1-2. a) Kakɔna katokimanyiya dia mbikikɛ ekakatanu wa lushi la lushi? Lembetshiya. b) Kakɔna kayotɔsɛdingola lo sawo nɛ?

“ETENA kakanyiyami dia ehemba wakahomana lami, dimi mbeyaka diaha la wolo ami hita mbakamakikɛ.” Onde wɛ atataka ɛtɛkɛta wele oko ɛsɔ? Efula ka l’atei aso mbutaka ɛtɛkɛta wele oko ɛsɔ. Ondo wɛ akate ngasɔ l’ɔkɔngɔ wa wɛ nkanyiya woho wakayonge l’akoka wa mbikikɛ hemɔ kɛmɔtshi ka wolo kana nyɔi ka lakiyɛ ɔmɔtshi la ngandji. Etena kakaloyayɛ washo l’ɔkɔngɔ, wɛ ndjaokaka dia wɛ akonge l’akoka wa mbikikɛ paka nɛ dia nyuma k’ekila ka Jehowa kakakosha “wolo woleki wɔnɛ wokongaka l’onto.”​—2 Kɔr. 4:7-9.

² Sho lawɔ ndjaɛkɛka lo nyuma k’ekila dia ndɔshana la shɛngiya y’andja ɔnɛ wa kɔlɔ. (1 Jni. 5:19) Laadiko dia laasɔ, sho pombaka ndɔshana la “ɛdiɛngɛ.” (Ɛf. 6:12) L’awui asɔ tshɛ lo yimba, tayanga nsɛdingola toho tohende tatokimanyiya nyuma k’ekila. Oma laasɔ, tayɛna kɛnɛ kakokaso nsala dia nkondja wahɔ tshɛ lo tshɛ oma le nyuma k’ekila.

3. Naa yoho mɔtshi yatokimanyiya Jehowa dia mbikikɛ ehemba?

³ Nyuma k’ekila ka Jehowa tokimanyiyaka lo tosha wolo kana lokalo la nkotsha ɛkɛndɛ aso kaanga l’atei w’ekakatanu. Ɔpɔstɔlɔ Pɔɔlɔ akokaka dia nde aki l’akoka wa ntetemala nkamba olimu ande kaanga l’atei w’ekakatanu nɛ dia nde akayaɛkɛka lo “wolo wa Kristo.” (2 Kɔr. 12:9) Lo lɔkɛndɔ lande la hende la misiɔnɛrɛ, Pɔɔlɔ kokamba tsho olimu w’esambishelo efula koko nde akakambe nto olimu dia nkondja falanga dia nkotsha ehomba ande. Nde akadjasɛ la Kɔrɛtɔ laka Akula la Piriskila. Vɔ wakasalaka mvudu y’apɛma. Lam’ele Pɔɔlɔ akakambaka olimu akɔ waamɛ, nde akakambaka kaamɛ la wɔ nshi mɔtshi. (Ets. 18:1-4) Nyuma k’ekila mbakasha Pɔɔlɔ wolo dia nkamba olimu ande wa lo demba ndo dia nkotsha olimu ande wa lo nyuma.

4. Lo ndjela 2 Kɔrɛtɔ 12:7b-9, okakatanu akɔna waki la Pɔɔlɔ?

 ⁴ Adia 2 Kɔrɛtɔ 12:7b-9. Lo avɛsa anɛ, kakɔna kakalange Pɔɔlɔ mbuta etena kakandate dia nde ekɔ lo ndɔshana la “tɛndɛ lo demba”? Naka wɛ ambokama tɛndɛ lo demba, kete wɛ ayonga la paa k’efula. Mbokɛmaka dia Pɔɔlɔ akataka dia nde aki l’ohemba ɔmɔtshi wakawoshaka paa efula. Nde akelɛ ohemba akɔ ɔnɛ “ondjelo wa Satana” wakatetemalaka ‘mbɔhɛnyahɛnya’ (‘mbɔkɔmɔla,’ nɔtɛ). Ondo ehemba wa Pɔɔlɔ koondja mbala kakɔ ɔtɔi oma le Satana kana ɛdiɛngɛ ande, wate kana oko wakawokaka tɛndɛ lo demba. Koko etena kakɛnyi nyuma ya kɔlɔ shɔ “tɛndɛ” diakɔ, ondo vɔ wakalomɔlomɔka dia dikɔkɔmɛ, mbuta ate dia ndeka mfudia paa ka Pɔɔlɔ. Kakɔna kakasale Pɔɔlɔ?

