1. Diaaso diakɔna diatosha Jehowa?

JEHOWA toshaka diaaso dia mbɔsa yɛdikɔ ya woho wahombaso nsɛna. Nde tetshaka woho wahombaso nsala ɛsɔnwɛlɔ w’amɛna ndo nde tokimanyiyaka dia monga l’etombelo w’amɛna etena kɔsaso tɛdikɔ tawɔngɛnyangɛnya. (Os. 119:173) Lo yɛdikɔ yayototalekaka nkamba la lomba lele l’Ɔtɛkɛta wa Nzambi, mbayototalekaka mbɔsa tɛdikɔ t’amɛna.​—Hɛb. 5:14.

2. Okakatanu akɔna wakokaso monga la wɔ l’ɔkɔngɔ wa sho mbɔsa yɛdikɔ mɔtshi?

² Koko, oyadi takɔshi yɛdikɔ ya dimɛna, sho koka monga l’okakatanu wa nshidiya kɛnɛ kakatatatɛ nsala. Tɔsɛdingole bɛnyɛlɔ dimɔtshi: Ɔnangɛso ɔmɔtshi l’ɔlɔngɔlɔngɔ ambɔsa yɛdikɔ ya mbadia Bible k’otondo. Nde ambadia dimɛna l’edja ka mingu mɔtshi, koko hayadia l’ɔtɛ w’ɔkɔkɔ ɔmɔtshi. Kadiyɛsɔ kɛmɔtshi ambɔsa yɛdikɔ ya nkamba olimu w’ombatshi mboka wa pondjo, koko ekɔ lo ntetemala ntaloya datɛ diahombande ntatɛ. Olui ɔmɔtshi wa dikumanyi wakɔshi yɛdikɔ kaamɛ dia nyomoleka ndjasha lo wembwelo w’ɛkɔkɔ wa l’etshumanelo, koko l’ɔkɔngɔ wa ngɔndɔ efula hawotatɛ nsala dui sɔ. Awui asɔ ntshikitana, koko vɔ fɔnaka lo dui dimɔtshi. Tɛdikɔ takawɔshi tɔsɔ kokotshama tshɛ lo tshɛ. Akristo wa lo ntambe ka ntondo wa la Kɔrɛtɔ wakonge l’okakatanu akɔ waamɛ. Tende wetshelo wakokaso nkondja oma le wɔ.

3. Yɛdikɔ yakɔna yakɔshi ase Kɔrɛtɔ, ko etombelo akɔna wakonge?

³ Oya lo 55 T.D., ase Kɔrɛtɔ wakɔshi yɛdikɔ y’ohomba efula. Vɔ wakeye ɔnɛ anangɛwɔ wa la Jɛrusalɛma ndo wa la Judeya wakadiɛnɛka l’ekakatanu ndo la wola ndo tshumanelo dikina wakakɔngɔlaka falanga dia mbakimanyiya. L’ɔtɛ wakiwɔ anto w’ɛlɔlɔ ndo waki la lokaho, ase Kɔrɛtɔ wakɔshi yɛdikɔ ya nkimɔ weshasha ndo wakambola Pɔɔlɔ woho wakawakoke mbakimanyiya. Nde akafundɛ etshumanelo kakɔ ɛlɔmbwɛlɔ kakawahombe ndjela ndo akasɔnɛ Tito dia mbakimanyiya dia  nkɔngɔla falanga. (1 Kɔr. 16:1; 2 Kɔr. 8:6) Koko ngɔndɔ ngana l’ɔkɔngɔ, Pɔɔlɔ akoke dia ase Kɔrɛtɔ kokotsha yɛdikɔ yakawɔshi. Etombelo wakonge ele, ondo weshasha awɔ komonga suke etena kakawahombe tomama la Jɛrusalɛma kaamɛ la weshasha wakakimɔ tshumanelo dikina.​—2 Kɔr. 9:4, 5.

4. Oko wɛnyamidiɔ lo 2 Kɔrɛtɔ 8:7, 10, 11, kakɔna kakakeketsha Pɔɔlɔ ase Kɔrɛtɔ dia nsala?

⁴ Ase Kɔrɛtɔ wakɔshi yɛdikɔ ya dimɛna, ndo Pɔɔlɔ akawawandola l’ɔtɛ wa mbetawɔ kawɔ ka wolo ndo nsaki k’efula kaki lawɔ ka monga anto wele la lokaho. Koko nde akahombe nto mbakeketsha dia nshidiya kɛnɛ kakawatatɛ nsala. (Adia 2 Kɔrɛtɔ 8:7, 10, 11.) Kɛnɛ kakaakomɛ kɛsɔ tetshaka ɔnɛ oyadi Akristo wele la kɔlamelo koka monga l’okakatanu wa nkotsha yɛdikɔ mɔtshi y’ɔlɔlɔ.

