1-2. a) Kakɔna kalangaso sho tshɛ? b) Lo na ahombaso monga l’eshikikelo?

SHO tshɛ nangaka mbokama ngandji. Ndo sho tshɛ nangaka dia vɔ tosalɛ akambo la losembwe. Naka hawotoke ngandji mbala la mbala ndo hawotosalɛ akambo la losembwe, sho koka ndjoyaoka dia sho bu la nɛmɔ kana bu l’elongamelo.

² Jehowa mbeyaka dia sho nangaka mbokama ngandji ndo kombolaka losembwe. (Os. 33:5) Sho koka monga l’eshikikelo dia Nzambi kaso tokaka ngandji k’efula ndo nde nangaka dia vɔ tosalɛ akambo la losembwe. Dui sɔ mɛnamaka hwe etena kasɛdingolaso la yambalo tshɛ Ɛlɛmbɛ wakasha Jehowa wodja w’Isariyɛlɛ lo tshimbo ya Mɔsɛ. Naka wɛ ekɔ lo nyanga ɔnɛ anto hawokosalɛ akambo la ngandji kana la losembwe, lam’alangayɛ nsɛdingola woho wɛnya Ɛlɛmbɛ wa Mɔsɛ * dia Jehowa ndjakiyanyaka dikambo di’ekambi ande.

3. a) Oko wɛnyamidiɔ lo Rɔmɔ 13:8-10, kakɔna kashihodiaso etena kekaso Ɛlɛmbɛ wa Mɔsɛ? b) Ambola akɔna wayokadimɔma lo sawo nɛ?

³ Etena kekaso Ɛlɛmbɛ wa Mɔsɛ, sho shihodiaka ngandji k’efula katoka Jehowa Nzambi. (Adia Rɔmɔ 13:8-10.) Lo sawo nɛ, tayɔsɛdingola ɛlɛmbɛ ɛmɔtshi eto wakawasha ase Isariyɛlɛ ndo tayokadimola ambola anɛ: Lande na kakokaso mbuta ɔnɛ Ɛlɛmbɛ wakahikama lo ngandji? Lande na kakokaso mbuta dia Ɛlɛmbɛ wakakeketshaka anto dia monga la losembwe? Ngande wakawalɔmbaka wanɛ waki la lowandji dia nkamba la Ɛlɛmbɛ? Ndo Ɛlɛmbɛ wakakokɛka weho w’anto akɔna lo yoho ya laande? Ekadimwelo wa ambola asɔ  wayotosha esambelo, elongamelo ndo wayotosukanya suke suke la Shɛso ka ngandji.​—Ets. 17:27; Rɔmɔ 15:4.

4. a) Lande na kakokaso mbuta di’Ɛlɛmbɛ wa Mɔsɛ wakahikama lo ngandji? b) Oko wakadiafundama lo Mateo 22:36-40, ɛlɛmbɛ akɔna wakatɔtɔmiya Yeso?

⁴ Sho koka mbuta dia Ɛlɛmbɛ wa Mɔsɛ wakahikama lo ngandji, nɛ dia Jehowa sɛngiyamaka la ngandji lo kɛnɛ tshɛ kasalande. (1 Jni. 4:8) Ɛlɛmbɛ tshɛ wakasha Jehowa pikama lo ɛlɛmbɛ ehende ɛnɛ: Nanga Nzambi ndo nanga wonyaso onto. (Lɛw. 19:18; Eoh. 6:5; adia Mateo 22:36-40.) Diakɔ diakokaso nongamɛ dia ɔlɛmbɛ tshɛ wa lo ɛlɛmbɛ 600 ndo ekina tetsha dui dimɔtshi diendana la ngandji ka Jehowa. Nyɛsɔ tɔsɛdingole bɛnyɛlɔ dimɔtshi.

5-6. Kakɔna kalanga Jehowa di’atshukanyi salaka, ndo kakɔna keya Jehowa? Sha ɛnyɛlɔ.

