1-2. a) Lande na kahomba atshukanyi w’eyoyo ndjaɛkɛ le Jehowa? (Osambo 37:3, 4) b) Kakɔna kayotɔsɛdingola lo sawo nɛ?

ONDE wɛ ekɔ suke la tshukana kana eke ko ditshukanaka? Naka ngasɔ, kete aha la taamu wɛ nomɔlomɔka dia ngɛnangɛna la lɔsɛnɔ kaamɛ l’onto lalangayɛ efula. Koko, atshukanyi mongaka l’ekakatanu ɛmɔtshi ndo atshukanyi w’eyoyo wekɔ la tɛdikɔ t’ohomba takokawɔ mbɔsa. Kɛnɛ kasalanyu etena kahomananyu l’ekakatanu ndo tɛdikɔ tɔsanyu mbayoshikikɛ dia kana nyayonga l’ɔngɛnɔngɛnɔ nyu akɔ ahende l’edja k’ɛnɔnyi efula. Naka nyu ndjaɛkɛ le Jehowa, mbɔsa tɛdikɔ t’amɛna, kete diwala dianyu diayoleka nkeketala ndo nyayoleka monga l’ɔngɛnɔngɛnɔ. Naka hanyokambe l’alako wa Nzambi, kete ondo nyayohomana l’ekakatanu wa wolo lo diwala dianyu ndo hanyotonga l’ɔngɛnɔngɛnɔ.​—Adia Osambo 37:3, 4.

² Kaanga mbele sawo nɛ ndekaka mendana l’atshukanyi w’eyoyo, diɔ diekɔ lo mɛnya ekakatanu wakoka atshukanyi tshɛ mpomana la wɔ. Tayɔsɛdingola wetshelo wakokaso nkondja oma lo bɛnyɛlɔ diakatotshikɛ apami la wamato amɔtshi wa kɔlamelo watɛkɛtama lo Bible. Bɛnyɛlɔ dia lo Bible sɔ toshaka wetshelo wakokaso nkamba la wɔ lo awui efula wa lo lɔsɛnɔ, mbidja ndo lo diwala. Tayɔsɛdingola nto wetshelo wakokaso nkondja oma lo awui wakakomɛ atshukanyi amɔtshi wa nshi nyɛ.

3-4. Ekakatanu akɔna wakoka atshukanyi w’eyoyo mpomana la wɔ?

³ Anto amɔtshi koka ntshutshuya atshukanyi w’eyoyo dia  nsɛna lɔsɛnɔ lelɛwɔ ɔnɛ lɔsɛnɔ la dimɛna. Ɛnyɛlɔ, ambutshi ndo ewotɔ ekina koka nsɛngiya wadi l’omi dia ntatɛ mbota ana aha la ntshimbatshimba. Kana angɛnyi wele la tokanyi t’amɛna ndo ase nkumbo koka ntshutshuya atshukanyi w’eyoyo dia nsomba lokombo ndo ndodia luudu la lomombo.

⁴ Naka hawendji ɔlɔlɔ, kete wadi l’omi koka ndjɔsa tɛdikɔ tayowakonya dia mbɔtɔ abasa wa mamba. Oma laasɔ, ondo wadi l’omi wayotatɛ nkamba olimu l’edja ka wenya efula paka dia mfuta abasa asɔ. Vɔ koka nkamba olimu efula woho wele hawotoyonga l’etena ka nsala wekelo wa Bible w’onto ndamɛ, ɔtɛmwɛlɔ wa lo nkumbo ndo nsambisha. Wadi l’omi koka ndjotatɛ mbetsha nsanganya dia nkamba olimu polo wenya wa laadiko dia nkondja falanga efula kana diaha vɔ mbanya l’elimu awɔ. Etombelo wayonga ele, hawotonga la waaso wa mpamia olimu wa Jehowa.

