SAWO DIA WEKELO 40
“Wakonya efula lo losembwe”
“Wanɛ wakonya efula lo losembwe [wayɔhɛtaka ngaingai] oko tɔɔtɔ pondjo pondjo.”—DAN. 12:3.
OSAMBO 151 Nde ayelɛ
AWUI WAYƆTƐKƐTAMA *
1. Naa awui w’amɛna watokongɛ wayosalema l’Ɛlɔmbwɛlɔ k’ɛnɔnyi kinunu?
ANDE lushi la dimɛna layonga etena kayotatɛ anto mbolɔ lanɛ la nkɛtɛ l’Ɛlɔmbwɛlɔ k’ɛnɔnyi kinunu ka Kristo lee! Anto tshɛ wakavusha wakiwɔ wa ngandji wekɔ lo nomɔlomɔ dia mɛnana la wɔ nto. Ngasɔ mbayaoka ndo Jehowa. (Jɔbɔ 14:15) Ohokanyiya ɔngɛnɔngɛnɔ wayonga l’anto tshɛ la nkɛtɛ etena kayolɔ wakiwɔ wa ngandji. Oko wakatɛnyi lo sawo dietshi, “anto w’ɛlɔlɔ” wele nkombo yawɔ fundama lo dibuku dia lɔsɛnɔ, wayolɔ lo “eolwelo ka lɔsɛnɔ.” (Ets. 24:15; Jni. 5:29) Ondo efula ka wakiso wa ngandji wayonga l’atei wa wanɛ wayolɔ la nkɛtɛ yema tshitshɛ l’ɔkɔngɔ w’Aramangɛdɔna. * Laadiko dia laasɔ, “anto wa kɔlɔ,” ɛnyɛlɔ wanɛ waki kokondja diaaso dia dimɛna dia mbeya Jehowa kana dia mbokambɛ la kɔlamelo tshɛ ntondo ka vɔ mvɔ, wayolɔ lo “eolwelo ka kilombo.”
2-3. a) Oko wadiɛnya Isaya 11:9, 10, naa ekongelo ka wetshelo koleki woke kahatasalemaka ndooko lushi l’ɔkɔndɔ w’anto? b) Kakɔna kayotɔsɛdingola lo sawo nɛ?
2 Anto asɔ tshɛ wayolɔ pombaka mbetshama. (Isa. 26:9; 61:11) Diakɔ diele, ekongelo ka wetshelo koleki woke kahatasalemaka ndooko lushi l’ɔkɔndɔ w’anto kayosalema. (Adia Isaya 11:9, 10.) Lande na? Ɔkɔkɔ ɔmɔtshi ele, anto wa kɔlɔ wayolɔ wayonga l’ohomba wa mbeka akambo wendana la Yeso Kristo, Diolelo dia Nzambi, oshinga w’etshungwelo, ndo dikambo dia l’andja w’otondo diendana la oyindjamelo wa lokombo la Jehowa ndo la lowandji lande. Kaanga anto w’ɛlɔlɔ wayonga l’ohomba wa mbeka awui w’eyoyo wayotasholaka Jehowa yema yema lo kɛnɛ kendana la sangwelo diande dikambo dia nkɛtɛ. Amɔtshi l’atei w’anto wa kɔlamelo asɔ wakavu edja efula la ntondo ka Bible nshila fundama. Oyadi anto wa kɔlɔ kana anto w’ɛlɔlɔ vɔ tshɛ wayonga l’awui efula wa mbeka.
3 Lo sawo nɛ, tayɔsɛdingola ambola anɛ: Ngande wayosalema ekongelo ka wetshelo koleki woke kɛsɔ? Ngande wele kɛnɛ kayosala anto la wetshelo ɔsɔ kayokimanyiya dia nkombo yawɔ fundama pondjo lo dibuku dia lɔsɛnɔ kana bu? Ekadimwelo wa ambola asɔ pombaka monga dui di’ohomba le so ɛlɔ kɛnɛ. Oko wayotodiɛna, prɔfɛsiya mɔtshi ya diambo yakafundama lo dibuku dia Danyɛlɛ ndo dia Ɛnyɛlɔ yayotokimanyiya dia sho monga la eokelo ka dimɛna lo kɛnɛ kendana la kɛnɛ kayosalema etena kayolɔ wanɛ wakavu. Ntondotondo, nyɛsɔ tɔsɛdingole akambo wa diambo wakatatami lo prɔfɛsiya kele lo Danyɛlɛ 12:1, 2.
