LISA * akate ate: “Ɔlɔlɔ w’anangɛmi l’akadiyɛmi mbakaleke minandami.” Nde akatɛkɛtaka dia dui dia ntondo diakokotola oya lo akambo wa mɛtɛ. Woho akɔ waamɛ mbakidiɔ ndo le Anne lakate ate: “Dimi lakakotwama l’ɔtɛ w’ɔlɔlɔ awɔ oleki la wetshelo awɔ.” Akadiyɛso ahende asɔ wekɔ lo ngɛnangɛna mbadia Bible ndo nkana la tɔ yimba, koko akambo w’ɛlɔlɔ wakawaasalɛ mbakaleke monga la shɛngiya ya wolo le wɔ.

Ngande wakokaso nkɛnɛmɔla ɔlɔlɔ wananda etema w’anto wotodingi? Nyɛsɔ tɔsɛdingole toho tohende: La lolemi laso ndo l’etsha aso. Oma laasɔ, tayeya waa na wakokaso salɛ ɔlɔlɔ.

Womoto lele l’akoka lɔtɛkɛtami lo Tokedi tshapita 31 ekɔ la “ɛlɛmbɛ w’ɔlɔlɔ w’otema” lo lolemi lande. (Tok. 31:26) Nde mbetawɔka dia “ɛlɛmbɛ” ɛsɔ nɔmbɔla wondjo ande wa dui ndo ɛtɛkɛta ande. Ambutshi w’apami vɔ lawɔ pombaka monga la “ɛlɛmbɛ” ɛsɔ lo nemi yawɔ. Ambutshi efula mbeyaka di’ɛtɛkɛta w’ehangohango koka monga l’etombelo wa kɔlɔ le ɔnawɔ. Naka ambutshi ntɛkɛta l’ehangohango, kete ondo ɔnawɔ howahokamɛ. Etena katɛkɛta ambutshi lo yoho y’ɔlɔlɔ, dui sɔ koka monga wɔdu le anawɔ dia mbahokamɛ ndo mbakitanyiya.

Oyadi wɛ ekɔ ombutshi kana bu, ngande wakoka ɛtɛkɛta w’amɛna nɔmbɔla lolemi layɛ? Sho tanaka kanyi mɔtshi lo Tokedi 31:26: “Nde ndjiholaka onyɔ ande la lomba.” Dui sɔ nembetshiyaka nsɔna ɛtɛkɛta aso la wondjo aso wa dui la lomba. Sho kokaka ndjambola mbala tshɛ ɔnɛ: ‘Onde kɛnɛ kayangami ntɛkɛta kayomadia anto kana kayotutsha kɛlɛ?’ (Tok. 15:1) Eelo, ekɔ dui dia lomba nkanyiya la ntondo ka ntɛkɛta.

Yokedi kina mbutaka ɔnɛ: “Ɛtɛkɛta w’otondjatondja tohomuyaka oko lokuwa.” (Tok. 12:18) Naka sho nkanyiya shɛngiya yayonga la wondjo aso wa dui ndo ɛtɛkɛta aso le anto akina, kete ondo hatototondja ɛtɛkɛta wakoka mbahomuya. Eelo, nkamba la “ɛlɛmbɛ w’ɔlɔlɔ w’otema” ayotokimanyiya diaha sho ntondja ɛtɛkɛta wa kɔlɔ ndo nkamba la wondjo wa dui wa wolo. (Ɛf. 4:31, 32) Tayɔhɛnya tokanyi ndo ɛtɛkɛta wa kɔlɔ l’ɛtɛkɛta ndo la wondjo wa dui wa dimɛna. Jehowa akasha ɛnyɛlɔ ka dimɛna lo dikambo sɔ etena kakandakeketsha Elidja okambi ande waki la wɔma. Ondjelo waki onyimpala wa Jehowa akatɛkɛta la “dui dia wɔlamu, dia ɔkɔkɛ.” (1 Ku. 19:12) Koko monga ɔlɔlɔ halembetshiya ntondja tsho ɛtɛkɛta w’amɛna. Sho pombaka nto monga l’etsha w’ɛlɔlɔ. Lo ngande?