5. Wetshelo akɔna wakondjayɛ oma l’ɛnyɛlɔ ka Klaus nde la Marisa?

⁵ Awui weta mɛnyaka dia naka sho ndjasha tshɛ dia nyanga lomombo, kete hatotonga l’ɔngɛnɔngɛnɔ. Tɔsɛdingole wetshelo wakakondja omi lelɛwɔ Klaus nde la wadɛnde Marisa lo dikambo sɔ. * L’etatelo ka diwala diawɔ, vɔ akɔ ahende wakakambaka olimu lushi l’otondo l’oyango wa vɔ nsɛna dimɛna. Koko, vɔ komonga l’ɔngɛnɔngɛnɔ. Klaus suyaka ate: “Taki la lomombo efula oleki ndo kɛnɛ kakiso l’ohomba, koko sho kodjadjɛka ndoko oyango wa lo nyuma. Lo mɛtɛ, taki l’ekakatanu efula ndo l’ekiyanu efula lo lɔsɛnɔ.” Ondo ndo wɛ la wɔ ambɛnaka dia ndjasha lo nyanga lomombo hela ɔngɛnɔngɛnɔ. Naka ngasɔ, kete tɔkɔmɔke. Sɛdingola bɛnyɛlɔ di’amɛna di’anto akina koka kokimanyiya lo dikambo sɔ. Ntondotondo, nyɛsɔ tɔsɛdingole wetshelo wakoka waomi nkondja oma l’ɛnyɛlɔ kakatshike nkumekanga Jɛhɔshafata.

6. Lo yoho yɔtɔnɛ la dako diele lo Tokedi 3:5, 6, ngande wakakandola nkumekanga Jɛhɔshafata okakatanu ɔmɔtshi wa wolo?

⁶ Waomi, onde nyu ndjakiyanyaka lo tena dimɔtshi l’ɔtɛ w’ɛkɛndɛ wele la nyu? Naka ngasɔ, kete nyu koka nkondja wahɔ oma l’ɛnyɛlɔ ka nkumekanga Jɛhɔshafata. Oko nkumekanga, Jɛhɔshafata aki l’ɔkɛndɛ wa nkokɛ wodja w’otondo! Kakɔna kakandasale dia nkotsha ɔkɛndɛ wa wolo ɔsɔ? Jɛhɔshafata akasale kɛnɛ kakandakoke nsala dia nkokɛ wanɛ waki l’ɛlɔmbwɛlɔ kande. Nde akadinge esomba wa Juda la mpele ndo akatshumanya asɔlayi wa wolo ndekana 1 160 000. (2 Ɛk. 17:12-19) L’ɔkɔngɔ diko, Jɛhɔshafata akahomana l’okakatanu ɔmɔtshi wa wolo. Lemba la woke l’asɔlayi w’ase Amɔna, ase Mɔaba ndo apami w’oma lo lɛkɛ l’akona wa Seirɛ wakawaanɛ nde la nkumbo kande ndo anto ande. (2 Ɛk. 20:1, 2) Kakɔna kakasale Jɛhɔshafata? Nde akalɔmbɛ Jehowa dia mbokimanyiya ndo mbosha wolo. Dui sɔ mbɔtɔnɛka la dako dia lomba diatanaso lo Tokedi 3:5, 6. (Adia.)  Dɔmbɛlɔ di’okitshakitsha diakasale Jɛhɔshafata diele lo 2 Ɛkɔndɔ 20:5-12, mɛnyaka polo lo yɛdikɔ y’efula yakandayaɛkɛka le She lele l’olongo loludi la ngandji. Ngande wakakadimola Jehowa dɔmbɛlɔ dia Jɛhɔshafata?

7. Ngande wakakadimola Jehowa dɔmbɛlɔ dia Jɛhɔshafata?

⁷ Jehowa akasawola la Jɛhɔshafata lo tshimbo y’ose Lɛwi ɔmɔtshi lakawelɛka Jahaziyɛlɛ. Jehowa akate ate: “Nyemale lo ahole anyu, nyotshikale ki, kele nyende panda kayanga nyosha Jehowa.” (2 Ɛk. 20:13-17) Ɔsɔ ekɔ mɛtɛ yoho yahaleke nkamba l’anto dia ndɔ ta! Koko, ɛlɔmbwɛlɔ kɛsɔ kondja oma le onto, tɔ kakaye oma le Jehowa. Jɛhɔshafata akayaɛkɛ tshɛ le Nzambi kande ndo nde akasale kɛnɛ kakandawotɛ. Etena kakandatshu nde l’anto ande dia tohomana l’atunyi awɔ, nde akakitsha la ntondo k’asɔlayi ande, aha asɔlayi waki la diewo, koko amembi waki komonga la dihomɔ dia ta. Jehowa kokalɛ Jɛhɔshafata, Nde akalɛndja asɔlayi w’atunyi ande.​—2 Ɛk. 20:18-23.

