“Etena kakatatɛ ɔnaki ɔnango mama ɔmɔtshi ndɔshami, dimi lakokimɛ lo wodi ndo lakatatɛ mbosotshasotsha. Lakalange mbodiaka.”​—Paul.

“La ngelo dimi momalaka esadi, kaanga aha l’ɛkɔkɔ w’eshika. Dimi ndanyaka diangɔ dia lo luudu, diangɔ dia tɔkɛnyɔ, kɛnɛ tshɛ konga la mi l’anya.”​—Marco.

Ondo aha sho tshɛ mbakoka momala ngasɔ. Koko, sho tshɛ mongaka l’okakatanu wa ndjakimɛ lo tena dimɔtshi. Ntondotondo dui sɔ diekɔ nɛ dia takahowɔ pɛkato oma le Adama, pami ka ntondo. (Rɔmɔ 5:12) L’ɛnyɛlɔ ka Paul la Marco, amɔtshi mongaka l’okakatanu dia ndjakimɛ. Amɔtshi koka monga l’okakatanu dia mbahemɛ tokanyi tawɔ. Ɛnyɛlɔ, vɔ tetemalaka nkanyiya awui wawasha wɔma kana waakɔmɔla. Akina koka monga l’okakatanu wa mbahemɛ nsaki ka nsala awui wa mindo wa dieyanelo, wanu wa tshamba ndeko kana didjoyadjoya.

Wanɛ wahahemɛ tokanyi, nsaki ndo etsha awɔ koka ndanya nsɛnɔ yawɔ. Koko sho koka mbewɔ dui sɔ. Lo ngande? Lo nkɛnɛmɔla ndjakimɛ. Dia tokimanyiya dia nsala dui sɔ, nyɛsɔ tɔsɛdingole ambola asato anɛ: 1) Ndjakimɛ kɛdikɛdi na? 2) Lande na ketɔ ohomba? 3) Ngande wakokaso nkɛnɛmɔla dionga dia lo “olowa wa nyuma” sɔ? (Ngal. 5:22, 23) Oma laasɔ, tayɔsɛdingola kɛnɛ kakokaso nsala shoamɛ naka lo tena dimɔtshi taya bu la ndjakimɛ.

Onto lele la ndjakimɛ hasale akambo lo ndjela nsaki tshɛ konga lande. Koko, nde ndjakimɛka dia ntɛkɛta ndo dia nsala akambo lo yoho yahangɛnyangɛnya Nzambi.

Yeso akatɛnya kɛnɛ kalembetshiya ndjakimɛ. Bible mbutaka ɔnɛ: “Etena kakawɔtɛngaka, nde kombatɛngaka. Etena kakandasoyamaka, nde komanɛka wanɛ wakoosoyaka, koko nde akayakimɔ le Ɔnɛ lalombosha la losembwe.” (1 Pe. 2:23) Yeso akakɛnɛmɔla ndjakimɛ kɛsɔ etena kakawɔnyɔla atunyi ande ndo kakawohanɛ l’otamba w’asui. (Mat. 27:39-44) Ntondo ka laasɔ, nde akɛnya ndjakimɛ k’efula etena kakalange ewandji w’ɛtɛmwɛlɔ mbonda lo lolemi. (Mat. 22:15-22) Ndo nde akatshike ɛnyɛlɔ ka dimɛna etena kakatɔngɔna ase Juda amɔtshi waki la kɛlɛ ave dia mbooka! Lo dihole dia nsɔmbɔya, “Yeso akayashɛ ndo akatombe oma lo tɛmpɛlɔ.”​—Jni. 8:57-59.

Onde hatokoke mbokoya ɛnyɛlɔ ka Yeso? Sho koka mbookoya lo yɛdikɔ mɔtshi. Ɔpɔstɔlɔ Petero akafunde ate: “Kristo akanyosowɛ ndo akanyotshikɛ ɛnyɛlɔ dia nyu mboyela dimɛna dimɛna lo wanya ande.” (1 Pe. 2:21) Kaanga mbeso bu kokele, sho koka ndjela dimɛna dimɛna ɛnyɛlɔ ka Yeso ka ndjakimɛ. Lande na kele ekɔ ohomba sho nsala dui sɔ?