5. Ngande wakakadimola Jehowa alɔmbɛlɔ wa Pɔɔlɔ?

⁵ Oma l’etatelo, Pɔɔlɔ akalangaka dia vɔ mbokola “tɛndɛ” sɔ. Nde akate ate: “Dimi lakasɛngasɛnga Nkumadiɔndjɔ [Jehowa] mbala 3 y’etondo . . . dia tɛndɛ sɔ mbikɔmi.” Koko, kaanga mbakalɔmbɛ Pɔɔlɔ mbala efula, tɛndɛ diande kombikɔ. Onde dui sɔ nangaka mɛnya dia Jehowa kokadimola alɔmbɛlɔ wa Pɔɔlɔ? Ndooko. Nde akakadimola alɔmbɛlɔ ande. Jehowa kominya okakatanu ɔsɔ, koko akasha Pɔɔlɔ wolo wa mbikikɛ. Jehowa akawotɛ ate: “Wolo ami wekɔ lo nkoma kokele lo wɔdu.” (2 Kɔr. 12:8, 9) Ndo l’ekimanyielo ka Nzambi, Pɔɔlɔ aki l’akoka wa nama ɔngɛnɔngɛnɔ ndo wɔladi ande wa l’etei k’otema!​—Flpɛ. 4:4-7.

6. a) Ngande wakoka Jehowa nkadimola alɔmbɛlɔ aso? b) Eshikikelo kakɔna kele lo avɛsa woshilami kakosha wolo?

⁶ L’ɛnyɛlɔ ka Pɔɔlɔ, onde wɛ ambɔsɛngasɛngaka Jehowa dia konyɛ ohemba ɔmɔtshi? Ko naka kaanga mbakayɔsɛngasɛnga l’otema ɔtɔi ko okakatanu akɔ koshila kana wakaleke monga wolo, onde wɛ akayakiyanya ɔnɛ ondo Jehowa hayokɔngɛnangɛna? Naka ngasɔ, ohɔ ɛnyɛlɔ ka Pɔɔlɔ. Oko wakakadimola Jehowa alɔmbɛlɔ ande, ndooko onyake Nde ayokadimola alɔmbɛlɔ ayɛ! Ondo Jehowa hatokonyɛ okakatanu akɔ. Koko l’ekimanyielo ka nyuma k’ekila, nde ayokosha wolo weyɛ l’ohomba dia mbikikɛ ohemba akɔ. (Os. 61:3, 4) Ondo wɛ koka “kɔshama la nkɛtɛ,” koko Jehowa hokokalɛ.​—2 Kɔr. 4:8, 9; Flpɛ. 4:13.

7-8. a) Lo yoho yakɔna yele nyuma k’ekila oko lɔpɛpɛ? b) Ngande wakalembetshiya Petero woho wakamba nyuma k’ekila?

⁷ Naa yoho kina yatokimanyiya nyuma k’ekila? L’ɛnyɛlɔ ka lɔpɛpɛ la dimɛna lo ndjale kambɔmbɔ, mbele ndo nyuma k’ekila tokimanyiyaka dia ntetemala kambɛ Jehowa oyadi ehemba akɔna wa wolo wele oko lɔpɛpɛ polo lam’ayotɔtɔ l’andja w’oyoyo wakalake Nzambi.

⁸ Oko wakinde omundji wa nse, ɔpɔstɔlɔ Petero akeyaka awui efula wendana la ɔkɛndjɛkɛndjɛlɔ wa masuwa. Mbokɛmaka lande na kakandalembetshiya woho wakamba nyuma k’ekila lo nkamba l’etelo kɔtɔnɛ la ɔkɛndjɛkɛndjɛlɔ wa masuwa. Nde akafunde ate: “Prɔfɛsiya kombishama oma lo lolango l’onto, koko anto wakate akambo w’oma le Nzambi nɛ dia wakasokoyama oma le nyuma k’ekila.” Tshɛkɛta ya lo Grɛkɛ yokadimɔmi ɔnɛ “wakasokoyama” nembetshiyaka tshɛkɛta lo tshɛkɛta “wakɛmbama kaamɛ la.”​—2 Pe. 1:21; nɔtɛ.

