Nzambi, mbidja ndo ɔngɛnɔngɛnɔ wele la yɛ l’ɔtɛ w’awui w’ɛlɔlɔ wakosalɛ Nzambi ndo weyɛ la mbetawɔ lo alaka ande tshɛ.​—Ngal. 5:22, 23.

Oko weyɛ okambi wa Jehowa, ondo wɛ mbetawɔka kɛnɛ kɔtɛkɛtami lo sawo nɛ lo kɛnɛ kendana la lowando. Koko, wɛ amboshihodia dia lowando ndo mɛna akambo la sso di’ɔlɔlɔ bu waonga wotɔso la wɔ. Koko tetawɔke dia dui sɔ kɔkɔmɔla. Wɛ koka nkɛnɛmɔla ndo nama lowando. Lo ngande? Ɔsaka etena lushi tshɛ ka nkanyiya awui amɔtshi wa lo lɔsɛnɔ layɛ wakokayɛ monga la lowando. Etena kayoyotalekaka nsala dui sɔ, mbayoyotalekaka monga la lowando. Dui sɔ diayokosha ɔngɛnɔngɛnɔ w’efula ndeka wanɛ waka washo lo ekakatanu wa lo lɔsɛnɔ. Kana yimba la awui w’ɛlɔlɔ wakosalɛ Nzambi ndo anto akina wakokeketsha ndo wakosha ɔngɛnɔngɛnɔ. Wɛ koka kaanga ntatɛ fundaka awui akɔ lofunda. Lɔkɔ, wɛ koka mfunda awui ahende kana asato wakakokonyisha dia monga la lowando lushi lakɔ.

Anyangiyangi amɔtshi wakashola dia “naka sho mbishaka anto akina losaka mbala la mbala, kete dui sɔ koka ntshikitanya woho wakamba wɔɔngɔ aso ndo kɛsɔ koka monga dui dia wɔdu le so dia ndjaoka dimɛna lo dikambo dia lɔsɛnɔ laso.” Onto lele la lowando mongaka l’ɔngɛnɔngɛnɔ w’efula. Diakɔ diele, kanaka yimba lo dikambo di’awui w’amɛna wakawakosalɛ, ngɛnangɛnaka l’awui wakokomɛ ndo ongaka nshi tshɛ la lowando! Lo dihole dia mbɔsa awui w’amɛna oko awui w’anyanya, “[shaka] Jehowa losaka, nɛ dia nde ekɔ ɔlɔlɔ.” Eelo, “[shaka] losaka lo akambo tshɛ.”​—1 Ɛk. 16:34; 1 Tɛs. 5:18.