8. Wetshelo akɔna wakoka waomi nkondja oma l’ɛnyɛlɔ ka Jɛhɔshafata?

⁸ Omi, wɛ koka nkondja wetshelo oma l’ɛnyɛlɔ ka Jɛhɔshafata. Wɛ ekɔ l’ɔkɛndɛ wa nkokɛ nkumbo kayɛ, diakɔ diakambayɛ olimu efula dia nkokɛ ndo nsukɛ nkumbo kayɛ. Etena kahomanayɛ l’ekakatanu, wɛ mbeyaka mfɔnya ɔnɛ wɛmɛ koka nkandola ekakatanu akɔ. Koko, toyaɛkɛke lo wolo ayɛ hita. Lo dihole dia nsala ngasɔ, lɔmbaka Jehowa etena keyɛ wɛmɛ dia nde kokimanyiya. Laadiko dia laasɔ, lɔmbaka l’etete kaamɛ la wadɛyɛ. Yangaka ɛlɔmbwɛlɔ oma le Jehowa lo mbekaka Bible ndo ekanda watondja okongamelo wa Nzambi, ndo kambaka l’alako wele lɔkɔ. Mbeyaka monga ko anto akina hawotetawɔ tɛdikɔ tɔsayɛ tohikami lo Bible, ndo vɔ koka kaanga kotɛ ɔnɛ wɛ ekɔ enginya. Vɔ koka kotɛ ɔnɛ falanga ndo lomombo mbayosha nkumbo kayɛ ekokelo koleki dimɛna. Koko ohɔ ɛnyɛlɔ ka Jɛhɔshafata. Nde akayaɛkɛ le Jehowa ndo akɛnya dui sɔ oma l’etsha. Jehowa kokalɛ pami ka kɔlamelo kɛsɔ ndo nde hokokalɛ. (Os. 37:28; Hɛb. 13:5) Kakɔna kakoka atshukanyi nsala kakoka mbasha lɔsɛnɔ l’ɔngɛnɔngɛnɔ?

9. Kakɔna kakokaso mbuta lo dikambo di’omvutshi Isaya nde la wadɛnde?

⁹ Omvutshi Isaya nde la wadɛnde waketɛ olimu wa Jehowa dui dioleki ohomba lo lɔsɛnɔ lawɔ. Isaya aki omvutshi, ndo mbeyaka monga ko ndo wadɛnde aki l’ɛkɛndɛ ɛmɔtshi wakatama lo prɔfɛsiya, nɛ dia nde mbelamɛka ɔnɛ “omvutshi wa womoto.” (Isa. 8:1-4) Mɛnamaka dia Isaya nde la wadɛnde wakayashaka tshɛ l’ɔtɛmwɛlɔ wa Jehowa. Shi ɔsɔ ekɔ ɛnyɛlɔ ka dimɛna efula le atshukanyi ɛlɔ kɛnɛ!

10. Ngande wele mbeka prɔfɛsiya ya lo Bible koka nkimanyiya atshukanyi dia ndjashikikɛ dia nsala awui efula lo dikambo dia Jehowa?

¹⁰ Ɛlɔ kɛnɛ, atshukanyi koka ndjasha dia kambɛ Jehowa lo lɔsɛnɔ lawɔ lo nsala kɛnɛ tshɛ kakokawɔ nsala l’olimu ande. Vɔ koka mfudia wɛkamu awɔ le Jehowa lo mbekaka prɔfɛsiya ya lo Bible kaamɛ ndo lo nyangaka dia mbeya woho wakotshamayɔ tena tshɛ. * (Tito 1:2) Vɔ koka nkana yimba lo woho wakokawɔ mbisha lonya lo okotshamelo wa prɔfɛsiya mɔtshi ya lo Bible. Ɛnyɛlɔ, vɔ koka mbisha lonya l’okotshamelo wa prɔfɛsiya kakate Yeso ɔnɛ lokumu l’ɔlɔlɔ layosambishama lo nkɛtɛ k’otondo la ntondo k’ekomelo ndja. (Mat. 24:14) Lo yɛdikɔ  yayoleka wadi l’omi monga l’eshikikelo dia prɔfɛsiya ya lo Bible yekɔ lo takotshama, mbayowotalekaka ndjashikikɛ dia nsala akambo efula lo dikambo dia Jehowa.