⁵ Onga la kɔlamelo le olonganyi ayɛ ndo kokɛka anayɛ. Jehowa nangaka di’atshukanyi mbokana ngandji k’efula lɔsɛnɔ lawɔ l’otondo. (Eta. 2:24; Mat. 19:3-6) Loseka ekɔ dui dia kɔlɔ diɛnya di’onto hoke onto okina ngandji. L’ɔkɔkɔ w’oshika, mbele ɔlɛmbɛ w’esambele wa lo Ɛlɛmbɛ dikumi kombetawɔka loseka. (Eoh. 5:18) Ɔsɔ ekɔ “salɛ Nzambi” pɛkato ndo salɛ olonganyi dui dia kɔlɔ efula. (Eta. 39:7-9) Olonganyi wahasadi loseka koka monga la paa k’efula ɛnɔnyi efula.

⁶ Jehowa mbeyaka dimɛna woho wasalanɛ atshukanyi akambo. Nde akalangaka dia vɔ salɛ wadi w’ase Isariyɛlɛ akambo lo yoho ya dimɛna. Pami kakakitanyiyaka Ɛlɛmbɛ akahombaka mboka wadɛnde ngandji ndo takandahombaka ndjaka diwala l’ɔtɛ w’ɛkɔkɔ w’anyanya. (Eoh. 24:1-4; Mat. 19:3, 8) Koko etena kakatombaka okakatanu wa wolo, ko pami ambodiaka diwala, nde akahombaka mbisha wadɛnde mukanda w’odiakelo wa diwala. Mukanda ɔsɔ wakakokɛka womoto di’aha vɔ ndjowomamatanyɛ awui wa mindo wa kashi. Laadiko dia laasɔ, ntondo ka omi mbisha wadɛnde mukanda w’odiakelo wa diwala, mɛnamaka dia nde akahombaka tɛnanyi la dikumanyi dia l’osomba. Lo nsala ngasɔ, dikumanyi diakakondjaka diaaso dia nkimanyiya wadi l’omi asɔ diaha diwala diawɔ mvɔ. Etena kakadiakaka pami kɛmɔtshi ka l’Isariyɛlɛ diwala la wadɛnde l’ɔtɛ w’ɛkɔkɔ wa lokaki, aha tena tshɛ mbakekɛka Jehowa lonya. Koko, nde akɛnaka woho wakasowaka womoto ndo wakandalelaka.​—Mal. 2:13-16.

7-8. a) Kakɔna kakadjangɛ Jehowa ambutshi dia nsala? (Enda osato wa lo lohoso.) b) Wetshelo akɔna wambotokondja?

⁷ Ɛlɛmbɛ wakɛnyaka nto dia Jehowa ndjakiyanyaka efula lo dikambo di’ana. Jehowa akadjangɛ ambutshi diaha nkotsha tsho ehomba wa lo demba w’anawɔ, koko ndo ehomba wa lo nyuma. Ambutshi wakakambaka la diaaso tshɛ dia nkimanyiya anawɔ dia vɔ nshihodia ndo mbɔsa Ɛlɛmbɛ wa Jehowa la nɛmɔ ndo mbeka dia mbooka ngandji. (Eoh. 6:6-9; 7:13) Ɔkɔkɔ ɔmɔtshi wakashaka Jehowa ase Isariyɛlɛ dilanya aki nɛ dia wakasalɛka anawɔ amɔtshi akambo wa kɔlɔ l’esehe. (Jɛr. 7:31, 33) Ambutshi wakahombaka mbɔsa anawɔ aha oko ɛngɔ kɛmɔtshi kakawakokaka minya yimba kana mpɛnyahɛnya, koko oko etenyi k’okitɔ kana woshasha w’oma le Jehowa wa mbɔsa la nɛmɔ.​—Os. 127:3.

⁸ Wetshelo: Jehowa mbidjaka yimba la yambalo tshɛ lo woho wasalanɛ atshukanyi akambo. Nde nangaka di’ambutshi mboka anawɔ ngandji ndo nde ayoyokoya la ambutshi lo woho waasalɛwɔ akambo.

9-11. Lande na kakadje Jehowa ɔlɛmbɛ washimba ɔkɔmiya?

