1. a) Elongamelo kakɔna kakatosha Jehowa? b) Kakɔna kalembetshiya ‘nongamɛ le Jehowa’? (Enda “Elembetshielo w’awui amɔtshi.”)

 JEHOWA akasha wanɛ tshɛ wawoka ngandji elongamelo ka dimɛna efula. Keema edja, nde ayokomiya hemɔ, kandji ndo nyɔi. (Ɛny. 21:3, 4) Nde ayokimanyiya “akanga wa memakana” walongamɛ le nde dia nkadimola nkɛtɛ paradiso. (Os. 37:9-11) Ndo nde ayosala di’onto l’onto l’atei aso monga la diɔtɔnganelo dia dimɛna la nde oleki diɔtɔnganelo diele lam’asaso la nde ɛlɔ kɛnɛ. Ande elongamelo ka diambo lee! Ko kakɔna katokimanyiya dia mbetawɔ di’alaka wa Nzambi wayokotshama mɛtɛ? Jehowa kotshaka nshi tshɛ kɛnɛ katande. Ɔnkɔnɛ, tekɔ l’ɔkɔkɔ w’oshika wa ‘nongamɛ le Jehowa.’ * (Os. 27:14) Sho mɛnyaka dui sɔ lo nkonga la solo dia lotutsha ndo l’ɔngɛnɔngɛnɔ dia Nzambi kaso nkotsha sangwelo diande.​—Isa. 55:10, 11.

2. Kakɔna kamboshilaka Jehowa nsala?

² Jehowa amboshilaka mɛnya dia nde kotshaka alaka ande. Tɔsɛdingole ɛnyɛlɔ kɛmɔtshi ka dimɛna. Lo dibuku di’Ɛnyɛlɔ, Jehowa akalake dia lo nshi yaso nyɛ, nde ayosala di’anto wa lo wedja tshɛ, waoho tshɛ ndo ɛtɛkɛta tshɛ monga kaamɛ, ndo nde ayosala dia vɔ monga kaamɛ l’ɔtɛmwɛlɔ wa pudipudi. Ɛlɔ kɛnɛ, olui w’anto wa laande ɔsɔ mbelamɛka ɔnɛ “olui a woke w’anto.” (Ɛny. 7:9, 10) Kaanga mbokengamiwɔ l’apami, wamato ndo l’ana wele la nkoho y’alemba yotshikitanyi, ɛtɛkɛta ndo anto w’oma l’ahole wotshikitanyi, olui ɔsɔ wele l’anto wotshikitanyi kengaka nkumbo k’onto l’ɔnango ka l’andja w’otondo  kele lo wɔladi ndo kaamɛ. (Os. 133:1; Jni. 10:16) Wanɛ wakenga olui a woke w’anto ɔsɔ sambishaka nto l’ohetoheto. Vɔ mongaka nshi tshɛ suke dia nsambisha onto tshɛ lawahokamɛ elongamelo kawɔ k’andja woleki dimɛna. (Mat. 28:19, 20; Ɛny. 14:6, 7; 22:17) Naka wɛ ekɔ l’atei w’olui a woke w’anto, kete aha la taamu elongamelo k’akambo w’amɛna waanga salema kekɔ la nɛmɔ le yɛ.

3. Oyango akɔna wele la Satana?

³ Diabolo nangaka koshishɛ elongamelo kayɛ. Oyango ande ele dia ketawoya ɔnɛ Jehowa hayakiyanya lo dikambo diayɛ ndo ɔnɛ Nde hokotsha alaka ande. Naka Satana ambotondoya oyango ande wa toshishɛ elongamelo kaso, kete sho koka nshisha dihonga ndo sho koka kaanga ntshika kambɛ Jehowa. Oko wayotodiɛna, Diabolo akasale la wolo dia shishɛ Jɔbɔ elongamelo kande ndo dia nde ntshika kambɛ Jehowa.

4. Kakɔna kayotɔsɛdingola lo sawo nɛ? (Jɔbɔ 1:9-12)

⁴ Lo sawo nɛ, tayɔsɛdingola toho ta mayɛlɛ takakambe la Satana dia ntshutshuya Jɔbɔ dia nde nshisha olowanyi ande. (Adia Jɔbɔ 1:9-12.) Tayɔsɛdingola nto wetshelo wakokaso nkondja oma l’ɛnyɛlɔ ka Jɔbɔ ndo lande na kahombaso mbohɔka ɔnɛ Nzambi tokaka ngandji ndo ayokotsha alaka Ande.

5-6. Kakɔna kakakomɛ Jɔbɔ l’etena ka tshitshɛ keto?