9. Naa etelo ka didjidji kakakambe la Petero dia mbɔtɔnganyiya la etelo k’ɔnɛ “wakɛmbama kaamɛ la”?

⁹ Naa etelo ka didjidji kakakambe la Petero dia mbɔtɔnganyiya la etelo k’ɔnɛ “wakɛmbama kaamɛ la”? Luka ofundji wa dibuku dia Etsha akakambe la etelo ka lo Grɛkɛ ka woho akɔ waamɛ, dia ntɛkɛta dikambo dia masuwa ‘wɛmbama la’ lɔpɛpɛ. (Ets. 27:15) Nomb’ewo kɛmɔtshi k’awui wa lo Bible akate dia etena kakafunde Petero dia afundji wa Bible “wakɛmbama kaamɛ la,” nde akakambe la “wɛdikelo wa dimɛna efula wendana l’awui wa l’ashi.” Lo  mɛtɛ, Petero akalange mbuta ɔnɛ, oko watɛmbamaka masuwa la lɔpɛpɛ lɛnɛ alangalɔ dia nkoma lɛnɛ atawatshu, mbele ndo amvutshi la afundji wa Bible wakɛmbama lɛnɛ akalange nyuma k’ekila dia nkotsha ɔkɛndɛ awɔ. Nomb’ewo kakɔ kaamɛ akate ate: “Aki oko amvutshi wakɔmbɔla apɛma awɔ wa masuwa.” Jehowa akakotsha ɔkɛndɛ ande. Nde akawasha “lɔpɛpɛ,” mbuta ate nyuma k’ekila. Afundji wa Bible wakakambe olimu awɔ. Vɔ wakayele ɛlɔmbwɛlɔ ka nyuma kɛsɔ.

10-11. Wanya akɔna ahende wahombaso ntakola dia ndjashikikɛ ɔnɛ tekɔ lo nɔmbwama la nyuma k’ekila? Sha ɛnyɛlɔ.

¹⁰ Lo mɛtɛ, ɛlɔ kɛnɛ Jehowa hayokamba la nyuma kande dia mbisha anto akoka wa mfunda abuku wa lo Bible. Koko nyuma k’ekila kekɔ lo ntetemala mbisha ekambi wa Nzambi wolo. Jehowa ekɔ lo ntetemala nsala kɛnɛ kahombande nsala. Ngande wakokaso nkondja wahɔ oma le nyuma k’ekila ka Nzambi? Sho pombaka ndjashikikɛ dia tekɔ lo nsala kɛnɛ kahombaso nsala. Ngande wasalaso dui sɔ?

¹¹ Tokane yimba la wɛdikelo ɔnɛ. Dia nkondja wahɔ oma lo lɔpɛpɛ, ɔkɛndjikɛndji wa masuwa pombaka nsala awui ahende. Dui dia ntondo, nde pombaka ntɔla masuwa otsha lɛnɛ apɛpa lɔpɛpɛ. Oma laasɔ, masuwa ande hawototshɔ otsha la ntondo naka ɔkɛndjikɛndji wa masuwa ntshikala l’omamu mangana etale la lɛnɛ apɛpa lɔpɛpɛ. Dui dia hende, nde pombaka mbidiya ndo mɔmbɔla apɛma wa masuwa lo yoho yahombama. Kɛnɛ kele mɛtɛ ele, oyadi lɔpɛpɛ lekɔ lo mpɛpa, masuwa wayotshɔ otsha la ntondo paka naka lɔpɛpɛ lekɔ lo mbɔtɔ lo apɛma wa masuwa. Woho akɔ waamɛ mbele, tayonga l’akoka wa ntetemala kambɛ Jehowa paka naka nyuma k’ekila tokimanyiya. Dia nyuma tokimanyiya, sho pombaka ntakola wanya ahende. Nna dia ntondo, sho pombaka nsala elimu walɔmbɔla nyuma k’ekila ekambi wa Nzambi dia nsala. Nna dia hende, sho pombaka nsala elimu ɛsɔ lo ndjela akoka aso. (Os. 119:32) Naka sho ntakola wanya asɔ, kete nyuma k’ekila kayotokimanyiya dia ntenyanya asuku w’ɔlɔshamelo ndo ehemba ndo tɔ kayotokimanyiya  dia mbikikɛ la kɔlamelo tshɛ polo l’andja w’oyoyo wa Nzambi.

