1. Ngande wɔsa anto efula olimu?

NGANDE wɔsa anto efula wa lɛnɛ odjashiyɛ olimu? Lo wedja efula, anto wekɔ lo nkamba olimu wa wolo ndo wa wenya efula oleki nshi yakete. Mbala efula, anto wakamba elimu efula hawokondja etena ka momuya, ka mbetsha kaamɛ la nkumbo yawɔ kana ka nkotsha ehomba awɔ wa lo nyuma. (Ond. 2:23) Lo wedi okina, anto amɔtshi hawolange nkamba olimu ndo mbishaka tɛkɛnɛndɛ diaha nkamba olimu.​—Tok. 26:13, 14.

2-3. Ɛnyɛlɔ kakɔna kakatosha Jehowa nde la Yeso lo kɛnɛ kendana l’olimu?

² Otshikitanyi la tokanyi t’ase andja ɔnɛ tele bu la wɛdimo, tende woho wɔsa Jehowa nde la Yeso olimu. Aha la taamu, Jehowa ekɔ okambi w’olimu. Yeso akɛnya dui sɔ hwe ate: “Papa ekɔ lo ntetemala nkamba polo ndo kakiye ndo dimi lekɔ lo ntetemala nkamba.” (Jni. 5:17) Ohokanyiya elimu tshɛ wakakambe Nzambi lo ntonga ditongami dia lo nyuma diaheyama mbadia ndo andja wa woke ɔnɛ. Tekɔ lo mɛna nto djembetelo y’elimu w’etongelo ka Nzambi oma lo okama wa nkɛtɛ w’olangala wadjasɛso. Diakɔ diakate omembi w’esambo ate: “Jehowa le, ande elimu ayɛ efula lee! Wɛ akaasale vɔ tshɛ la lomba. Nkɛtɛ ndola tɔɔ la kɛnɛ kakayasale.”​—Os. 104:24.

³ Yeso akokoya She. Ɔna akakimanyiya Nzambi etena “kakandalɔngɔsɔla olongo.” Nde aki kaamɛ la Jehowa “oko okambi wa kɔmba.” (Tok. 8:27-31) Edja efula l’ɔkɔngɔ, etena kakayonga Yeso la nkɛtɛ, nde akakambe olimu wa diambo efula. Olimu ɔsɔ waki oko mma le nde, ndo elimu ande wakɛnya dia Nzambi mbakotome.​—Jni. 4:34; 5:36; 14:10.

4. Wetshelo akɔna wakondjaso oma le Jehowa nde la Yeso lo dikambo dia diomuyelo?

 ⁴ Onde bɛnyɛlɔ diakatosha Jehowa nde la Yeso lo kɛnɛ kendana la nkamba olimu wa wolo mɛnyaka dia sho bu l’ohomba wa momuya? Ndooko. Jehowa halɛmbaka pondjo, laasɔ nde bu l’ohomba wa diomuyelo. Bible mbutaka dia l’ɔkɔngɔ wa Jehowa ntonga olongo la nkɛtɛ, “nde akatshike nkamba ndo akomuya.” (Eto. 31:17) Koko kɛsɔ mɛnyaka hwe dia Jehowa akatshike nkamba lo tshanda mɔtshi ndo akangɛnangɛna la kɛnɛ kakandasale. Ndo kaanga mbakakambe Yeso olimu wa wolo etena kakinde la nkɛtɛ, nde akatshungolaka etena ka momuya ndo ka ndɛ yangɔ la angɛnyi ande.​—Mat. 14:13; Luka 7:34.