11. Kakɔna kaki Piriskila la Akula l’akoka wa nsala, ndo lande na?

¹¹ Wadi l’omi weke koditshukanaka koka nkondja wetshelo oma le Piriskila la Akula, wadi l’omi w’ase Juda wakadjasɛka l’osomba wa Rɔmɔ. Vɔ wakoke lokumu l’ɔlɔlɔ lendana la Yeso ko wakakome Akristo. Aha la taamu, vɔ wakangɛnangɛna lɔsɛnɔ lakayonga la wɔ. Koko, lɔsɛnɔ lawɔ lakatshikitana la shashimuya etena kakadjanga nkumekanga Klodiyo di’ase Juda tshɛ mimɔ oma la Rɔmɔ. Tɔsɛdingole kɛnɛ kakalembetshiya dui sɔ le Akula nde la Piriskila. Vɔ wakahombe mimɔ oma lo dihole diakawekesanɛ la diɔ, wakahombe toyanga luudu l’oyoyo, ndo etena kakiwɔ lekɔ, wakahombe totatɛ okanda awɔ wa mbikanɛka mvudu y’apɛma. Onde ekakatanu ɛsɔ wakaashimbe diaha vɔ mbetsha wahɔ wa Diolelo lo dihole dia ntondo? Ondo wɛ mbeyaka okadimwelo lo dimbola sɔ. Etena kakiwɔ lo dihole diawɔ di’oyoyo la Kɔrɛtɔ, Akula nde la Piriskila wakayasha tshɛ dia nkimanyiya ase etshumanelo ka lɛkɔ ndo wakakambe kaamɛ l’ɔpɔstɔlɔ Pɔɔlɔ dia nkeketsha anangɛwɔ wa lɛkɔ. L’ɔkɔngɔ diko, vɔ wakonɔ l’esomba ekina wakiwɔ l’ohomba efula w’apandjudi. (Ets. 18:18-21; Rɔmɔ 16:3-5) Vɔ mɛtɛ wakakondja ɛtshɔkɔ efula lo lɔsɛnɔ lam’ele vɔ wakakambe kaamɛ!

12. Lande na kahomba wadi l’omi ndjadjɛ eyango wa lo nyuma?

¹² Waa wadi la waomi wa nshi nyɛ koka mbokoya Piriskila la Akula lo mbetsha wahɔ wa Diolelo lo dihole dia ntondo. Etena koleki dimɛna kahomba wadi l’omi nsawola awui wendana l’eyango wa lo lɔsɛnɔ lawɔ ele etena kembɔnawɔ. Naka wadi l’omi mbɔsa tɛdikɔ kaamɛ ndo mbidja welo dia nkotsha eyango wa lo nyuma kaamɛ, kete vɔ wayoleka monga la waaso wa mɛna woho wakamba nyuma ka Jehowa lo lɔsɛnɔ lawɔ. (Ond. 4:9, 12) Tɔsɛdingole ɛnyɛlɔ ka Russell la Elizabeth. Russell mbutaka ate: “Etena kakatembɔnaka, takakɛtshanyaka eyango ɛmɔtshi shikaa wa  lo nyuma.” Elizabeth mbutaka ate: “Takakɛtshanyaka eyango ɛsɔ dia kaanga tamboyɔsa tɛdikɔ totshikitanyi lo lɔsɛnɔ, tɛdikɔ takɔ hatotodjɛ wekamu dia sho nkotsha eyango akɔ.” Awui asɔ wakakimanyiya Russell la Elizabeth dia vɔ monɔ otsha la Micronésie dia tokamba lɛnɛ akiwɔ l’ohomba efula w’apandjudi.

13. Lo ndjela Osambo 28:7, etombelo akɔna wayonga naka sho ndjaɛkɛ le Jehowa?

¹³ L’ɛnyɛlɔ ka Russell la Elizabeth, atshukanyi efula wakɔshi yɛdikɔ ya mbetɛ nsɛnɔ yawɔ ɔsɛlɛngɛ l’oyango wa vɔ ndjasha efula l’olimu w’esambishelo ndo wa mbetɛ anto ambeki. Naka wadi l’omi ndjadjɛ eyango w’amɛna l’olimu wa Jehowa ndo nkamba kaamɛ dia nkotsha eyango akɔ, kete vɔ wayokondja etombelo w’amɛna efula. Vɔ wayɛna woho waakokɛ Jehowa, wɛkamu awɔ wayoleka mfula, ndo vɔ wayonga l’ɔngɛnɔngɛnɔ wa mɛtɛ.​—Adia Osambo 28:7.

