1-2. Lo ndjela 1 Petero 4:7, 8, kakɔna kayotokimanyiya dia ndɔshana l’ekakatanu?

OKO wambotoleka nyɔngɔmɛ lo “nshi y’ekomelo,” sho mbeyaka mpomana l’ekakatanu wa wolo. (2 Tim. 3:1) Ɛnyɛlɔ, l’ɔkɔngɔ wa vɔtɛ yakasalema lo wodja ɔmɔtshi wa l’Afrikɛ wa lo owɛstɛ, ata wakayɔlɔma efula. L’edja kolekanyi ngɔndɔ shamalo, anangɛso ndo akadiyɛso kokoka mbeteta aha l’okakatanu nɛ dia waki l’ɛtshi ka nkɛtɛ kakalɔmaka ata. Kakɔna kakaakimanyiya dia ndɔshana l’ekakatanu ɛsɔ? Amɔtshi wakatodjasɛ lo mvudu y’anangɛso wakadjasɛka l’ɛtshi ka nkɛtɛ kaki wɔladi. Ɔnangɛso ɔmɔtshi mbutaka ate: “L’etena kɛsɔ, lakangɛnangɛna monga l’angɛnyi lalemi. Taki l’akoka wa keketshana lam’asaso.”

² Etena kayotatɛ “mfɔnu ka woke,” tayɔngɛnangɛna monga l’angɛnyi w’eshika watoka ngandji. (Ɛny. 7:14) Diakɔ diele ekɔ dui dia wanyandja dia nkeketsha lɔngɛnyi laso oma ko kakianɛ. (Adia 1 Petero 4:7, 8.) Tayokondja wetshelo efula oma l’awui wakahomana la Jɛrɛmiya, lele angɛnyi ande wakokimanyiya dia mpandɔ la ntondo ka Jɛrusalɛma ndanyema. * Ngande wakokaso mbokoya Jɛrɛmiya?

3. a) Kakɔna kakakoke nkonya Jɛrɛmiya dia ndjaanganya l’anto? b) Kakɔna kakatɛ Jɛrɛmiya sekeletɛlɛ kande Baruka, ndo etombelo akɔna waki la dui sɔ?

³ L’edja kolekanyi ɛnɔnyi 40, Jɛrɛmiya akasɛnaka l’atei w’anto waki komonga la kɔlamelo, mbidja ndo asukanyi, ondo ndo ewotɔ ande ɛmɔtshi w’oma l’osomba wakandotɔ wa Anatɔta. (Jɛr. 11:21; 12:6) Koko, nde kondjaanganya l’anto. Nde akakɛnɛmɔlɛ Baruka sekeletɛlɛ kande ka kɔlamelo tokanyi tande, ndo sho mbeyaka woho wakandayaoke nɛ dia awui asɔ wakafundama. (Jɛr. 8:21; 9:1; 20:14-18; 45:1) Lo menda akambo wele l’ɔkɔndɔ wa Jɛrɛmiya wakafunde Baruka, sho koka  mbuta dia vɔ ahende wakokanaka ngandji k’efula ndo wakalɛmiyanaka.​—Jɛr. 20:1, 2; 26:7-11.

4. Kakɔna kakalɔmbɛ Jehowa Jɛrɛmiya dia nsala, ndo ngande wakakeketsha ɔkɛndɛ ɔsɔ lɔngɛnyi la lam’asa Jɛrɛmiya la Baruka?

⁴ L’edja k’ɛnɔnyi efula, la dihonga tshɛ Jɛrɛmiya akewoyaka ase Isariyɛlɛ akambo waki suke la salema la Jɛrusalɛma. (Jɛr. 25:3) Mbala kekina kakandakeketsha anto dia ndjatshumoya, Jehowa akalɔmbɛ Jɛrɛmiya dia mfunda ɛhɛmwɛlɔ Ande lo wɔɔmbɔ. (Jɛr. 36:1-4) Lam’ele Jɛrɛmiya la Baruka wakakambaka kaamɛ dia nkotsha ɔkɛndɛ wakawasha Nzambi ɔsɔ, ondo wakasalema l’edja ka ngɔndɔ efula, aha la taamu asawo wakawasawolaka wakakeketshaka mbetawɔ yawɔ.