5. Okakatanu akɔna wele l’ekambi wa Nzambi efula?

⁵ Bible keketshaka ekambi wa Nzambi dia monga akambi w’olimu. Ekambi ande pombaka monga l’etete, koko aha monga akanga wa nɛndɛ. (Tok. 15:19) Ondo wɛ kambaka olimu wa l’emunyi dia nkotsha ehomba wa nkumbo kayɛ. Ndo ambeki wa Kristo tshɛ wekɔ l’ɔkɛndɛ wa nsambisha lokumu l’ɔlɔlɔ. Koko, wɛ ekɔ nto l’ohomba wa momuya efula. Onde lo tena dimɔtshi wɛ mongaka l’okakatanu dia monga la wɛdimo lo kɛnɛ kendana l’olimu wa l’emunyi, olimu w’esambishelo ndo lo kɛnɛ kendana la diomuyelo? Ngande weyaso lofulo la wenya la nkamba olimu ndo lofulo la wenya la momuya?

6. Ngande wɛnya Makɔ 6:30-34 dia Yeso aki la kanyi yele la wɛdimo lo dikambo di’olimu ndo diomuyelo?

⁶ Lo dikambo di’olimu, wɛdimo wekɔ ohomba. Nkumekanga Sɔlɔmɔna akasambiyama dia mfunda ate: “Dikambo tshɛ diekɔ la etena kadiɔ.” Nde akate dia etena ka monɛ, ka mbika, ka ndela, ka mbɔla, ka nnɔ lokombe ndo elimu ekina. (Ond. 3:1-8) Mbokɛmaka di’awui ahende w’ohomba wendana la lɔsɛnɔ laso ele olimu la diomuyelo. Yeso aki la kanyi yele la wɛdimo lo dikambo di’olimu ndo diomuyelo. Lo diaaso dimɔtshi, apɔstɔlɔ wakakalola oma lɛnɛ akawatshu dia tasambishaka. Vɔ waki l’awui efula wa nsala woho wele “vɔ kokondja kaanga etena ka ndɛ yangɔ.” Yeso akate ate: “Nyoye nyuamɛ, totshu lo dihole dia diɛta kele nyotomuya yema.” (Adia Makɔ 6:30-34.) Kaanga mbele aha tena tshɛ mbaki Yeso l’ambeki ande l’akoka wa momuya lo yɛdikɔ yakawalangaka, Yeso akeyaka dia vɔ tshɛ waki l’ohomba wa momuya.

7. Ngande wayotokimanyiya ɔsɛdingwelo wa ɔlɛmbɛ wendana la Sabato?

⁷ Lo tena dimɔtshi, diomuyelo kana etshikitanu ɛmɔtshi wekɔ mɛtɛ ohomba. Sho koka mɛna dikambo sɔ oma lo yɛdikɔ yakɔshi Jehowa lo wahɔ w’ekambi ande w’edjedja, mbuta ate Sabato kakasalemaka lomingu tshɛ. Sho bu l’ɛse k’Ɛlɛmbɛ wa Mɔsɛ, koko sho koka nkondja wahɔ lo nsɛdingola kɛnɛ katawɔ lo dikambo dia Sabato. Kɛnɛ kayoteka ayotokimanyiya dia nsɛdingola kanyi yaso lo dikambo di’olimu ndo diomuyelo.

8. Lo ndjela Etombelo 31:12-15, Sabato kaki lushi la dikambo diakɔna?

⁸ Ɔtɛkɛta wa Nzambi mbutaka dia l’ɔkɔngɔ wa “nshi” shamalo y’etongelo, Nzambi akomuya oma l’olimu ande wendana la nkɛtɛ. (Eta. 2:2) Koko, Jehowa nangaka olimu ndo lo toho tokina, nde “ekɔ lo ntetemala nkamba.” (Jni. 5:17) Yɛdikɔ yendana la Sabato ka lomingu la lomingu ndjelaka ɛnyɛlɔ ka lushi la Jehowa la diomuyelo lɔtɛkɛtami lo Etatelo. Nzambi akate dia Sabato aki djembetelo lam’asande la Isariyɛlɛ. Tɔ kaki lushi la “momuya tshɛ lo tshɛ . . . ekila dikambo dia Jehowa.” (Adia Etombelo 31:12-15.) Didjango diaha nkamba olimu lushi la Sabato diakendanaka  l’onto tshɛ, mbidja ndo ana, mfumbe ndo kaanga dongalonga. (Eto. 20:10) Diɔ diakashaka anto diaaso dia ndeka ndjasha l’akambo wa lo nyuma.