Sho pombaka monga la ndjakimɛ dia sho mbetawɔma le Jehowa. Oyadi tambokambɛ Jehowa la kɔlamelo l’edja k’ɛnɔnyi, sho koka nshisha diɔtɔnganelo diasaso la nde naka hatahemɛ kɛnɛ kasalaso ndo kataso.

Tɔsɛdingole ɛnyɛlɔ ka Mɔsɛ, laki “onto lakaleke anto tshɛ wa la nkɛtɛ memakana” lo nshi shɔ. (Wal. 12:3) L’ɔkɔngɔ wa mbikikɛ la solo dia lotutsha l’edja k’ɛnɔnyi akumi woho wakayakiyanyaka ase Isariyɛlɛ, Mɔsɛ akashisha ndjakimɛ. Nde akoke nkɛlɛ etena kakawayakiyanya nto l’ɔtɛ wakawahombe ashi. Nde akatondjɛ wodja ɛtɛkɛta wa kɔlɔ, lo mbuta ɔnɛ: “Nyu atɔmbɔki le, nyohokame! Onde tonyotondje ashi oma lo dive nɛ?”​—Wal. 20:2-11.

Mɔsɛ kondjakimɛ. Nde kombisha Jehowa lotombo oko wakinde Kiɔkɔ y’ashi wakatombe lo dihindo. (Os. 106:32, 33) Etombelo wakonge ele, Jehowa kombetawɔ dia nde mbɔtɔ lo Nkɛtɛ ya Daka. (Wal. 20:12) Polo lushi lakandavu, Mɔsɛ akanyange l’ɔtɛ wakandashisha ndjakimɛ.​—Eoh. 3:23-27.

Wetshelo akɔna wakondjaso? Oyadi tambeya akambo wa mɛtɛ l’edja k’ɛnɔnyi efula, hatohombe pondjo mbitɛ anto wambototsha nkɛlɛ kana wahomba mingɔma ɛtɛkɛta wele bu la dilɛmiɛlɔ. (Ɛf. 4:32; Kɔl. 3:12) Lo mɛtɛ, oko watatatshunde esombe, ondo solo dia lotutsha diaso koka nkitakita. Koko katohɔke ɛnyɛlɔ ka Mɔsɛ. Hatohombe ndanya diɔtɔnganelo dia dimɛna diasaso la Jehowa l’ɔtɛ weso bu la ndjakimɛ. Akokaso nsala dia nkɛnɛmɔla dionga di’ohomba sɔ?

Lɔmba dia nkondja nyuma k’ekila. Lande na? Nɛ dia ndjakimɛ kekɔ dionga dimɔtshi dia olowa wa nyuma ka Nzambi, ndo Jehowa mbishaka wanɛ wɔlɔmba nyuma kande. (Luka 11:13) Lo tshimbo ya nyuma kande, Jehowa koka tosha wolo weso l’ohomba. (Flpɛ. 4:13) Nde koka tokimanyiya nto dia nkɛnɛmɔla waonga akina w’olowa wa nyuma, ɛnyɛlɔ ngandji, tɔ kayotokimanyiya dia nkeketsha ndjakimɛ kaso.​—1 Kɔr. 13:5.

Ewɔ dui tshɛ diakoka kokonya diaha monga la ndjakimɛ. Ɛnyɛlɔ, ewɔ sitɛ y’Ɛtɛrnɛtɛ ndo tɔkɛnyɔ ta kɔlɔ. (Ɛf. 5:3, 4) Lo mɛtɛ, sho pombaka mbewɔ dui tshɛ diakoka tohemba dia nsala kɔlɔ. (Tok. 22:3; 1 Kɔr. 6:12) Ɛnyɛlɔ, onto lakoka pembama esadi eto dia nsala awui wa mindo, koka mbɔsa yɛdikɔ ya  ndjanganya tshɛ lo tshɛ la abuku ndo filmɛ yatɛkɛtawɔ awui wa ngandji.