5. Ambola akɔna wayangaso nkadimola?

⁵ L’ɛnyɛlɔ k’ase Kɔrɛtɔ, sho koka monga l’okakatanu dia nkotsha tɛdikɔ taso. Lande na? L’ɔtɛ weso bu kokele, sho koka tsho ntaloya akambo. Kana awui wa shashimoya koka nsala ko aya wolo dia sho nkotsha yɛdikɔ yakatɔshi. (Ond. 9:11; Rɔmɔ 7:18) Ngande wakokaso nyomɔsɛdingola yɛdikɔ mɔtshi ndo nshihodia dia kana sho pombaka ndjitshikitanya? Ndo ngande wakokaso nshidiya dimɛna kɛnɛ kakatatatɛ nsala?

6. Etena kakɔna kakokaso monga l’ohomba wa ntshikitanya yɛdikɔ mɔtshi?

⁶ Ekɔ tɛdikɔ tɔmɔtshi t’ohomba tahatakoke ntshikitanya pondjo. Ɛnyɛlɔ, sho kukutɛka yɛdikɔ yaso ya kambɛ Jehowa ndo sho ndjashikikɛka dia monga la kɔlamelo le olonganyi aso. (Mat. 16:24; 19:6) Koko, ekɔ tɛdikɔ tokina takokaso monga l’ohomba wa ntshikitanya. Lande na? Nɛ dia awui tshikitanaka. Wanya akɔna wakoka tokimanyiya dia mbɔsa tɛdikɔ toleki amɛna?

7. Lo dikambo diakɔna diahombaso nɔmba, ndo lande na?

⁷ Lɔmba dia nkondja lomba. Jehowa akasambiyɛ Jakɔba dia mfunda ɔnɛ: “Naka onto ɔmɔtshi l’atei anyu ekɔ l’ohomba wa lomba, nde atetemale nɔmba Nzambi, . . . nɛ dia la lokaho tshɛ nde mbishaka anto tshɛ.” (Jak. 1:5) Lo tena dimɔtshi, sho tshɛ ‘pombaka lomba.’ Diakɔ diele, yaɛkɛ le Jehowa etena kɔsayɛ yɛdikɔ ndo etena kasɛdingolayɛ yɛdikɔ yakɔ nto. Oma laasɔ, Jehowa ayokokimanyiya dia mbɔsa tɛdikɔ t’amɛna.

8. Eyangelo akɔna wahombaso nsala ntondo ka mbɔsa yɛdikɔ mɔtshi?

⁸ Sala eyangelo wa lotshimola. Kamba l’Ɔtɛkɛta wa Nzambi, adia ekanda watondja okongamelo wa Jehowa ndo sawola l’anto wayaɛkɛyɛ le wɔ. (Tok. 20:18) Eyangelo wa ngasɔ wekɔ ohomba ntondo ka mbɔsa yɛdikɔ ya ntshikitanya olimu, ya monɔ kana ya nsɔna nkalasa yahombayɛ mbɔtɔ yayokokimanyiya dia nsukɛ olimu ayɛ w’esambishelo.

9. Wahɔ akɔna wayotokondja naka tekɔ la losembwe le so shoamɛ?

⁹ Sɛdingola eyango ayɛ. Jehowa mbidjaka yimba lo eyango wele la so. (Tok. 16:2) Jehowa nangaka dia sho monga la losembwe l’akambo tshɛ. Diakɔ diele etena kɔsaso tɛdikɔ, sho lawɔ nangaka monga la losembwe le so shoamɛ ndo le anto akina lo kɛnɛ kendana l’eyango aso. Naka sho bu la losembwe tshɛ lo tshɛ, kete ondo tayonga l’okakatanu dia nkotsha tɛdikɔ taso. Ɛnyɛlɔ, ɔnangɛso ɔmɔtshi l’ɔlɔngɔlɔngɔ koka mbɔsa yɛdikɔ ya monga ombatshi mboka wa pondjo. Koko l’ɔkɔngɔ w’etena kɛmɔtshi, nde aya l’okakatanu dia nkotsha wenya walɔmbama ndo aya bu l’ɔngɛnɔngɛnɔ efula l’olimu ande. Ondo nde akafɔnyaka dia oyango ande wa ntondo wa monga ombatshi mboka aki wa ngɛnyangɛnya Jehowa. Koko ondo ɔkɔkɔ wa mɛtɛ wakandɔshi  olimu w’ombatshi mboka aki dia ngɛnyangɛnya ambutshi ande kana onto okina.