9. Naa kanyi ya kɔlɔ yaki l’anto wa lo nshi ya Yeso lo dikambo dia Sabato?

⁹ Lushi la Sabato laki dimɛna le ekambi wa Nzambi, koko ewandji w’ɛtɛmwɛlɔ efula wa lo nshi ya Yeso wakatambe elelo ndo waki awui wolo lo dikambo dia lushi lɔsɔ. Vɔ wakate dia bu dimɛna mina kaanga nanula kana nkɔnɔla onto lushi la Sabato. (Makɔ 2:23-27; 3:2-5) Tokanyi tɔsɔ kɔmbɔtɔnɛka la ta Nzambi, ndo Yeso akalembetshiya wanɛ waketawɔ mbohokamɛ dikambo sɔ hwe.

10. Wetshelo akɔna wakondjaso oma lo Mateo 12:9-12 lo kɛnɛ kendana la woho wakɔsaka Yeso Sabato?

¹⁰ Yeso la ambeki ande w’ase Juda wakomuyaka lushi la Sabato, nɛ dia vɔ waki l’ɛse k’Ɛlɛmbɛ wa Mɔsɛ. * Koko Yeso akate ndo akasale akambo efula wakɛnyaka dia keema kɔlɔ salɛ anto akina akambo w’ɛlɔlɔ lushi la Sabato. Nde akate hwe ate: “Ekɔ dimɛna nsala dikambo di’ɔlɔlɔ lushi la Sabato.” (Adia Mateo 12:9-12.) Nde kɔmbɔsa dia nsala awui w’ɛlɔlɔ ndo wakimanyiya kete ambɔnyɔla Sabato. Awui wakasale Yeso wakɛnyaka shikaa dia Sabato aki dui di’ohomba. Lam’ele ekambi wa Nzambi wakomuyaka oma l’elimu wakawakambaka lushi la lushi, vɔ waki l’akoka wa ndjasha l’awui wa lo nyuma. Yeso akole lo nkumbo kakakambaka la Sabato lo dikambo dia wahɔ wa lo nyuma. Sho mbeyaka dui sɔ  l’ɔtɛ wa kɛnɛ kadiaso lo dikambo dia Yeso etena kakinde l’osomba ande wa lootɔ wa Nazarɛtɛ ɔnɛ: “Oko waki mbekelo [ka Yeso] lushi la Sabato, nde akɔtɔ lo shinangɔnga ndo akemala dia mbadia.”​—Luka 4:15-19.

11. Ɛnyɛlɔ kakɔna ka dimɛna kakatosha Yeso lo kɛnɛ kendana l’olimu?

¹¹ Lo mɛtɛ, Yɔsɛfu aki la kanyi ya Nzambi lo kɛnɛ kendana l’olimu etena kakandetshaka Yeso, ɔnande la loodia, dia monga otshudi w’abaya. (Mat. 13:55, 56) Ndo Yeso akɛnyi woho wakakambaka Yɔsɛfu olimu wa wolo lushi la lushi dia nkotsha ehomba wa nkumbo kande ka woke. Ndo l’ɔkɔngɔ diko, Yeso akayotɛ ambeki ande ate: “Ose olimu la dia nongola difuto diande.” (Luka 10:7) Eelo, Yeso akayaekesanyiya la olimu wa wolo.