⁹ Tɔkɔmiyake. Ɔlɛmbɛ w’ekomelo wa lo Ɛlɛmbɛ dikumi wakashimbaka ɔkɔmiya  kana monga la nsaki ka kɔlɔ ka nkombola ɛngɔ k’onto okina. (Eoh. 5:21; Rɔmɔ 7:7) Jehowa akadje ɔlɛmbɛ ɔsɔ dia mbisha wetshelo ɔmɔtshi w’ohomba, wodja ande wakahombaka nama etema awɔ, mbuta ate tokanyi, nsaki ndo ekanelo kawɔ ka yimba. Nde mbeyaka dia etsha wa kɔlɔ tatɛka oma lo tokanyi ndo nsaki ya kɔlɔ. (Tok. 4:23) Etena kaketawɔka ose Isariyɛlɛ ɔmɔtshi dia nsaki ya kɔlɔ mpama l’otema ande, ondo nde akakokaka salɛ anto akina akambo aha la ngandji. Ɛnyɛlɔ, nkumekanga Davidɛ akatale lo djonga shɔ. Lo tshɛ, nde aki pami k’ɔlɔlɔ. Koko lo diaaso dimɔtshi nde akakɔmiya wadi a kana. Nsaki kande kakokonya lo pɛkato. (Jak. 1:14, 15) Davidɛ akasale loseka, akayange dia nkesa omi aki womoto akɔ ndo l’ekomelo nde akoodiake.​—2 Sa. 11:2-4; 12:7-11.

¹⁰ Jehowa akeyaka etena kakasekolaka ose Isariyɛlɛ ɔmɔtshi ɔlɛmbɛ wendana la ɔkɔmiya, nɛ dia Nde mbeyaka kɛnɛ kele l’otema. (1 Ɛk. 28:9) Ɔlɛmbɛ wendana la ɔkɔmiya wakoholaka wodja dia mbewɔ tokanyi takakokaka nkonya dia monga la lɔkɛwɔ la kɔlɔ. Jehowa ekɔ mɛtɛ Shɛso ka lomba ndo ka ngandji!

¹¹ Wetshelo: Jehowa mɛnaka aha tsho kɛnɛ kɛnama lo washo w’anto. Nde mɛnaka kɛnɛ kele mɛtɛ l’etei kaso, mbuta ate l’otema aso. (1 Sa. 16:7) Ndooko tokanyi, nsaki kana awui amɔtshi wakoka mbishɛma le nde. Nde nyangaka awui w’ɛlɔlɔ wele le so ndo tokeketshaka. Koko nde nangaka dia sho mbeya ndo mbahemɛ tokanyi ta kɔlɔ la ntondo ka tɔ ndjokoma etsha wa kɔlɔ.​—2 Ɛk. 16:9; Mat. 5:27-30.

12. Kakɔna katetsha Ɛlɛmbɛ wa Mɔsɛ?

¹² Ɛlɛmbɛ wa Mɔsɛ tetshaka dia Jehowa nangaka losembwe. (Os. 37:28; Isa. 61:8) Nde mbishaka ɛnyɛlɔ ka kokele kendana la salɛ anto akina akambo la losembwe. Etena kakakitanyiyaka ase Isariyɛlɛ Ɛlɛmbɛ wa Jehowa, nde akatshɔkɔlaka. Etena kakawanyaka yimba l’atɔndɔ ande w’amɛna ndo wosembwe, vɔ wakasowaka. Tɔsɛdingole ɛlɛmbɛ ekina ehende wa lo Ɛlɛmbɛ dikumi.

13-14. Kakɔna kakalɔmbaka ɛlɛmbɛ ehende wa ntondo wa lo Ɛlɛmbɛ dikumi, ndo ngande wele nkitanyiya ɛlɛmbɛ ɛsɔ akongaka la wahɔ le ase Isariyɛlɛ?