⁵ Jɔbɔ aki la lɔsɛnɔ la dimɛna efula. Nde aki la diɔtɔnganelo dia ma ma la Jehowa. Nde aki la nkumbo ka woke, kaki kaamɛ ndo nde aki l’ɔngɔnyi efula. (Jɔbɔ 1:1-5) Koko Jɔbɔ akashisha suke l’ɛngɔ tshɛ kaki lande lushi ɔtɔi loto. Ntondotondo, nde akashisha nyama yande. (Jɔbɔ 1:13-17) Oma laasɔ, anande tshɛ wakandokaka ngandji efula wakavu. Ohokanyiya lɔkɔnyɔ lakahombe monga la nde l’etena kɛsɔ. Ambutshi mongaka la lɔkɔnyɔ l’efula etena kavushawɔ kaanga ɔnawɔ ɔtɔi. Ko ohokanyiya lɔkɔnyɔ, ɔkɛyi ndo paa kaki la Jɔbɔ nde la wadɛnde lam’akaweye di’anawɔ tshɛ dikumi wambovɔ. Aha la taamu Jɔbɔ akatshatsha ahɔndɔ ande etena kakandalelaka ndo akayakɔsha la nkɛtɛ!​—Jɔbɔ 1:18-20.

⁶ Oma laasɔ, Satana akatatsha Jɔbɔ hemɔ ka wolo efula ndo akoshishɛ kɛnɛmɔ kande. (Jɔbɔ 2:6-8; 7:5) Ntondo ka laasɔ, Jɔbɔ akalɛmiyamaka efula oma le anto wa lo tshunda diande. Anto wakayaka ndjoyanga alako le nde. (Jɔbɔ 31:18) Kakianɛ anto wowewewɔ. Anango, angɛnyi ande wa ma ma ndo kaanga ekambi ande wakayowotona!​—Jɔbɔ 19:13, 14, 16.

7. a) Jɔbɔ aketawɔ dia nde akasowaka l’ɔkɔkɔ akɔna, ko kakɔna kakandatone nsala? b) Ngande wakoka Okristo ndɔshana l’ohemba wafɔna la wɔnɛ wɛnaso l’osato wɔtɔnɛ l’odingɔ ɔnɛ?

⁷ Satana akalange dia Jɔbɔ mbetawɔ ɔnɛ nde akasowaka nɛ dia Jehowa aki hayowetawɔ. Ɛnyɛlɔ, Satana akakambe la lɔpɛpɛ la wolo dia ndanya luudu laki ana wa Jɔbɔ dikumi wakalɛka mbo ya ndɛ kaamɛ. (Jɔbɔ 1:18, 19) Nde akasale nto dia dja mpolɔ oma l’olongo dia yɔ ntshumba aha tsho nyama yaki Jɔbɔ koko ndo ekambi ande wakayilongaka. (Jɔbɔ 1:16) Lam’ele lɔpɛpɛ ndo dja yakaye oma l’olongo, Jɔbɔ akafɔnya ɔnɛ Jehowa Nzambi mbaki lo Kiɔkɔ ya dui sɔ. Ndo etombelo waki la dui sɔ ele, Jɔbɔ aketawɔ dia nde akanyangɛ Jehowa lo yɛdikɔ mɔtshi. Kaanga mbakidiɔ ngasɔ, Jɔbɔ akatone mbidja She lele l’olongo mananu. Jɔbɔ akeyaka dia l’edja k’ɛnɔnyi efula, nde akakondjaka diangɔ di’amɛna efula oma le Jehowa. Diakɔ diele, nde akakane yimba ɔnɛ naka nde aketawɔ ngɛnangɛna la kɛnɛ kele ɔlɔlɔ, kete nde akahombe nto mbetawɔ kɛnɛ kele kɔlɔ. Diakɔ diele  nde akate ate: “Lokombo la Jehowa latetemale tombɔma.” (Jɔbɔ 1:20, 21; 2:10) Kaanga mbakashisha Jɔbɔ falanga yande, anande ndo yoonge yande, nde akatshikala la kɔlamelo le Jehowa. Koko Satana kombotshika.