12. Avɛsa akɔna wɛnya kɛnɛ kata Bible lo dikambo di’olimu wa wolo?

¹² Ngasɔ mbakidiɔ ndo lo dikambo di’ɔpɔstɔlɔ Pɔɔlɔ. Olimu ande wa ntondo aki wa mbewoya anto awui wendana la lokombo ndo losango la Yeso. Koko, Pɔɔlɔ akakambaka olimu dia nkotsha ehomba ande. Ase Tɛsalɔnika wakeyaka “olimu [ande] wa wolo,” olimu wakandakambaka “otsho la yanyi” diaha nde “monga wotsho wamboleka” le onto tshɛ. (2 Tɛs. 3:8; Ets. 20:34, 35) Ondo Pɔɔlɔ akatɛkɛtaka di’olimu ande w’osadi wa mvudu y’apɛma. Lam’akinde la Kɔrɛtɔ, nde akadjasɛ laka Akula la Piriskila ndo “vɔ wakakambaka kaamɛ, nɛ dia vɔ wakasalaka mvudu y’apɛma.” Woho wakakambaka Pɔɔlɔ olimu “otsho la yanyi” kɔmɛnyaka dia nde komomuyaka. Nde akomuyaka oma l’olimu ande w’osadi wa mvudu y’apɛma, ɛnyɛlɔ lushi la Sabato. Lushi lɔsɔ lakawoshaka diaaso dia nsambisha ase Juda, wele vɔ lawɔ kokambaka olimu lushi la Sabato.​—Ets. 13:14-16, 42-44; 16:13; 18:1-4.

13. Wetshelo akɔna wakokaso nkondja oma l’ɛnyɛlɔ k’ɔpɔstɔlɔ Pɔɔlɔ?

¹³ Ɔpɔstɔlɔ Pɔɔlɔ akasha ɛnyɛlɔ k’ɔlɔlɔ. Nde akahombaka nkamba olimu wa l’emunyi, koko nde akashaka lonya mbala la mbala “lo nkamba olimu w’ekila wa lokumu l’ɔlɔlɔ laki Nzambi.” (Rɔmɔ 15:16; 2 Kɔr. 11:23) Nde akakeketsha anto akina dia nsala woho akɔ waamɛ. Diakɔ diele, Akula nde la Piriskila waki “aseka[nde] wa l’olimu le Kristo Yeso.” (Rɔmɔ 12:11; 16:3) Pɔɔlɔ akakeketsha ase Kɔrɛtɔ dia monga “la akambo efula wa nsala l’olimu wa Nkumadiɔndjɔ.” (1 Kɔr. 15:58; 2 Kɔr. 9:8) Jehowa akasambiya ɔpɔstɔlɔ Pɔɔlɔ dia mfunda ɔnɛ: “Naka onto halange nkamba, kete atɔlɛke.”​—2 Tɛs. 3:10.

14. Kakɔna kakalange Yeso mbuta etena kakandate awui wofundami lo Joani 14:12?

¹⁴ Olimu woleki ohomba lo nshi y’ekomelo nyɛ ele wa nsambisha ndo mbetɛ anto ambeki. Diakɔ diakate Yeso dia ambeki ande wayokamba elimu woleki ndo wɔnɛ wakandakambe! (Adia Joani 14:12.) Nde konanga mbuta dia sho tayosala ahindo oko wakandasale. Koko, ambeki ande wayosambisha ndo wayetsha lo ɛtshi ka nkɛtɛ koleki woke, wayosambisha anto efula mboleka, ndo wayosambisha l’etena koleki otale.