Sho koka monga l’okakatanu dia nkamba la dako sɔ. Koko, naka sho mbidja welo, kete Jehowa ayotosha wolo wele la so ohomba dia ndjakimɛ. (2 Pe. 1:5-8) Nde ayotokimanyiya dia mbahemɛ tokanyi, ɛtɛkɛta ndo etsha aso. Dui sɔ diekɔ mɛtɛ, nɛ dia Paul ndo Marco, anto wakatatɛkɛtshi la diko, wakeke woho wa mbahemɛ dionga dia ndjawudi. Tɔsɛdingole nto ɛnyɛlɔ ka ɔnangɛso ɔmɔtshi laki kondjakimɛka mbala efula ndo lakawanaka l’anto akina etena kakandakɛndjakɛndjaka mutuka. Kakɔna kakandasale lo dikambo sɔ? “Lakalɔmbaka l’etete lushi tshɛ. Lakeke asawo wendana la ndjakimɛ ndo lakakimɛ avɛsa w’ohomba wa lo Bible. Kaanga mbadjami welo l’edja k’ɛnɔnyi, ekɔ ohomba le mi dia ndjadjɛka oyango l’etatelo ka lushi tshɛ dia ntshikala ki. Ndo dimi mbetɔka esadi dia tohomana l’anto wakokana la mi diaha dimi ndjonga ko lotatshu esadi esadi.”

Lo tena dimɔtshi, sho koka nshisha ndjakimɛ. Naka dui sɔ diambotokomɛ, ondo sho koka mboka sɔnyi dia ndjasukanya la Jehowa lo dɔmbɛlɔ. Koko ɔsɔ ekɔ etena kahombaso ndeka nɔmba. Diakɔ diele, lɔmba Jehowa aha la ntshimbatshimba. Lɔmbande dia kodimanyiya, dia kokimanyiya, ndo dia wɛ mbɔsa yɛdikɔ diaha kalolɛ munga kakɔ kaamɛ. (Os. 51:9-11) Jehowa honya yimba lo dɔmbɛlɔ diayɛ dia kɛtshi dia l’otema ɔtɔi. (Os. 102:17) Ɔpɔstɔlɔ Joani toholaka dia dikila di’Ɔna Nzambi “diekɔ lo tɛdia oma lo pɛkato tshɛ.” (1 Jni. 1:7; 2:1; Os. 86:5) Ohɔ dia Jehowa mbitɛka ekambi ande dia dimanyiyaka anto mbala la mbala. Diakɔ diele, sho koka ndjashikikɛ ɔnɛ nde ayotosalɛ woho akɔ waamɛ.​—Mat. 18:21, 22; Kɔl. 3:13.

Jehowa akanyange etena kakashisha Mɔsɛ ndjakimɛ kande lo tshanda mɔtshi l’oswe wa shɛnga. Kaanga mbakidiɔ ngasɔ, Jehowa akoodimanyiya. Ndo Ɔtɛkɛta wa Nzambi mbitaka dia Mɔsɛ ekɔ ɛnyɛlɔ ka diambo kendana la mbetawɔ. (Eoh. 34:10; Hɛb. 11:24-28) Jehowa kombetawɔ dia Mɔsɛ mbɔtɔ lo Nkɛtɛ ya Daka, koko Nde ayetawɔ dia Mɔsɛ mbɔtɔ lo Paradiso ka la nkɛtɛ ndo mbosha elongamelo ka sɛnaka pondjo pondjo. Sho koka monga l’elongamelo kakɔ kaamɛ naka sho ntetemala mbidja welo dia nkɛnɛmɔla dionga di’ohomba dia ndjakimɛ.​—1 Kɔr. 9:25.