¹³ Ntɛmɔla paka Jehowa ndamɛ oto. Ɛlɛmbɛ ehende wa ntondo wa lo Ɛlɛmbɛ dikumi wakalɔmbaka ase Isariyɛlɛ dia ntɛmɔla paka Jehowa ndamɛ oto ndo wakaahɛmɔlaka diaha ntɛmɔla dikishi. (Eto. 20:3-6) Aha Jehowa mbakakondjaka wahɔ lo Ɛlɛmbɛ ɛsɔ. Koko, wodja ande mbakakondjaka wahɔ lo Ɛlɛmbɛ akɔ. Etena kakatshikalaka wodja ande la kɔlamelo le nde, vɔ waki l’ɔngɛnɔngɛnɔ. Etena kakawatɛmɔlaka tozambizambi t’ase wedja, vɔ wakasowaka.

¹⁴ Tokanyiya dikambo di’ase Kanana. Vɔ wakatɛmɔlaka dikishi diele bu la lɔsɛnɔ lo dihole dia ntɛmɔla Nzambi ka mɛtɛ ndo kasɛna. Etombelo waki la dui sɔ ele, wakayanyɛka nɛmɔ. (Os. 115:4-8) Ndjasha lo awui wa dieyanelo wa wɔnɔnyi ndo nambola anawɔ lo yoho ya kɔlɔ, aki etenyi kɛmɔtshi k’ɔtɛmwɛlɔ awɔ. Woho akɔ wamɛ mbele, etena kaki ase Isariyɛlɛ kokitanyiyaka Jehowa ndo kakawatɛmɔlaka dikitshi, wakayanyɛka nɛmɔ ndo wakasalɛka nkumbo yawɔ kɔlɔ. (2 Ɛk. 28:1-4) Wanɛ waki la lowandji wakatone atɔndɔ wa Jehowa wosembwe. Wakakambaka la lowandji la wɔ lo yoho ya kɔlɔ ndo wakahɛnyahɛnyaka wanɛ waki wɛɔdu ndo wanɛ waki komonga l’ekokelo. (Ɛzk. 34:1-4) Jehowa akahɛmɔla ase Isariyɛlɛ dia nde ayolombosha wanɛ wakasalɛka wamato ndo ana waki komonga la ekokelo akambo lo yoho ya kɔlɔ. (Eoh.  10:17, 18; 27:19) Lo wedi okina, Jehowa akatshɔkɔlaka wodja ande etena kakiwɔ la kɔlamelo le nde ndo kakawasalanɛka akambo la losembwe.​—1 Ku. 10:4-9.

15. Wetshelo akɔna wakondjaso lo dikambo dia Jehowa?

¹⁵ Wetshelo: Jehowa keema l’onongo etena kanya wanɛ wata dia wekɔ lo mbokambɛ yimba lo atɔndɔ ande ndo kasalɛwɔ ekambi ande awui wa kɔlɔ. Koko, Jehowa tokaka ngandji ndo mbeyaka naka tekɔ lo nsowa lo yoho yele bu la losembwe. Nde mbeyaka dimɛna paa kele la so ndeka woho weya ombutshi wa womoto asui w’ɔnande. (Isa. 49:15) Kaanga mbele nde hakoke mbekɛ lonya mbala kakɔ ɔtɔi, l’etena kahombama nde ayoyokoya l’anto wasala akambo wa kɔlɔ wahayatshumoya lo woho wakawasalɛ anto akina akambo.

16-18. Ɛlɛmbɛ wa Mɔsɛ wakendanaka l’awui akɔna wa lo lɔsɛnɔ, ndo wetshelo akɔna wakondjaso?

¹⁶ Ɛlɛmbɛ wa Mɔsɛ wakendanaka l’awui efula wa lo lɔsɛnɔ l’ase Isariyɛlɛ, diakɔ diele aki ohomba dia dikumanyi di’apami diakasɔnama nombosha wodja wa Jehowa la losembwe. Vɔ wakahombaka nkandola aha tsho akambo wa lo nyuma koko ndo ewanu ndo awui wa kɔlɔ. Tɔsɛdingole bɛnyɛlɔ diayela nɛ.

