Onde wɛ koka nkadimola ambola anɛ wohikami lo Tshoto y’Etangelo ya lo 2019?

Naa kitshimudi ya daka dia Nzambi nɛ: “Ndooko ehomɔ ka ta kayowotshula dia kɔlɔsha kayolowana”? (Isa. 54:17)

Sho koka monga l’eshikikelo dia Nzambi ayotokokɛ oma lo “loowe la akanga wa hiadi.” (Isa. 25:4, 5) Atunyi aso hawotokoka tosalɛ kɔlɔ kahakomɛ.​—w19.01, lk. 6-7.

Ngande wele woho wakasalɛ Nzambi ase Kanana ndo ase Isariyɛlɛ waki komonga l’okitanyiya akambo kɛnɛmɔlaka losembwe lande?

Nzambi akela kilombo le wanɛ wakayashaka lo ditshelo dia monanyi kana lo salɛ wamato ndo ana akambo lo yoho ya kɔlɔ. Nde akatshɔkɔlaka ekambi ande waki l’okitanyiya le nde ndo wakasalɛka anto akina akambo la losembwe.​—w19.02, lk. 22-23.

Ahombaso nsala naka tekɔ laawɔ etena kasala onto lele bu ombetawudi dɔmbɛlɔ?

Sho koka ntshikala ki ndo monga la dilɛmiɛlɔ, koko hatohombe mbuta “aamɛɛ” kana memɛ anya kaamɛ l’anto akina wele laawɔ. Sho koka nsala dɔmbɛlɔ diaso shoamɛ l’etei k’otema.​—w19.03, lk. 31.

Lande na kele mbeyana l’ɔna dikɛnda la wolo ekɔ dui dia kɔlɔ efula?

Onto leyana l’ɔna dikɛnda la wolo mbosalɛka kɔlɔ, salɛka etshumanelo kɔlɔ, salɛka emboledi kɔlɔ, ndo salɛka Nzambi kɔlɔ. Lo ahole watanema ɛlɛmbɛ walɔmba dia mbutɛ lɛɛta naka onto ambolanya ɔna dikɛnda, dikumanyi kitanyiyaka ɛlɛmbɛ akɔ.​—w19.05, lk. 9-10.

Ngande wakokayɛ ntshikitanya kana ndowanya lonto layɛ?

Wanya w’ohomba: Sawolaka la Jehowa lo dɔmbɛlɔ. Kanaka yimba l’oyango wa ndjasɛdingola. Sɔna angɛnyi ayɛ la lomba.​—w19.06, lk. 11.

Akokaso nsala kakianɛ dia ndjalɔngɔsɔla dikambo di’ɛhɛnyɔhɛnyɔ?

Sho pombaka nkeketsha diɔtɔnganelo diasaso la Jehowa. Tonge l’eshikikelo dia nde tokaka ngandji ndo nde hatokalɛki pondjo. Adiaka Bible lushi tshɛ, ndo lɔmbaka mbala la mbala. Onga l’eshikikelo di’alaka wendana la Diolelo wayokotshama. Kimɛ lo yimba avɛsa walekayɛ nanga ndo esambo wa lotombo.​—w19.07, lk. 2-4.

Kakɔna kakokaso nsala dia nkimanyiya ewotɔ aso dia ndjoshimbamɛ?

Ekɔ ohomba ndjadja lo dihole di’anto akina, tosale dia lɔkɛwɔ laso la dimɛna monga esambishelo ka woke, tonge la solo dia lotutsha ndo la ɔkɔmi.​—w19.08, lk. 15-17.

Ngande wakeketshamaso oko wakalake Yeso lo Mateo 11:28?

Tekɔ la emendji w’Akristo wokana ngandji, angɛnyi woleki amɛna, ndo olimu woleki dimɛna.​—w19.09, lk. 23.

Ngande wakoka Nzambi tosha nsaki ndo wolo wa nsala akambo? (Flpɛ. 2:13)

Naka sho mbadia Ɔtɛkɛta wa Nzambi ndo nkana yimba lawɔ, kete Nzambi ayotosha nsaki ka nsala lolango lande ndo wolo wa nsala akambo. Nyuma kande koka ndowanya akoka aso.​—w19.10, lk. 21

Wanya akɔna w’ohomba wahombaso ntakola ntondo ka mbɔsa tɛdikɔ ta weke?

Wanya atanu anɛ: Sala eyangelo wa lotshimola. Lɔmba dia nkondja lomba. Sɛdingola eyango ayɛ. Yadjɛ eyango w’eshika. Ɛna akambo la sso di’ɔlɔlɔ.​—w19.11, lk. 27-29.

Onde kanyi y’ɔnɛ anima havu yakatatɛ oma lo kɛnɛ kakatɛ Satana Eva?

Ondo bu. Satana akatɛ Eva ɔnɛ nde hatovɔ, aha ɔnɛ otɛnama tsho dia nde ayovɔ. Ndooko tokanyi ta kɔlɔ ta l’ɔtɛmwɛlɔ takonge l’ɔkɔngɔ wa Mvula k’elola. Ondo dietawɔ di’ɔnɛ anima havu diakatatɛ ntondo ka Nzambi mpandjola anto wakakaka tshoto ya Babɛlɛ.​—w19.12, lk. 15.