Sho mbokoyaka Jehovah lo tondjaka ɛtɛkɛta w’amɛna ndo lo monga l’etsha w’ɛlɔlɔ. (Ɛf. 4:32; 5:1, 2) Lisa lakatatɛkɛtshi oma l’etatelo, nembetshiyaka woho wakosalɛ Ɛmɛnyi wa Jehowa ɔlɔlɔ. “Etena kakatatshutshuyama dia monɔ la shashimoya, anangɛso ahende la wadiɛwɔ wakɔshi vakashi dia ndjotokimanyiya la nɔnga diangɔ. L’etena kɛsɔ ko talatatɛ kaanga mbeka Bible!” Etsha w’ɛlɔlɔ ɛsɔ wakatshutshuya Lisa dia nde nsɛdingola dimɛna dimɛna akambo wa mɛtɛ.

Anne lakatatɛkɛtshi l’etatelo, nde lawɔ akonge la lowando lo kɛnɛ kakawosalɛ Ɛmɛnyi wa  Jehowa. Nde mbutaka ate: “Lo menda woho wele andja lo tshɛ kawɔ ɛlɔ kɛnɛ, lakayonga kanga taamu. Akayonga dui dia wolo le mi dia ndjaɛkɛ le anto akina.” Nde tetemalaka mbuta ate: “Etena kakamahomana l’Ɛmɛnyi wa Jehowa, lakavu eyango awɔ tshɔdia. Lakayambola nte: ‘Lande na kayashawɔ le mi?’ Koko ɔlɔlɔ w’ombetsha ami wa Bible akatshutshuya dia dimi ndjaɛkɛ lende.” Naa etombelo w’ɛlɔlɔ wakonge la dui sɔ? “L’ɔkɔngɔ diko, lakayotatɛka mbidja yimba lo kɛnɛ kakamekaka.”

Tolembete dia Lisa nde la Anne wakaleke minandema oma l’etsha wa ngandji w’ase etshumanelo, ndo dui sɔ diakawakimanyiya dia vɔ mbeka akambo wa mɛtɛ. Ɛlɔlɔ wakaasalɛ ase etshumanelo wakawakimanyiya dia vɔ ndjihola etema awɔ.

Le anto amɔtshi, koka monga dui dia wɔdu dia nkamba l’ɛtɛkɛta w’amɛna ndo mɔnamɔna l’ɔtɛ wa woho wakawodiama. Ekɔ dimɛna di’anto amɔtshi tshutshuyama dia monga la loshilambo l’ɔtɛ wa mbekelo yawɔ ndo waonga awɔ wa lotɔ. Koko naka sho tshutshuyama tsho la mbekelo yaso ndo la waonga aso wa lotɔ, kete kɛsɔ mɛnyaka dia ondo hatokoya ɔlɔlɔ wa Nzambi.​—Ɛdika la Etsha 28:2.

 Ɔlɔlɔ waki Nzambi ekɔ dionga dimɔtshi dia l’olowa wa nyuma k’ekila ka Nzambi. (Ngal. 5:22, 23) Kɛsɔ nembetshiyaka ɔnɛ ekɔ ohomba sho monga la nyuma k’ekila ka Nzambi dia tɔ tokimanyiya dia sho salɛ anto ɔlɔlɔ wa mɛtɛ. Dui sɔ mbɔtɔnɛka la nsaki kele laso ka mbokoya Jehowa nde la Yeso. Ndo oko weso Akristo, sho pombaka ndjashaka le anto akina lo yoho ya dimɛna. Diakɔ diele, sho tshutshuyamaka la ngandji kokaso Jehowa ndo asekaso anto. Lo nsala ngasɔ, ɔlɔlɔ aso ndjoyalaka dionga diele la nkudu k’efula dioye oma k’ɛse otema ndo dietawɔma le Nzambi.

Mbeyaka monga dui dia wɔdu dia sho mɛnya ɔlɔlɔ le anto wakatosalɛ ɔlɔlɔ kana anto weyaso. (2 Sa. 2:6) Yoho mɔtshi ele mbaoka losaka. (Kɔl. 3:15) Ko kayotota naka tekɔ lo mɛna di’oko onto ɔmɔtshi hasungana sho mbosalɛ ɔlɔlɔ?