¹⁷ Etena kakadiakaka ose Isariyɛlɛ onto ɔmɔtshi, nde kondjakemaka mbala kakɔ ɔtɔi. Dikumanyi dia l’osomba awɔ wakahombaka nsɛdingola akambo la ntondo ka mbɔsa yɛdikɔ dia kana aki ohomba mbofundɛ dilanya dia nyɔi. (Eoh. 19:2-7, 11-13) Dikumanyi wakasɛdingolaka nto awui efula wa lo lɔsɛnɔ, wakakandolaka ekakatanu wendana la diangɔ diele l’onto ndo ewanu waki lam’asa atshukanyi. (Eto. 21:35; Eoh. 22:13-19) Etena kakasalaka dikumanyi akambo la losembwe ndo kakakitanyiyaka ase Isariyɛlɛ Ɛlɛmbɛ, onto tshɛ akakondjaka wahɔ ndo wodja wakatombolaka Jehowa.​—Lɛw. 20:7, 8; Isa. 48:17, 18.

¹⁸ Wetshelo: Dui tshɛ dia lo lɔsɛnɔ laso diekɔ ohomba le Jehowa. Nde nangaka dia sho monga la losembwe ndo la ngandji etena keso kaamɛ l’anto akina. Ndo nde mɛnaka kɛnɛ kataso ndo kasalaso oyadi lo woshɛshɛ.​—Hɛb. 4:13.

19-21. a) Ngande wakahombe dikumanyi ndo toshushi salɛ wodja waki Nzambi akambo? b) Ɛlɛmbɛ akɔna wakasha Jehowa, ndo wetshelo akɔna wakondjaso?

¹⁹ Jehowa akalangaka nkokɛ wodja ande oma lo nshɛngiya ya kɔlɔ ya wedja wakadinge. Diakɔ diele, nde akalɔmbɛ dikumanyi ndo toshushi dia nkamba la Ɛlɛmbɛ aha la shɔnɔdi. Koko, wanɛ wakalomboshaka takawahombe salɛ wodja akambo sso lo sso kana wolo wolo. Koko, vɔ wakahombe nanga losembwe.​—Eoh. 1:13-17; 16:18-20.

²⁰ Jehowa akokaka wodja ande kɛtshi, diakɔ diele nde akadje ɛlɛmbɛ di’anto salanɛka akambo la losembwe. Ɛnyɛlɔ, Ɛlɛmbɛ wakakimanyiyaka di’aha vɔ mamatanyiyɛ onto akambo wa kɔlɔ. Ɔnɛ lakawafunde  aki la lotshungɔ la mbeya ɔnɛ lakofunde. (Eoh. 19:16-19; 25:1) Ndo ntondo ka vɔ mbuta ɔnɛ nde aki l’onongo, akahombaka dia ɛmɛnyi ehende kana ndekana nshikikɛ dui sɔ. (Eoh. 17:6; 19:15) Ko kayotota dikambo di’ose Isariyɛlɛ lakasalaka kɔlɔ kakɛnama paka le ɔmɛnyi ɔtɔi? Takandahombaka nkanyiya ɔnɛ nde holongola dilanya l’ɔtɛ wa dui sɔ. Jehowa akɛnyi kɛnɛ kakandasale. Lo nkumbo, wakasha ambutshi w’apami lowandji, koko lowandji lɔsɔ laki l’elelo. Lo kɛnɛ kendana la ewanu ɛmɔtshi wa lo nkumbo, dikumanyi dia l’osomba waki l’ɔkɛndɛ wa nsɛdingola dui sɔ ndo mbɔsa yɛdikɔ y’ekomelo.​—Eoh. 21:18-21.

²¹ Wetshelo: Jehowa toshaka ɛnyɛlɔ ka kokele; nde salaka dui tshɛ la losembwe. (Os. 9:7) Nde futaka wanɛ wakitanyiya la kɔlamelo tshɛ atɔndɔ ande, koko nde mbishaka wanɛ wakamba la lowandji lawɔ lo yoho ya kɔlɔ dilanya. (2 Sa. 22:21-23; Ɛzk. 9:9, 10) Anto amɔtshi koka nsala akambo lo yoho ya kɔlɔ ko mfɔnya dia vɔ hawotolongola dilanya, koko etena kayɛna Jehowa ɔnɛ etena kambokoka, nde ayowalombosha. (Tok. 28:13) Ndo naka vɔ hawoyatshumoya, vɔ wayeya aha la ntshimbatshimba dia “ekɔ dikambo dia wɔma efula dia nkɔ l’anya wa Nzambi kasɛna.”​—Hɛb. 10:30, 31.