10. Kakɔna kalɔmbama dia nsala etshikitanu?

¹⁰ Tɔsɛdingole ɛnyɛlɔ ka ombeki wa Bible wambɔsa yɛdikɔ dia ntshika nnɔ mfɔka. Oma l’etatelo, nde ambosala la wolo, ko ambotshika nnɔ mfɔka l’edja ka lomingu ɔtɔi kana mingu hiende, koko oma laasɔ nde ambotatɛ nnɔ mfɔka nto. Koko l’ekomelo, nde ambotondoya dia ntshika nnɔ mfɔka! Ngandji kokande Jehowa ndo nsaki kele la nde ka mbɔngɛnyangɛnya kambookimanyiya dia ntshika mbekelo kɛsɔ.​—Kɔl. 1:10; 3:23.

11. Lande na kahombayɛ ndjadjɛ eyango w’eshika?

¹¹ Yadjɛ eyango w’eshika. Lo yɛdikɔ yayoyoleka ndjadjɛ eyango w’eshika, ondo mbayoyoleka nshidiya kɛnɛ kakayatatɛ nsala. Ɛnyɛlɔ, ondo wɛ mbeyaka mbɔsa yɛdikɔ ya ndeka mbadiaka Bible mbala la mbala. Koko naka wɛ bu l’ekongelo ka shikaa lo yimba, kete ondo wɛ hokotsha oyango ayɛ. * Kana dikumanyi dia l’etshumanelo koka mbɔsa yɛdikɔ ya ndeka membola ɛkɔkɔ mbala la mbala, koko l’ɔkɔngɔ w’etena kɛmɔtshi, vɔ hawoyotetemala nkotsha yɛdikɔ shɔ. Dia vɔ ntondoya, vɔ pombaka ndjaoka ambola wele oko anɛ: “Onde sho mbeyaka anangɛso l’akadiyɛso wahombaso ndeka membola lo yoho ya laande? Onde takashikike etena shikaa ka mbaembola?”

12. Kakɔna kakoka monga ohomba dia sho nsala, ndo lande na?

¹² Ɛna akambo la sso di’ɔlɔlɔ. Ndooko onto l’atei aso lele la etena, diangɔ, kana wolo wa nsala kɛnɛ tshɛ kalangande dia nsala. Diakɔ diele, ɛna akambo la sso di’ɔlɔlɔ ndo onga l’ekanelo k’ɔlɔlɔ. Naka aya ohomba, kete ondo wɛ ayonga l’ohomba wa ntshikitanya yɛdikɔ mɔtshi yɛnayɛ dia wɛ bu l’akoka wa ndjikotsha. (Ond. 3:6) Tɔshi ɛnyɛlɔ dia wɛ ambonyomɔsɛdingola yɛdikɔ yakayɔshi, amboyitshikitanya oko wahombama ndo wɛ ambɛna dia wɛ koka ndjikotsha. Tɔsɛdingole wanya atanu wakoka kokimanyiya dia nshidiya kɛnɛ kakayatatɛ nsala.

13. Ngande wakokayɛ nkondja wolo wele la yɛ ohomba dia nkotsha yɛdikɔ yayɛ?

¹³ Lɔmba dia nkondja wolo wa nsala akambo. Nzambi koka kosha “wolo wa nsala akambo” ndo wa nkotsha yɛdikɔ yayɛ. (Flpɛ. 2:13) Diakɔ diele, lɔmba Jehowa dia nyuma kande k’ekila kosha wolo wele la yɛ ohomba. Oyadi wɛ ekɔ lo mɛna dia dɔmbɛlɔ diayɛ diatakadimɔma, tetemala nɔmba. Diakɔ diakate Yeso ate: “Nyotetemale nɔmba, ko wayonyosha [nyuma k’ekila].”​—Luka 11:9, 13.

14. Ngande wakoka tɔndɔ diele lo Tokedi 21:5 kokimanyiya dia nkotsha yɛdikɔ yayɛ?

¹⁴ Sala ekongelo. (Adia Tokedi 21:5.) Dia nshidiya dui tshɛ diakayatatɛ, wɛ pombaka nsala ekongelo. Oma laasɔ, wɛ pombaka nkamba olimu lo ndjela ekongelo kakɔ. Woho akɔ waamɛ mbele, etena kɔsayɛ yɛdikɔ, mfunda awui shikaa wahombayɛ ndjela dia nkotsha yɛdikɔ yakɔ. Kahanya elimu wa wolo lo tolimulimu ta totshitshɛ koka kokimanyiya dia ntetemala nkotsha yɛdikɔ yayɛ aha l’okakatanu. Pɔɔlɔ akakeketsha ase Kɔrɛtɔ dia mombaka yangɔ mɔtshi “lushi la ntondo la lo lomingu tshɛ” dia kimɔka woshasha lo dihole dia nkonga ndo ndjodja welo dia nkɔngɔla paka nde amboya. (1 Kɔr. 16:2) Kahanya elimu wa wolo lo tolimulimu ta totshitshɛ koka nto kokimanyiya diaha nkɔmɔ.