14. Ngande wakɛnya ɔpɔstɔlɔ Petero nde la wadɛnde dia vɔ wakayaɛkɛ lo daka diele lo Mateo 6:25, 31-34?

¹⁴ Atshukanyi koka nkondja nto wetshelo oma l’ɛnyɛlɔ kakatshike ɔpɔstɔlɔ Petero nde la wadɛnde. Ngɔndɔ oko shamalo l’ɔkɔngɔ wa nde mɛnana la Yeso mbala ka ntondo, ɔpɔstɔlɔ Petero akahombe mbɔsa yɛdikɔ mɔtshi y’ohomba efula. Petero akasɛnyaka nkumbo kande lo munda okanda wa nse. Ɔnkɔnɛ, etena kakalɔmbɛ Yeso Petero dia nde ntshika olimu ɔsɔ ko teetetaka la nde, Petero akahombe nkanyiya dikambo dia nkumbo kande. (Luka 5:1-11) Petero akɔshi yɛdikɔ ya tatshindɛka Yeso l’olimu ande w’esambishelo. Nde akɔshi yɛdikɔ ya lomba! Ndo sho koka monga l’ɔkɔkɔ w’oshika wa mbuta ɔnɛ wadi aki Petero akasukɛ yɛdikɔ yande. Bible mɛnyaka dia l’ɔkɔngɔ wa Yeso mbolɔ, wadi aki Petero aketetaka la Petero l’edja k’etena kɛmɔtshi. (1 Kɔr. 9:5) Aha la taamu, ɛnyɛlɔ kakandasha oko wadi l’Okristo akakimanyiya Petero dia ntɛkɛta hwe hwe etena kakandasha waomi la waa wadi w’Akristo alako wakasambiyama. (1 Pe. 3:1-7) Lo mɛtɛ, Petero nde la wadɛnde wakayaɛkɛ lo daka dia Jehowa di’ɔnɛ nde ayowakotshɛ ehomba awɔ naka vɔ mbetsha wahɔ wa Diolelo lo dihole dia ntondo lo nsɛnɔ yawɔ.​—Adia Mateo 6:25, 31-34.

15. Wetshelo akɔna wakondjayɛ oma lo kɛnɛ kakakomɛ Tiago la Esther?

¹⁵ Naka wɛ akatshukana l’ɛnɔnyi weke kambeta, ngande wakokayɛ ntetemala monga la nsaki ka mpamia olimu ayɛ? Yoho mɔtshi yakokayɛ nsala dui sɔ ele lo nkondja wetshelo oma lo bɛnyɛlɔ di’atshukanyi akina. Ɛnyɛlɔ, wɛ koka mbadia ɔnɔngɔ w’asawo wele l’ɔtɛ a dui ɔnɛ: “Wakayakimɔ la lolango dia tokimanyiya.” Asawo asɔ mbakakimanyiya Tiago la Esther, wadi l’omi wele la Brésil, dia mfudia nsaki kawɔ ka tokamba lɛnɛ ewɔ l’ohomba efula w’ekimanyielo. Tiago mbutaka ate: “Etena kakatadia awui wɛnya woho wakimanyiya Jehowa ekambi ande wa nshi nyɛ, sho lawɔ takangɛnangɛna mɛna woho watɔlɔmbɔla Jehowa ndo watokokɛnde.” L’ɔkɔngɔ diko, vɔ wakonɔ otsha la Paraguay, lɛkɔ vɔ wakatokamba l’ɛtshi ka nkɛtɛ katɛkɛtawɔ Portugais oma ko 2014. Esther mbutaka ate: “Divɛsa dimɔtshi diatɔngɛnyangɛnya sho akɔ ahende efula ele Ɛfɛsɔ 3:20. Mbala la mbala, takɛnaka okotshamelo w’ɛtɛkɛta ɛsɔ l’olimu wa Jehowa.” Lo mukanda ɔsɔ wakandafundɛ ase Ɛfɛsɔ, Pɔɔlɔ akalake dia Jehowa ayotokotshɛ awui efula oleki kɛnɛ kɔlɔmbaso. Shi daka sɔ diekɔ mɛtɛ!