5. Ngande wakɛnya Baruka dia nde aki ɔngɛnyi w’oshika le Jɛrɛmiya?

⁵ Lam’akakoke etena k’awui wa lo wɔɔmbɔ mbeyama, Jɛrɛmiya akahombe ndjaɛkɛ le ɔngɛnyi ande Baruka dia mbewoya losango lɔsɔ. (Jɛr. 36:5, 6) La dihonga tshɛ, Baruka akakotsha ɔkɛndɛ ande wa waale ɔsɔ. Onde wɛ koka nkanyiya ofunu wakahombe monga la Jɛrɛmiya etena kakatshu Baruka lo sɛkɛ dia tɛmpɛlɔ ndo kakandasale kɛnɛ kakawɔlɔmbɛ dia nsala? (Jɛr. 36:8-10) Ewandji w’ase Juda wakoke kɛnɛ kakasale Baruka ndo wakawodjangɛ dia nde mbawadiɛ wɔɔmbɔ la dui dia wolo! (Jɛr. 36:14, 15) Ewandji wakɔshi yɛdikɔ ya totɛ nkumekanga Jɛhɔyakima awui wakate Jɛrɛmiya. La ngandji tshɛ, vɔ wakatɛ Baruka ɔnɛ: “Tshɔka, toyashɛ wɛ la Jɛrɛmiya, ndo aha ndooko onto mbeya lɛnɛ enyu.” (Jɛr. 36:16-19) Ɔsɔ aki mɛtɛ dako dia dimɛna!

6. Kakɔna kakasale Jɛrɛmiya la Baruka etena kakiwɔ l’ɔlɔshamelo?

⁶ Nkumekanga Jɛhɔyakima akoke kɛlɛ efula etena kakandoke ɛtɛkɛta wakafunde Jɛrɛmiya, ko nde akatshumbe wɔɔmbɔ akɔ  ndo akadjanga dia minda Jɛrɛmiya la Baruka. Koko, Jɛrɛmiya komboka wɔma. Nde akɔshi wɔɔmbɔ okina, akasha Baruka ndo etena kakawokaka Jɛrɛmiya losango l’oma le Jehowa, Baruka akafunde “ɛtɛkɛta tshɛ . . . waki lo wɔɔmbɔ wakatshumbe Jɛhɔyakima nkumekanga ka Juda lo dja.”​—Jɛr. 36:26-28, 32.

7. Kakɔna ondo kakayala etena kakakambaka Jɛrɛmiya la Baruka kaamɛ?

⁷ Mbala efula anto wakikɛ ehemba kaamɛ ndjongaka la dimama dia wolo. Diakɔ diele sho koka nkanyiya dia etena kakawakambaka kaamɛ dia mpɛnya wɔɔmbɔ wakalanya nkumekanga Jɛhɔyakima, Jɛrɛmiya la Baruka, onto l’onto akayoleka mbeya wonyande dimɛna ndo wakayoyala angɛnyi wa ma ma. Wahɔ akɔna wakokaso nkondja oma l’ɛnyɛlɔ kakatotshikɛ apami ahende wa kɔlamelo asɔ?

8. Awui akɔna wakoka toshimba dia monga l’angɛnyi w’eshika, ndo lande na kahatahombe mpekɔ?

⁸ Koka monga dui dia wolo le so dia diholɛ anto etema naka onto ɔmɔtshi akatonyangiya lo nshi yakete. (Tok. 18:19, 24) Kana sho mbeyaka mfɔnya dia sho bu l’etena ndo la wolo dia monga la lɔngɛnyi la ma ma. Koko, hatohombe mpekɔ. Naka sho kombolaka dia anangɛso monga suke la so etena kayotohomana l’ehemba, kete sho pombaka nsala la wolo dia ndjaɛkɛ le wɔ oma ko kakianɛ lo mbatɛka tokanyi ndo nsaki yaso. Ɔsɔ ekɔ nna di’ohomba dia monga angɛnyi w’eshika.​—1 Pe. 1:22.

9. a) Ngande wakɛnya Yeso dia nde ndjaɛkɛka le angɛnyi ande? b) Ngande wakoka sawo dia dimɛna kokimanyiya dia nkeketsha lɔngɛnyi layɛ l’anto akina? Sha ɛnyɛlɔ.