“WANƐ WOLADI DJƆ LO DITSHU . . . WAYEMƆ”
4-5. Kakɔna kɛnya Danyɛlɛ 12:1 lo dikambo di’etena k’ekomelo?
4 Adia Danyɛlɛ 12:1. Dibuku dia Danyɛlɛ mɛnyaka akambo wa diambo ndo woho wayowotasalemaka l’ɔnɔngɔ l’etena k’ekomelo. Ɛnyɛlɔ, Danyɛlɛ 12:1 mɛnyaka dia Mikayɛlɛ, mbuta ate Yeso Kristo, ‘emadi lo wahɔ w’anto wa Nzambi’ etenyi ka prɔfɛsiya kɛsɔ kakatatɛ kotshama lo 1914 etena kakasɔnama Yeso oko nkumengaka ka Diolelo dia Nzambi l’olongo.
5 Koko, wakatɛ Danyɛlɛ nto dia Yeso “ayemala” l’etena ka “sui dia woho wahatayalaka ntatɛ lam’akayala wodja polo ndo l’etena kɛsɔ.” Etena ka “sui” kɛsɔ ekɔ “mfɔnu ka woke” kakatɛkɛtama lo Mateo 24:21. Yeso ayemala kana ayosala akambo dia mamɛ ekambi wa Nzambi, l’etena k’ekomelo ka sui mbuta ate l’Aramangɛdɔna. Dibuku dia Ɛnyɛlɔ mbelɛka anto asɔ ɔnɛ “olui a woke w’anto wamboya oma lo mfɔnu ka woke.”—Ɛny. 7:9, 14.
6. Kakɔna kayosalema l’ɔkɔngɔ wa olui a woke w’anto pandɔ lo mfɔnu ka woke? Lembetshiya. (Enda nto lo numɛlɔ kɛnɛ “Ambola w’oma le ambadi” lo kɛnɛ kendana la eolwelo ka lɔsɛnɔ lanɛ la nkɛtɛ.)
6 Adia Danyɛlɛ 12:2. Kakɔna kayosalema l’ɔkɔngɔ wa olui a woke w’anto pandɔ l’etena ka sui kɛsɔ? Prɔfɛsiya kɛsɔ hendana la eolwelo ka didjidji, kana ɔkɔlɔnganelo wa lo nyuma w’ekambi wa Nzambi wasalema lo nshi y’ekomelo nyɛ oko waki eokelo kaso ka ntondo. * Ɛtɛkɛta ɛsɔ mendanaka la eolwelo kayosalema l’andja w’oyoyo wayaye. Lande na kataso ngasɔ? Etelo k’ɔnɛ “ditshu” kambemaka nto lo Jɔbɔ 17:16 ndo tɔ nembetshiyaka “Diombo.” Dui sɔ mɛnyaka dia Danyɛlɛ 12:2 mendanaka la eolwelo ka mɛtɛ mɛtɛ kayosalema l’ɔkɔngɔ wa nshi y’ekomelo nkomɛ ndo l’ɔkɔngɔ wa ta dia Aramangɛdɔna.
7. a) Lo yoho yakɔna yayolwama anto amɔtshi lo eolwelo k‘otsha lo “lɔsɛnɔ la pondjo”? b) Ngande wele ɔsɔ ekɔ “eolwelo koleki dimɛna”?
7 Kakɔna kalanga mbuta divɛsa dia Danyɛlɛ 12:2, etena katadiɔ ɔnɛ anto amɔtshi wayolɔ lo “lɔsɛnɔ la pondjo”? Diɔ nangaka mbuta dia wanɛ wayolwama l’Ɛlɔmbwɛlɔ k’ɛnɔnyi 1 000 ndo wayeya kana wayotetemala mbeya ndo nkitanyiya Jehowa nde la Yeso, wayolongola l’ekomelo a shimu lɔsɛnɔ la pondjo. (Jni. 17:3) Ɔsɔ ayonga “eolwelo koleki dimɛna” oleki eolwelo kakasalema lo nshi y’edjedja. (Hɛb. 11:35) Lande na? Nɛ dia anto wele keema kokele asɔ wakayovɔ nto.