15. L’ɔkɔngɔ wa nsala ekongelo, kakɔna kakoka salema?

¹⁵ Ekongelo ka shikaa ka lofunda koka kokimanyiya dia nkotsha tɛdikɔ tayɛ. (1 Kɔr. 14:40) Ɛnyɛlɔ, olui wa dikumanyi nɔmbamaka  dia nsɔna ekumanyi kɛmɔtshi dia tafundaka yɛdikɔ tshɛ yambɔsa olui wa dikumanyi, mbidja ndo nkombo ya dikumanyi diahomba menda dikambo la dikambo ndo datɛ diahombawɔ nkomiya dikambo diakɔ. Dikumanyi diayela ɛlɔmbwɛlɔ ɛsɔ ndekaka monga l’akoka wa nkotsha tɛdikɔ tawɔ. (1 Kɔr. 9:26) Wɛ koka nsala woho akɔ waamɛ la akambo ayɛ hita. Ɛnyɛlɔ, wɛ koka nsala listɛ l’awui wayoyosalaka lushi tshɛ, ndo nkongɛ awui l’ɔnɔngɔ lo ndjela woho wakombolayɛ mbakotsha. Dui sɔ koka kokimanyiya aha tsho dia nshidiya kɛnɛ kakayatatɛ nsala, koko ndo dia nsala awui akina efula.

16. Kakɔna kalɔmbama dia nkotsha yɛdikɔ yayɛ, ndo ngande wasukɛ Rɔmɔ 12:11 dui sɔ?

¹⁶ Yaketembola. Nɔmbamaka mbidja welo dia ndjela ekongelo kayɛ ndo nshidiya kɛnɛ kakayatatɛ nsala. (Adia Rɔmɔ 12:11.) Pɔɔlɔ akatɛ Timɔte ɔnɛ “otetemale ndjasha” ndo ɔnɛ “otetemale” ndjalowanya dia monga ombetsha w’oshika. Dako sɔ mendanaka ndo la eyango ekina wa lo nyuma.​—1 Tim. 4:13, 16.

17. Ngande wakokaso nkamba la Ɛfɛsɔ 5:15, 16 dia nkotsha yɛdikɔ yaso?

¹⁷ Kamba la wenya ayɛ la lomba. (Adia Ɛfɛsɔ 5:15, 16.) Sɔna etena kɛmɔtshi dia nkotsha yɛdikɔ yayɛ ndo totshikitanyake etena kɛsɔ. Ewɔ dia nkonga etena ka kokele dia nsala akambo; ondo etena ka kokele hatoyala. (Ond. 11:4) Onga la shɛnɔdi diaha mbetawɔ dia awui wele bu ohomba efula kɔsɛ wenya ndo wolo wele la yɛ ohomba dia nsala awui woleki ohomba. (Flpɛ. 1:10) Naka kokaka, sɔna etena kahatoleka anto kofukutanya. Tɛ anto akina dia wɛ ekɔ l’ohomba w’etena ka ndjasha lo dui dimɔtshi. Dima telefɔnɛ ndo koyadia waa mesajɛ kana ndjɔtɔ lo réseaux sociaux l’ɔkɔngɔ. *

18-19. Kakɔna kakoka kokimanyiya diaha mpekɔ dia nkotsha yɛdikɔ ya dimɛna etena kahomanayɛ l’ekakatanu?

¹⁸ Dja yimba l’etombelo wayonga. Etombelo kana kɛnɛ kayosalema l’ɔkɔngɔ wa yɛdikɔ yayɛ kekɔ oko dihole dimɔtshi diatayatshu. Naka wɛ nangaka mɛtɛ nkoma lɛnɛ atayatshu, kete wɛ ayotetemala ntshɔ oyadi mboka kambodihama ndo wɛ pombaka mbeta lo mboka kekina. Woho akɔ waamɛ mbele, naka sho mbidja yimba lo etombelo wayonga la tɛdikɔ taso, kete hatotohekɔ esadi eto etena kayotohomana l’ekakatanu.​—Ngal. 6:9.

¹⁹ Mbɔsa tɛdikɔ t’amɛna ekɔ wolo, ndo tikotsha koka monga okakatanu. Koko l’ekimanyielo ka Jehowa, wɛ koka nkondja lomba ndo wolo wele la yɛ ohomba dia nshidiya kɛnɛ kakayatatɛ nsala.