16. Le waa na akoka wanɛ weke katshukana nyanga alako etena kayadjɛwɔ eyango lo lɔsɛnɔ lawɔ?

¹⁶ Ɛlɔ kɛnɛ, wanɛ weke katshukana koka  nkondja wahɔ oma le anto akina wele la diewo wakayaɛkɛ le Jehowa. Ondo atshukanyi amɔtshi waya ɛnɔnyi akumi l’olimu wa lo tena tshɛ. Lande na kahanyayange alako oma le wɔ naka nyekɔ lo nanga ndjadjɛ eyango? Ɔsɔ ekɔ yoho kina yakokanyu mɛnya dia nyu ndjaɛkɛka le Jehowa. (Tok. 22:17, 19) Dikumanyi vɔ lawɔ koka nkimanyiya atshukanyi weke katshukana dia vɔ ndjadjɛ eyango wa lo nyuma ndo mbakotsha.

17. Kakɔna kakakomɛ Klaus nde la Marisa, ndo wetshelo akɔna wakondjaso oma lo kɛnɛ kakaakomɛ?

¹⁷ Koko, lo tena dimɔtshi mbeyaka monga ko yɛdikɔ yakatɔshi ya mpamia olimu aso honga l’etombelo walongamɛso. Tɔsɛdingole ɛnyɛlɔ ka Klaus nde la Marisa, wakatatɛkɛtshi la diko. L’ɔkɔngɔ wa vɔ ntshukana ɛnɔnyi esato, vɔ wakonɔ mangana etale la ngelo kawɔ ndo wakatokamba oko anto wayakimɔ la lolango l’olimu wa wokelo lo Bɛtɛlɛ ka Finlande. Koko, wakawatɛ ɔnɛ vɔ hawotokoka ntshikala lɛkɔ olekanyi ngɔndɔ shamalo. Oma l’etatelo vɔ wakakɔmɔ. Koko yema tshitshɛ oma laasɔ, wakawaelɛ dia tɔtɔ kalasa ka l’ɔtɛkɛta wa Arabe, ndo kakianɛ vɔ wekɔ lo nkamba l’ɔngɛnɔngɛnɔ tshɛ lo ɛtshi ka nkɛtɛ katɛkɛtawɔ Arabe lo wodja okina. Etena kakanyiya Marisa kɛnɛ kakokomɛ, nde mbutaka ate: “Lakoke wɔma dia nsala dui dimɔtshi diakimi talasalaka ndo diakimi l’ohomba wa nsala dia ndjaɛkɛ tshɛ lo tshɛ le Jehowa. Koko lakɛnyi woho wakatokimanyiyaka Jehowa tena tshɛ lo toho takiso konongamɛka. L’ɔkɔngɔ wa mɛna dui sɔ, wɛkamu ami le Jehowa wakaleke nkeketala.” Oko wadiɛnya ɛnyɛlɔ kɛsɔ, wɛ koka monga l’eshikikelo ɔnɛ Jehowa ayokɔtshɔkɔlaka tena tshɛ naka wɛ ndjaɛkɛ le nde tshɛ lo tshɛ.

18. Kakɔna kakoka wadi l’omi nsala dia vɔ ntetemala ndjaɛkɛ le Jehowa?

¹⁸ Diwala diekɔ woshasha w’oma le Jehowa. (Mat. 19:5, 6) Nde nangaka di’atshukanyi ngɛnangɛna la woshasha ɔsɔ. (Tok. 5:18) Nyu wanɛ weke katshukana le, lande na kahanyasɛdingola woho wakambanyu la nsɛnɔ yanyu? Onde nyekɔ lo nsala kɛnɛ tshɛ kakokanyu nsala dia mɛnya Jehowa polo lo yɛdikɔ y’efula yenyu la lowando lo woshasha ɔsɔ wakandanyosha? Nyosawole la Jehowa lo dɔmbɛlɔ. Nyoyange lo Ɔtɛkɛta ande atɔndɔ wendana la dikambo sɔ. Oma laasɔ, nyokitanyiya alako wanyosha Jehowa. Nyu koka monga l’eshikikelo ɔnɛ nyayonga la lɔsɛnɔ lele l’ɔngɛnɔngɛnɔ ndo loludi l’ɛtshɔkɔ naka nyu mbetɛ olimu wa Jehowa dui dioleki ohomba lo diwala dianyu!