15. Ambola akɔna wahombaso ndjaoka, ndo lande na?

¹⁵ Naka wɛ ekɔ lo nkamba olimu wa l’emunyi, kete yambola ambola anɛ: ‘Onde dimi mbeyamaka lo dihole diami di’olimu oko onto lakamba olimu wa wolo? Onde dimi manaka olimu la wonya ndo dimi kambaka l’akoka ami tshɛ?’ Naka wɛ nkadimola ɔnɛ eelo, kete ondo owandji ayɛ w’olimu ayoyaɛkɛ le yɛ. Ndo ondo anto wa l’olimu wayoleka monga suke dia mbetawɔ losango la Diolelo. Lo kɛnɛ kendana l’olimu w’esambishelo ndo wa mbetsha anto, yambola ɔnɛ: ‘Onde dimi mbeyamaka oko onto lasambisha efula? Onde  dimi nɔngɔsɔlaka wendelo wa ntondo dimɛna? Onde dimi kalolaka aha la ntshimbatshimba dia tosawola l’anto wakɛnya nsaki? Ndo onde dimi ndjashaka lo toho totshikitanyi t’esambishelo?’ Naka wɛ nkadimola ɔnɛ eelo, kete wɛ ayonga l’ɔngɛnɔngɛnɔ l’olimu ayɛ.

16. Otshikitanu akɔna wele lam’asa woho wakɔsaka Yeso la apɔstɔlɔ ande diomuyelo la woho wadiɔsa anto efula ɛlɔ kɛnɛ?

¹⁶ Yeso akeyaka dia lo tena dimɔtshi, nde l’apɔstɔlɔ ande waki l’ohomba wa momuya yema. Koko, anto efula wa lo nshi shɔ ndo efula wa nshi nyɛ wekɔ oko kanga ɔngɔnyi la lo wɛɛla wa Yeso. Pami kakɔ akayatɛ ate: “Aya wɛ tokomuya, ndɛka tsho, nɔka tsho ndo ngɛnangɛnaka.” (Luka 12:19; 2 Tim. 3:4) Nde akafɔnya di’awui woleki ohomba lo lɔsɛnɔ ele momuya la ngɛnangɛna. Koko, le Yeso ndo apɔstɔlɔ ande, aha ɔngɛnɔngɛnɔ awɔ hita mbaki dui diakaleke ohomba lo lɔsɛnɔ lawɔ.

17. Ngande wakokaso nkamba la wenya weso bu lo olimu wa l’emunyi?

¹⁷ Ɛlɔ kɛnɛ, sho salaka la wolo dia mbokoya Yeso lo nkamba la wenya weso bu lo olimu aha tsho dia momuya, koko ndo dia nsala kɛnɛ kele ɔlɔlɔ lo nsambisha anto akina lokumu l’ɔlɔlɔ ndo lo mbɔtɔka lo nsanganya y’Akristo. Le so olimu wa mbetɛ anto ambeki ndo wɔtwɛlɔ wa lo nsanganya wekɔ awui w’ohomba efula, diakɔ diele sho mbidjaka welo efula dia ndjashaka mbala la mbala l’elimu w’ekila ɛsɔ. (Hɛb. 10:24, 25) Kaanga etena keso lo vakashi, hatotshike mbekelo yaso y’amɛna ya lo nyuma ya sanganaka mbala la mbala oyadi dihole diakɔna dieso, ndo sho nyangaka waaso wa nsawola la wanɛ wahomana la so.​—2 Tim. 4:2.

18. Kakɔna kalanga Kristo Yeso, Nkumekanga kaso dia sho nsala?

¹⁸ Tekɔ la lowando efula lo woho wele Kristo Yeso, Nkumekanga kaso ekɔ l’ekanelo k’ɔlɔlɔ ndo nde tokimanyiyaka dia monga la kanyi yele la wɛdimo lo kɛnɛ kendana l’olimu ndo diomuyelo! (Hɛb. 4:15) Nde nangaka dia sho momuyaka yema. Nde nangaka nto dia sho nkamba olimu wa wolo dia ndjakotshɛ ehomba aso wa l’emunyi ndo ndjashaka l’olimu washa ɔngɛnɔngɛnɔ wa mbetɛ anto ambeki. Lo sawo diayela, tayɔsɛdingola ɔkɛndɛ wele la Yeso wa totshungola oma lo yoho ya lɔhɔmbɔ yoleki tshɛ kɔlɔ.