LO NSHI yakafundamaka Bible, pami kakatshukaka kana nkumbo kande wakakimɔka okundji le nkumbo ka womoto etena kaketawɔka nkumbo yakɔ hiende dia diwala salema. Okundji wakakokaka monga diangɔ dia nɛmɔ, nyama kana falanga. Lo tena dimɔtshi, wakafutaka okundji akɔ lo nkamba olimu wa wolo, ɛnyɛlɔ oko wakidiɔ le Jakɔbɔ laketawɔ kambɛ she Rashɛlɛ olimu l’edja k’ɛnɔnyi esambele dia nde ndjotshuka Rashɛlɛ. (Eta. 29:17, 18, 20) Naa oyango waki la mbekelo kɛsɔ ka nkimɔ okundji?

Carol Meyers, nomb’ewo kɛmɔtshi k’awui wa Bible akafunde ate: “Wakakokaka nkimɔ okundji le nkumbo ka womoto l’ɔtɛ wakiwɔ suke la nkakitɔna la womoto lakakambaka elimu wa wolo, nɛ dia dui sɔ diaki ohomba le nkumbo [yakakambaka dikambɔ].” Ondo okundji wakakimanyiyaka nto dia nkeketsha diɔtɔnganelo dia lam’asa nkumbo hiende yaki suke la tshukanya anawɔ. Ase nkumbo shɔ wakakoke kimanyiyana lam’asawɔ lo tena dia paa. Laadiko dia laasɔ, okundji akɛnyaka dia womoto ambotshukama ndo ɔnɛ nde okoka mimɔ oma l’ekokelo ka she dia omɛnde mbokokɛ.

Nkimɔ okundji konembetshiyaka dia womoto aya ɛngɔ kɛmɔtshi kakokawɔ nsondja kana nsomba. Dibuku Ancient Israel​—Its Life and Institutions (Isariyɛlɛ w’edjedja​—Lɔsɛnɔ lawɔ ndo ɛlɛmbɛ awɔ) mbutaka ɔnɛ: “Didjango sɔ dia nkimɔ lofulo lɔmɔtshi la falanga kana ɛngɔ kɛdimi la lɔ, le nkumbo k’ɔna womoto diakashaka diwala di’ose Isariyɛlɛ ɛnamelo k’osombelo. Koko, akɛnamaka dia [okundji] wekɔ oko ɛngɔ kakawakimɔka le nkumbo ka womoto dia mbɔsa womoto, koko aha oshinga wafutawɔ dia nsomba womoto.”

Ɛlɔ kɛnɛ, lo wedja ɛmɔtshi anto wekɔ lo ntetemala ndjela mbekelo ka nkimɔ okundji. Etena kalɔmba ambutshi w’Akristo okundji, vɔ salaka dia ‘ekanelo kawɔ k’ɔlɔlɔ mbeyama le anto tshɛ,’ aha nɔmba lo yoho ya tshamba ndeko, koko la wɛdimo. (Flpɛ. 4:5; 1 Kɔr. 10:32, 33) Lo nsala ngasɔ, vɔ mɛnyaka dia vɔ bu ‘anangi wa falanga’ kana akanga wa lokaki. (2 Tim. 3:2) Laadiko dia laasɔ, naka ambutshi w’Akristo hawɔlɔmbi okundji wa tshamba ndeko, kete omi layotshuka ɔnawɔ hotshutshuyama dia ntaloya diwala polo lam’ayondokondja falanga yɔlɔmbiwɔ dia ndjokimɔ okundji. Kana omi layotshuka ɔnawɔ hotshuthuyama dia ntshika olimu ande w’ombatshi mboka l’ɔtɛ wahombande nkamba olimu efula dia ntana falanga yakawɔlɔmbɛ dia nkimɔ okundji w’efula.

L’ahole efula wa l’andja ɔnɛ, ɛlɛmbɛ wa wodja mbashikikɛ okundji wahomba kimɔma. Lɛnɛ asalema dui sɔ, ambutshi w’Akristo pombaka nkitanyiya ɛlɛmbɛ akɔ. Lande na? Nɛ dia Ɔtɛkɛta wa Nzambi nɔmbaka Akristo dia ‘ndjakitshakitsha l’ɛse ka ewandji wa laadiko’ ndo dia nkitanyiya ɛlɛmbɛ wahalɔshana la ɛlɛmbɛ wa Nzambi.​—Rɔmɔ 13:1; Ets. 5:29.