Tɔsɛdingole ɛnyɛlɔ kɛnɛ: Jehowa ekɔ ɛnyɛlɔ koleki tshɛ k’onto lakatosalɛ ɔlɔlɔ waheyama mbɛdika, ndo Ɔtɛkɛta ande wakafundama tetshaka ohomba wa nkɛnɛmɔla dionga sɔ. Etelo k’ɔnɛ “ɔlɔlɔ waheyama mbɛdika” tanemaka mbala efula l’Afundelo w’Akristo wa lo Grɛkɛ. Ngande wakɛnya Nzambi ɔlɔlɔ ande?

Ohokanyiya woho wasalɛ Jehowa miliyɔ y’anto ɔlɔlɔ dia mbasha kɛnɛ kewɔ l’ohomba dia nsɛna. (Mat. 5:45) Lo mɛtɛ, kaanga la ntondo k’anto mbeya Jehowa nde mbaɛnyaka ɔlɔlɔ ande. (Ɛf. 2:4, 5, 8) Ɛnyɛlɔ, nde akasale kɛnɛ koleki ɔlɔlɔ lo nkimɔ Ɔnande ɛtɔi lakandote lo dikambo di’anto tshɛ. Ɔpɔstɔlɔ Pɔɔlɔ akafunde dia Jehowa akatosha oshinga w’etshungwelo “lo ndjela ɔngɔnyi wa ɔlɔlɔ ande waheyama mbɛdika.” (Ɛf. 1:7) Ndo nto, kaanga mbasalaso pɛkato ndo mbanyangiyaso Jehowa, nde tetemalaka tɔlɔmbɔla ndo tetsha. Wetshelo ndo ɛtɛkɛta ande wekɔ oko ‘vulavula ya dimɛna.’ (Eoh. 32:2) Sho mɛtɛ hatokoke mbofuta l’ɔtɛ w’ɔlɔlɔ tshɛ watosalɛnde. Ndo kɛnɛ kele mɛtɛ ele, otondonga Jehowa kotɛnya ɔlɔlɔ ande waheyama mbɛdika, tototonga l’elongamelo ka lo nshi yayaye.​—Ɛdika la 1 Petero 1:13.

Aha la taamu, ɔlɔlɔ wa Jehowa tokotolaka ndo totshutshuyaka dia sho mbookoya. Etombelo wele la dui sɔ ele, lo dihole dia sho nsɔna anto wahombaso salɛ ɔlɔlɔ, sho pombaka nsala la wolo dia mbokoya Jehowa lo salɛka anto ɔlɔlɔ lushi la lushi. (1 Tɛs. 5:15) Naka sho salaka ɔlɔlɔ tena la tena, kete tayonga oko dja yasalanganya demba lushi la tshitshi. Sho keketshaka ase nkumbo kaso, asekaso atɛmɔdi, asekaso wa l’olimu, asekaso wa la kalasa ndo asukanyi aso.

Ohokanyiya ase nkumbo kayɛ kana ase etshumanelo kanyu wayokondja wahɔ oma lo ɛtɛkɛta ndo etsha ayɛ w’ɛlɔlɔ. Mbeyaka monga ko onto ɔmɔtshi l’etshumanelo kanyu ekɔ l’ohomba w’ekimanyielo ka laande dia mbosalɛ elimu wa la ngelo, wa lo jardɛ kana mbosalɛ elimu wasalema lushi la lushi, ɛnyɛlɔ oko mbosombɛ diangɔ. Ndo nto etena kahomanayɛ l’onto ɔmɔtshi lele l’ohomba w’ekimanyielo l’olimu w’esambishelo, onde wɛ hakoke mbosha ekimanyielo kɛmɔtshi ka shikaa?

Lo mbokoya Jehowa, ɛtɛkɛta ndo etsha ayɛ walɔmbwamake mbala tshɛ “l’ɛlɛmbɛ w’ɔlɔlɔ w’otema.”