1-2. a) Lo yoho ya laande etena kakɔna katotohɔka lakiso ɔmɔtshi la ngandji lakavu? b) Kakɔna kakahɔhɔla Yeso l’otsho wa la ntondo ka nde mvɔ?

OYADI edja ka ngande kambovɔ wakiso wa ngandji, sho tetemalaka mbaohɔ. Sho ndekaka mbaohɔ djekoleko etena kakoka datɛ diakawavu.

² Ɔnɔnyi tshɛ, sho mongaka l’atei wa miliyɔ y’anto wa l’andja w’otondo wasangana kaamɛ dia mbohɔ nyɔi k’onto ɔmɔtshi lalangaso efula, mbuta ate Yeso Kristo. (1 Pe. 1:8) Sho sanganaka kaamɛ dia mbohɔ onto lakakimɔ lɔsɛnɔ lande oko oshinga w’etshungwelo dia toshimbɛ oma lo pɛkato la nyɔi. (Mat. 20:28) Lo mɛtɛ, Yeso akalange di’ambeki ande mbohɔka nyɔi kande. L’otsho wa la ntondo ka nyɔi kande, nde akahɔhɔla dambo dia dikɔlɔ dia laande ndo akawadjangɛ ate: “Kanyotshake ɔnkɔnɛ dia mbohɔkami.” *​—Luka 22:19.

3. Kakɔna kayotɔsɛdingola lo sawo nɛ?

³ Djui ya tshitshɛ ya wanɛ wɔtɔ lo Eohwelo ka nyɔi ka Kristo mbele l’elongamelo ka tɔsɛna l’olongo. Koko miliyɔ efula ya wanɛ wele l’elongamelo ka nsɛna la nkɛtɛ mongaka lawɔ. Lo sawo nɛ, tayɔsɛdingola ɛkɔkɔ wɛnya lande na kalomɔlomɔ elui akɔ ehende dia mbɔtɔ lo Eohwelo ɔnɔnyi tshɛ. Tayɔsɛdingola nto wahɔ wakondjaso lo mbɔtɔ lɔkɔ. Nyɛsɔ totate nsɛdingola ɛkɔkɔ ɛmɔtshi wɛnya lande na kɔtɔ akitami lo Eohwelo.

4. Lande na kalɛ akitami mapa ndo kanɔwɔ vinyɔ lo Eohwelo?

⁴ Ɔnɔnyi tshɛ, akitami wɔtɔ lɔ Eohwelo ndɛka mapa ndo nɔka vinyɔ. Lande na kalɛwɔ mapa ndo kanɔwɔ vinyɔ? Dia nkadimola lo dimbola sɔ, nyɛsɔ tɔsɛdingole kɛnɛ kakatombe l’otsho w’ekomelo ka lɔsɛnɔ la Yeso lanɛ la nkɛtɛ. L’ɔkɔngɔ wa dambo di’Elekanelo, Yeso akahɔhɔla kɛnɛ kelamɛ ɔnɛ Dambo dia dikɔlɔ dia Nkumadiɔndjɔ. L’ɔkɔngɔ wa nde mbetshetsha mapa ndo vinyɔ le apɔstɔlɔ 11 wa kɔlamelo, nde akawatɛ dia vɔ ndɛ ndo dia nnɔ. Yeso akawatɛ dia toseke tohende, kana waokanelo, mbuta ate sheke y’oyoyo ndo sheke ya Diolelo. * (Luka 22:19, 20, 28-30) Toseke tɔsɔ takadiholɛ apɔstɔlɔ ndo lofulo la tshitshɛ l’anto akina mboka dia vɔ nkoma nkumi ya dikanga ndo ɛlɔmbɛdi l’olongo. (Ɛny. 5:10; 14:1) Paka atshikadi w’akitami, * wanɛ wele lo toseke tohende tɔsɔ mbakoka ndɛ mapa ndo nnɔ vinyɔ lo Eohwelo.