8. Yoho yakɔna ya mayɛlɛ yakakambe la Satana nto lo dikambo dia Jɔbɔ?

⁸ Satana akakambe la yoho kina ya mayɛlɛ lo dikambo dia Jɔbɔ, nde akatshutshuya angɛnyi asato wa kɔlɔ waki Jɔbɔ dia mbokonya dia nde ndjaɔsa dia nde komonga la nɛmɔ. Apami asato asɔ wakate dia Jɔbɔ akasowaka l’ɔtɛ wakandasale awui wa kɔlɔ efula. (Jɔbɔ 22:5-9) Vɔ wakahembe nto mbeetawoya ɔnɛ oyadi kaanga nde komonga otshi wa kɔlɔ, welo tshɛ wakandadjaka dia ngɛnyangɛnya Nzambi komonga la nɛmɔ. (Jɔbɔ 4:18; 22:2, 3; 25:4) Lo mɛtɛ, vɔ wakasale la wolo dia nkonya Jɔbɔ dia nde mbidja taamu ɔnɛ Nzambi koombokaka ngandji, dia Nde kombokokɛka, ndo ɔnɛ komonga ohomba dia nde mbokambɛ. Ɛtɛkɛta awɔ wakakoke nkonya Jɔbɔ dia mfɔnya ɔnɛ nde komonga l’elongamelo dia dikambo diande diayolowana.

9. Kakɔna kakakimanyiya Jɔbɔ dia monga la dihonga ndo nkeketala?

⁹ Ohokanyiya dui nɛ. Jɔbɔ mbidjasɛ paka l’otoko, etena kende paka la paa. (Jɔbɔ 2:8) Angɛnyi ande wekɔ lo ntetemala mbotɛ dia nde bu onto ɔlɔlɔ ndo wekɔ lo nsala la wolo dia mbolanyɛ lokumu lande. Nde aki l’ehemba wa wolo efula etena kakandadiɛnɛka l’ɔkɛyi l’otema l’ɔtɛ wa nyɔi k’anande. Ntondotondo, Jɔbɔ akatshikala ki. (Jɔbɔ 2:13–3:1) Naka angɛnyi wa Jɔbɔ wakafɔnya dia tshelo yakandatshikala ki yakɛnya dia nde ayɔsɛka Otungi ande, kete vɔ wakayakese. L’etena kɛmɔtshi, ondo Jɔbɔ akonyiya ɔtɛ ande ndo akende angɛnyi ande wa kɔlɔ tɛɛ ko akawatɛ ate: “Polo lam’ayomovɔ, dimi hantotshika olowanyi ami!” (Jɔbɔ 27:5) Kakɔna kakakimanyiya Jɔbɔ dia monga la dihonga dia ngasɔ  ndo nkeketala kaanga l’atei w’asui asɔ tshɛ? Kaanga l’etena kakandayɔkɔmɔ, nde koshisha elongamelo pondjo ɔnɛ Nzambi kande ka ngandji ayowokimanyiya. Nde akeyaka ɔnɛ kaanga naka nde mvɔ, Jehowa ayowolola.​—Jɔbɔ 14:13-15.

10. Kakɔna katetsha ɔkɔndɔ wendana la Jɔbɔ?

¹⁰ Ɔkɔndɔ wendana la Jɔbɔ tetshaka dia Satana hakoke totshutshuya la wolo dia sho nsɛka Jehowa ndo ɔnɛ Jehowa mbeyaka oseka dui tshɛ. Kɛnɛ kakakomɛ Jɔbɔ koka tokimanyiya nto dia sho nshihodia dimɛna awui wendana la dikambo sɔ. Tɔsɛdingole wetshelo ɛmɔtshi shikaa wakokaso nkondja oma le Jɔbɔ.

11. Eshikikelo kakɔna kakokaso monga la tɔ naka sho ntetemala ndjaɛkɛ le Jehowa? (Jakɔba 4:7)

¹¹ Jɔbɔ akɛnya dia naka sho ntetemala ndjaɛkɛ le Jehowa, kete sho koka mbikikɛ oseka ohemba tshɛ ndo ntondoya dimɛna dia ndɔshana la Satana. Etombelo akɔna wayonga la dui sɔ? Afundelo toshikikɛka ɔnɛ Diabolo ayotolawɔ.​—Adia Jakɔba 4:7.

