Lo dikambo sɔ, etshumanelo koka mbɔsa diwala dia ntondo oko diambovɔ etena katshuka pami nto ndo vɔ koka mbɔsa diwala di’oyoyo oko diwala dietawɔma. Dia sho nshihodia ɛkɔkɔ watokonya dia mbuta ngasɔ, nyɛsɔ tɔsɛdingole kɛnɛ kakate Yeso lo dikambo di’odiakelo wa diwala ndo tshukana nto.

Oko wofundamidiɔ lo Mateo 19:9, Yeso akɛnya ɔkɔkɔ ɔtɔi wahomba diwala mvɔ. Nde akate ate: “Onto tshɛ ladiaka diwala la wadɛnde, naka aha l’ɔkɔkɔ w’awui wa mindo wa dieyanelo ko nde ntshuka womoto okina, nde ambosala loseka.” Oma l’ɛtɛkɛta wa Yeso ɛsɔ, sho mbekaka dia 1) awui wa mindo wa dieyanelo mbele ɔkɔkɔ ɔtɔi wa l’Afundelo wakoka nkonya anto dia ndjaka diwala ndo 2) ɔnɛ onto ladiaka diwala la wadɛnde aha l’ɔkɔkɔ wa l’Afunde ko ntshuka wadi okina, ambosala loseka. *

Onde ɛtɛkɛta wa Yeso ɛsɔ nembetshiyaka dia pami kasala awui wa mindo wa dieyanelo ndo kadiaka diwala la wadɛnde ekɔ la lotshungɔ l’oma l’Afundelo la ntshuka nto? Keema. Etena kasalema loseka lo diwala, olonganyi wele bu l’onongo mbɔsaka yɛdikɔ ya kana nde koka dimanyiya omɛnde kana mbɔsɛka. Naka nde ambɔɔsɛka ndo ambodiaka la nde diwala lo yoho yetawɔ ɛlɛmbɛ, kete vɔ ahende waya la lotshungɔ la ntshukana nto l’ɔkɔngɔ wa nsala awui tshɛ wendana l’odiakelo wa diwala.

Lo wedi okina, olonganyi wele bu l’onongo koka monga la nsaki k’oma k’ɛse otema ka nama diwala diawɔ ndo nkɛnɛmɔla nsaki ka dimanyiya omɛnde. Ko kayotota naka kaanga mbambetawɔ wadi dia mbodimanyiya, omi lakasale loseka ambotona ndo ambotodiaka diwala laka lɛɛta aha la lolango la wadɛnde? Lam’ele wadi mbetawɔka mbodimanyiya ndo ntetemala la diwala diawɔ, omi honga la lotshungɔ l’oma l’Afunde la ntshuka nto. Naka nde ntshininala dia nsala akambo lo yoho yahɔtɔnɛ l’Afundelo ndo ntshuka womoto okina etena kele nde bu la lotshungɔ l’oma l’Afundelo la nsala dui sɔ, kete nde ambosala loseka nto ndo dui sɔ diayonga ɔkɔkɔ okina wa kɔmite ka kilombo kengama.​—1 Kɔr. 5:1, 2; 6:9, 10.

Lam’ele pami kɛsɔ bu la lotshungɔ l’oma l’Afundelo la ntshuka nto, ngande wakoka etshumanelo mbɔsa diwala diande dia ntondo ndo di’oyoyo? Onde diwala diande dia ntondo diayotetemala mbetawɔma lo ndjela Afundelo? Onde olonganyi wele bu l’onongo koka ntetemala mbɔsa yɛdikɔ ya dimanyiya kana nsɛka ɔnɛ laki omɛnde? Onde diwala diande di’oyoyo koka mbɔsama oko diwala dia loseka?

Lo nshi y’edjedja, etshumanelo kakɔsaka diwala di’oyoyo oko diwala dia loseka l’edja tshɛ kaki olonganyi wele bu l’onongo la lɔsɛnɔ, kakinde atatshukama ndo kakinde atasale awui wa mindo wa dieyanelo. Koko, Yeso kodimola olonganyi  wele bu l’onongo etena kakandatɛkɛta dia ndjaka diwala ndo ntshukana nto. Koko, nde akalembetshiya dia pami kadiaka diwala aha l’ɔkɔkɔ wa l’Afundelo ndo oma laasɔ ntshuka womoto okina, ambosala loseka. Lo dikambo sɔ, ndjaka diwala ndo ntshuka nto, oko wakate Yeso ekɔ mɛtɛ oko nde ambosala loseka, ndo dui sɔ mbakomiya diwala dia ntondo.

