Ɔkɔndɔ wele lo Eohwelo k’Ɛlɛmbɛ 22:25-27 hawɔkɔndwami ntondotondo dia mɛnya ɔnɛ pami mbaki l’onongo, nɛ dia dui sɔ diakeyamaka. Ɔlɛmbɛ ɔsɔ ndekaka mbika epole ɔsɛkɛ dia mɛnya woho wele womoto bu l’onongo. Tɔsɛdingole avɛsa wosukanyi l’avɛsa asɔ.

Avɛsa wotate tɛkɛtaka dikambo dia pami kakeyana “lo osomba” la womoto lakambemɛ. Lo nsala ngasɔ, nde aki l’onongo wa loseka, lam’ele womoto lakambemɛ akɔsamaka oko onto lambotshukama. Kayotota dikambo dia womoto? “Nde kombida ekoko lo osomba.” Otondonga nde akasale ngasɔ, ndooko onyake anto akina wotoka ekoko ndo wotoya dia ndjookokɛ. Koko nde kombida ekoko. Diakɔ diele, nde lawɔ akasale loseka ndo vɔ akɔ ahende waki l’onongo.​—Eoh. 22:23, 24.

Ɔlɛmbɛ akɔ mbutaka nto dui diotshikitanyi ɔnɛ: “Ko naka pami kakɔ ambohomana lo okonda la womoto lakambemɛ ko pami kakɔ mbooleka wolo ndo ambetama la nde, pami kaketami la nde kahomba mvɔ ndamɛ, ndo hanyohombe salɛ womoto ndooko dui. Womoto akɔ hasadi pɛkato kahombande mvɔ. Dui sɔ diekɔ oko etena kalɔsha pami kɛmɔtshi osekande ko amboodiaka. Nɛ dia nde akahomanyi la nde lo okonda ndo womoto lakambemɛ akadi ekoko, koko ndooko onto lakakoki mbotshungola.”​—Eoh. 22:25-27.

Lo etena kɛsɔ, toshushi waketawɔka kɛnɛ kakataka womoto. Lo ngande? Nɛ dia akɛnamaka dia nde “akadi ekoko, koko ndooko onto lakakoki mbotshungola.” Diakɔ diele, nde kosala loseka. Koko, pami ekɔ l’onongo wa mbeyana la nde la wolo ndo wa loseka nɛ dia nde “mbooleka wolo ndo ambetama la” womoto lakambemɛ.

Koko, kaanga mbele ɔlɛmbɛ ɔsɔ wakaleke mbika epole ɔsɛkɛ lo mɛnya woho wele womoto bu l’onongo, ɔkɔndɔ ɔsɔ mɛnyaka hwe dia pami aki l’onongo wa mbeyana la nde la wolo ndo wa loseka. Sho koka monga l’eshikikelo dia toshushi wakahombaka “disɛdingola dimɛna dimɛna” ndo mbɔsa yɛdikɔ yɔtɔnɛ l’atɔndɔ wakɛnya Nzambi hwe ndo mbala la mbala.​—Eoh. 13:14; 17:4; Eto. 20:14.