12. Ngande wakakeketsha elongamelo ka eolwelo Jɔbɔ?

¹² Sho pombaka monga la mbetawɔ ka wolo lo elongamelo ka eolwelo. Oko wakadiatɛkɛtama lo sawo dietshi, mbala efula Satana kambaka la wɔma wa nyɔi dia tokonya dia sho ntshika olowanyi aso. Lo dikambo dia Jɔbɔ, Satana akate dia Jɔbɔ ayosala kɛnɛ tshɛ kakokande nsala, oyadi ntshika olowanya ande l’oyango wa nshimbɛ lɔsɛnɔ lande. Satana akate kashi. Kaanga l’etena ka paa kakayɛna Jɔbɔ dia nde aya suke la mvɔ, nde koshisha olowanyi ande. Wɛkamu waki la nde lo ɔlɔlɔ wa Jehowa ndo elongamelo ka wolo kaki la nde ɔnɛ Jehowa ayosembola akambo, akokimanyiya dia mbikikɛ. Jɔbɔ aki la mbetawɔ ɔnɛ oyadi kaanga Jehowa hasembodi akambo etena kakinde la lɔsɛnɔ, Nde ayoyowolola lo nshi yayaye. Elongamelo ka eolwelo kaki dui dia mɛtɛ le Jɔbɔ. Naka elongamelo kɛsɔ monga dui dia mɛtɛ le so, kete kaanga nyɔi hatotokonya dia sho nshisha olowanyi aso.

13. Lande na kahombaso monga la yambalo y’efula lo toho ta mayɛlɛ takakambe la Satana lo dikambo dia Jɔbɔ?

¹³ Sho pombaka monga la yambalo y’efula lo toho ta mayɛlɛ takakambe la Satana lo dikambo dia Jɔbɔ nɛ dia Satana kambaka la toho takɔ taamɛ le so ɛlɔ kɛnɛ. Tolembete dia Satana akate ɔnɛ: “Onto [koko aha Jɔbɔ oto] ayokimɔ kɛnɛ tshɛ kele la nde dikambo dia lɔsɛnɔ lande.” (Jɔbɔ 2:4, 5) Lo mɛtɛ, Satana mbutaka ɔnɛ sho hatolange mɛtɛ Jehowa Nzambi ndo ɔnɛ tayowɔsɛka naka dui sɔ diayoshimbɛ lɔsɛnɔ laso. Satana mbutaka nto ɔnɛ Nzambi hatolange ndo Nde hadje yimba lo welo wadjaso dia mbɔngɛnyangɛnya. Koko, lam’ele tekɔ lo mbeya toho ta mayɛlɛ takamba la Satana, sho wanɛ walongamɛ le Jehowa hatokesama.

14. Kakɔna kakoka ehemba mɛnya le so? Sha ɛnyɛlɔ.

¹⁴ Sho pombaka mbɔsa ehemba oko diaaso dia sho nkondja wetshelo lo dikambo diaso. Ehemba wakakomɛ Jɔbɔ wakokimanyiya dia nshihodia wɛɔdu ɛmɔtshi waki la nde ndo ndjalowanya. Ɛnyɛlɔ, nde akakondja wetshelo dia nde akahombe nyomonga l’okitshakitsha. (Jɔbɔ 42:3) Ndo sho lawɔ koka nkondja wetshelo lo dikambo diaso etena keso la ohemba. Ɔnangɛso lelɛwɔ Nikolay, * lakadjama lo lokanu kaanga mbakandadiɛnɛka l’ekakatanu wa wolo wendana la yoonge mbutaka ate: “Lokanu lekɔ oko rayon-X, wɛnya waonga w’Okristo wa l’etei.” Etena kashihodiaso wɛɔdu aso, sho koka nsala la wolo dia ndjalowanya.

15. Onto akɔna ahombaso mpokamɛ, ndo lande na?

 ¹⁵ Sho pombaka mpokamɛ Jehowa, koko aha atunyi aso. Jɔbɔ akadje yambalo y’efula etena kakasawolaka Jehowa la nde. Nzambi akakane la Jɔbɔ yimba ndo ekɔ oko nde akawotɛka ɔnɛ: ‘Onde wɛ ekɔ lo mɛna wolo ami w’etongelo? Dimi mbeyaka dui tshɛ diakokomɛ. Onde wɛ fɔnyaka dia dimi hayakiyanya lo dikambo diayɛ?’ L’okitshakitsha tshɛ Jɔbɔ akonge la lowando l’efula lo ɔlɔlɔ wa Jehowa. Nde akate ate: “Atoyi ami wakoke awui wendana la yɛ, koko kakianɛ dimi lambokɛna la washo ami.” (Jɔbɔ 42:5) Ondo Jɔbɔ aki mbidjasɛ paka l’otoko, demba diande diaki la mpota y’atshutshu ndo nde aki paka la lɔkɔnyɔ l’ɔtɛ wa nyɔi k’anande etena kakandate ɛtɛkɛta ɛsɔ. Kaanga mbakidiɔ ngasɔ, Jehowa akashikikɛ Jɔbɔ dia Nde akawokaka ngandji ndo akooshikikɛ dia Nde akawetawɔka.​—Jɔbɔ 42:7, 8.