5. Kakɔna keya akitami lo kɛnɛ kendana la elongamelo kakawakondja?

⁵ Ɔkɔkɔ okina wɛnya lande na kalomɔlomɔ akitami dia mbɔtɔ lo Eohwelo vɔ ɔnɛ: Losanganya lɔsɔ mbashaka diaaso dia vɔ nkana yimba lo elongamelo kawɔ. Jehowa akawasha elongamelo ka diambo ka monga la lɔsɛnɔ lahavu ndo la demba diahahɔndɛ l’olongo, dia tokamba kaamɛ la Yeso Kristo lakolwama ndo l’akitami akina wa l’atei wa 144 000 ndo laadiko di’akambo tshɛ dia monga la ntondo ka Jehowa Nzambi! (1 Kɔr. 15:51-53; 1 Jni. 3:2) Akitami mbeyaka dia vɔ wakelamɛ dia toonga la waɛsɛ asɔ l’olongo. Koko dia mbetawɔma dia ntshɔ l’olongo, vɔ pombaka ntshikala la kɔlamelo polo lo nyɔi kawɔ. (2 Tim. 4:7, 8) Akitami wekɔ l’ɔngɛnɔngɛnɔ w’efula etena kakanyiyawɔ dikambo dia elongamelo kawɔ k’otsha l’olongo. (Tito 2:13) Ko kayotota dia “ɛkɔkɔ ekina”? (Jni. 10:16) Naa ɛkɔkɔ ɛmɔtshi wɔtɔwɔ lo Eohwelo?

6. Lande na kɔtɔ ɛkɔkɔ ekina lo Eohwelo ɔnɔnyi tshɛ?

⁶ Ɛkɔkɔ ekina mbɔtɔka lo Eohwelo, aha oko anto walɛ mapa kana wanɔ vinyɔ, koko oko anto wasɛdingola kɛnɛ keta. Lo 1938, wanɛ waki l’elongamelo ka nsɛna la nkɛtɛ wakelamɛ mbala ka ntondo lo yoho ya shikaa dia mbɔtɔ lo Eohwelo. Tshoto y’Etangelo ya Ngɔndɔ ka ntondo 1, 1938 lo Angɛlɛ yakate ɔnɛ: “Ayonga mɛtɛ dui dia dimɛna ndo diasunga dia [ɛkɔkɔ ekina] monga lawɔ lo losanganya lɔsɔ ndo nsɛdingola kɛnɛ kasalema. . . . Ɔsɔ pombaka monga ndo ekɔ etena k’ɔngɛnɔngɛnɔ ndo le wɔ.” L’ɛnyɛlɔ ka wanɛ wakelamɛ wonga l’ɔngɛnɔngɛnɔ dia menda woho wasalema fɛtɛ kɛmɔtshi ka diwala, mbele ɛkɔkɔ ekina mongaka l’ɔngɛnɔngɛnɔ dia mbɔtɔ lo Eohwelo oko anto wenda kɛnɛ keta.

7. Lande na kakongɛ ɛkɔkɔ ekina sawo dia Eohwelo l’asolo walomɔlomɔ?

⁷ Ɛkɔkɔ ekina vɔ lawɔ kanaka yimba lo elongamelo kawɔ. Vɔ kongɛka sawo dia Eohwelo l’asolo walomɔlomɔ, nɛ dia diɔ ndekaka mendana la kɛnɛ kayosalɛ Kristo nde l’anto 144 000 wayolɛ kaamɛ la nde anto wele la kɔlamelo lo Ɛlɔmbwɛlɔ k’ɛnɔnyi kinunu. Lo ɛlɔmbwɛlɔ ka Nkumekanga Yeso Kristo, wanɛ wayolɛ kaamɛ la nde l’olongo wayosha lonya dia mbetɛ nkɛtɛ paradiso ndo nkonya anto wele l’okitanyiya kokele. Ɔsɔ  ayonga mɛtɛ dui di’ɔngɛnɔngɛnɔ le miliyɔ y’anto wɔtɔ lo Eohwelo oko anto wenda kɛnɛ keta dia nkanyiya woho wayokotshama prɔfɛsiya ya lo Bible lo nshi yayaye, ɛnyɛlɔ prɔfɛsiya yatanema lo Isaya 35:5, 6; 65:21-23; ndo Ɛnyɛlɔ 21:3, 4. Lo monga oko anto wele l’andja w’oyoyo vɔ la wakiwɔ wa ngandji, vɔ keketshaka elongamelo kawɔ kendana la nshi yayaye ndo yɛdikɔ yawɔ yaha ntshika pondjo kambɛ Jehowa.​—Mat. 24:13; Ngal. 6:9.