⁹ Yeso akɛnya dia nde ndjaɛkɛka le angɛnyi ande lo sawolaka la wɔ awui hwe hwe. (Jni. 15:15) Sho koka mbookoya lo mbutɛka asekaso awui watɔngɛnyangɛnya, watokiyanya ndo watonyangiya. Naka wɛ pokamɛka la yambalo tshɛ etena kasawolayɛ l’onto ɔmɔtshi, kete wɛ mbeyaka mbishola dia wɛ ekɔ la tokanyi, nsaki ndo eyango efula waamɛ la nde. Tɔsɛdingole ɛnyɛlɔ ka kadiyɛso Cindy kele l’ɛnɔnyi 20 l’ɛmɔtshi. Nde akɔtɔ ɔngɛnyi la Marie-Louise, ombatshi mboka wele l’ɛnɔnyi 60 l’ɛmɔtshi. Cindy la Marie-Louise wakasambishaka kaamɛ la pindju ka Lushi la nɛi tshɛ, ndo wakasawolaka hwe hwe awui wotshikitanyi. Cindy mbutaka ate: “Dimi ngɛnangɛnaka nsawola l’angɛnyi ami akambo w’ohomba, ndo dui sɔ kimanyiyakami dia mbaeya ndo nshihodia dimɛna kɛnɛ katawɔ.” Sawo dia dimɛna kimanyiyaka dia lɔngɛnyi nkeketala. L’ɛnyɛlɔ ka Cindy, naka wɛ ntakola nna dia sawolaka  l’anto akina dimɛna ndo la waasaso, kete ondo diɔtɔnganelo diayɛ la wɔ diayokeketala.​—Tok. 27:9.

10. Lo ndjela Tokedi 27:17, etombelo akɔna wakoka monga etena kakambaso kaamɛ l’asekaso ambetawudi?

¹⁰ Oko wakidiɔ lo dikambo dia Jɛrɛmiya la Baruka mbele, naka sho nkamba kaamɛ l’asekaso ambetawudi ndo mbika washo lo waonga awɔ w’amɛna, kete tayeka awui efula oma le wɔ ndo tayoyasukanya la wɔ. (Adia Tokedi 27:17.) Ɛnyɛlɔ, ngande watoyoyaokaka etena keyɛ l’esambishelo wɛ l’osekayɛ ndo kokayɛ woho waamɛnde mbetawɔ kande la dihonga tshɛ kana katɛkɛtande l’eshikikelo tshɛ akambo wendana la Jehowa ndo la sangwelo diande? Ondo wɛ tolekaka ndjaoka suke la nde.

11-12. Sha ɛnyɛlɔ kɛnya woho wele nsambisha kaamɛ koka tokimanyiya dia nkeketsha lɔngɛnyi laso.

¹¹ Tɔsɛdingole bɛnyɛlɔ pende diɛnya woho wele nkamba kaamɛ l’esambishelo konyaka di’anto monga kaamɛ. Adeline, kadiyɛso kele l’ɛnɔnyi 23 akalɔmbɛ ɔngɛnyi ande Candice dia vɔ tosambisha l’ɛtshi ka nkɛtɛ kahaleke sambishama. Nde mbutaka ate: “Takalangaka nsambisha l’ohetoheto w’efula ndo takangɛnangɛnaka esambishelo efula. Sho akɔ ahende taki l’ohomba w’ekeketshelo ka lo nyuma.” Wahɔ akɔna wakawakondja lo nkamba kaamɛ? Adeline mbutaka ate: “L’ekomelo ka lushi tshɛ, takasawolaka woho wakatayaokaka, awui wakatokeketshaka lo asawo wakatasawolaka ndo woho wakatɛnaka ɛlɔmbwɛlɔ ka Jehowa l’esambishelo. Takangɛnangɛnaka sho akɔ ahende asawo asɔ ndo onto l’onto akaleke mbeya osekande dimɛna.”

¹² Laïla nde la Marianne, akadiyɛso ahende w’enyemba w’oma la France, wakatshu tosambisha mingu tshanu la Bangui, kapitalɛ ka République centrafricaine kele l’anto efula. Laïla mbohɔka ate: “Dimi la Marianne takahomana l’ekakatanu, koko diɛsɛ la sawo dia dimɛna ndo ngandji ka mɛtɛ, lɔngɛnyi laso lakaleke nkeketala. Akoka wa Marianne wa ndjaekesanyiya esadi l’awui w’eyoyo, ngandji  kande otsha le anto wa lo ngelo ndo ohetoheto ande l’esambishelo, akakonya dia dimi ndeka mbɔlɛmiya.” Halɔmbama paka wɛ konwe lo wodja okina ko wɛ nkondja ɛtshɔkɔ ɛsɔ. Etena tshɛ kasambishayɛ l’ɛtshi kayɛ ka nkɛtɛ l’ɔnangɛso kana kadiyɛso kɛmɔtshi, wɛ ekɔ la diaaso dia mbeeya dimɛna ndo ndeka nkeketsha lɔngɛnyi lanyu.