16. Lo ndjela Isaya 49:15, 16, kakɔna kahombaso mbohɔka etena keso la ntondo k’ehemba?

¹⁶ Ɛlɔ kɛnɛ nto, anto mbeyaka tɔtɛnga ndo tosalɛ akambo oko anto w’anyanya. Vɔ mbeyaka mpemba tolanyɛ lokumu laso oko anto kana oko okongamelo ndo “[t]omamatanyiyɛ weho tshɛ w’akambo wa kɔlɔ.” (Mat. 5:11) Oma l’ɔkɔndɔ wa Jɔbɔ, tambokondja wetshelo dia Jehowa mbetawɔka dia tayotshikala la kɔlamelo le nde kaanga etena keso l’ehemba. Jehowa tokaka ngandji ndo nde hasɛkaki pondjo wanɛ walongamɛ le nde. (Adia Isaya 49:15, 16.) Tatodjake yimba l’awui wata atunyi waki Nzambi! James, ɔnangɛso ɔmɔtshi lele la Turquie lele nkumbo kande kakadiɛnɛ l’ehemba wa wolo mbutaka ate: “Takashihodia ɔnɛ  mpokamɛ awui wa kashi wendana l’ekambi wa Nzambi tɔkɔmɔlaka. Diakɔ diele, takadje yimba l’elongamelo kaso ka Diolelo ndo takatshikala la kɔlamelo lo olimu wakambɛso Jehowa. Etombelo waki la dui sɔ ele takatetemala monga l’ɔngɛnɔngɛnɔ.” L’ɛnyɛlɔ ka Jɔbɔ, tohokame Jehowa! Kashi yata atunyi aso hayohombe tolanyɛ elongamelo kaso.

17. Wetshelo akɔna wakondjayɛ oma l’ɛnyɛlɔ k’apami la wamato waki la kɔlamelo wɔtɛkɛtami lo Hɛbɛru tshapita 11?

¹⁷ Jɔbɔ ekɔ ɛnyɛlɔ ɔtɔi keto k’ekambi wa Jehowa wakatetemala monga la dihonga ndo wakakeketala etena kakiwɔ l’ehemba wa wolo. Lo mukanda ande wakandafundɛ ase Hɛbɛru, ɔpɔstɔlɔ Pɔɔlɔ akatɛkɛta dikambo di’anto akina efula lo mbaelɛ ɔnɛ “olui a woke w’ɛmɛnyi.” (Hɛb. 12:1) Vɔ tshɛ wakadiɛnɛ l’ehemba wa wolo, koko vɔ wakatshikala la kɔlamelo le Jehowa l’edja ka lɔsɛnɔ lawɔ. (Hɛb. 11:36-40) Onde ekikelo kawɔ ndo olimu awɔ wa wolo waki anyanya? Ndooko kaanga yema! Kaanga mbakiwɔ kɔmɛna ekotshamelo k’alaka wa Nzambi etena kakiwɔ la lɔsɛnɔ, vɔ wakatetemala nongamɛ le Jehowa. Ndo lam’ele vɔ waki l’eshikikelo dia vɔ waketawɔmaka le Jehowa, vɔ waketawɔ dia wayɛna ekotshamelo k’alaka asɔ. (Hɛb. 11:4, 5) Ɛnyɛlɔ kawɔ koka nkeketsha yɛdikɔ yaso ya ntetemala nongamɛ le Jehowa.

18. Kakɔna kamboyoyashikikɛ dia nsala? (Hɛbɛru 11:6)

¹⁸ Ɛlɔ kɛnɛ tekɔ lo nsɛna l’andja wataleke ntshɔ otsha lo kɔlɔ. (2 Tim. 3:13) Satana hatshike mbidja ekambi wa Nzambi l’ehemba. Oyadi ekakatanu akɔna watokonga la ntondo, nyɛsɔ toyashikikɛ dia nkamba olimu wa wolo lo dikambo dia Jehowa, tele l’eshikikelo ɔnɛ “takakitsha elongamelo kaso le Nzambi kasɛna.” (1 Tim. 4:10) Tohɔ dia kɛnɛ kakayokondja Jɔbɔ oma le Jehowa mɛnyaka “dia Jehowa ekɔ la ngandji k’efula ndo la kɛtshi.” (Jak. 5:11) Nyɛsɔ ndo sho lawɔ totetemale monga la kɔlamelo le Jehowa, tele l’eshikikelo dia Nde ayofuta “wanɛ wooyanga l’otema ɔtɔi.”​—Adia Hɛbɛru 11:6.