8. Lo ngande wele anto akina wayolɔma “otsha lo nsɔnyi ndo lo diɔnyɔ dia pondjo”?
8 Koko aha wanɛ tshɛ wayolwama mbayetawɔ ekongelo ka wetshelo kayowaetsha Jehowa. Prɔfɛsiya ka Danyɛlɛ mbutaka di’amɔtshi wayolwama “otsha lo nsɔnyi ndo lo diɔnyɔ dia pondjo.” Lam’ele vɔ wayɛnya yimba ya ɔtɔmbɔkwɛlɔ, nkombo yawɔ hayotofundama lo dibuku dia lɔsɛnɔ ndo vɔ hawotokondja lɔsɛnɔ la pondjo. Koko vɔ wayolongola “diɔnyɔ dia pondjo,” kana elanyelo ka pondjo. Ɔnkɔnɛ Danyɛlɛ 12:2 tɛkɛtaka lo kɛnɛ kendana la etombelo w’ekomelo wayokomɛ wanɛ tshɛ wayolɔ lo ndjela kɛnɛ kayowosala l’ɔkɔngɔ wa eolwelo kawɔ. * (Ɛny. 20:12) Amɔtshi wayokondja lɔsɛnɔ la pondjo koko akina hawotolikondja.
“WAKONYA EFULA LO LOSEMBWE”
9-10. Kakɔna kayosalema l’ɔkɔngɔ wa mfɔnu ka woke, ndo waa na “wayɔhɛta ngaingai oko loowa l’olongo”?
9 Adia Danyɛlɛ 12:3. Kakɔna kayosalema nto l’ɔkɔngɔ wa “etena ka sui” kayaye? Ladiko dia Danyɛlɛ 12:2, divɛsa dia 3 mɛnyaka dui dimɔtshi diayosalema l’ɔkɔngɔ wa mfɔnu ka woke.
10 Waa na “wayɔhɛta ngaingai oko loowa l’olongo”? Sho tanaka kanyi ya dui sɔ lo ɛtɛkɛta wa Yeso wofundami lo Mateo 13:43 wata ɔnɛ: “L’etena kɛsɔ, anto w’ɛlɔlɔ wayɔhɛta oko osase wa wonya lo Diolelo dia Shɛwɔ.” Lo ndjela awui wosukanyi l’ɛtɛkɛta ɛsɔ, Yeso akatɛtaka lo kɛnɛ kendana la “ana wa Diolelo,” mbuta ate, anango w’akitami wayokamba kaamɛ la nde lo Diolelo dia l’olongo (Mat. 13:38) Laasɔ, Danyɛlɛ 12:3 pombaka mendana l’akitami ndo l’olimu wayowokamba l’Ɛlɔmbwɛlɔ k’ɛnɔnyi kinunu.
Anto 144 000 wayokamba kaamɛ la Yeso Kristo dia nɔmbɔla olimu wa wetshelo wayosalema l’edja k’ɛnɔnyi 1 000 (Enda odingɔ 11)
11-12. Olimu akɔna wayokamba anto 144 000 l’edja k’ɛnɔnyi 1 000?
11 Ngande wakonya akitami anto “efula lo losembwe”? Akitami wayokamba dihɛka lo dihɛka la Yeso Kristo dia nɔmbɔla ekongelo ka wetshelo kayosalema lanɛ la nkɛtɛ l’edja k’ɛnɔnyi 1 000. Anto 144 000 hawotɔlɔmbɔla tsho oko nkumi ya dikanga koko wayokamba nto oko ɛlɔmbɛdi. (Ɛny. 1:6; 5:10; 20:6) Diakɔ diele, vɔ wayosha lonya lo “ɛkɔnwɛlɔ ka wedja,” mbuta ate di’anto takomaka kokele yema yema. (Ɛny. 22:1, 2; Ɛzk. 47:12) Ande ɔngɛnɔngɛnɔ wayonga la dui sɔ le akitami lee!
12 Waa na wayonga l’atei w’anto “efula” wakonyawɔ lo losembwe? L’atei w’anto asɔ mbayonga ndo wanɛ wayolwama ndo wanɛ wayohandɔ oma lo Aramangɛdɔna kaamɛ l’ana tshɛ wakoka totɔ l’andja w’oyoyo. L’ekomelo k’ɛnɔnyi 1 000, wanɛ tshɛ wa djasɛ la nkɛtɛ wayonga kokele. Ko laasɔ, l’etena kakɔna kayofundama nkombo yawɔ pondjo la bikɛ koko aha la kidiyɔ lo dibuku dia lɔsɛnɔ?
OHEMBA W’EKOMELO
13-14. Kakɔna kayohomba anto wa kokele tshɛ wa lanɛ la nkɛtɛ mɛnya la ntondo ka vɔ ndjokondja lɔsɛnɔ la pondjo?