13. Okakatanu akɔna wakoka mpomana laso etena kakambaso kaamɛ l’angɛnyi aso?

¹³ Tena dimɔtshi, etena kakambaso kaamɛ l’angɛnyi aso, sho mbisholaka waonga awɔ w’amɛna ndo wɛɔdu awɔ. Kakɔna kakoka tokimanyiya dia ndjasukanya l’anangɛso kaanga mbewɔ la wɛɔdu ɛsɔ? Tɔsɛdingole nto ɛnyɛlɔ ka Jɛrɛmiya. Kakɔna kakokimanyiya dia mbidja yimba lo waonga w’amɛna w’anto akina ndo minya yimba lo wandja awɔ?

14. Wetshelo akɔna wakakondja Jɛrɛmiya lo dikambo dia Jehowa, ndo ngande wakookimanyiya dui sɔ?

¹⁴ Jɛrɛmiya mbakafunde dibuku dielamɛ lo lokombo lande, ndo ondo nde mbakafunde ndo abuku wa lo Bible wa Nkumi ya dikanga ka ntondo ndo ka hende. Aha la taamu, ɔkɛndɛ ɔsɔ wakokimanyiya dia mɛna lo yoho ya laande woho wakɛnɛmɔlɛ Jehowa anto wele keema kokele kɛtshi. Ɛnyɛlɔ, nde akeye dia etena kakayatshumoya nkumekanga Ahaba oma l’etsha ande wa kɔlɔ, Jehowa akawotsha ndo nde kɔmɛna elanyelo ka nkumbo kande k’otondo l’edja tshɛ kakinde la lɔsɛnɔ. (1 Ku. 21:27-29) Woho akɔ waamɛ mbele, Jɛrɛmiya akeyaka dia Manase akasale akambo efula wa kɔlɔ wakanyangiya Jehowa oleki Ahaba. Kaanga mbakidiɔ ngasɔ, Jehowa akadimanyiya Manase nɛ dia nde akayatshumoya. (2 Ku. 21:16, 17; 2 Ɛk. 33:10-13) Ɛkɔndɔ ɛsɔ wakahombe nkimanyiya Jɛrɛmiya dia mbokoya solo dia lotutsha ndo kɛtshi ka Nzambi etena kakandasalɛka angɛnyi ande akambo.​—Os. 103:8, 9.

15. Ngande wakokoya Jɛrɛmiya solo dia lotutsha dia Jehowa etena kakekola Baruka yimba?

¹⁵ Tɔsɛdingole woho wakakimanyiya Jɛrɛmiya Baruka etena kakandayekola yimba lo tshanda mɔtshi l’ɔkɛndɛ ande. Lo dihole dia nde mpekɔ ɔngɛnyi ande esadi eto, Jɛrɛmiya akakimanyiya Baruka lo mbotɛ losango la dimɛna l’oma le Nzambi koko aha la mutshamutsha onyɔ. (Jɛr. 45:1-5) Wetshelo akɔna wakokaso nkondja oma l’ɔkɔndɔ ɔsɔ?

16. Lo ndjela Tokedi 17:9, kakɔna kahombaso nsala dia nama lɔngɛnyi laso?

¹⁶ Lo mɛtɛ, hatokoke nongamɛ dia anangɛso l’akadiyɛso monga kokele. Diakɔ diele, etena kongaso la lɔngɛnyi la ma ma la wɔ, sho pombaka nsala la wolo dia nama lɔngɛnyi laso. Naka angɛnyi aso wambosala munga, kete ondo sho pombaka mbasha alako wohikami l’Ɔtɛkɛta wa Nzambi lo yoho ya dimɛna koko aha la mutshamutsha onyɔ. (Os. 141:5) Ndo naka wambotonyangiya, sho pombaka mbadimanyiya. Naka tambadimanyiya, kete hatohombe mbaohola awui wakawatosalɛ kana mbutɛ anto akina. (Adia Tokedi 17:9.) Ekɔ dui di’ohomba efula lo nshi ya paa nyɛ dia sho mbika washo lo waonga w’amɛna w’anangɛso l’akadiyɛso koko aha lo wɛɔdu awɔ! Nsala ngasɔ ayokeketsha dimama diasaso la wɔ, nɛ dia tayonga l’ohomba w’angɛnyi wa ma ma lo mfɔnu ka woke.