8. Naa ɔkɔkɔ okina wɔtɔ ɛkɔkɔ ekina lo Eohwelo?

⁸ Tɔsɛdingole ɔkɔkɔ okina wɔtɔ ɛkɔkɔ ekina lo Eohwelo. Vɔ nangaka mɛnya ngandji kawɔ ndo woho wasukɛwɔ akitami. Ɔtɛkɛta wa Nzambi wakatatshi dia dimama dia wolo diayonga lam’asa akitami la wanɛ wele l’elongamelo ka nsɛna la nkɛtɛ. Lo woho akɔna? Nyɛsɔ tɔsɛdingole bɛnyɛlɔ dimɔtshi.

9. Kakɔna kɛnya prɔfɛsiya ka lo Zɛkariya 8:23 lo dikambo dia woho wɔsa ɛkɔkɔ ekina akitami?

⁹ Adia Zɛkariya 8:23. Prɔfɛsiya kɛnɛ kɔndɔlaka lo yoho ya dimɛna efula woho wɔsa ɛkɔkɔ ekina anangɛwɔ l’akadiyɛwɔ w’akitami. Ɛtɛkɛta w’ɔnɛ “ose Juda” ndo “la nyu” mendanaka la olui akɔ waamɛ, mbuta ate atshikadi w’akitami. (Rɔmɔ 2:28, 29) “Anto 10 w’oma l’ɛtɛkɛta tshɛ wa wedja” wekɔ didjidji di’ɛkɔkɔ ekina. Vɔ ‘kimɛka,’ mbuta ate vɔ mamemaka akitami la kɔlamelo tshɛ lo monga kaamɛ la wɔ l’ɔtɛmwɛlɔ wa pudipudi. Laasɔ, la dikɔlɔ dia Eohwelo, ɛkɔkɔ ekina mɛnyaka woho wamamemawɔ akitami lo monga kaamɛ la wɔ.

10. Kakɔna kakasale Jehowa dia nkotsha prɔfɛsiya ka lo Ɛzɛkiyɛlɛ 37:15-19, 24, 25?

¹⁰ Adia Ɛzɛkiyɛlɛ 37:15-19, 24, 25. Jehowa akakotsha prɔfɛsiya kɛnɛ lo nsala di’akitami ndo ɛkɔkɔ ekina nkamba kaamɛ dihɛka lo dihɛka. Prɔfɛsiya kɛnɛ tɛkɛtaka dia totenyi tohende t’esongo. Wanɛ wele l’elongamelo ka tɔsɛna l’olongo wekɔ oko tshenyi y’osongo “dikambo dia Juda” (dioho diele oma lɔkɔ mbakasɔnama nkumi ya dikanga y’Isariyɛlɛ), ndo wanɛ wele l’elongamelo ka nsɛna la nkɛtɛ wekɔ oko tshenyi y’osongo “ya Efarayimɛ.” * Jehowa akasale di’elui ehende ɛsɔ monga kaamɛ ndo nkoma “tshenyi y’osongo tshɔi.” Kɛsɔ nembetshiyaka dia vɔ wekɔ lo nkamba kaamɛ lo ɛlɔmbwɛlɔ ka Nkumekanga kawɔ ɔtɔi, Kristo Yeso. Ɔnɔnyi tshɛ, akitami ndo ɛkɔkɔ ekina mbɔtɔka lo Eohwelo, aha oko elui ehende watɔnyi, koko oko “olui 1” ndo l’ɛlɔmbwɛlɔ ka “olami 1.”​—Jni. 10:16.

11. Naa yoho ya ntondo yɛnya “ɛkɔkɔ” wɔtɛkɛtshiwɔ lo Mateo 25:31-36, 40 woho wasukɛwɔ anango Kristo?

¹¹ Adia Mateo 25:31-36, 40. “Ɛkɔkɔ” wa lo wɛɛla ɔnɛ wekɔ didjidji di’anto w’ɛlɔlɔ wa lo etena k’ekomelo wele l’elongamelo ka nsɛna la nkɛtɛ, mbuta ate ɛkɔkɔ ekina. Vɔ sukɛka la kɔlamelo tshɛ atshikadi w’akitami w’anango Kristo ntondotondo lo mbaakimanyiya dia vɔ nkotsha ɔkɛndɛ wa woke wakawalongola, mbuta ate olimu wa nsambisha ndo wa mbetɛ anto ambeki l’andja w’otondo.​—Mat. 24:14; 28:19, 20.