12. Kakɔna kayangaso nsɛdingola kakianɛ?

¹² La diko takasɛdingodi toho tohende tatokimanyiya nyuma k’ekila. Nyuma k’ekila toshaka wolo ndo tokimanyiyaka dia ntshikala la kɔlamelo etena kahomanaso l’ehemba. Ndo nto, nyuma k’ekila tɔlɔmbɔlaka ndo tokimanyiyaka dia ntshikala lo mboka ka lɔsɛnɔ la pondjo. Kakianɛ tayanga nsɛdingola awui anɛi wahombaso nsala dia nkondja wahɔ tshɛ lo tshɛ oma le nyuma k’ekila.

13. Lo ndjela 2 Timɔte 3:16, 17, kakɔna kakoka Afundelo tosalɛ, ko ahombaso nsala?

¹³ Ntondotondo, tekake Ɔtɛkɛta wa Nzambi. (Adia 2 Timɔte 3:16, 17.) Tshɛkɛta ya lo Grɛkɛ yakakadimɔma ɔnɛ “[a]kasambiyama oma le Nzambi” nembetshiyaka tshɛkɛta lo tshɛkɛta ɔnɛ “Nzambi akafufe loowe.” Nzambi akakambe la nyuma kande dia “mbidja” tokanyi tande lo timba ta afundji wa Bible. Etena kadiaso Bible ndo kakanaso yimba la kɛnɛ kadiaso, alako wa Nzambi mbɔtɔka lo yimba yaso ndo l’otema aso. Tokanyi takasambiyama tɔsɔ tokimanyiyaka dia mbɔtɔnganyiya lɔsɛnɔ laso la lolango la Nzambi. (Hɛb. 4:12) Koko dia nkondja wahɔ tshɛ lo tshɛ oma le nyuma k’ekila, sho pombaka ndjatshungwɛka etena ka mbekaka Bible mbala la mbala ndo kanaka yimba efula la kɛnɛ kadiaso. Oma laasɔ, Ɔtɛkɛka wa Nzambi wayonga la shɛngiya lo kɛnɛ tshɛ kataso ndo kasalaso.

14. a) Lande na kakokaso mbuta dia nsanganya yaso y’Akristo yekɔ dihole “diapɛpa lɔpɛpɛ”? b) Kakɔna kayotokimanyiya dia nkondja wahɔ tshɛ lo tshɛ oma le nyuma k’ekila lo nsanganya yaso?

¹⁴ Dui dia hende, tɔtɛmɔlake Nzambi kaamɛ. (Os. 22:22) Lo yoho mɔtshi, nsanganya yaso y’Akristo yekɔ dihole “diapɛpa lɔpɛpɛ.” Nyuma ka Jehowa mongaka lo nsanganya. (Ɛny. 2:29) Lande na kataso ngasɔ? Nɛ dia etena kasanganaso l’asekaso Akristo dia ntɛmɔla, sho nɔmbaka dia nkondja nyuma k’ekila, sho membaka esambo wa Diolelo wohikami l’Ɔtɛkɛta wa Nzambi, ndo sho pokamɛka alako w’oma lo Bible washama oma le anangɛso wakasɔnama l’ekimanyielo ka nyuma k’ekila. Ndo nyuma k’ekila kakɔ kaamɛ kimanyiyaka akadiyɛso dia nɔngɔsɔla ndo nkotsha ɛkɛndɛ awɔ. Dia nkondja wahɔ tshɛ lo tshɛ le nyuma k’ekila, sho pombaka nɔngɔsɔlaka nsanganya ndo mbishaka kɔmatɛrɛ. Lo nsala ngasɔ, tayokondja wahɔ lo nyuma k’ekila oko masuwa wele “l’apɛma wɔmbwami.”

15. Ngande watokimanyiya nyuma k’ekila l’esambishelo?

¹⁵ Dui dia sato, tosambishake. Etena kakambaso la Bible dia nsambisha ndo mbetsha anto, sho mbishaka nyuma k’ekila diaaso dia tokimanyiya. (Rɔmɔ 15:18, 19) Koko, dia nkondja wahɔ tshɛ lo tshɛ oma le nyuma k’ekila, wɛ pombaka sambishaka mbala la mbala ndo kambaka la Bible etena tshɛ kahombama. Yoho mɔtshi yakokaso ndeka sawolaka l’anto dimɛna l’esambishelo ele, nkamba la bɛnyɛlɔ di’asawo diele lo Dikatshi dia losanganya la Lɔsɛnɔ ndo olimu aso.