17. Ngande wakɛnya Jɛrɛmiya dia nde aki ɔngɛnyi w’oshika lo tena dia paa?

¹⁷ Omvutshi Jɛrɛmiya akɛnya dia nde aki ɔngɛnyi w’oshika lo tena dia paa. Ɛnyɛlɔ, l’ɔkɔngɔ wa Ɛbɛdɛ-Mɛlɛkɛ laki ɔnɛnɛ wa laka nkumekanga shimbɛ Jɛrɛmiya oma lo nyɔi lo  mbotondja oma lo difuku diakalole la lɔtɛkɛ, Ɛbɛdɛ-Mɛlɛkɛ aki la wɔma ɔnɛ ewandji wayowosalɛ kɔlɔ. Etena kakayeya Jɛrɛmiya dui sɔ, nde kɔmbɔlama ki lo nongamɛ ɔnɛ ɔngɛnyi ande ayokandola dui sɔ ndamɛ lo yoho mɔtshi. Kaanga mbaki Jɛrɛmiya lo lokanu, nde akasale kɛnɛ kakandakoke nsala lo mbitɛ Ɛbɛdɛ-Mɛlɛkɛ ɔngɛnyi ande daka dia Jehowa diakeketsha.​—Jɛr. 38:7-13; 39:15-18.

18. Lo ndjela Tokedi 17:17, kakɔna kakokaso nsala etena kadiɛnɛ ɔngɛnyi aso ɔmɔtshi l’ekakatanu?

¹⁸ Ɛlɔ kɛnɛ, anangɛso l’akadiyɛso wekɔ lo mpomana l’ekakatanu wotshikitanyi. Ɛnyɛlɔ, amɔtshi wekɔ lo diɛnɛ la mpokoso y’oma lo diangɔ diakatongama kana oma lo kɛnɛ kasala anto. Naka awui wa ngasɔ wambotomba, kete anto amɔtshi wa l’atei aso koka monga l’akoka wa pangiya angɛnyi asɔ lawakawɔ. Akina mbeyaka monga l’akoka wa nkimanyiya lo nkimɔ falanga. Koko sho tshɛ koka nɔmba Jehowa dia nde nkimanyiya anangɛso l’akadiyɛso. Etena kokaso dia ɔnangɛso kana kadiyɛso kɛmɔtshi ekɔ l’ɔkɔmwɛlɔ, sho mbeyaka mpomba ɛtɛkɛta wa mbotɛ kana kɛnɛ ka nsala. Koko ekɔ awui efula wakokaso sho tshɛ nsala. Ɛnyɛlɔ, sho koka ntshungola etena ka mbetsha kaamɛ l’ɔngɛnyi aso. Sho koka mbohokamɛ la kɛtshi tshɛ etena katɛkɛtande. Ndo sho koka nkahana la nde divɛsa di’ekeketshelo dialekaso nanga. (Isa. 50:4) Kɛnɛ koleki ohomba ele monga kaamɛ l’angɛnyi ayɛ etena kewɔ l’ohomba ayɛ.​—Adia Tokedi 17:17.

19. Lande na kele nkeketsha lɔngɛnyi laso oma ko kakianɛ ayotokimanyiya lo nshi yayaye?

¹⁹ Sho pombaka ndjashikikɛ oma ko kakianɛ dia mbɔtɔ lɔngɛnyi l’anangɛso l’akadiyɛso ndo likeketsha. Lande na? Nɛ dia atunyi aso wayosala la wolo dia tokakitola lo tshimbo y’awui wa kashi. Vɔ wayosala la wolo dia tokonya diaha sho ndjaɛkɛ ndo nsukɛ anangɛso. Koko welo awɔ wayokita tatala. Vɔ hawotonga l’akoka wa mpembola dimama diaso dia ngandji. Ndooko dui diayowosala diayolanya lɔngɛnyi la lam’asaso. Lo mɛtɛ, lɔngɛnyi laso lɔsɔ layotetemalaka aha tsho polo l’ekomelo ka dikongɛ nɛ, koko pondjo pondjo!