12-13. Naa toho tokina tɛnya ɛkɔkɔ ekina dia vɔ sukɛka anango Kristo?

¹² Ɔnɔnyi tshɛ lo mingu y’otsha lo Eohwelo, ɛkɔkɔ ekina mɛnyaka woho wasukɛwɔ anango Kristo lo ndjasha tshɛ lo esambishelo ka laande ka mbelɛ anto oya lo Eohwelo. (Enda kiombo yata ɔnɛ: “ Onde wɛ amboyalɔngɔsɔla la ntondo dikambo dia nshi ya Eohwelo?”) Vɔ kimanyiyaka nto lo nsala ɛlɔngɔswɛlɔ wahombama dia Eohwelo salema lo etshumanelo tshɛ l’andja w’otondo, kaanga mbele lo  tshumanelo dioleki efula ndooko onto lalɛ mapa kana lanɔ vinyɔ. Ɛkɔkɔ ekina ngɛnangɛnaka nsukɛ anango Kristo lo toho tɔsɔ. Ɛkɔkɔ ɛsɔ mbeyaka dia Yeso mbɔsaka kɛnɛ kasalɛwɔ anango w’akitami oko nde mbasalɛwɔ awui asɔ.​—Mat. 25:37-40.

¹³ Naa ɛkɔkɔ ekina watotshutshuya sho tshɛ, oyadi elongamelo kele la so dia mbɔtɔ lo Eohwelo?

14. Ngande wakɛnya Jehowa nde la Yeso ngandji k’efula katokawɔ?

¹⁴ Tekɔ la lowando efula l’ɔtɛ wa ngandji kakatoke Jehowa nde la Yeso. Jehowa akɛnya ngandji katokande lo toho efula, koko yoho mɔtshi ndeka toho tokina tshɛ. Nde akatɛnya yoho yoleki woke yatokande ngandji lo ntoma Ɔnande la nɛmɔ dia ndjosowa ndo ndjovɔ lo dikambo diaso. (Jni. 3:16) Sho mbetawɔka dia Yeso nde lawɔ akatɛnya ngandji efula lo mbetawɔ la lolango tshɛ dia nkimɔ lɔsɛnɔ lande lo dikambo diaso. (Jni. 15:13) Hatokokaki pondjo mfuta Jehowa nde la Yeso l’ɔtɛ wa ngandji kakawatɛnya. Koko sho kokaka mɛnya lowando laso oma lo yoho ya lɔsɛnɔ yasɛnaso lushi tshɛ. (Kɔl. 3:15) Ndo sho mbɔtɔka lo Eohwelo dia mbohɔ ngandji kakawatoke ndo dia mbaɛnya ngandji kawaokaso.

15. Lande na kele akitami la ɛkɔkɔ ekina mbɔsaka la nɛmɔ di’efula woshasha w’oshinga w’etshungwelo?

¹⁵ Sho mbɔsaka woshasha w’oshinga w’etshungwelo la nɛmɔ efula. (Mat. 20:28) Akitami mbɔsaka oshinga w’etshungwelo la nɛmɔ nɛ dia diɛsɛ l’oshinga w’etshungwelo mbewɔ l’elongamelo ka diambo kɛsɔ. L’ɔtɛ wa mbetawɔ kawɔ l’olambo wa Kristo, Jehowa mbaɔsaka oko anto w’ɛlɔlɔ ndo nde akawaote oko anande wa yanyi. (Rɔmɔ 5:1; 8:15-17, 23) Ɛkɔkɔ ekina vɔ lawɔ wekɔ la lowando l’efula l’ɔtɛ w’oshinga w’etshungwelo. Oma lo mbetawɔ kawɔ lo dikila diakatshulola Kristo, vɔ mbɔsamaka oko anto wa pudipudi la ntondo ka Nzambi ndo oko anto wakoka mbokambɛ olimu w’ekila, ndo wele la elongamelo ka shimbamɛ lo “mfɔnu ka woke.” (Ɛny. 7:13-15) Yoho kina yɛnya akitami ndo ɛkɔkɔ ekina lowando lawɔ l’oshinga w’etshungwelo ele lo mbɔtɔka lo Eohwelo ɔnɔnyi tshɛ.