16. Naa yoho yoleki dimɛna yakokaso nkondja nyuma k’ekila mbala kakɔ ɔtɔi?

¹⁶ Dui dia nɛi, tɔlɔmbake Jehowa. (Mat. 7:7-11; Luka 11:13) Yoho yoleki dimɛna yakokaso nkondja nyuma k’ekila mbala kakɔ ɔtɔi ele, nɔmbaka Jehowa nyuma kakɔ. Ndooko kakoka nshimba dia alɔmbɛlɔ aso nkoma le Jehowa kana nshimba dia woshasha wa dimɛna wa nyuma ka Nzambi nkoma le so; oyadi mpele dia lokanu ndo kaanga Satana. (Jak. 1:17) Ngande wakokaso nɔmba dia nkondja wahɔ tshɛ lo tshɛ oma le nyuma k’ekila? Dia nkadimola, tende lo yoho ya lotshimola awui  wendana la dɔmbɛlɔ lo nsɛdingola ɛnyɛlɔ katanema paka lo Evanjiliɔ wa Luka. *

17. Wetshelo akɔna wendana la dɔmbɛlɔ wakondjaso oma lo ɛnyɛlɔ kakasha Yeso kele lo Luka 11:5-9, 13?

¹⁷ Adia Luka 11:5-9, 13. Ɛnyɛlɔ kakasha Yeso mɛnyaka woho wahombaso nɔmbaka dia nkondja nyuma k’ekila. L’ɛnyɛlɔ kɛsɔ, pami kakɔ akakondja kɛnɛ kaki lande ohomba “l’ɔtɛ wa wembiya ande w’efula.” Nde komboka wɔma dia nɔmba ɔngɛnyi ande ekimanyielo kaanga mbakinde otsho wa kati. (Luka 11:8) Ngande wakɔtɔnganyiya Yeso ɛnyɛlɔ kɛsɔ la dɔmbɛlɔ? Nde akate ate: “Nyotetemale nɔmba, ko wayonyosha; nyotetemale nyanga, ko nyayotana; ndo nyotetemale nkɔkɔla, ko wayonyodihola.” Ko, wetshelo akɔna wakondjaso? Dia nkondja ekimanyielo ka nyuma k’ekila, sho pombaka nɔmba l’etete dia kikondja.

18. Lo ndjela ɛnyɛlɔ kakasha Yeso, lande na kakokaso monga l’eshikikelo ɔnɛ Jehowa ayotosha nyuma kande k’ekila?

¹⁸ Ndo nto, ɛnyɛlɔ kakakambe la Yeso tokimanyiyaka dia mɛna lande na kayotosha Jehowa nyuma k’ekila. Pami ka l’ɛnyɛlɔ kɛsɔ akalange monga onto ɔlɔlɔ lalongola angɛndangɛnda. Nde akeye ɔnɛ nde ekɔ l’ɔkɛndɛ wa mbisha ɔngɛndangɛnda ande wakakome l’otsho wa kati mbo ya ndɛ koko nde komonga la ɛngɔ ka mbosha. Yeso akate dia osukanyi wa pami kɛsɔ akayodihola l’ɔtɛ wakatetemalaka pami kɛsɔ mbɔlɔmba mapa. Kakɔna kakalange Yeso teetsha? Naka onto lele keema kokele mbetawɔka nkimanyiya osukanyi ande wawembiya, kete sho koka ndeka monga l’eshikikelo dia Shɛso ka ngandji kele l’olongo ayokimanyiya wanɛ watetemala mbɔlɔmba nyuma kande! Ɔnkɔnɛ, sho koka monga l’eshikikelo ɔnɛ Jehowa ayokadimola alɔmbɛlɔ aso naka sho mbɔlɔmba nyuma k’ekila.​—Os. 10:17; 66:19.

19. Lande na kahombaso monga l’eshikikelo ɔnɛ tayodja otshumba?

¹⁹ Sho koka monga l’eshikikelo ɔnɛ kaanga mbatetemala Satana mbidja welo dia tɔlɛndja, tayodja otshumba. Lande na? Nɛ dia nyuma k’ekila tokimanyiyaka lo toho tohende. Ntondotondo, tɔ toshaka wolo weso l’ohomba dia mbikikɛ ekakatanu. Dui dia hende, tɔ kekɔ wolo watokimanyiya dia ntetemala kambɛ Jehowa polo ndo lam’ayotɔtɔ l’andja w’oyoyo. Nyɛsɔ toyashikikɛ dia nkondja wahɔ tshɛ lo tshɛ l’ekimanyielo ka nyuma k’ekila!