Naka pami ambodiaka diwala la wadɛnde ndo ambotshuka nto, kete hayokoka nto dia wadɛnde la ntondo lele bu l’onongo mbodimanyiya kana mbɔsɛka. Ɔnkɔnɛ, nde aya bu l’ɔkɛndɛ wa woke wa mbɔsa yɛdikɔ ya kana nde kokaka dimanyiya kana nsɛka ɔnɛ laki omɛnde. Laadiko dia laasɔ, oyadi olonganyi wele bu l’onongo ambovɔ, ambotshukama nto kana ambosala awui wa mindo wa dieyanelo, dui sɔ hatshikitanya woho wɔsa etshumanelo diwala di’oyoyo. *

La diko takasɛdingodi ɛnyɛlɔ k’omi lakasale loseka ko dui sɔ diambokonya dia ndjaka diwala. Ko kayotota naka omi kosala loseka koko ambodiaka diwala ndo oma laasɔ ambotshuka nto? Kana kayotota naka omi kosala awui wa mindo wa dieyanelo la ntondo ka ndjaka diwala, koko amboyosala dui sɔ l’ɔkɔngɔ wa ndjaka diwala ndo oma laasɔ ambotshuka nto kaanga mbetawɔ wadɛnde mbodimanyiya? Lo bɛnyɛlɔ sɔ tshɛ, ndjaka diwala ndo ntshuka nto ekɔ loseka ndo dui sɔ kokaka nkomiya diwala dia ntondo. Diwala di’oyoyo ekɔ diɔtɔnganelo dietawɔma lo ndjela ɛlɛmbɛ. Oko wakadiatama lo Tshoto y’Etangelo ya Ngɔndɔ ka hende 15, 1980, lɛkɛ 31-32 lo Falase, “etena kambondotshuka nto, nde hayokoka ntshikitanya awui wakete; diwala diande dia ntondo diakakomɛ etena kakawadiake diwala, kakandasale loseka ndo kambondotshuka nto.”

Woho wambotshikitana eokelo kaso kɛsɔ halembetshiya ɔnɛ tɔɔsa dia diwala bu ekila kana ɔnɛ loseka bu pɛkato ka woke. Pami kadiaka diwala la wadɛnde aha l’ɔkɔkɔ wetawɔma l’Afundelo ndo oma laasɔ ntshuka womoto okina aha la monga la lotshungɔ l’oma l’Afundelo la nsala dui sɔ, pombaka mbɔtɔ lo kɔmite ka kilombo l’ɔtɛ wa loseka. (Naka olonganyi ande w’oyoyo ekɔ Okristo, nde lawɔ pombaka mbɔtɔ lo kɔmite ka kilombo l’ɔtɛ wa loseka.) Kaanga mbele diwala di’oyoyo hɔsama oko diwala dia loseka, pami hokotsha kɛnɛ kalɔmbama dia mɛmba ɛkɛndɛ wa laande w’olimu l’etshumanelo l’edja k’ɛnɔnyi efula ndo anto hawototshika mbonyangɛ l’ɔtɛ w’awui wa kɔlɔ wakandasale lo nshi yakete ndo hawototshika nkanyiya ɔnɛ nde hasungana nɛmiyama. La ntondo ka mbosha ɔkɛndɛ tshɛ w’olimu, dikumanyi pombaka nkanyiya awui wa nshi nyɛ wendana l’olonganyi wa ntondo wele ondo akoosalɛ akambo la lokeso ndo ana wa totshitshɛ wele ondo olonganyi wakasale pɛkato akaakalɛ.​—Mal. 2:14-16.

Lo menda etombelo wa kɔlɔ wonga naka onto ndjaka diwala lo yoho yahɔtɔnɛ l’Afundelo ndo ntshuka nto, ekɔ dui dia lomba di’Akristo nsukɛ kanyi ya Jehowa y’ɔnɛ diwala diekɔ ekila.​—Ond. 5:4, 5; Hɛb. 13:4.