16. Naa ɔkɔkɔ okina wɔtɔso lo Eohwelo?

¹⁶ Ɔkɔkɔ okina wɔtɔso lo Eohwelo ele sho nangaka nkitanyiya Yeso. Oyadi elongamelo kakɔna kele laso ka lo nshi yayaye, sho tshɛ onto l’onto nangaka nkitanyiya didjango dia Yeso diakandasha l’otsho wakandahɔhɔla Eohwelo ate: “Kanyotshake ɔnkɔnɛ dia mbohɔkami.”​—1 Kɔr. 11:23, 24.

17. Ngande watokimanyiya Eohwelo dia ndeka ndjasukanya la Jehowa?

¹⁷ Sho ndekaka ndjasukanya la Jehowa. (Jak. 4:8) Oko wakatadiɛnyi, Eohwelo toshaka diaaso dia nkana yimba lo kɛnɛ kendana la elongamelo kakatosha Jehowa ndo lo ngandji k’efula kakandatoke. (Jɛr. 29:11; 1 Jni. 4:8-10) Etena kakanaso yimba lo elongamelo ka shikaa kendana la nshi yayaye ndo lo ngandji kahakomɛ katoka Jehowa, sho fudiaka ngandji kaso hita le Jehowa ndo keketshaka dimama diele lam’asaso la nde.​—Rɔmɔ 8:38, 39.

18. Nkana yimba lo ɛnyɛlɔ ka Yeso totshutshuyaka dia nsala na?

¹⁸ Sho keketshamaka dia mbokoya ɛnyɛlɔ ka Yeso. (1 Pe. 2:21) Lo nshi y’otsha lo Eohwelo, sho mbikaka washo l’ɛkɔndɔ wa lo Bible wendana la lomingu l’ekomelo la lɔsɛnɔ la Yeso lanɛ la nkɛtɛ, lo nyɔi kande, ndo lo eolwelo  kande. Oma laasɔ, la dikɔlɔ dia Eohwelo, sawo toholaka ngandji kakatoke Yeso. (Ɛf. 5:2; 1 Jni. 3:16) Etena kadiaso awui wendana la ɛnyɛlɔ ka ndjahondja kaki Yeso ndo kakanaso yimba lɔkɔ, sho tshutshuyamaka dia “nkɛndakɛnda oko wakakɛndakɛndaka onto ɔsɔ.”​—1 Jni. 2:6.

19. Ngande wakokaso ntshikala lo ngandji ka Nzambi?

¹⁹ Tamboleka ndjashikikɛ dia ntshikala lo ngandji ka Nzambi. (Judɛ 20, 21) Sho tshikalaka lo ngandji ka Nzambi lo nsala kɛnɛ tshɛ kakokaso nsala dia mbookitanyiya, nkidia lokombo lande, ndo ngɛnyangɛnya otema ande. (Tok. 27:11; Mat. 6:9; 1 Jni. 5:3) Wɔtwɛlɔ wa lo Eohwelo totshutshuyaka dia ndeka ndjashikikɛ dia sɛnaka lushi tshɛ lo yoho yatɛ Jehowa ɔnɛ: ‘Dimi nangaka ntshikala lo ngandji kayɛ pondjo pondjo!’

20. Naa ɛkɔkɔ w’eshika wele laso wa mbɔtɔ lo Eohwelo?

²⁰ Oyadi tekɔ l’elongamelo ka tɔsɛna l’olongo kana la nkɛtɛ, tekɔ la ɛkɔkɔ w’eshika wa mbɔtɔ lo Eohwelo. Ɔnɔnyi tshɛ, etena katshumanaso kaamɛ lo datɛ sɔ, sho mbohɔka nyɔi k’onto ɔmɔtshi lokaso ngandji, Yeso Kristo. Laadiko di’akambo asɔ tshɛ, sho mbohɔka tshelo ya ngandji koleki, mbuta ate ngandji kakatoke Jehowa lo nkimɔ Ɔnande oko oshinga w’etshungwelo. Ɔnɔnyi ɔnɛ, Eohwelo kayosalema la dikɔlɔ dia Lushi la tanu, Ngɔndɔ ka nɛi 15, 2022. Sho mbokaka Jehowa la Ɔnande ngandji, diakɔ diele lo lushi lakavu Yeso lɔsɔ, dui diayoleka monga ohomba le so ele mbɔtɔ lo Eohwelo.