13 Sho pombaka mbeya ɔnɛ monga kokele halembetshiya ɔnɛ lo weho akɔ tshɛ onto ayokondja lɔsɛnɔ la pondjo. Tokanyiya dikambo di’Adama la Eva. Vɔ waki kokele, koko vɔ wakahombe mɛnya okitanyiya awɔ le Jehowa Nzambi la ntondo ka vɔ ndjokondja lɔsɛnɔ la pondjo. Lonyangu ko, vɔ kombokitanyiya.—Rɔmɔ 5:12.
14 Ngande wayonga dikambo dia wanɛ wayonga lanɛ la nkɛtɛ l’ekomelo k’ɛnɔnyi 1 000? Vɔ tshɛ wayonga kokele. Onde anto wa kokele asɔ tshɛ wayosukɛka Ɛlɔmbwɛlɔ ka Jehowa pondjo pondjo? Ko kana amɔtshi wayonga oko Adama la Eva, wanɛ wele kaanga mbakiwɔ kokele wakayoshisha kɔlamelo? Ambola asɔ pombaka kadimɔma, ko ngande?
15-16. a) Etena kakɔna kayokondja anto tshɛ diaaso dia mɛnya olowanyi awɔ le Jehowa? b) Etombelo akɔna wayonga l’ohemba w’ekomelo ɔsɔ?
15 Satana ayodihama l’edja k’ɛnɔnyi 1 000. L’edja k’etena kɛsɔ nde honga l’akoka wa minganyiya ndooko onto. Koko l’ekomelo k’ɛnɔnyi 1 000, Satana ayotshungɔma yema. Oma laasɔ, nde ayosala la wolo dia minganyiya anto wa kokele. L’edja ka ohemba w’ekomelo ɔsɔ, anto wa kokele tshɛ wa la nkɛtɛ wayonga la diaaso dia mɛnya hwe lo wedi akɔna wayowonga lo kɛnɛ kɛndana la oyindjamelo wa lokombo la Nzambi ndo la lowandji lande. (Ɛny. 20:7-10) Kɛnɛ kayowosala l’etena kɛsɔ ayoshikikɛ dia kana nkombo yawɔ koka mfundama pondjo pondjo lo dibuku dia lɔsɛnɔ.
16 Anto amɔtshi waheyama lofulo, wayɛnya dia vɔ wekɔ oko Adama la Eva lo ntona Ɛlɔmbwɛlɔ ka Jehowa. Kakɔna kayowakomɛ? Ɛnyɛlɔ 20:15 totɛka ɔnɛ: “Onto tshɛ lele lokombo lande kotanema lo dibuku dia lɔsɛnɔ akakashema lo oduwa wa dja.” Eelo, atɔmbɔki asɔ wayolanyema tshɛ lo tshɛ lo pondjo. Koko anto efula wa kokele wayeta l’ohemba w’ekomelo. Nkombo yawɔ yayofundama pondjo lo dibuku dia lɔsɛnɔ.
LO “ETENA K’EKOMELO”
17. Kakɔna kakatɛ ondjelo Danyɛlɛ kayosalema l’etena kaso kɛnɛ? (Danyɛlɛ 12:4, 8-10)
17 Ande ɔngɛnɔngɛnɔ wele laso etena kakanyiyaso awui asɔ wayosalema lo nshi yayaye lee! Koko, Danyɛlɛ akalongola awui amɔtshi w’ohomba wendana l’etena kaso kɛnɛ, mbuta ate “etena k’ekomelo.” (Adia Danyɛlɛ 12:4, 8-10; 2 Tim. 3:1-5) Ondjelo akatɛ Danyɛlɛ ate: “Ewo ka mɛtɛ kayoyala efula.” Eelo, ekambi waki Nzambi wayohomba ndeka nshihodia ɛtɛkɛta wa prɔfɛsiya wele lo dibuku diande. Ondjelo akakotsha ate “akanga wa kɔlɔ wayosalaka kɔlɔ ndo ndooko kanga kɔlɔ layoshihodia.”
18. Kakɔna kayokomɛ anto wa kɔlɔ keema edja?
18 Ɛlɔ kɛnɛ koka mɛnama di’oko anto wa kɔlɔ hawolongola dilanya l’ɔtɛ wa lɔkɛwɔ lawɔ la kɔlɔ. (Mal. 3:14, 15) Koko, keema edja Yeso ayolombosha anto wa kɔlɔ ndo ayowakakitola l’anto w’ɛlɔlɔ wele oko ɛkɔkɔ. (Mat. 25:31-33) Anto wa kɔlɔ asɔ hawotohandɔ lo mfɔnu ka woke ndo vɔ hawotolɔ dia ndjɔsɛna l’andja w’oyoyo. Nkombo yawɔ hayotonga lo “dibuku dia eohwelo” diakatɛkɛtama lo Malaki 3:16.