22-24. a) Ɛlɛmbɛ wakakokɛka anto akɔna lo yoho ya laande, ndo wetshelo akɔna wakondjaso lo dikambo dia Jehowa? b) Ɔhɛmwɛlɔ akɔna watanaso lo Etombelo 22:22-24?

²² Ɛlɛmbɛ wakakokɛka lo yoho ya laande  wanɛ waki kokoka ndjakokɛ vɔamɛ, ɛnyɛlɔ ana wa tshike, wadi waki edo, ndo angɛndangɛnda. Wakatɛ toshushi ɔnɛ: “Tosambolake kilombo k’ɔngɛndangɛnda kana ka ɔna etshike wɛngɛngɛ ndo tɔsake dihɔndɔ dia wadi aki odo oko ɔkɔlɛ.” (Eoh. 24:17) Jehowa akayashaka l’otema ɔtɔi le anto waki komonga l’ekokelo. Ndo nde akashaka wanɛ wakasalɛka akambo lo yoho ya kɔlɔ dilanya.​—Adia Etombelo 22:22-24.

²³ Ɛlɛmbɛ wakakokɛka ase nkumbo lo nshimba weho tshɛ w’awui wa dieyanelo dia lam’asa ase nkumbo. (Lɛw. 18:6-30) Otshikitanyi la wedja wakadinge Isariyɛlɛ, waketawɔka kana wakadihaka washo lo tshelo shɔ, wodja waki Jehowa wakahombe mbɔsa dui dia kɔlɔ sɔ woho wadiɔsa Jehowa, mbuta ate dihetsha.

²⁴ Wetshelo: Jehowa nangaka dia anto wakandasha ɛkɛndɛ ndjasha la ngandji le anto tshɛ walɔmbɔlawɔ. Nde petshaka dieyanelo tshɛ dia kɔlɔ ndo nde toshikikɛka sho tshɛ, djekoleko wanɛ woleki monga aha l’ekokelo, dia wayokondja ekokelo ndo losembwe.

25-26. a) Lande na kakokaso mbuta ɔnɛ ngandji la losembwe wekɔ oko lomu la lɔsɛnɔ? b) Kakɔna kayotɔsɛdingola lo sawo diayela dia lo asawo anɛ?

²⁵ Ngandji ndo losembwe wekɔ oko lomu la lɔsɛnɔ; lanɛ la nkɛtɛ, ɔmɔtshi hakoke monga ko okina bu. Naka sho monga l’eshikikelo ɔnɛ Jehowa tosalɛka akambo la losembwe, kete ngandji kawokaso kayofula. Ndo naka sho nanga Nzambi ndo atɔndɔ ande wosembwe, kete tayotshutshuyama dia mboka anto akina ngandji ndo mbasalɛ akambo la losembwe.

²⁶ Ɛlɛmbɛ wa Mɔsɛ mbɛdikaka lomu la lɔsɛnɔ la diɔtɔnganelo diaki lam’asa Jehowa l’ase Isariyɛlɛ. Koko, wodja waki Nzambi takawahombe nkitanyiya Ɛlɛmbɛ wa Mɔsɛ nto l’ɔkɔngɔ wa Yeso nkotsha Ɛlɛmbɛ, ndo vɔ wakahɛnyama la dui dimɔtshi di’ohomba efula. (Rɔmɔ 10:4) Ɔpɔstɔlɔ Pɔɔlɔ tɛkɛtaka lo dikambo di’Ɛlɛmbɛ ɔnɛ wekɔ “didjidji dia akambo w’ɛlɔlɔ wakahombe ndja.” (Hɛb. 10:1) Lo sawo diayela dia lo asawo anɛ tayɔsɛdingola awui amɔtshi l’atei w’awui w’amɛna asɔ ndo ohomba wele la ngandji ndo losembwe lo etshumanelo k’Akristo.