19. Kakɔna kahombaso nsala l’etena kɛnɛ, ndo lande na? (Malaki 3:16-18)
19 Ɔnɛ mbele etena ka sho mɛnya dia sho bu l’atei w’anto wa kɔlɔ. (Adia Malaki 3:16-18.) Jehowa ekɔ lo nkimanyiya wanɛ wɔsande oko “ɛngɔ ka laande” kana oko ɛngɔ ka nɛmɔ. Lo mɛtɛ sho nangaka monga l’atei awɔ.
Ande ɔngɛnɔngɛnɔ wayonga laso dia mɛna Danyɛlɛ, wakiso wokaso ngandji, kaamɛ ndo anto akina efula “wambemala” dia nkondja yema yawɔ l’andja w’oyoyo lee! (Enda odingɔ 20)
20. Naa Daka di’ekomelo diakawatɛ Danyɛlɛ, ndo lande na kahombayɛ kongɛ l’asolo walomɔlomɔ ekotshamelo ka daka sɔ?
20 Lo mɛtɛ, tekɔ lo nsɛna l’etena ka diambo efula. Koko akambo efula woleki diambo wekɔ suke la salema. Keema edja tayɛna elanyelo k’anto wa kɔlɔ tshɛ. Oma laasɔ, tayɛna okotshamelo wa daka dakatɛ Jehowa Danyɛlɛ ate: “Wɛ ayemala dikambo dia yema yayɛ lo ekomelo ka nshi.” (Dan. 12:13) Onde wɛ ekɔ lo nomɔlomɔ dia mɛna lushi lele Danyɛlɛ kaamɛ la wakiyɛ wa ngandji “wayemala” nto? Naka ngasɔ, kete nsala la wolo omako kakianɛ dia monga la kɔlamelo, ko wɛ ayonga l’eshikikelo dia lokombo layɛ layotetemala fundama lo dibuku dia lɔsɛnɔ dia Jehowa.
OSAMBO 80 “Nyɔlɛtɛ ko nyayɛna dia Jehowa ekɔ ɔlɔlɔ”
^ Sawo nɛ mɛnyaka otshikitanu ɔmɔtshi wambosalema lo eokelo kaso kendana la ekongelo ka woke ka wetshelo kakatɛkɛtama lo Danyɛlɛ 12:2, 3. Tayɔsɛdingola etena kayosalema dui sɔ ndo waa na wayendana la dui sɔ. Tayɔsɛdingola nto woho wayɔlɔngɔsɔla ekongelo ka wetshelo kɛsɔ anto wa la nkɛtɛ dikambo di’ohemba w’ekomelo wayonga l’ekomelo ka Ɛlɔmbwɛlɔ k’ɛnɔnyi kinunu ka Kristo.
^ Ondo anto wakavu la kɔlamelo lo nshi y’ekomelo mbayotatɛ mbolɔ, ndo oma laasɔ wanɛ wakavu lo nshi y’edjedja koka ntatɛ mbolɔ, lɔlɔnga la lɔlɔnga. Naka ngasɔ mbayodionga, kete lɔlɔnga tshɛ layonga la diaaso dia nongola wanɛ wakaweyaka. Oyadi woho akɔna wayosalema akambo, Afundelo tɛkɛtaka dikambo dia wanɛ wayolɔ otsha l’olongo ɔnɛ vɔ wayolɔ ‘l’ɔnɔngɔ,’ ndo sho koka mfɔnya dia ndo eolwelo ka la nkɛtɛ kayosalema tɔ lawɔ l’ɔnɔngɔ.—1 Kɔr. 14:33; 15:23.
^ Elembetshiyelo ɛnɛ wekɔ etshikitanu wa eokelo kaso kele lo dibuku He Dja Yimba lo prɔfɛsiya ka Danyɛlɛ! tshapita 17, ndo lo Tshoto y’Etangelo ya Ngɔndɔ k’esambele 1, 1987, lɛkɛ 21-25 lo Falase.
^ Lo yoho yotshikitanyi, etelo k’ɔnɛ “anto w’ɛlɔlɔ” ndo “anto wa kɔlɔ” katanema lo Etsha 24:15 ndo ɛtɛkɛta w’ɔnɛ “wanɛ wakasalaka akambo w’ɛlɔlɔ” ndo “wanɛ wakasalaka akambo wa kɔlɔ” watanema lo Joani 5:29 tɔtɔmiyaka lɔkɛwɔ laki la wanɛ wayolwama la ntondo ka vɔ mvɔ.
